மின்சாரம்

மின்சாரம்

கழகத்தின் பாசறையாம் தந்தை பெரியார் அவர் களின் பாடி வீடான தஞ்சையம்பதியிலே வரும் 23, 24 (சனி, ஞாயிறு) ஆகிய நாள்களில் முறையே திராவிடர் கழக மாநில மாநாடு - சமூகநீதி மாநாடுகள் தக்கதோர் தருணத்தில் சகல வகையான சிறப்பு மலர்கள் பூத்துக்குலுங்கும் - மணம் வீசும் மாநாடுகள் நடைபெற உள்ளன.

எத்தனை எத்தனையோ மாநாடுகளை நடத்தி தஞ்சைத் தன் முடியில் வாகை மலர்களைச் சூட்டிக் கொண்டுள்ளது.

தஞ்சை மாவட்டம்பற்றி தந்தை பெரியாரின் கணிப்பு என்ன?

‘‘எங்கும் இயக்கத் தோழர்கள் இருந்தாலும், என்னுடைய முயற்சிக்கும், போக்குக்கும் தஞ்சை முதன்மையானதாக உள்ளது. திராவிடர் கழகமாக ஆன பிறகு மாத்திரமல்ல, நான் காங்கிரசில் இருந்த காலத்திலும், தஞ்சை பெருமளவில் ஆதரவு அளித்துள்ளது. சுயமரியாதை இயக்கம் ஆரம்பித்த காலத்திலும், நடத்திய காலத்திலும் தஞ்சைதான் ஆதரவு அளித்துள்ளது. எதைச் சொல்கிறேனோ, எதை எதிர்பார்க்கிறேனோ, அதைத் தமிழ்நாடு முழுவதும் பகுதி செய்கிறது என்றால், தஞ்சை மாத்திரம் பகுதிக்குக் குறையாமல் செய்யும்.''

இந்த வரலாற்றுப் புகழாரத்தை தஞ்சைக்கு எந்த மாநாட்டில்  தந்தை பெரியார் சூட்டினார் தெரியுமா?

ஜாதியைப் பாதுகாக்கும் இந்திய அரசமைப்புச் சட்டத்தின் பகுதியைக் கொளுத்தும் - உலகமே கண்டு அறியாத, கேட்டறியாத போராட்டத்தை தந்தை பெரியார் ஆயிரம் ஆயிரம் கரங்கள் உயர, கோடை இடியென முழக்கமிட்ட தஞ்சை ஜாதி ஒழிப்பு தனி (ஸ்பெஷல்) மாநாட்டில்தான் இந்தப் புகழாரத்தைச் சூட்டினார் - தஞ்சையின் உச்சி மோந்தார் (3.11.1957) உலகத் தலைவர் பெரியார்.

அந்த மாநாட்டில் அறிவிக்கப்பட்ட போராட்டம் இயக்க வரலாற்றில் மட்டுமல்ல, எந்த நாட்டிலும் நடந்திராத புரட்சிப் போராட்டம்!

‘‘ஜாதி இருக்கும் நாட்டில் சுதந்திரம் இருக்குமா? சுதந்திரம் இருக்கும் நாட்டில் ஜாதி இருக்கலாமா?'' என்ற பொருள் பொதிந்த, உச்சிமுடியைப் பிடித்துக் குலுக்கும் வினாவை அந்த மாநாட்டில்தானே தந்தை பெரியார் எழுப்பினார்.

சட்டத்தை எரித்தால் என்ன தண்டனை என்று சட்டத்திலேயே இடம்பெறாத ஒரு மாபெரும் போராட்டத்தையல்லவா தந்தை பெரியார் அறிவித்தார்.

அவசர அவசரமாக தமிழ்நாடு சட்டப்பேரவையில் தேசியக் கவுரவ  சின்னங்களை எரித்தால், அவமதித்தால் மூன்றாண்டு தண்டனை என்று சட்டம் செய்யப்பட்டது.(Prevention of Insult to National Honour-1957)

இந்த அவசர சட்டம் கண்டு அஞ்சப் போகிறீர்களா கருஞ்சட்டையினரே - 30 ஆண்டுகள் தண்டனை என்றாலும், சட்ட எரிப்புப் போராட்டம் நடக்கும் என்று அறிவித்த அரிமா அல்லவா அய்யா பெரியார்.

10 ஆயிரம் கருஞ்சட்டையினர் குடும்பம் குடும்பமாக கொளுத்தி சாம்பலை அனுப்பி வைத்தார்களே - அந்த வரலாற்று மணி முடியைச் சூடிய அதே தஞ்சையில்தான் இப்பொழுது இருபெரும் மாநாடுகள்.

1957 நவம்பர் 3 அன்று தஞ்சையிலே நடைபெற்றதே அந்த ஜாதி ஒழிப்பு மாநாட்டில் எடைக்கு எடை வெள்ளி ரூபாய் நாணயங்கள் - நாணயத்தின் நாயகரான தந்தை பெரியாருக்கு அளிக்கப்பட்டதே - அந்த விழா மாநாட்டுக்கு ‘‘ஈரோட்டுப் பாசறைக்கு வாரீர்!'' எனும் தலைப்பில், ‘விடுதலை'யில் எழுதியவர் யார் தெரியுமா?

அன்றைய கடலூர் மாணவர் - சட்டக் கல்லூரி மாணவர் மானமிகு வீரமணி அவர்கள்தான்.

என்ன எழுதினார்?

‘‘இதுவரை எந்தத் தலைவருக்கும் நடந்திராத சிறப்பு நடைபெறுகிறது. இதுவரை எந்தத் தலைவரும் கூறாத கருத்துகளை கூறியவர் - கூறுபவர் தந்தை பெரியார் அவர்கள்தானே - அதனால்தான் ஈரோட்டுப் பாசறைக்கு அழைப்பதாக'' நமது ஆசிரியர் அன்றே அழைப்புக் கொடுத்தார்.

அந்த மாணவர் வீரமணி, மாபெரும் சமூகப் புரட்சி இயக்கத்தின் தன்னிகரற்ற தலைவராக, தமிழர் தலைவராக, தமிழ்நாட்டை வழிநடத்தும் தலைவராக - உலகம் முழுவதும் நிறைந்த பகுத்தறிவாளர்கள் மதிக்கும் மானமிகு தலைவராக ஒளிரும் ஆசிரியர் கி.வீரமணி அவர்கள்தான் வரும் சனி, ஞாயிறு மாநாடுகளுக்கு அழைக்கிறார்! அழைக்கிறார்!! அழைக்கிறார்!!!

தோழர்களே வாருங்கள்!

குடும்பம் குடும்பமாக வாருங்கள்!!

குழந்தைச் செல்வங்களோடு வாருங்கள்!!!

உற்றார் உறவினரோடு வாருங்கள்!

நண்பர் குழாமுடன் வாருங்கள்!

இடையில் மூன்று நாள்கள்தான். நிதி வசூல் - உங்களுடைய இலக்கினை முடித்து விட்டீர்களா தோழர்களே!

நிதியுடன் வாரீர்! நீதி கேட்கும் மாநாடாயிற்றே!

அருமைத் தமிழ்க் குலத்தீர்! தஞ்சை மாநகரில் வரும் 23, 24 சனி, ஞாயிறு இருநாட்களில் திராவிடர் கழகத்தின் மாநில மாநாடும், சமுக நீதி மாநாடும் நடக்க இருக்கின்றன.

தஞ்சையில் திராவிடர் கழக மாநாடு என்றால் அதற் கென்று   தனித்த முத்திரை உண்டு - உண்டு.

எத்தனையோ திருப்பங்களைத் தந்த தித்திக்கும் ஏடுகளைக் கொண்ட எத்தனை மாநாடுகள் ஆங்கே! ஆங்கே!

அரிமா நோக்கோடு பார்த்தால் நமக்கே திகைப்பாக இருக்கிறது. அடேயப்பா! இத்தனை இத்தனை மாநாடுகளா ஒரே  ஊரில்? என்று எண்ணிப் பார்க்கும்பொழுது நமது உடலை நாமே கிள்ளிப்பார்க்க வேண்டியுள்ளது.

இதோ ஒரு பட்டியல்:

1927 முதல் 2018 வரை தஞ்சையில் நடைபெற்ற மாநாடுகள்

1. தஞ்சை ஜில்லா பார்ப்பனரல்லாதார் 6ஆவது மகாநாடு - 08.05.1927

2. தஞ்சை சுயமரியாதை வாலிபர்கள் மகாநாடு (பார்ஃஅல்) -26.02.1928

3. தஞ்சை சுயமரியாதை மகாநாடு - 24, 25-05-1931

4. தஞ்சை - சென்னை மாகாண பார்ப்பனரல்லாதார் மகாநாடு - 8, 9-10-1932

5. தஞ்சை ஜில்லா 4ஆவது சுயமரியாதை மகாநாடு - 19, 20-01-1935

6. தஞ்சை 5ஆவது சுயமரியாதை மகாநாடு - 21, 22-031936

7. தஞ்சை ஜில்லா 6ஆவது சுயமரியாதை மகாநாடு 19-02-1938

8. தஞ்சை திராவிடர் வாலிபர் மகாநாடு - 11-07-1944

9. தஞ்சை திராவிடர் மாணவர் மகாநாடு 24-09-1944

10. தஞ்சை மாவட்ட திராவிடர் மகாநாடு 18-05-1946

11. தஞ்சை திராவிடர் கழக (ஸ்பெஷல்) மாநாடு, (அரண்மனைத்திடலில் எடைக்கு எடை வெள்ளி நாணயம் வழங்கும் விழா) - 2.11.1957

12. தஞ்சாவூரில் திராவிடர் கழக மாநாடு - 3.12.1966

13. தஞ்சாவூரில் சமதர்ம மாநாடு - 4.12.1966

14. தஞ்சை மாவட்ட பகுத்தறிவாளர் மாநாடு - 15.05.1971

15.தஞ்சை மாவட்ட திராவிடர் கழக மாநாடு - 16.05.1971

16. தமிழர் தலைவருக்கு புதுக்கார் பரிசளிப்பு விழா - 19.8.1973

17. சுயமரியாதை இயக்க பொன்விழா - 22.01.1976

18. தஞ்சை மாவட்ட நிர்வாண சாமியார்கள் ஓட்டம் (தோழர்களின் ஏற்பாடு) -12.04.1977

19. தந்தை பெரியார் நூற்றாண்டு விழா - 16, 17.09.1979

20. தஞ்சை மாவட்டத்தில் நடைபெற்ற அனைத்து சாதியினரும் அர்ச்சகராக அரசு ஆணை கோரி போராட்ட விளக்க மாநாடு - 14.08.1982

21. தஞ்சை மாவட்ட திராவிடர் விவசாய தொழிலாளர் மாநாடு - 25.07.1983

22.தஞ்சை மாவட்ட திராவிடர் விவசாய தொழிலாளர் மாநாடு - 15.05.1984

23. தஞ்சை மாவட்ட திராவிடர் விவசாய தொழிலாளர் மாநாடு - 15.05.1986

24. தஞ்சை மாவட்ட குடியரசுத் தலைவர் பங்கேற் சமூக நீதி மாநாடு - 24, 25.05.1987

25. தஞ்சை மாவட்ட திராவிடர் கழக மாநில மாநாடு - 25.05.1990

26. தஞ்சை மாவட்ட சமூக நீதி மாநாடு - 26.05.1990

27. தஞ்சை மாவட்ட ஜாதி ஒழிப்பு மாநாடு - 20.02.1995

28. தஞ்சை மாவட்ட மனிதநேய மாநாடு மற்றும் தமிழர் தலைவருக்கு எடைக்கு எடைத் தங்கம் வழங்கும் விழா - 01.02.1998

