மின்சாரம்

*கிடுகிடுக்க வைத்த பேரணி - உரத்துக் கேட்ட கொள்கை முழக்கம்

*கிழியட்டும் ஜாதி என்ற பறை முழக்கம்!

*மயிர்க் கூச்செறிந்த வீர விளையாட்டு

*கருத்தரங்கக் கர்ச்சனைகள்!

*கழகப் பொறுப்பாளர்களின் கருத்துரைகள் - காலக்கல்வெட்டான தீர்மானங்கள்!

சென்னை மண்டல திராவிடர் கழக இளைஞர் எழுச்சி மாநாடு "திக்கெட்டும் பாய்வோம்! திராவிடத்தைக் காப்போம்!'' என்ற எழுச்சி முழக்கத்தோடு நேற்று (12.5.2018) சனி மாலை 5 மணியளவில் தொடங்கப்பட்டது.

மாநாட்டையொட்டி புழல் முதல் பொன்னேரிவரை எங்கு பார்த்தாலும் சுவர் எழுத்துகள் - கழகத் தோழர் ஓவியர் புதுவயல் இரணியனின் கைவண்ணம் பளிச் சிட்டது. எழுத்துகளும், பதாகைகளும், வண்ண வண்ண சுவரொட்டிகளும் மாநாட்டின் நோக்கத்தைப் பறைசாற்றின.

சாலையின் இருமங்கிலும் கழகக் கொடி பட்டொளி வீசிப் பறந்து கொண்டிருந்தது.

மாலை 5.30 மணிக்கு பொன்னேரி பேரூராட்சி அலு வலகம் அருகில் பேரணி மாநில இளைஞரணி துணைச் செயலாளர் பொழிசை கண்ணன் தலைமையில், மண்டலக் கழகச் செயலாளர் வி.பன்னீர்செல்வம் கொடியசைத்திட அதிர்வேட்டு கொள்கை முழக்கத்துடன் புறப்பட்டது.

பேரணிக்குக் கீழ்க்கண்ட தோழர்கள் முன்னிலை வகித்தனர்.

மாநில மாணவரணி துணை செயலாளர் நா.பார்த்திபன், கும்மிடிப்பூண்டி மாவட்ட மாணவரணி அமைப்பாளர் சு.எழில், ஆவடி மாவட்ட இளைஞரணி செயலாளர் வை.கலையரசன், தாம்பரம் மாவட்ட இளைஞரணி செயலாளர் சட்டநாதன், ஆவடி மாவட்ட இளைஞரணி அமைப்பாளர் க.கலைமணி, தென்சென்னை மாவட்ட இளைஞரணி அமைப்பாளர் க.பவன்குமார், தாம்பரம் மாவட்ட இளைஞரணி அமைப்பாளர் இரா.கதிர்வேல், வடசென்னை மாவட்ட இளைஞரணி அமைப்பாளர் வ.தமிழ்ச்செல்வன் ஆகியோர் முன்னிலை வகித்தனர்.

பெரியார் பிஞ்சுகள் முன்வரிசையில் கழகக் கொடியைப் பிடித்து நிற்க  வரிசைக்கு இருவர் வீதம் கழக மகளிர் அணியினரும் தொடர்ந்து இளைஞரணி, மாணவரணி மற்றும் கழகத் தோழர்களும் அணிவகுத்து நின்ற காட்சி இராணுவ மிடுக்காக ஜொலித்தது. ஒவ்வொரு தோழரின் கரத்திலும் கழகக்  கொடி அல்லது கொள்கை முழக்கப் பதாகை கட்டாயம் காட்சி அளித்தது.

பெரியார் வீர விளையாட்டுக் கழகத்தினர் பேரணியில் சிலம்பாட்ட சாகசங்களை நடத்திக் காட்டினர். அந்தக் குழுவில் சிறுவர்களும் இடம்பெற்று நடத்திக் காட்டிய சிலம்ப விளையாட்டுகள் மயிர்க் கூச்செறியச் செய்தன.

புத்தர் பறை இசைக் குழுவினர் தூள் பரப்பினர். கிழியட்டும் ஜாதி என்பது இலட்சிய முழக்கமாக இருந்தது. கழக மகளிர் அணியினர் தீச்சட்டியை ஏந்திப் போர் முழக்கமிட்டனர்.

தீச்சட்டி இங்கே மாரியாத்தாள் எங்கே?'' என்று மகளிரே தீச்சட்டி ஏந்தி முழக்கமிட்டு வந்தது பொது மக்களுக்கு ஒரு வகையில் மிரட்சியாக'க்கூட இருந்தது என்று சொல்லலாம். சிந்திக்கவும் தூண்டியது.