29. தஞ்சை மாவட்ட மாநில மாநாடு - 23.04.1999

30. தஞ்சை மாவட்ட திராவிடர் கழக வழக்குரை ஞர்கள் மாநாடு - 07.04.2001

31. தஞ்சை மாவட்ட கழக இளைஞரணி மண்டல மாநாடு - 30.12.2002

32. தஞ்சை மாவட்ட தேசிய குழந்தைகள் அறிவியல் மாநாடு - 27.11.2003

33. உலக நாத்திகர் மாநாடு (ஒரு பகுதி) 8.01.2011

34. தஞ்சை மாவட்ட திராவிடர் கழக இளைஞரணி மாநாடு - 05.03.2011

35. தஞ்சை மாவட்ட அன்னை மணியம்மையார் பிறந்தநாள் விழா பெண்கள் மாநாடு - 10.03.2012

36. தஞ்சை மாவட்ட திராவிடர் கழக இளைஞர் எழுச்சி மாநாடு - 29.05.2018

சுயமரியாதை இயக்கக் காலந்தொட்டு எண்ணரும் மாநாடுகள். இன்னும் சொல்லப்போனால் காங்கிரசில் இருந்தபோதே இதே தஞ்சையில் 1921ஆம் ஆண்டில் வகுப்புவாரி உரிமை தீர்மானத்தை முன்மொழிந்தார்  தந்தை பெரியார். தந்தை பெரியாரின் 'அருமை நண்பர்' சக்ரவர்த்தி ராஜகோ பாலாச்சாரியார்.

“நாயக்கரே, இதைக் கொள்கை அளவில் ஏற்றுக் கொள்வோம் - தீர்மான ரூபமாக இப்போது வேண் டாம்“ என்று கேட்டுக் கொண்டதற்கு இணங்க தந்தை பெரியார் வற்புறுத்தவில்லை.

தஞ்சையைத் தொடர்ந்து ஒவ்வொரு காங்கிரசு மாநாட் டிலும் அத்தீர்மானத்தை வலியுறுத்திய போதெல்லாம் ஏதோ சாக்குபோக்குகளைச் சொல்லி தந்திரமாக அத் தீர்மானம் நிறைவேறாமல் தள்ளிப் போட்டே வந்தனர். கடைசியில் காஞ்சியில் தான் (1925) இந்தப் பார்ப்பனர்களை நம்பிப் பயனில்லை - ஒரு கை பார்ப்பது என்று தந்தை பெரியார் முடிவெடுத்து, துண்டை உதறித் தோளில் போட்டுக் கொண்டு வெளியேறிய வீர தீர வரலாறு எல்லாம் சாதாரணமானதா!

அன்று 50 சதவிகித இடஒதுக்கீட்டுக்குத் தடை விதித்த தர்ப்பைப்புல் கும்பல் இன்று 10 சதவிகிதத்திற்கு தள்ளாடிக் கொண்டு நிற்கிறது!

அரும்பாடுபட்டு அய்யாவின் தலைமையில் மேற் கொள்ளப்பட்ட முயற்சியின் காரணமாக தமிழ்நாட்டில்

69 சதவிகித இடஒதுக்கீட்டினை சட்டப்படியாக அனுப வித்துக் கொண்டுள்ளோம்.

ஆனாலும் அவ்வப்பொழுதும் ஆரியப்பாம்பு சமூக நீதியின் கழுத்துப் பக்கம் கடித்துக் குருதி குடித்துக் கொண்டுதான் வருகிறது.

உயர்ஜாதிக்காரர்களுக்கு பொருளாதார அடிப்படையில் 10 சதவிகித இடஒதுக்கீடு என்பது தந்திரமாக ஒட்டகம் உள்ளே நுழையும் கதைதான்.

இதற்கெல்லாம் சரியாக சூடு போட்டுக் கொழுக் கட்டையாக வீங்க வைக்கும் மண் தஞ்சை தரணி தானே!

தலைவர்கள் எல்லாம் திரண்டு வருகிறார்கள். தஞ்சை மாநாட்டைத் தரணி வியக்கச் செய்ய கழகப் பொறுப் பாளர்கள், தோழர்கள், கருஞ்சட்டைப் போர் குணத் தீரர்கள் வரிந்து கட்டிக் கொண்டு ஓயாப் பணியில் மூழ்கிக் கிடக்கிறார்கள்.

அனைத்து மாவட்டங்களிலும்  கழகப் பொறுப் பாளர்கள் சுவரெழுத்துப் பணிகள், விளம்பரப் பணிகள், வசூல் பணிகளில் பம்பரமாகச் சுழன்று சுழன்று பணியாற்றிக் கொண்டுள்ளார்கள்.

வெளியூர்களில் இருந்து குடும்பம் குடும்பமாக வரும் தோழர்கள் தங்குவதற்கான மண்டபங்களை யெல்லாம் ஏற்பாடு செய்து விட்டனர்.

மாநாடு நடக்கும் காலப்பொழுதின் தட்பவெப்பமும் சிறப்பானதே! தேர்வுகள் இல்லை; தேர்தல் வேண்டு மானால் நெருங்கலாம். தேவையான மாநாடுகள் தேவை யான பருவத்தில் நடைபெற உள்ளன.

வாரீர்! வாரீர்!

குடும்பம் குடும்பமாக வாரீர்!

உங்கள் உறவினரோடு வாரீர்!

சுற்றம் சூழ வாரீர்!

சூத்திரப் பட்டம் ஒழிய, பஞ்சமப் பட்டம் பஞ்சாய்ப் பறக்க, பெண்ணடிமைத்தனம் அடிபட்டுக் கீழே சாய, சமதர்ம - சமத்துவ - சமுக நீதி சங்கெடுத்து ஊதுவோம் வாரீர்! வாரீர்!!

தமிழர் தலைவர் அழைக்கிறார்! அழைக்கிறார்!!

ஒரு போராட்டத்தில் ஈடுபட்டவர்கள் கைது செய்யப்பட்டு ஒரு திருமண மண்டபத்தில் வைக்கப்படுகின்றனர்.

முற்பகல் 11.30 மணி முதல் மாலை 6.30 மணி வரை 7 மணி நேரம் வைக்கப்படுகின்றனர். அந்த நேரத்தைக்கூட பயனுள்ள வகையில் கொள்கைப் பாசறையாக மாற்றி, கழகக் கொள்கைகளையும், இலட்சியங்களையும், இயக்கத்தால் ஈர்க்கப்பட்ட காரணாதிகளையும், இருபால் தொண்டர்கள் இயல்பாகப் பேசுவதும், அதைக் கழகத்தின் தலைவர் ஏழு மணி நேரம் அமர்ந்து செவிமடுப்பதும் திராவிடர் கழகத்தைத் தவிர வேறு எங்கும் காண முடியாத உலக அதிசய காட்சி என்பதில் எள்ளளவு முனையும் அய்யமில்லை. இதற்கு என்ன காரணம் - பதவி, அரசியல், பக்கம் கால்களையும், கண்களையும் தாவவிடாமல் இலட்சிய நோக்கு ஒன்றையே குறிக்கோளாய்க் கொண்டதாகும். அந்த இலட்சிய கர்த்தாவின் கருத்துகளையே சுவாசித்து வாழ்வியல் நடப்பாகக் கொண்டிருப்பது தான் இதற்குக் காரணமாகும். பெரியார் ஒரு வாழ்வியல் சிந்தனை, வாழ்க்கை முறையல்லவா! இன்னும் சிலரின் உரைகளைக் கேட்பீர்!

சி.மெர்சி ஆஞ்சலா மேரி

குடும்பத்தலைவர் ஆசிரியர் உட்பட அனைவருக்கும் வணக்கம்.

என் பெயர் சி.மெர்சி ஆஞ்சலா மேரி. இல்லாத முருகனுக்கு ஆறு வீடுகள். அதுல ஒரு வீடு பழநி. அந்தப் பழநி கழக மாவட்டத்தில் இருந்து ஆவடி மாவட்டத்திற்கு வந்துள்ளோம். எனக்கு மூன்று பெண் குழந்தைகள். மூத்த மகளுக்கு திருமணம் முடிந்துவிட்டது. அடுத்த மகள் L.L.B. படித்துக் கொண்டிருக்கிறாள். எங்களுக்கு திருமணம் 1989இல் ஜாதி மறுப்பு, கடவுள் மறுப்புடன் கூடிய காதல் திருமணம். திருமணம் என்று கூடசொல்ல முடியாது. ஏனென்றால் இயக்கத் தோழர்கள் நான்கு பேர் முன்னிலையில் உறுதிமொழி எடுத்துகொண்டு மனமொத்த வாழ்க்கையைத் தொடங்கினோம்.

எனது வாழ்விணையர் பெரியார் கொள்கையை ஏற்றுக்கொண்டு இயக்கப் பணி ஆற்றக்காரணம் அமைப்பு செயலாளர்அண்ணன் பன்னீர்செல்வம் அவர்களே. எனது வாழ்விணையர் மிகவும் தைரியசாலி. பெரியாரையும், அவரின் கொள்கைகளையும், தமிழர் தலைவர் அவர்களையும் யாராவது விமர்சனம் செய்து விட்டால் அவர்கள் உயிருடன் செல்வார்களா  என்பது நிச்சயமல்ல. அது வன்முறைதான். சரியல்லதான். இருந்தாலும் பெரியாரின் மீதும் கொள்கையின் மீதும் அளவில்லா பற்றுக் கொண்டவர்.

எங்களது வாழ்க்கை ஆரம்பித்த பின்பும் கூடபெரியார் படிப்பகத்தில் இரவு 2 மணி வரை இருந்துவிட்டு தான் வருவார். ஒரு நூற்பாலையில் வேலை செய்து கொண்டிருந்தார். நான் தொடக்கப்பள்ளியில் ஆசிரியராக பணிபுரிந்து சென்ற ஆண்டில் பணி நிறைவு பெற்றேன். நான் பணியாற்றியதால் பொருளாதாரத்திற்கு குடும்பத்தில் ஒருவர் பணியாற்றினால் போதும் எனக்கூறி இல்வாழ்க்கையை ஆரம்பித்த சில மாதங்களிலேயே பணிக்கு செல்வதை நிறுத்திவிட்டார். இயக்கப் பணி மட்டுமே அவரது குறிக்கோளாக இருந்தது. நான் கிறித்துவ குடும்பத்தில் பிறந்தவள். மிகவும் பக்தியோடு எப்போதும் துதித்துக் (Prayer) கொண்டிருப்பேன். இப்போது நினைத்தாலும் எனக்கு அந்த நாட்கள் கேவலமாகவும் அருவருப்பாகவும் உள்ளன. நான் சார்ந்திருந்த ஆசிரியர் இயக்கம் கம்யூனிச சித்தாந்தமுடையது. நான் கம்யூனிச சிந்தனையில் இருந்தாலும் எனது வாழ்விணையர் என்னை திராவிடர் கழகத்தில் சேர வற்புறுத்தியதில்லை. படித்தவர்கள் பட்டறிவு பெற்று திருந்தட்டும் என்று விட்டு விடுவார்.