கழக மகளிர் அணி - மகளிர்ப் பாசறையைச் சேர்ந்த தோழர்கள் தமிழீழம், டார்வின் சூர்யா, விஜயலட்சுமி, ஜெயந்தி, சுபா மற்றும் சமரன், மனோஜ், மணிகண்டன், செல்வக் கணபதி, முகிலன், மணிமாறன் ஆகியோர் தீச்சட்டி ஏந்தி வந்தனர்.

கடவுள் சக்தி என்று சொல்லி அலகுக் குத்தி பக்தர்கள் தேர் இழுப்பார்கள் அல்லவா! பக்திக்கும் அதற்கும் சம்பந்தம் இல்லை - இதோ பார் கடவுள் இல்லை என்று முழக்கமிட்டு முதுகில் அலகுக் குத்தி கார் இழுத்துக் காட்டுகிறோம் என்று பறைசாற்றி, பொழிசை கண்ணன், சரவணன் ஆகியோர் இழுத்து வந்து அசத்தினர். காரினை அனாசியமாக இழுத்து வந்ததுடன் நிற்கவில்லை, கடவுள் இல்லை, இல்லவே இல்லை என்று முழக்கமிட்டு வந்த காட்சியை இளைஞர்கள் பார்த்து வியந்தனர்.

கடவுள் சக்தி' என்று சொல்லித் தேர் இழுக்கும் பக்தனே! கடவுள் இல்லை என்று சொல்லி கார் இழுக்கும் கருஞ்சட்டைத் தோழர்களைப் பார்த்தீயா, பார்த்தியா'' என்று முழக்கமிட்டு வந்த காட்சி தனிச் சிறப்பு! இந்த இளைஞர்கள் தங்களை வருத்திக்கொண்டே, மக்களுக்குப் பகுத்தறிவுத் தீயைக் கொளுத்தும் கொள்கை செயல்பாட்டினைப் பலதரப்பு மக்களும் பாராட்டிச் சொன்னதைக் கேட்க முடிந்தது.

பேரணியை ஆயிரக்கணக்கான பொதுமக்கள் திரண்டு நின்று பார்த்து வியந்ததும், பாராட்டியதும் கழகத்தின் முயற்சிக்குக் கிடைத்த வெற்றியாகவே கருதவேண்டும். முக்கிய வீதிகள் வழியாக பேரணி மாநாடு நடைபெறும் பொன்னேரி அரிஅரன் கடைவீதிக்கு வந்து சேர்ந்தது.

வரும் வழியில் இருந்த தந்தை பெரியார், அண்ணல் அம்பேத்கர், பச்சைத் தமிழர் காமராசர், அறிஞர் அண்ணா ஆகியோர் சிலைகளுக்கு  கழகத் துணைத் தலைவர் கலி.பூங்குன்றன், பொதுச்செயலாளர்கள் வீ.அன்புராஜ், தஞ்சை இரா.ஜெயக்குமார் ஆகியோர் மாலை அணிவித்து வந்தனர். அத்தகு இடங்களில் எல்லாம் வெகுமக்கள் நிறைந்து காணப்பட்டனர். அங்கு பெரியார் வீர விளையாட்டுக்காரர்கள் சிலம்ப சாகசங்களை நிகழ்த்திக் காட்டிய வண்ணம் இருந்தனர்.

பேரணி முக்கிய வீதிகள் வழியாக சுமார் 2 கிலோ மீட்டர் தூரம் அமைதிக்குப் பங்கமின்றி - பொதுமக்களின் ஒத்துழைப்புடன் நடந்தது குறிப்பிடத்தக்கதாகும். இப்படி நடந்ததில் காவல்துறையினருக்கு அளவுகடந்த மகிழ்ச்சியாகும்.

கலைமாமணி பன்னீர்செல்வம் இசை மழை!

பேரணி ஒரு பக்கம் வந்து கொண்டே இருக்க, மாநாட்டு மேடையில் கலைமாமணி'' திருத்தணி டாக்டர் பன்னீர்செல்வம் குழுவினரின் பகுத்தறிவு இன்னிசை தேன்மழை பொழிந்து கொண்டிருந்தது. அப்பொழுதே மேடையின் முன்புறம் அமைக்கப்பட்டிருந்த இருக்கைகள் நிரம்பி வழிந்தன.

மாநாட்டு மேடை கலை வண்ணத்துடன் கம்பீரமாகக் காட்சி அளித்தது.

திராவிடர் கழகத் தலைவர் ஆசிரியர் கி.வீரமணி அவர்களின் ஆசிரியரும், ஆசானுமாகிய ஆ.திராவிடமணி அவர்கள் பொன்னேரியையடுத்த ஆசானப்புதூரைச் சேர்ந்தவர் என்பதால், அரங்கத்திற்கு அவர்பெயர் சூட்டப்பட்டு மேடையின் முகப்பில் அவர் படமும் அணி செய்யப்பட்டது.

பொன்னேரியில் பகுத்தறிவாளர் கழகத்தின் முன்னோடியாக இருந்து அருந்தொண்டாற்றிய ஆசிரியர் மறைந்த சந்திரராசு அவர்களின் பெயர் மாநாட்டு மேடைக்குப் பொருத்தமாகச் சூட்டப்பட்டு அவர் படமும் காட்சியளித்தது. அந்த இருபெரும் இயக்க வீரர்கள்பற்றி தமிழர் தலைவர் மாநாட்டில் குறிப்பிட்டபோது உள்ளூர் மக்கள் பெருமகிழ்ச்சியில் கைதட்டி ஆரவாரம் செய்தனர். (ஆசிரியர் சந்திரராசு அவர்களின் வாழ்விணையருக்குக் கழகத் தலைவர் சால்வை அணிவித்துச் சிறப்பு செய்தார்).

மாநாட்டுக் கருத்தரங்கம் தொடங்குமுன் பெரியார் வீர விளையாட்டுக் கழகத்தினரின் சிலம்பம் மற்றும் சாகச விளையாட்டுகளும், புத்தர் கலைக் குழுவினரின் பறை இசையும் பட்டையைக் கிளப்பின.

கும்மிடிப்பூண்டி மாவட்ட இளைஞரணி தலைவர் சு.நாகராசு வரவேற்புரை ஆற்றினார்.

சென்னை மண்டல இளைஞரணி செயலாளர் ஆ.இர.சிவசாமி மாநாட்டுக்குத் தலைமை வகித்து, புரட்சிக் கவிஞரின் பாடலை எடுத்துக் காட்டி திராவிடன் என்பதில் உள்ள பெருமிதத்தை விளக்கினார்.

மாநாட்டுக்குக் கீழ்க்கண்டவர்கள் முன்னிலை வகித்தனர்.

சின்னக்காவனம் நடேசனார், கும்மிடிப்பூண்டி மாவட்ட இளைஞரணி செயலாளர் - க.ச.க.இரணியன், தாம்பரம் மாவட்ட இளைஞரணி தலைவர் - கெ.விஜயகுமார், வடசென்னை மாவட்ட இளைஞரணி தலைவர் - தளபதி பாண்டியன், ஆவடி மாவட்ட இளைஞரணி தலைவர் - வெ.கார்வேந்தன், தென்சென்னை மாவட்ட இளைஞரணி செயலாளர் - ச.மகேந்திரன், வடசென்னை மாவட்ட இளைஞரணி செயலாளர் - சோ.சுரேஷ்

கழகக் கொடியேற்றம்

கும்மிடிப்பூண்டி மாவட்ட திராவிடர் கழக மகளிர் பாசறை செயலாளர் கு.செல்வி தந்தை பெரியார் வாழ்க! அன்னை மணியம்மையார் வாழ்க! தமிழர் தலைவர் வாழ்க! தந்தை பெரியார் பணி முடிப்போம்! கடவுள் இல்லவே இல்லை என்ற முழக்கங்களுக்கிடையே திரா விடர் கழகக் கொடியை ஏற்றினார். அவர் தன்னுரையில் சனாதனத்தின் வேரை வீழ்த்தும் போர்க்குணத்தைக் கொண்டது திராவிடர் கழகக் கொடி,. இன இழிவை ஒழிக்கப் புரட்சி செய்வோம் என்ற தத்துவத்தைக் கொண் டது கழகக் கொடி என்று விரிவாக எடுத்துரைத்தார்.

திராவிடர் இனம் தலை நிமிர்ந்திட.. என்ற தலைப்பில் நடைபெற்றக் கருத்தரங்கத்திற்கு மாநில மாணவரணி செயலாளர் பிரின்சு என்னாரெசு பெரியார் தலைமை வகித்தார்.

பார்ப்பனர் அல்லாதாரை திராவிடர் என்று ஏன் அழைக் கிறோம்  என்றால் அந்த சொல்தான் நமது இனத்திற்கு எதிரி பார்ப்பான் - ஆரியன் என்ற அடையாளத்தைக் காட்டுவதாகும் என்று குறிப்பிட்டார்.