ஆனாலும் நான் பணியாற்றிய பள்ளியில் மாணவர்களுக்கிடையே அறிவியலையும் மூடநம்பிக்கை யையும் இணைத்தே பாடம் நடத்துவேன். இன்றும் கூட என்னைச் சந்திக்கும் மாணவர்கள் நீங்க கூறிய வடக்கே ஏன் தலை வைத்துப் படுக்க கூடாது என்ற கருத்தைமறக்க முடியாது என்று கூறுவார்கள். பழநியில் ஆர்.எப். ரோடு என்பதே தி.க பெல்ட்  என்று கூறுவார்கள். அன்றைய காலத்தில் கூட்டத்தில் சிறு வயது தம்பிகள் துண்டு விரித்து வசூல் செய்வார்கள். எனது வாழ்விணையர் 2010இல் மறைந்து விட்டார். மருத்துவமனையில் இருந்தபோதே தனக்கு கருப்பு சட்டை போட்டு - எவ்வித மூட சடங்குகளும் செய்யக் கூடாது என எனது மகள்களிடம் கூறியிருந்தார். எனது இளைய மகள் 10ஆம் வகுப்பு படித்துக் கொண்டிருந்தார். எனது வாழ்விணையரின்  உறவினர்கள் இந்து மத நம்பிக்கை உடையவர்கள். தேங்காய்ப் பழத்துடன் சடங்கு செய்ய வற்புறுத்தியபோது அதை செய்யக்கூடாது என எனது மகள் உறுதியுடன் நின்றாள். எவ்வித சடங்கு சம்பிரதாயங்களுமின்றி அவரது உடல் எரியூட்டப்பட்டது. அந்த நேரத்தில் எங்களை விட்டுச் சென்றவர்கள் இன்றுவரை எங்களோடு எந்தத் தொடர்பும் இல்லை. எனது மகள் இரத்த உறவுகள் தேவையில்லை கொள்கை  உறவுகளே போதும் என அன்று கூறியது போல் இன்றுவரை எங்களுக்கு கொள்கை உறவுகள் மட்டுமே சொந்தம். பழநியில் இயக்கப் பணி தற்போது ஆற்ற முடியவில்லை என்றாலும், ஆவடி பகுதியில் எங்களால் அன்று முடிந்த அளவிற்கு குடும்பமாக இணைந்து ஆசிரியர் தலைமையில் பணியாற்றுவோம் என்று உறுதிகூறி வாய்ப்புக்கு நன்றி கூறி முடிக்கிறேன்.

சட்டக்கல்லூரி மாணவி மதிவதனி

திராவிடர் கழக தலைவர் எங்கள் குடும்பத் தலைவர் ஆசிரியர் உட்பட அனைவருக்கும் வணக்கம்.

எனக்கு முன்னாடி மெர்சினு ஒருத்தங்க பேசுனப்போ சொன்ன 15 வயசு பொண்ணுதான் நான். பேசினவர் என் தாயார், என் 15 வயதில் மறைந்தவர் என் தந்தையார். என் தாயார் பேசியபோது சில செய்தியை குறிப்பிட மறந்துவிட்டார். என் தந்தை இறந்தபோது எந்தவிதமான சடங்கும் செய்யக்கூடாது என்று நான் தீவிரமாக, தெளிவாக சொன்னதால், தந்தை வழி உறவினர்கள் எல்லாம் அன்றைக்கு எங்களுடன் இருக்கும் உறவை முறித்துவிட்டு சென்றவர்கள் 8 ஆண்டுகள் ஆகியும் பேசுவது கூட இல்லை. அதைப்பற்றி ஒரு நாளும் நான் கவலை கொண்டது இல்லை. காரணம், என் தந்தை இறந்து இரண்டாவது மாதம், ஆசிரியர் தாத்தா என் தந்தையார் படத்திறப்பு நிகழ்வுக்கு பழநியில் உள்ள எங்கள் வீட்டிற்கு வந்தார். அவர் பேசியபோது, சேதுவின் குடும்பத்தை நாங்கள் தத்து எடுத்துக் கொள்கிறோம். இந்த பிள்ளைகளின் கல்வி செலவோ, மற்ற எந்த தேவை இருந்தாலும் தலை மைக்குக் கடிதமோ, இல்லை, என்னை நேரில் சந்தித்தோ தகவல் சொல்லி, உதவி பெறலாம் என்று சொன்னார்.

அதன் பிறகு நாங்கள் எவ்வித உதவியும் கேட்கா விட்டாலும் கூட, தொண்டருக்குத் தொண்டராய் தனது தொண்டர்களுக்கு நான் இருக்கிறேன், இந்த இயக்கம் இருக்கிறது என்று கொடுத்த உணர்வுதான் இன்று வரை இரத்த உறவுகளை பற்றி எண்ணாமல், கொள்கை உறவுகள் மட்டும் போதும் என்று வாழ்ந்து வருகிறோம். இந்து மதத்தைத் தாண்டி பயங்கர ஜாதி வெறியால் ஊறிப்போன குடும்பம் என் தந்தையின் குடும்பம். ஒருவேளை என் தந்தை என்னை கொள்கைவாதியாக வளர்க்க வில்லை என்றால் இன்று என் நிலை எப்படி இருந்திருக்கும் என்று நினைத்துப் பார்க்க முடியவில்லை. மற்ற குடும்பங்கள் போல் இல்லாமல் எங்கள் வீட்டில் அப்பா திராவிடர் கழகம், அம்மா கம்யூனிஸ்ட், நல்ல வாய்ப்பாக, என் அப்பா அவர் பக்கம் என்னைக் கொண்டு வந்து விட்டதால், இன்றைக்கு மதிவதனி இந்த நிலையில் இருக்கிறேன். பின், தந்தையின் மறைவுக்குப் பிறகு என் தாயும் திராவிடர் கழகப் பொறுப்பாளர் ஆகிவிட்டார். எனக்கு 3 வயதில் ஆசிரியர் தாத்தாவை சந்திக்க திருச்சி பெரியார் மாளிகைக்கு அப்பா அழைத்துச் சென்றார். அங்கு துரை.சக்கரவர்த்தி தாத்தாவும் உடன் இருந்தார். ஆசிரியர் தாத்தா என்னைப் பார்த்து உன் பெயர் என்னம்மா? என்று கேட்டார். நான் உடனே தாத்தா நீங்க தானே பெயர் வச்சீங்க. இப்ப நீங்களே என் பெயர் என்ன என்று கேட் குறீங்கனு கேட்டேன். சின்ன வயதல்லவா? சற்றுத்துடுக்கு தான். மற்ற தலைவராக இருந்தால், சற்று யோசித்திருப் பார்கள். என் தந்தை இறக்கும் வரை இந்த நிகழ்வை சொல்லிக்கொண்டே இருப்பார். ஆசிரியர் தாத்தா சற்றும் யோசிக்காமல் நான் நிறைய பேருக்கு ஒரே நாளில் பெயர் வைக்கிறேன், அதான் எனக்கு சரியாக ஞாபகம் இல்லன்னு சொல்லிட்டு, அவர் வைத்திருந்த சால்வையை எனக்குப் போர்த்தி விட்டார். அன்றிலிருந்து இதுவரைநான் அம்மா வழி தாத்தாவையும் பார்த்ததில்லை; அப்பா வழி தாத்தா வையும் பார்த்ததில்லை. ஆசிரியர் தாத்தா, கவிஞர் தாத்தா மட்டும்தான் நமக்கு தாத்தா என்று நினைத்தே வளர்ந்து விட்டேன். ஆசிரியருக்கு 86 வயது என்று யாராவது நினைவுபடுத்தினாலே என்னை அறியாமல் கண்ணில் நீர் வரும். எப்போது அவரைப் பார்த்தாலும் ஆசிரியருக்கு உடல்நலம் எப்போதும் நன்றாக இருக்க வேண்டும் என்று நினைத்து அழுவேன்.

கடந்த மாதம் அன்புராஜ் அண்ணாவை பார்த்தபோது, என்னை மீறி அவரிடம் சொன்னேன். அண்ணா எனக்கு அம்மா பிடிக்குமா? ஆசிரியர் பிடிக்குமா? என்று கேட்டால், ஆசிரியர் தாத்தா தான் பிடிக்கும்; அவருக்காக எதை வேண்டுமானாலும் செய்வேன் என்று சொன்னேன். உடனே அவர் சொன்ன பதில்தான் - இந்த இயக்கம் நம்மை எப்படி வழிநடத்துகிறது என்பதற்கு ஆதாரம். அவர் சொன்னார் அம்மாவைத் தான் பிடிக்கும்னு நீ சொல்லணும், அம்மாவுக்குத் தான் நீ எல்லாம் செய்யனும்னு சொன்னாரு. மத்த கட்சியாக இருந்தால், பொண்ணு கொஞ்சம் நல்லா பேசுது, நம்ம கழகத்திற்குப் பயன்படுத்திக் கொள்ள வேண்டும் என்று நினைப்பாங்க. ஆனா இங்க மட்டும் தான் முதல்ல நீங்க நல்லா படிங்க. அம்மாவை பார்த்துகுங்கனு சொல்ற ஒரே இயக்கம் திராவிடர் கழகம் மட்டும்தான். சாமி நம்பிக்கை இல்லாததால, தேர்வில் 12 ஆம் வகுப்பு தேர்வில் நான் கோட்டைவிட்டுடுவேன்னு உறவினர்கள் எல்லாம் எதிர்பார்த்தாங்க. ஆனால் நான் +2வில் எடுத்த மதிப்பெண் 1125. இப்ப கல்லூரி வந்த பிறகும்கூட ஒரு நிமிடம் இரு, சாமி கும்பிட்டு வரேன்னு சொல்றவங்க எல்லாம் ஒரு பாடத்திலாவது நிலுவை (அரியர்) வச்சாங்க. நான் 11 பாடம் ஒரு சேர எழுதியதில் எல்லாத்துலயும் பாஸ் ஆகி விட்டேன். இதெல்லாம் ஏன் சொல்றேன்னா நாம நல்ல நிலைமையில் இருந்து, நம்ம கருத்தை சொன்னால் தான் ஏத்துப்பாங்க. அந்த நிலை மைக்கு நாம் வரணும். ஆசிரியருக்கு இயக்கத்தின் உயிர் நாடியாக தெரிவது பிரச்சாரமும், போராட்டமும் தான்.

அந்த வழியில் தொடர்ந்து மாநாடு, பொதுக்கூட்டம், வசூல்னு களைப்பு ஏற்படலாம். களைப்பு வரும்போது ஆசிரியரை நினைத்துப் பார்க்கணும். நேற்று டில்லி இன்னைக்கு சென்னையில் போராட்டம், கைது, நாளைக்கு மதுரை, இப்படி நாள்தோறும் இந்த சமூகத்திற்காக அலையும் தலைவரை நான்கு முறை அறுவை சிகிச்சைக்குப் பின்பும் அலையும் தலைவரை எங்கேயாவாது பார்க்க முடியுமா? கடந்த கும்பகோணம் மாணவர் கழக பவள விழா மாநாட் டிற்கு பேருந்து பிரச்சாரத்திற்கு சென்றோம். அப்போ பேருந்தில் ஒரு அம்மா, சின்ன பிள்ளையார் சிலையை வச்சு காசு கேட்டு வந்தாங்க. அவங்க என்னை பார்த்து என்னம்மா பிச்சை எடுக்க வந்துட்டியான்னு கேட்டாங்க நான் உடனே சிரிச்சிக்கிட்டே ஆமாம்மா நீங்க இல்லாதபிள்ளையாரை வைத்து பிச்சை கேக்குறீங்க, நானோ, நாட்டில்  உண்மையில் இருக்கும் நீட் பிரச்சினை, சமூகநீதி, பிரச்சினையை சொல்லி பிச்சை கேட்கிறேன்னு சொன்னேன். உடன் இருந்த மாணவர் கழக தோழர்கள் அஜிதன், யாழ்திலீபன் இருவரும் வாங்க போகலாம்னு சொன்னாங்க. இருங்க பார்ப்போம்னு சொல்லி  நின்னோம்.

பேருந்தில் இருந்த அனைவரும் நம் மாநாட்டுக்கு தான் அதிக பணம் கொடுத்தாங்க. எந்த வசூல் பணிக்குப் போனாலும் கவிஞர் தாத்தா அடிக்கடி கலந்துரையாடல்களில் சொல்லும் வார்த்தையை ஞாபகம் வச்சுக்கணும். இனமானம் காப்பவர்களுக்கு தன்மானம் பெரிதல்ல. அன்று மாலை ஆசிரியரைப் பார்த்து இந்த நிகழ்வை சொன்னோம். அய்யா சொன்னார், துண்டறிக்கையைக் கொடுங்க, பணம் கொடுத்தா நன்றி சொல்லுங்க, இல்லன்னு சொன்னா மிக்க நன்றினு சொல்லிட்டு வாங்க. நம்ம வேலை துண்டறிக்கையை கொண்டுபோய் சேர்ப்பதுதான் என்று சொன்னார். அறிவியல் மனப்பான்மையை வளர்க்கும் பணியை கடமையை 51A(h) என்னும் இந்திய அரசமைப்புச் சட்டத்தின் அடிப்படையில் ஆசிரியர் பரப்புரைக் கூட்டங்கள் நடத்த சொன்னார். அந்த அறிக்கையைப் பார்த்தவுடன் நானும் திராவிடர் மாணவர் கழக துணைச் செயலாளர் தோழர் திலீபனும் இணைந்து அய்ந்து (5) பள்ளிகளுக்குச் சென்று பரிணாம வளர்ச்சி குறித்துப் படம் போட்டு பிரச்சாரம் செய்தோம். அங்கு இருந்த 8 வயது சிறுமி எழுந்து "அக்கா இந்த கையில் உள்ள கயிறை எனக்கு கழட்டி விடுங்க, சாப்பிடவே இனி அருவருப்பாக இருக்கும்னு" சொன்னது. இதுதான் நம் வெற்றி! நாம் விதைப்பது விதைகள் - அது மரமாக கொள்கை மரமாக, ஒரு நாள் வளரும். ஆசிரியரைப் பார்த்து மாலை அணிவிப்பதோ, சால்வை அணிவிப்பதோ, பணம் தருவதோ எல்லாம் தாண்டி உண்மையான ஒரு கழகத்துக்காரரை உருவாக்கிக் காட்டினால்தான் அவருக்கு உண்மையான மகிழ்ச்சி. அதுதான் அவர் வாழ்நாளை நீட்டிக்கும்.எனவே தொடர்ந்து பள்ளி, கல்லூரிகளுக்கு சென்று அடுத்த தலைமுறைகளை உருவாக்கி ஆசிரியர் வழியில் அய்யாவின் பணி முடிப்போம். நன்றி!

- இந்த வயதில் இவ்வளவு முதிர்ச்சியான கருத்துகளா? என்று நினைக்கத் தோன்றுகிறதா? - தோன்றட்டுமே!

பசும்பொன் செந்தில்குமாரி

"இன்று (7.2.2019) மனுதர்ம எரிப்பு போராட்டத்தில் நான் கலந்து கொண்டு கைதாகி காவல்துறை வாகனத்தில் வந்து கொண்டிருந்தபோது என்னுடைய திருமணம் நடந்த முறை என் நினைவிற்கு வந்தது. ஏனெனில் இந்திய குடியரசு முன்னாள் தலைவர் ஆர்.வெங்கட்ராமனுக்குக் கருப்புக்கொடி காட்டிய வழக்கில் 9.11.1991 அன்று கைதாகி இருந்தபொழுது என்னுடைய திருமணம் இதேபோல்  சிறையில் நடைபெற்றது. மடிப்பாக்கத்தில் வீட்டில் இருந்த என்னை அவசர அவசரமாக அழைத்துச் சென்றனர். திருமண மண்டபத்தில் நமது தோழர்கள் கைது செய்து வைக்கப்பட்டு இருந்தனர். அங்குதான் எனக்கும், இசையின்பனுக்கும் திருமணம் நடந்தது. எந்த சடங்கு - சம்பிரதாயமும் இன்றி நேரம் காலம் பார்க்காமல் நடைபெற்றது ஆசிரியர்தான் நடத்தி வைத்தார். பத்திரிகையில் வெளிவந்த செய்தியைப் பார்த்துதான் என் பெற்றோர்களே தெரிந்து கொண்டார்கள். ஆனால் இப்படி திருமணம் நடந்ததால் எங்களுக்கும், எங்களது பிள்ளைகளுக்கும் எந்த பாதிப்பும் இல்லை. எங்களுக்கு ஒரு மகள் சீர்த்தி (சிவில் இன்ஜினியர்), ஒரு மகன் இனநலம் (ECE-II Year) உள்ளார்கள். இன்றுவரை ஒருவரையொருவர் மனம் ஒத்து மகிழ்ச்சியுடன் வாழ்க்கை நடத்துகிறோம். என் அத்தை திருமகள் இறையன் திருமண நிலையத் தின் இயக்குநராக இருந்தபொழுது அவருக்கு உதவி யாளராக பணியாற்றினேன். அவர்கள் 14.11.2015 அன்று மறைந்தார்கள். அதன்பிறகு நான் திருமண நிலைய இயக்குநர் பொறுப்பேற்றேன். அன்றிலிருந்து ஜாதி மறுப்பு, மத மறுப்பு, விதவை மறுமணம், மணமுறிவு என்று 498 இணையேற்புகளை நடத்தி வைத்து என்னுடைய பணியை தமிழர் தலைவர் வழிகாட்டுதலுடன் சிறப்புடன் செய்து வருகிறேன்." என்றார்.

மின்சாரம்

"உயர் ஜாதியினரில் ஏழைகளுக்கு 10 விழுக்காடு இடஒதுக்கீடா?" என்னும் தலைப்பில், காந்தியார் அண்ணா நினைவு நாளை நினைவு கூர்ந்து வட சென்னை மாவட்ட திராவிடர் கழகத்தின் சார்பில் அனைத்துக் கட்சி கண்டனப் பொதுக் கூட்டம் வில்லி வாக்கம் பேருந்து நிலையம் அருகில் நடைபெற்றது.

திராவிடர் கழகத் தலைவர் தமிழர் தலைவர் ஆசிரியர் கி. வீரமணி அவர்களின் தலைமையில் நடைபெற்ற இந்தப் பொதுக் கூட்டத்திற்கு வடசென்னை மாவட்ட திராவிடர் கழக மகளிரணி தலைவர் தங்கமணி குணசீலன், பெரியார் பெருந்தொண்டர் அர. சிங்கார வேலு ஆகியோர் முன்னிலை வகித்தனர்.

கூட்ட ஏற்பாடுகள் மிகவும் சிறப்பாக அமைந் திருந்தன.

முக்கிய சாலையிலிருந்து கூட்டம் நடைபெற்ற இடம் வரை இருமருங்கிலும் திராவிடர் கழகக் கொடிகள் பட்டொளி வீசிப் பறந்தன. விதவிதமான வண்ணத்தில் சுவரொட்டிகள் கூட்டத்திற்குக் கட்டியம் கூறின!

மிகப் பெரிய அளவு திறந்த மேடை; மிகவும் பொருத் தமாக "முரட்டு கருஞ்சட்டை வீரரான" குணசீலன் பெயர் சூட்டப்பட்டிருந்தது.

வடசென்னை மாவட்ட திராவிடர் கழகத் தலைவர் வழக்குரைஞர் சு. குமாரதேவன் வரவேற்புரையாற்றினார். சமூக நீதிக் காரணத்துக்காக நடத்தப்படும் பொதுக் கூட்டம் காந்தியார் - அண்ணா நினைவு நாளை முன்னிறுத்தி நடத்தப்படுவதன் அவசியத்தை விளக்கிக் கூறினார்.

மு. வீரபாண்டியன்

இந்தியக் கம் யூனிஸ்டுக் கட்சியின் தமிழ் மாநிலத் துணைச் செயலாளர் மு. வீர பாண்டியன்  அவர்கள் தனது உரையில், இந்தியாவிலேயே தமிழ் மண் சமூகநீதியில் முன்வரிசையில் இருப்பதற்குக் காரணம் தந்தை பெரியாரும், திராவிட இயக்கமும்தான் என்றாலும் இத்திசையில் இந்தியக் கம்யூனிஸ்டுக் கட்சியின் பங்களிப்புத் தொடர்ந்து வந்திருக்கிறது என்பதையும் தெளிவுபடுத்தினார்.

தந்தை பெரியாரின் பொது வாழ்க்கை என்பது எளிமையானது - எந்த வகையிலும்  தன் பிம்பங்களை கட்டமைக்கும் தன்மை கொண்டதல்ல - பொதுக் கூட்டங்களுக்குச் செல்லும் தந்தை பெரியார் மற்ற பேச்சாளர்கள் மேடைக்கு வருவதற்கு முன்பே மேடையில் அமர்ந்து விடும் அந்தத் தன்மையை வெகுவாக சிலாகித்தார் தோழர் வீரபாண்டியன்.

தமிழர் தலைவருக்கு வீரவாள்

கடலூர் சுப்ரமணியம் தொடங்கி அய்ந்தாம் தலைமுறை கண்ட இந்தி எதிர்ப்பு வீரர் கடலூர் கேசவனின் கொள்ளு பெயரன்கள் சமூகநீதி காவலர் ஆசிரியர் வீரமணி அவர்களுக்கு வீரவாள் வழங்குகிறார்கள்.

பேராசிரியர் எம்.எச். ஜவாஹிருல்லா

தொடர்ந்து உரையாற்றிய மனிதநேய  மக்கள் கட்சியின் நிறுவனர் - தலைவர் பேராசிரியர் எம்.எச். ஜவாஹிருல்லா அவர்கள் சமூக நீதித் திசையில் தந்தை பெரியார், திராவிடர் கழகம், திராவிட கட்சிகள் பொறித்த முத்திரைகளை வெகுவாகப் பாராட்டினார்.

உயர் ஜாதிக் காரர்கள் இப்பொ ழுதுள்ள இடஒதுக் கீட்டு முறையால் ஏதோ பாதிக்கப்பட்டு இருப்பதாக சொல்ல முயல்வது அடிப் படைத் தவறு - உண் மைக்கு எதிரானது என்று எடுத்துரைத்த பேராசிரியர் உயர் ஜாதியினர் குறிப்பாகப் பார்ப்பனர்  உயர் பதவிகளில் எந்த அளவு ஆதிக்கம் செலுத்தி வருகின்றனர் என்பதற்கான புள்ளி விவரத்தை எடுத்து விளக்கினார்.

எடுத்துக்காட்டாக குடியரசுத் தலைவர், பிரதமர் அலுவலகங்களில் உயர் பதவிகளின் நிலையை ஆதாரத் துடன் எடுத்துக் காட்டினார்.

குடியரசுத் தலைவர் அலுவலகத்தில் உள்ள 49 உயர் பதவிகளில் பார்ப்பனர்கள் - 39; தாழ்த்தப்பட்டோர், மலை வாழ் மக்கள் - 4 பேர்; பிற்படுத்தப்பட்டோர் - 6. துணைக் குடியரசுத் தலைவர் அலுவலகத்தில் உள்ள ஏழு உயர் பதவிகளிலும் பார்ப்பனர்களே ஆதிக்கம் செலுத்துகின்றனர். பிரதமரின் அலுவலகத்தில் 35 உயர் பதவிகளில் பார்ப்பனர்கள் - 31, தாழ்த்தப்பட்டோர் - 2, பிற்படுத்தப்பட்டோர் - 2, கவர்னர் மற்றும்  லெப்டினண்ட் கவர்னர் 27 பேர்களில் பார்ப்பனர்கள் 25, தாழ்த்தப் பட்டோர், மலைவாழ் மக்கள் ஒருவரும் இலர், பிற்படுத் தப்பட்டோர் இருவர்.

3600 அய்.ஏ.எஸ். பதவிகளில் பார்ப்பனர்கள் 2750, தாழ்த்தப்பட்டோர், மலைவாழ் மக்கள் 300, பிற்படுத்தப் பட்டோர் 350. உயர் ஜாதியினர், குறிப்பாகப் பார்ப் பனர்கள் 70 விழுக்காடு, 80 விழுக்காடு அளவுக்கு ஆதிக்கம் செலுத்தும் நிலையில் ஏதோ உயர் ஜாதியினர் பாதிக்கப்பட்டு இருப்பதாக சொல்லுவது அசல் ஏமாற்று வேலை என்று அழுத்தம் திருத்தமாக தம் கருத்தைப் பதிவு செய்தார்.

பேராசிரியர் கே.எம். காதர் மொய்தீன்

இந்திய யூனியன் முசுலீம் லீக் தேசிய தலைவர் பேராசிரியர் கே.எம். காதர் மொய்தீன் அவர்கள் திராவிடர் கழகத் தலைவர் ஆற்றி வரும், சாதித்துவரும் சமூக நீதிக்கான சாதனைகளை மனந் திறந்து பாராட் டினார்.

மண்டல் குழுப் பரிந்துரைகள் இன்றைக்கு இந்தியா முழுவதும் சட்டரீதியாக பிற்படுத்தப்பட்டவர்களுக்கு கிடைத்தது என்றால் அதற்கு முதற் காரணம் ஆசிரியர்

கி. வீரமணி அவர்கள்தான்.

சமூகநீதி, மதச் சார்பின்மை, பகுத்தறிவு கொள்கை களில் தந்தை பெரியாரின் சாதனைக்கு நிகர் தந்தை பெரியார்தான்.

இந்தக் கொள்கை களுக்கு எதிராக யார் எண்ணினாலும், செய்ய முற்பட்டாலும் அவர்கள் தேய்ந்து போவார்களே தவிர வெற்றி பெற முடியாது.

தந்தை பெரியார் கொள்கைகளை ஆசிரியர் வீரமணி அவர்கள் உலகம் முழுவதும் கொண்டு சென்றுள்ளார். பெரியார் கொள்கை உலகம் முழுவதும் இன்று பரவிக் கொண்டிருக்கிறது.

திராவிடர் கழகம் அறிவுத் துறையில் மகத்தான பணியைச் செய்து கொண்டுள்ளது. அத்தகைய இளை ஞர்களையும் உருவாக்கிக் கொடுக்கிறது.

இண்டலிஜன்ஷியாவை வளர்த்து வருகிறது. ஒவ்வொரு  மாநிலத்திலும் இதுபோன்ற நூறு இளைஞர்கள் உருவாக்கப்படுவார்களானால், பெரிய மாற்றமே ஏற்படும் என்று பேராசிரியர் காதர்மொய்தீன் தன் கணிப்பை வெளிப்படுத்தினார்.

இன்றைக்குப் பல வகைகளிலும் மத்திய பிஜேபி ஆட்சியில் மக்களுக்கு அச்சுறுத்தல்களும், இழப்புகளும் ஏற்பட்டு வருகிறது.

இதற்கு ஒரே தீர்வு மத்தியில் உள்ள பிஜேபி ஆட்சியை வரும் தேர்தலில் வீட்டுக்கு அனுப்புவதுதான் என்று அழுத்தம் திருத்தமாக தம் கருத்துகளை பதிவு செய்தார் இந்திய யூனியன் முசுலீம் லீக்கின் தேசிய தலைவர் பேராசிரியர் கே.எம். காதர்மொய்தீன் அவர்கள்.

வில்லிவாக்கம் - அனைத்துக் கட்சி கண்டனப் பொதுக் கூட்டத்தில் கலந்து கொண்டோர் (1.2.2019)

டி.கே.எஸ். இளங்கோவன் எம்.பி.

திமுக மாநிலங்களவை உறுப்பினர் டி.கே. எஸ். இளங்கோவன் அவர்கள் தம் உரையில் பதிவு செய்த தாவது:

உயர் ஜாதியில் பொரு ளாதாரத்தில் பின் தங்கி யவர்கள் என்று மத்திய அரசு யாரை சொல்லுகிறது?  ஆண்டு வருவாய் ரூபாய் எட்டு லட்சம் உள்ளவர்கள் ஏழைகளா? இதன்படி நாள் ஒன்றுக்கு ரூ.2300 வருமானம் பெறக் கூடியவர்கள் ஏழைகளா? என்ற கேள்வியை எழுப்பினார் டி.கே.எஸ்.

(பொருளாதாரத்தில் உயர் ஜாதி என்றால் ஆண்டு வருமானம் 8 லட்சம் - மற்ற ஜாதியினர் என்றால் வேறு அளவுகோலா? இதிலும் ஒரு மனுதர்மம் இருக்கிறதே!)

உச்சநீதிமன்றம் இரு முக்கிய வழக்குகளில் சரியான தீர்ப்பினை வழங்கியுள்ளது.

1992இல் இந்திரா  சகானி என்கிற மண்டல் குழு பரிந்துரை தொடர்பான வழக்கில் இட ஒதுக்கீட்டில் பொருளாதார அளவுகோல் என்ற பிரச்சினைக்கே இடமில்லை என்று தீர்ப்பு கூறி விட்டது.

கேசவானந்த பாரதி வழக்கில் அரசமைப்புச் சட்டத்தில் கூறப்பட்டுள்ள அடிப்படை அம்சத்திற்கு எதிராக எந்த சட்டத்தையும் இயற்ற முடியாது என்று உச்சநீதிமன்றம் திட்டவட்டமாகத் தீர்ப்பு வழங்கியுள்ள நிலையில் இந்த இரண்டு உச்சநீதிமன்ற தீர்ப்புகளுக்கும் எதிராக மோடி அரசு நடந்து கொண்டு வருகிறது.

பொருளாதாரக் கண்ணோட்டப்படி பார்த்தாலும் ஏழைகளாக பெரும்பாலும் இருப்பவர்கள் தாழ்த்தப்பட்ட, பிற்படுத்தப்பட்ட மக்களே - உயர் ஜாதியினர் தாம் பொருளாதாரத்திலும் மேம்பட்ட நிலையில் இருக் கின்றனர் என்பதற்கு தக்க புள்ளி விவரங்களை எடுத்து வைத்தார் டி.கே.எஸ்.

தாழ்த்தப்பட்டவர்களுள் சம்பாதிப்பவர்கள் 78.9%, மலை வாழ் மக்களில் சம்பாதிப்போர் 66.5%, இதர பிற்படுத்தப்பட்டவர்களுள் சம்பாதிப்பவர்கள் 91.9%, பார்ப்பனர்களில் சம்பாதிப்பவர்கள் 147.5% இதர உயர் ஜாதியினரில் சம்பாதிப்பவர்கள் 145.5%.

இந்தப் புள்ளி விவரங்கள் எதைக் காட்டுகின்றன?

பொருளாதார நிலையிலும் தாழ்த்தப்பட்ட, பிற் படுத்தப்பட்டோர்தான் தாழ் நிலையில் இருக்கின்றனர் - உயர் ஜாதியினர் தான் மேல் நிலையில் உள்ளனர்.

உண்மை நிலை இவ்வாறு இருக்கும் பொழுது உயர் ஜாதியினரில் ஏழைகளுக்காக ஒரு சட்டத் திருத்தம் கொண்டு வருவது என்ன நியாயம் என்ற வினாவை டி.கே.எஸ். இளங்கோவன் எழுப்பியது விவேகம் நிறைந்த ஒன்றாகும்.

மதிமுக பொதுச் செயலாளர்

திராவிட இயக்கப் போர்வாள் வைகோ

காந்தியார், அண்ணா நினைவு நாளில் அவர்கள் சான்றாண்மைகளைப் பலபட பிரித்துப் பேசினார் திராவிட இயக்கப் போர் வாளாம் வைகோ.

சமூகநீதியில் கலங்கரை விளக்கமாக, தூண்டும் சக்தியாக இருப்பவர் எனது அண்ணன் திராவிடர் கழகத் தலைவர் ஆசிரியர் வீரமணி ஆவார்கள்.

இன்றைக்கு மத்தியில் உள்ள மோடி தலைமையிலான மத்திய பிஜேபி அரசு நம்மை எல்லாம் சவுக்கால் அடித்து எழுப்பி விட்டிருக்கிறது. தூங்கும் புலியை இடறி விட்டது. அதன் பலனை மத்திய அரசு அனுபவிக்கத் தயாராக இருக்கட்டும்.

உயர் ஜாதியினரில் ஏழைகளுக்கு 10 சதவீத இடஒதுக்கீடு என்பது ஒடுக்கப்பட்ட மக்களைத் தட்டி எழுப்பி விட்டது.

அறிவு ஆசான் இன்று நம்மிடையே இல்லை. அறிஞர் அண்ணாவை இழந்துவிட்டோம்! அண்ணன் கலைஞரையும் பறி கொடுத்து விட்டோம்! இப்பொழுது நம்மிடம் இருக்கும் பலமான சக்தி என்று சொன்னால், அது அண்ணன்  வீரமணியும், திமுக தலைவர் மு.க.ஸ்டாலின்தான் என்று வைகோ அவர்கள் சொன்னபொழுது பார்வையாளர்கள் மத்தியில் மிகப் பெரிய வரவேற்பு!

இன்றைக்கு தமிழ்நாடு மக்கள் 69 விழுக்காடு இடஒதுக்கீட்டை அனுபவிக்கின்றனர் என்றால் அதற்கான முழு முதற் காரணம் நமது ஆசிரியர் அவர்கள்தான்! ஆட்சியினருக்குச் சட்ட ரீதியான ஆலோசனைகளைக் கூறி செயல்பட வைத்தவரும் அவரே! ( 31சி சட்டத்திற்கான நகலைத் தயாரித்துக் கொடுத்தவர் ஆசிரியர் வீரமணி அவர்களே!)

அன்றைக்குத் துரோணாச்சாரிகள் ஏகலைவனின் கட்டை விரலை வாங்கி இருக்கலாம். இன்றைக்குக் கோடிக்கணக்கான ஏகலைவன்கள் தோன்றி விட்டார்கள் - அத்தனைப் பேர்களின் கட்டை விரல்களை  வெட்ட முடியுமா என்று வேங்கை எனச் சீறி எழுந்தது அந்தப் புரட்சிப் புயல்!

தமிழர் தலைவர் ஆசிரியர் கி.வீரமணி

நேரத்தின் நெருக் கடிக் கிடையே தன் உரையைத் தொடங்கிய திராவிடர் கழகத் தலை வர் ஆசிரியர் வீரமணி அவர்கள் அந்தக் குறு கிய காலத்திலும் மூன்று முக்கிய தகவல் களை எடுத்துக் கூறினார்.

முதலாவதாக தந்தை பெரியார் தனது நாட் குறிப்பில் பதிவு செய்த தகவல்தான் அது.

"இந்தியா 'சுதந்திரம்' பெற்றது 15.8.1947இல், காந்தியார் கொல்லப்பட்டது 30.1.1948இல் அதாவது சுதந்திரம் பெற்ற 165ஆம் நாள் கொல்லப்பட்டார். காந்தி இந்தியாவை மதச்சார்பற்றநாடு என்று சொன்னது 7.12.1947இல் காந்தி கொல்லப்பட்டது 30.1.1948இல், அதாவது அவர் "நம் நாடு மதச்சார்பற்றது" என்று சொன்ன 53ஆம் நாள் கொல்லப் பட்டார்.

காந்தி இந்தியா சுதந்திரம் பெற்றவுடன் பார்ப்பனரின் நடத்தையைப் பார்த்து சுயமரியாதைக்காரராகி விட்டார்.  அவர் கொல்லப்படா விட்டால் இந்த நாடு சுயமரியாதைக் கொள்கை நாடாகி விடும் என்று பயந்தே அவரைக் கொன்றார்கள்" என்று தந்தை பெரியார் அவர்கள் தமது டைரியில் எழுதியிருந்த குறிப்பினை தலைவர் ஆசிரியர் வெளிப்படுத்தியபோது, மேடையில் அமர்ந்திருந்த பல்வேறு கட்சிகளின் தலைவர்களும் ஆர்வமுடன் கவனித்து உள் வாங்கினர்.

காந்தியார் படுகொலை செய்யப்பட்டதற்கான கார ணத்தை தந்தை பெரியார் எவ்வாறு கணித்துள்ளார் என்பது கவனிக்கத்தக்கதும், ஆச்சரியப்படத்தக்கது மாகும்.

இன்னொரு முக்கிய தகவலையும் தமிழர் தலைவர் கூறினார். ஒழுக்க சீலர் ஓமாந்தூரார் முதல் அமைச்சர். அவர் பார்ப்பனர்களை உதாசீனப்படுத்துகிறார்.தாடி யில்லாத ராமசாமி நாயக்கர் என்பது பார்ப்பனர்களின் கருத்தாக இருந்தது.

இதனை காந்தியாரைச் சந்தித்துத் தமிழ்நாட்டுப் பார்ப்பனர்கள் முறையிட்டனர். ஓமாந்தூரர் அவர்கள் காந்தியாரைச் சந்தித்து உண்மை நிலைகளை எடுத்துக் கூறினார். பார்ப்பனர்கள் மக்கள் தொகையில் எத்தனை சதவிகிதம், அதே நேரத்தில் கல்வியிலும், உத்தியோகத் திலும் எத்தனை மடங்கு அனுபவிக்கின்றனர் என்பதைப் புள்ளி விவரங்களுடன் காந்தியாரிடம் எடுத்து வைத்தார் முதல் அமைச்சர் ஓமாந்தூரார். உண்மை நிலையை புரிந்து கொண்டார் காந்தியார்.

மறுபடியும் பார்ப்பனர்கள் காந்தியாரைச் சந்தித்துக் கேட்ட பொழுது காந்தியாருக்கு மகா கோபம் வந்தது. பார்ப்பனர்களைப் பார்த்துக் கேட்டார்.

"ஆமாம் நீங்கள் பிராமணர்கள்தானே - நீங்கள் வேதம் படிக்க வேண்டியவர்கள் தானே - அதை விட்டு விட்டு இன்ஜினியரிங் படிக்க ஏன் ஆசைப்படுகிறீர்கள்? வருண தர்மப்படி வேதம் ஓத வேண்டியது தானே உங்கள் வேலை? உங்கள் கைகளில் 'டி'ஸ்கொயர் எதற்கு? பிணம் அறுக்கும் டாக்டர் வேலை எதற்கு என்று கேட்டார் காந்தியார்.

அன்றே முடிவு செய்துவிட்டனர் பார்ப்பனர்கள். காந்தியாரிடம் குடிகொண்டிருந்த சமூக நீதி உணர்வைப் புரிந்து கொண்டனர்.

காந்தியாரை விட்டு வைப்பது ஆபத்து என்று உணர்ந்தனர். அந்தஉணர்வுதான் கோட்சே உருவில் கைத் துப்பாக்கியாக காந்தியாரின் மார்பைப் பிளந்தது.

காங்கிரசை விட்டு விலகி சுயமரியாதை இயக்கம் கண்ட தந்தைபெரியார் மீண்டும் காங்கிரசுக்கு வந்து அவர் தொண்டு தொடர வேண்டும் என்று காந்தியார் விரும்பினார். அவரைப் போன்ற பொதுத் தொண்டு ஆர்வலர்களைக் காண்பது அரிது என்று கருதினார் காந்தியார்.

அந்த எண்ணம் பெங்களூருவில் 1927ஆம் ஆண்டில் காந்தியார் - பெரியார் சந்திப்பாக அமைந்தது. பெரியாருடன் ராமநாதனும் உடன் சென்றிருந்தார்.

அந்த உரையாடல் சற்றுக் காரசாரமாகவும் அமைந்தது.

பார்ப்பனர்களைப் பற்றிய சர்ச்சையில் காந்தியார் பெரியாரைப் பார்த்துக் கேட்டார். "என்ன ராமசாமி உலகத்திலேயே ஒரு  பிராமணன்கூட நல்லவர் இல்லை என்பது உங்கள் கருத்தா?" என்று கேட்டார்.

"அப்படிப்பட்ட ஒரு பார்ப்பனரை நான் பார்த்த தில்லை. உங்களுக்குத் தெரிந்தால் சொல்லுங்கள்", என்று பெரியார் கேட்டபொழுது "கோபாலகிருஷ்ண கோகலே உத்தமப் பிராமணர் அல்லவா!" என்றார் காந்தியார்.

அதற்குப் பெரியார் சொன்ன  பதில்தான் முக்கியம் - ஏன் சுவையானதும்கூட.

"நீங்களோ மகாத்மா, எனக்கு சாதாரண ஆத்மா விலுமே நம்பிக்கை கிடையாது. மகாத்மாவாகிய தங் களுக்கே உலகத்தில் ஒரே ஒரு பார்ப்பான் மட்டும்தான் நல்லவனாகத் தெரிகிறார். என்னைப் போன்றவர்களுக்கு அப்படிப்பட்ட ஒரே ஒருவர் எப்படி தெரிய முடியும்?" என்று தந்தை பெரியார் சொன்ன பொழுது காந்தியாருக்கே ஆச்சரியம்.

தொடர்ந்து இந்துமதம் பற்றி விவாதம் நடந்தது. இந்துமதத்தில் சில குறைபாடுகள் இருப்பதை ஒப்புக் கொண்ட காந்தியார், அதனை நாம் மாற்றியமைக்கலாம் என்று சொன்னபொழுது குறுக்கிட்ட தந்தை பெரியார் "அப்படி கை வைத்தவர்களைப் பார்ப்பனர்கள் விட்டு வைக்க மாட்டார்கள். நீங்கள் கை வைத்தாலும் உங்களையும் விட்டு வைக்க மாட்டார்கள்" என்று 1927இல் தந்தை பெரியார் சொன்னதுதானே 1948இல் நிகழ்ந்தது.

தந்தை பெரியாரின் தொலைநோக்கு எவ்வளவு துல்லியமானது என்று குறுகிய நேரத்திலும் செறிவான தகவல்களைச் சொன்ன திராவிடர் கழகத் தலைவர் இறுதியாக  தந்தை பெரியார் சொன்னதை நினைவூட் டினார்.

"வாழ்ந்த காந்தியார் வருணாசிரமவாதி; மறைந்த காந்தியார் வருணாசிரமத்தை ஒழிக்க விரும்பிய காந்தியார். காந்தியார் சுயமரியாதைக்காரராகி விட்டார்" என்று தந்தை பெரியார் தனது நாட்குறிப்பில் எழுதியது அந்தப் பொருளில்தான் என்று கூறிய தமிழர் தலைவர்  - மதச்சார்பின்மையும், சமூகநீதியும் தேவை என்று உணர்ந்த காந்தியார் கோட்சே உருவில் பார்ப்பனர்களால் சுட்டுக் கொல்லப்பட்டார் என்றார்.

(பார்ப்பனர்களை, பார்ப்பனீயத்தை எதிர்த்தவர்கள் கொல்லப்பட்டது வரலாற்றில் காணப்படும் தகவல்கள் தானே!)

கூட்டத்தில் திராவிடர் கழகத் துணைத் தலைவர் கலி. பூங்குன்றன் பொருளாளர் வீ. குமரேசன் ஆகியோர் உரையாற்றினர். வடசென்னை மாவட்ட செயலாளர் தி.செ. கணேசன் நன்றி கூறினார். கூட்டத்தின் துவக்கத் தில் மயிலை நாத்திகன் குழுவினரின் பகுத்தறிவு இசை நிகழ்ச்சி நடைபெற்றது,. மக்கள் இரசித்து மகிழ்ந் தனர்.

கலந்துகொண்டவர்கள்

கழகப் பொதுச்செயலாளர் வீ.அன்புராஜ், அமைப்புச் செயலாளர் வி.பன்னீர்செல்வம், துணைப் பொதுச் செயலாளர் ச.இ.இன்பக்கனி, சென்னை மண்டல செயலாளர் தே.செ.கோபால், மண்டல இளைஞரணி செயலாளர் சோ.சுரேஷ், வடசென்னை மாவட்டத் துணைத் தலைவர் கி.இராமலிங்கம், துணைச் செயலாளர் கெடார் மும்மூர்த்தி, அமைப்பாளர் புரசை சு.அன்பு செல்வன், துணை அமைப்பாளர் சி.பாசுகர், வடசென்னை மாவட்ட இளைஞரணித் தலைவர் தளபதி பாண்டியன்,  கருங்குழி கண்ணன், ஆத்தூர் சேகர், கொடுங்கையூர்  கோ.தங்கமணி,காரல்மார்க்ஸ், வேல வன்,  பெரம்பூர் ப.கோபாலகிருஷ்ணன்,சி.வாசு,

ச.முகிலரசு, க.சிட்டிபாபு, கு.ஜீவரத்தினம்,   மகளிரணித் தோழர்கள் வி.வளர்மதி, சி.வெற்றிசெல்வி, சுமதி,

த.மரகதமணி, தங்க.தனலட்சுமி, பொன்னேரி செல்வி, சுயமரியாதை திருமண நிலைய இயக்குநர் பசும்பொன் செந்தில்குமாரி, தென்சென்னை மாவட்டத் தலைவர் இரா.வில்வநாதன், செயலாளர் செ.ர.பார்த்தசாரதி, கோ.வீ.ராகவன், அரும்பாக்கம் சா.தாமோதரன், தமிழ் சாக்ரட்டீஸ், தாம்பரம் மாவட்டத் தலைவர் ப.முத்தையன், செயலாளர் கோ.நாத்திகன், சு.மோகன்ராஜ், மா.குண சேகரன், ஆவடி மாவட்டத் தலைவர் பா.தென்னரசு, செயலாளர் க.இளவரசன், ஆவடி மாவட்ட அமைப் பாளர் உடுமலை வடிவேல், வை.கலை யரசன், ஆவடி வெ.கார்வேந்தன், கலைமணி,  கும்மிடிப்பூண்டி மாவட்டத் தலைவர் புழல் த.ஆனந்தன், செயலாளர் இரமேஷ், க.ச.க.இரணியன், புழல் ஏழுமலை,  வழக்குரைஞர்கள் சு.ந.விவேகானந்தன், ம.வீ.அருள் மொழி, மாநில மாணவர் கழக செயலாளர் ச.பிரின்சு என்னாரெசு பெரியார், மாணவர் கழகத் துணைச் செயலாளர் நா.பார்த்திபன், மாணவர் கழக இணை   செயலாளர் பா.மணியம்மை, மாணவர் கழகம்

க.ஆற்றலரசி, தே.ஒளிவண்ணன், பெரு.இளங்கோ, கொரட்டூர் பன்னீர் செல்வம், நாகூர் சி.காமராஜ், கோபால்,  பெரியார் மாணாக்கன், கூடுவாஞ்சேரி ராசு,   ஆயிரம்விளக்கு சேகர், ஆனந்தன்,  சிவக்குமார், மகேஷ்வரன், விமல் ராஜ், சக்திவேல், திண்டிவனம் சிறீராமுலு,  விடுதலை சிறுத்தைகள் கட்சி துணைப்பொதுச்செயலாளர் பாலாஜி,  செல்வம், இந்திய யூனியன் முசுலீம்லீக்  ஜெய்னுலாபிதீன், குலாம் முகமது யூசூப், கரீம், ஜாபர் சாதிக், சஞ்சய்குமார், அருண்குமார், ஏழுமலை, முகமது யூசுப், மற்றும் திமுக, மதிமுக, விடுதலைசிறுத்தைகள்கட்சி, இந்திய யூனியன் முசுலீம் லீக் கட்சி, மனிதநேய மக்கள் கட்சி உள்ளிட்ட அனைத்து கட்சிகள், அமைப்புகளின்  பொறுப்பாளர்கள், தென் சென்னை, வடசென்னை, தாம்பரம், ஆவடி, கும்மிடிப்பூண்டி, சோழிங்கநல்லூர் உள் ளிட்ட சென்னை மண்டல கழக மாவட்டங்களின் பொறுப்பாளர்கள் பலரும் கூட்டத்தில் கலந்து கொண்டனர்.

கண்டனப் பொதுக்கூட்ட முடிவில் மாவட்டச் செயலாளர் தி.செ.கணேசன் நன்றி கூறினார்.

நூல்களைப் பெற்றுக்கொண்டவர்கள்

மதிமுக ஜீவன், புழல் த.ஆனந்தன், கெடார் மும்மூர்த்தி, த.கு.திவாகரன், கவிஞர் கண்மதியன், இளவரசன், பூவை செல்வி, பெரியார்செல்வி, ச.இ. இன்பக்கனி,கோ.நாத்திகன், தங்க.தனலட்சுமி, பொய் யாமொழி, ராமு, புழல் இராசேந்திரன் மற்றும் பல்வேறு அமைப்புகளைச் சார்ந்த பலரும் நூல்களை மதிமுக பொதுச்செயலாளர் வைகோவிடமிருந்து பெற்றுக் கொண்டார்கள்.

 

வில்லிவாக்கத்தில் வெடித்த கேள்விகள்

சமூகரீதியாகவும், கல்வி ரீதியாகவும் தான் இடஒதுக்கீடு என்று திட்டவட்டமாக அரசமைப்புச் சட்டம் சொல்லும் பொழுது பொருளாதார அளவுகோல் எங்கிருந்து வந்தது?

உச்சநீதிமன்றம் உட்பட பொருளாதார அளவுகோலை நிராகரித்தபோது இடஒதுக்கீட்டில் பொருளாதார அளவுகோலைத் திணித்தது ஏன்?

ஜாதி அளவுகோல் என்பது மாறாதது. ஆனால் பொருளாதார அளவுகோல் என்பது அடிக்கடி மாறக் கூடிய எலாஸ்டிக் தன்மை கொண்டது.

ஆண்டு வருமானம் 8 லட்சம் ரூபாய் உள்ளவர்கள் ஏழைகளா?

இடஒதுக்கீடு வந்தால் தகுதி - திறமை போய் விடும் என்று சொன்ன பார்ப்பனர்கள், இப்பொழுது தங்களுக்கு இடஒதுக்கீடு கேட்பானேன்?

பொருளாதாரத்தில் பின் தங்கியுள்ள உயர் ஜாதியினர் கல்வியிலும், சமூக ரீதியிலும் பின் தங்கியுள்ளனர் என்பதற்கான புள்ளி விவரம் எங்கே? எங்கே?

புத்தகச் சந்தையில் ஒரு பொன்னேடு!

சென்னை புத்தகச் சந்தையில் எத்தனை எத்த னையோ நிகழ்ச்சிகள் நடைபெற்றுள்ளன. ஆனாலும், நேற்று பிற்பகல் (17.1.2019) புத்தகக் கண்காட்சி விழா அரங்கில் நடைபெற்ற புத்தக வெளியீட்டு விழா ஒரு பொன்னேட்டை உருவாக்கிக் கொடுத்தது.

"தமிழுக்கு என்ன செய்தார் பெரியார்?'' தலைப்பே சற்று வித்தியாசமானதுதான்.

தந்தை பெரியார் எதைச் செய்தாலும், எந்தக் கருத்தை வெளியிட்டாலும் அவை ஏதோ ஓடுகிற ஆற் றோட்டத்தோடு ஓடும் தென்னை மட்டைகள் அல்ல.

மூடத்தனத்திலும், பிற்போக்குத்தனத்திலும் தலைக்குப்புற வீழ்ந்து கிடக்கும் - ஆரிய ஆதிக்கம் நிலைநாட்டப்பட்ட ஓர் அழுக்குச் சமுதாயத்தில் - அவற்றின் ஆணிவேரை ஒட்ட நறுக்கி அக்னித் திராவகத்தில் வீசும் புரட்சி எரிமலையான தந்தை பெரியார் அவர்களின் சிந்தனைச் சீலங்களும், கருத்துக் கருவூலங்களும் எதிர்நீச்சல் போட்டு எதிரிகளை மூர்ச்சடையச் செய்யும் பேராற்றல் பெற்றவையாகும்.

''தமிழுக்கு என்ன செய்தார் பெரியார்?'' என்பதை விட, தமிழுக்கு என்ன செய்யவில்லை பெரியார் என்று கேட்டிருந்தால், அது மேலும் பொருத்தமானதாகவே இருந்திருக்கும்.

247 எழுத்துகளைக் கொண்ட தமிழ் கற்பதற்கு எளிதாகவில்லை. பிற மொழியைத் தாய்மொழியாகக் கொண்டவர்களுக்கு ஒரு மலைப்பாகவேகூடத் தோன்றும்.

இருபத்தாறே எழுத்துக்களைக் கொண்ட ஆங் கிலம் உலகை ஆட்கொள்ளவில்லையா? அந்த வகையில், தமிழிலும் சீர்திருத்தம் செய்து, எளிதாக்கி உலகப் பரப்பின் பக்கமெல்லாம் - தேமதுரத் தமிழைத் தேசமெல்லாம் கொண்டு செல்லுவோம் என்பதற் கொப்ப தமிழ் எழுத்துச் சீர்திருத்தத்தின்மூலம் அதனைச் செயல்படுத்திய ஆசான் தந்தை பெரியார்.

1935 ஆம் ஆண்டு ஜனவரி 13 ஆம் தேதி நாளிட்ட குடிஅரசு' இதழில் தமிழ் எழுத்துச் சீர்திருத்தத்தை செயல்படுத்தியவர் தந்தை பெரியார்.  44  ஆண்டுகளுக்குப் பிறகு தந்தை பெரியார் நூற்றாண்டு விழாவையொட்டி எம்.ஜி.ஆர். அவர்கள் முதலமைச்சராக இருந்தபோது, அதற்கு சட்ட ரீதியான அங்கீகாரம் அளிக்கப்பட்டது. அதன் விளைவாகத்தான் பாடப் புத்தகங்கள் முதல் அனைத்திலும் தந்தை பெரியாரின் எழுத்துச் சீர்திருத்தம் செயல்பாட்டுக்கு வந்தது. லை' என்றால், அது விடுதலை' லை' என்று  சொல்லும் அளவுக்கு மக்கள் மத்தியில் மலிவுப் பதிப்பாகச்' சென்றடைந்தது.

தமிழ்நாட்டில் மட்டுமல்ல, தமிழ் மொழி தவழும் அனைத்து நாடுகளிலும் தந்தை பெரியார் தமிழ் எழுத்துச் சீர்திருத்தம் மூலமாகவும் உலா வருகிறார்.

தமிழைக் காட்டுமிராண்டி மொழி என்று சொன்ன தந்தை பெரியார், ஏன் இந்த எழுத்துச் சீர்திருத்தத்தைச் செய்தார்?

தமிழ் வளர்ச்சி அடையவேண்டும். உலகெங்கும் எளிதில் பரவவேண்டும் என்ற நல்லெண்ணத்தால் அல்லவா!

நேற்று நடைபெற்ற தமிழுக்கு என்ன செய்தார் பெரியார்?'' என்ற நூலினை வெளியிட்ட கவிஞர் ஈரோடு தமிழன்பன் அவர்கள்.

தந்தை பெரியார் தமிழைப்பற்றி தெரிவித்த விமர்சனம் என்பது நட்பு விமர்சனமாகும்; எதிரிகள் வைத்ததோ பகை விமர்சனம் என்று ஆழமான கருத் துச் செறிவினை முன் வைத்தார் ஈரோடு தமிழன்பன்.

இதுதானே துல்லியமான கருத்தாழமிக்க படப் பிடிப்பு.

இதழ்களுக்குப் பெயர் சூட்டியதில்கூட தந்தை பெரியார் தமிழுக்கு சிறந்த அணிகலன்களைப் பூட்டி னார்.

குடிஅரசு', புரட்சி', பகுத்தறிவு', விடுதலை', உண்மை' என்று தனித்தமிழில்தானே சூட்டினார். அழகு தமிழ் மட்டும் இதில் குடிகொண்டு மணம் வீசுவதாகக் கருதக்கூடாது. இதழின், ஏட்டின் பெயரேகூட, அதன் நோக்கினை வெளிப்படுத்தச் செய்த தந்தை பெரியார் அவர்களின் நுண்மான் நுழைபுலத்தை எண்ணிப் பார்க்கவேண்டும்.

முதலையுண்ட பாலகனை மீட்டது தமிழ், எலும்பைப் பெண்ணுருவாக்கியது தமிழ், மறைக்கதவைத் திறந்தது தமிழ் என்று அற்புதங்கள் என்ற பெயரால் மூடநம்பிக் கைகளைப் பூட்டித் தமிழை ஊர்வலமாகக் கொண்டு செல்லுவதை எள்ளி நகையாடி, தமிழை அறிவியல் ஆசனத்தில் அமர்த்தவேண்டும் என்று எண்ணியவர், செயல்பட்டவர் தந்தை பெரியார்.

அந்த வகையில் தமிழர் தலைவர் ஆசிரியர் அவர்களால் எழுதப் பெற்ற, தொகுக்கப் பெற்ற தமிழுக்கு என்ன செய்தார் பெரியார்?'' என்ற நூல், காலத்தின் தேவையைக் கருதி திராவிடர் கழக (இயக்க) வெளியீடாக வெளிவந்தது.

வெளியீட்டு விழா மேடையிலேயே வரிசை வரிசையாக வந்து வெகுமக்கள் நூலாசிரியரிடம் பெற்றுச் சென்றனர். ரூ.180 இந்நூலின் நன்கொடை - வெளியீட்டு விழாவின் சிறப்புக் கருதி, பொங்கல் பரிசாக ரூ.30 தள்ளுபடி செய்யப்பட்டு, ரூ.150-க்கு வழங்கப்பட்டது.

புத்தகச் சந்தையில் பெரியார் சுயமரியாதைப் பிரச்சார நிறுவனத்தின் சார்பில் நான்கு கடைகள் இயங்கின. அக்கடையில் வாசகர்களைச் சந்தித்தார் நூல் ஆசிரியர், ஆசிரியர் மானமிகு கி.வீரமணி அவர்கள். அங்கும் ஏராளமான தோழர்கள் நூல்களை வாங்கி, நூலாசிரியரிடம் கையொப்பம் பெற்றுக்கொள்வதில் ஆர்வம் காட்டினர்.

கவிஞர் ஈரோடு தமிழன்பன்

நூல் வெளியீட்டு விழாவின் வரவேற்புரையை திராவிடர் கழகப் பொருளாளர் வீ. குமரேசன் வழங் கினார். திராவிடர் கழகத் துணைத் தலைவர் கவிஞர் கலி.பூங்குன்றன் தலைமை வகித்தார். நூலினைக் கவிஞர் ஈரோடு தமிழன்பன் வெளியிட்டார்.

அவர் தன் உரையில் முத்தாய்ப்பாகக் கூறியதாவது:

1949 ஜனவரி 15 16 ஆகிய நாள்களில் பொங்கல் விழாவினையொட்டி சென்னை பிராட்வேயில் தந்தை பெரியார் திருக்குறள் மாநாட்டினை நடத்தினார்.

அதேபோல, தமிழுக்கு என்ன செய்தார் பெரியார்'' எனும் இந்நூலினை நமது ஆசிரியர் அவர்கள் எழுதி, அதன் வெளியீட்டு விழாவையும் பொங்கலையொட்டி இங்கு வெளியிட்டு இருப்பது மிகவும் பொருத்தமானது'' என்று எடுத்த எடுப்பிலேயே கூறி, ஒரு கலகலப்பை ஏற்படுத்தினார். இந்நூல் தமிழர்களுக்குக் கிடைத்த அரிய பொங்கல் பரிசு என்றும் கூறினார்.

கொள்கைப் பிரச்சார நோக்குதான் தந்தை பெரியாரிடத்தில் இருந்தது - என்பதை கவிஞர் ஈரோடு தமிழன்பன் அவர்கள் ஓர் எடுத்துக்காட்டுடன் விளக்கினார்.

திருக்குறள் நூலை தொடக்கத்தில் எட்டணா விலை போட்டு மக்கள் மத்தியில் பரப்பினார். அடுத்த பதிப்பின் விலை அய்ந்தணா என்றார்.

அய்ந்தணா என்பது கட்டுப்படியாகும் விலை என்பதால், அதன் விலையைக் குறைத்ததாக தந்தை பெரியார் குறிப்பிட்டதை கவிஞர் தமிழன்பன் அவர்கள் சொன்னபோது, பெரும்பாலோருக்கு அது ஒரு புதிய தகவலாக இருந்ததோடு மட்டுமல்லாமல், தந்தை பெரியாரின் தன்னிகரில்லா பண்பாட்டின் பெற்றியைப் பறைச்சாற்றுவதாக இருந்தது.

தமிழுக்குப் பெருமை என்பது கல்தோன்றி மண் தோன்றாக் காலத்தே முன்தோன்றியது என்பது அல்ல'' என்று தந்தை பெரியார் குறிப்பிட்டதை எடுத்துச் சொன்ன கவிஞர் அவர்கள், தமது படைப்பால், கருத்தால் மனிதன் ஒரு அங்குலமாக வளர்ச்சியடைய, பயனடையச் செய்யும் ஒருவனே புலவன்'' என்று தந்தை பெரியார் சொன்னதையும் குறிப்பிட்டார்.

எழுத்தாளர் இமையம்

நூலினைப் பெற்றுக்கொண்டு உரையாற்றிய எழுத்தாளர் இமையம் அவர்கள் முழு நூலினையும் பிழிந்து சாறாகக் கொடுத்தார்.

இப்படி ஒரு நூலினைக் கொண்டு வந்த ஆசிரியரின் வயது 86 என்று நம்பவே முடியவில்லை. 26 வயது இளைஞனின் உழைப்பு இந்நூலில் காணப்படுகிறது என்றார்.

நூறு ஆண்டுகளுக்கு மேலாக தந்தை பெரியார்மீது சுமத்தப்பட்ட பழியை இந்நூல் பழிவாங்கி விட்டது என்று அவர் சொன்னபொழுது பலத்த கரவொலி பார்வையாளர் பகுதியிலிருந்து.

காரல் மார்க்ஸ், ஏங்கல்ஸ் வெளியிட்ட கம்யூனிஸ்டு அறிக்கையை தமிழில் மொழி பெயர்த்து இந்தியாவிலேயே முதன்முதலாக வெளியிட்டவர் தந்தை பெரியார். அதுபோலவே, அண்ணல் அம்பேத்கர் அவர்களின் ஜாதி ஒழிப்பு' என்ற நூலையும் தமிழில் கொண்டு வந்தவரும் தந்தை பெரியாரே!

இந்நூலில் இடம்பெற்றுள்ள மொழி ஆராய்ச்சி'' என்னும் தந்தை பெரியார் அவர்களின் கட்டுரையை ஒவ்வொருவரும் படிக்கவேண்டும்'' என்றும் கேட்டுக்கொண்டார்.

தமிழ் மட்டுமல்ல, தமிழிசையை வளர்த்தெடுப் பதற்கு தமிழிசை மாநாட்டை நடத்தியவரும் தந்தை பெரியாரே!

தமிழ்மீது வெறும் கற்பிதங்களை சுமத்தக்கூடாது என்பதுதான் தந்தை பெரியார் அவர்களின் கருத்தாக இருந்ததையும் எழுத்தாளர் இமையம் எடுத்துக்காட்டினார்.

பேராசிரியர் அவ்வை நடராசன்

தஞ்சைத் தமிழ்ப் பல்கலைக் கழக மேனாள் துணைவேந்தர் அவ்வை நடராசன் அவர்கள்,

இந்நூல் தமிழர்களிடையே ஒரு புத்துணர்வை ஏற்படுத்தக் கூடியது என்றார்.

தமிழ்நாட்டில் தமிழ் - தமிழர் நிலை என்னவாக இருந்தது என்பதற்கு எடுத்துக்காட்டாக ஒரு நிகழ்வை நினைவுபடுத்தினார்.

திருவையாற்றில் தியாகையர் உற்சவம் நடந்தது. அதில் தண்டபாணி தேசிகர் சித்தி விநாயகனே'' என்ற ஒரு தமிழ்ப் பாடலைப் பாடினார். அவ்வளவுதான், தமிழில் பாடியதால் சந்நிதானம் தீட்டாயிடுத்து என்று கூறி, அதனை சுத்திகரித்த பிறகுதான் - தீட்டுக் கழித்த பிறகுதான் அரியக்குடி ராமானுஜ அய்யங்கார் பாடினார் என்பதை நினைவுபடுத்தினார் - நமக்கு அவ்வையாகக் கிடைத்த பேராசிரியர் அவ்வை நடராசன் அவர்கள். (அதனை மய்யப்படுத்திதான் கலைஞர் அவர்கள் குடிஅரசு' இதழில் (9.2.1946) தீட்டாயிடுத்து' என்ற கட்டுரையைத் தீட்டினார்).

நூலாசிரியரின் ஏற்புரை

ஏற்புரை வழங்கிய நூலாசிரியர் ஆசிரியர் கி.வீரமணி அவர்கள் 25 மணித்துளிகளில் அரிய கருத்துகளையும், தகவல்களையும் வாரி வழங்கினார்.

தமிழ்நாட்டின் முதல் பேராசிரியர் தந்தை பெரியார்; அவர் வகுப்புகள் எல்லாம் மாலைப் பல்கலைக் கழகமாக மக்கள் மத்தியில் அந்த வகுப்புகள் நடைபெறும் என்று அறிஞர் அண்ணா அவர்கள் குறிப்பிட்டதை சுட்டிக்காட்டினார்.

தமிழ்மொழி படித்த பேராசிரியர்களின் அன்றைய நிலை என்ன? என்பதை ஓர் எடுத்துக்காட்டுடன் விளக்கினார்.

சென்னை மாநிலக் கல்லூரியில் தமிழ்ப் பேராசிரி யராக இருந்த பெரும்புலவர் கா.நமச்சிவாயனார் அவர்களுக்கு மாத ஊதியம் ரூ.81. அதேநேரத்தில், சமஸ்கிருதப் பேராசிரியர் குப்புசாமி சாஸ்திரிக்கோ ரூ.300. இந்த வருண வேறுபாட்டை ஒழித்து தமிழுக் குரிய தன்மானத்தை மீட்டுத் தந்தவர் தந்தை பெரியார்.

வறுமையில் வாடிய தமிழ்ப் புலவர்களுக்கு வலது கை செய்ததை இடது கை அறியாது என்பதுபோல, அவர்களுக்கு அவ்வப்பொழுது உதவி செய்து வந்தவரும் தந்தை பெரியாரே!

சென்னை பல்கலைக் கழகத்தில் மறைமலை அடிகளாரின் அறிவுரைக் கொத்து' நூல் பாடத் திட்டத்தில் வைக்கப்பட்டிருந்தது. சமஸ்கிருதத்தைப் பற்றி அடிகளார் குறிப்பிட்ட பகுதியை எதிர்த்துப் பார்ப்பனர்கள் குரல் கொடுத்தனர். தந்தை பெரியாரோ அறிவுரைக் கொத்துக்கு ஆதரவு தெரிவித்தார்.

அப்பொழுது அண்ணா அவர்கள் முதலமைச்சர். அதுகுறித்து ஆய்வு செய்ய  டாக்டர் மு.வ. அவர்கள் தலைமையில் ஒரு குழு அமைக்கப்பட்டது. அடிகளாரின் நூல் பல்கலைக் கழகப் பாடத் திட்டத்தில் தொடர்ந்தது என்ற ஒரு தகவலை தன் உரையில் பகன்றார் நூல் ஆசிரியர். இதுபோன்ற தகவல்கள் புதிய தலைமுறையினருக்குப் புதிய விருந்து என்பதில் அய்யமில்லை.

பெரியார் புத்தக நிலைய மேலாளர் த.க.நடராசன் நன்றி கூறிட, பிற்பகல் 5.30 மணியளவில் நூல் வெளியீட்டு விழா நிறைவு பெற்றது. ஏராளமான பார்வையாளர்கள் நிகழ்ச்சியில் ஆர்வத்தோடு பங்குகொண்டனர்.

Banner
Banner