திராவிடம் என்று சொல்லும்பொழுது தான் ஆரியமும், காவிக் கூட்டமும் அலருகின்றன என்பதிலிருந்தே திராவிடத்தின் அருமையை உணரலாம் என்று எடுத்துக் கூறினார்.

மே 12 என்பது - திராவிடர் கழகத் தலைவர் ஆசிரியர் அவர்கள் முதன்முதலில் மேடையேறி உரையாற்றிய நாள் - இன்றோடு அது பவள விழாவை - (75 ஆண்டுகள்) காணுகிறது என்று அவர் சுட்டிக் காட்டியபோது பெரும் ஆரவாரம்!

பண்பாட்டுப் படையெடுப்பை முறியடிப்போம் எனும் தலைப்பில் உரையாற்றிய அமுதரசன் - பண்டைத் திராவிடத்தில் ஜாதி கிடையாது, அது ஒரு தாய், வழிச் சமுதாய அமைப்பு என்ற வரலாற்றை நினைவூட்டினார்.

உலகில் நாடே இல்லாத இனங்கள் இரண்டு உண்டு. ஒன்று ஆரியர், இன்னொருவர் யூதர் என்றும் குறிப்புக் காட்டினார்.

வரலாற்றில் முதன்மையான சமூக எழுச்சி போராட்டம் தந்தை பெரியார் தலைமை வகித்து நடத்தி வெற்றி கண்ட வைக்கம் போராட்டம். அந்த வைக்கத்திலிருந்து வந்த கே.ஆர்.நாராயணன்தான் இந்தியாவில் முதல் தாழ்த்தப் பட்ட சமூகத்தைச் சேர்ந்த குடியரசுத் தலைவர் என்றும் குறிப்பிட்டார்.

பகுத்தறிவுச் சுடர் ஏந்துவோம் என்ற தலைப்பில் உரையாற்றிய வழக்குரைஞர் ம.வீ.அருள்மொழி புத்தருக் குப் பிறகு பகுத்தறிவுக்கு முன்னுரிமை கொடுத்தவர் தந்தை பெரியார் என்றார்.

படித்த மனிதன் கூட இன்னும் சாணியைப் பிடித்து வைத்து சாமி என்று கும்பிடுகிறானே என்று எள்ளி நகையாடினார். பஞ்சகவ்யம் என்று மாட்டு மூத்திரத்தை தட்சணை கொடுத்துக் குடிப்பதையும் சாடினார்.

ஆண்டு என்பது கருப்பையில் பிறக்கக் கூடியதா என்று கேட்ட இந்த இளம் வழக்குரைஞர் தமிழ் ஆண்டு என்று கூறி 60 வருடங்களைச் சொல்லுகிறார்களே அதில் ஒரே ஒரு ஆண்டுக்காவது தமிழில் பெயருண்டா? என்ற அறிவார்ந்த வினாவையும் எழுப்பினார்.

தமிழக உரிமைகளை மீட்டெடுப்போம் எனும் தலைப்பில் வழக்குரைஞர் பா.மணியம்மை தன் உரையில் காவிரிப் பிரச்சினையில் தமிழ்நாடு வஞ்சிக்கப்படுவதை சுட்டிக் காட்டினார். இப்பிரச்சினையில் அனைத்துக் கட்சிக் கூட்டத்தில் எடுக்கப்பட்ட முடிவின்படி பிரதமரைச் சந்திக்க முதல் அமைச்சர் தேதி கேட்டும், பிரதமர் தேதி கொடுக்காத - இந்தியா ஜனநாயக நாடுதானா?

மாநிலங்களைப் பிரதமர் மதிக்கும் இலட்சணம் - இதுதானா என்ற அர்த்தமுள்ள கேள்வியை எழுப்பினார்.

மாநாட்டு மேடையில் வெளியிடப்பட்ட மூன்று நூல்கள் குறித்து வடசென்னை மாவட்ட திராவிடர் கழகத் தலைவர் வழக்குரைஞர் சு.குமாரதேவன் சிறிது நேரம் விளக்கிப் பேசினார். தனக்கு மொழிப் பற்றோ, தேசப் பற்றோ கிடையாது; எனது பற்று எல்லாம் மானுடப் பற்றுதான் என்று சொன்ன தலைவர் தந்தை பெரியார் தான் என்றார் வழக்குரைஞர் குமாரதேவன்.

திராவிடர் கழகப் பிரச்சார செயலாளர் வழக்குரைஞர் அருள்மொழி தனது உரையில் முக்கியமாகக் குறிப்பிட்ட தாவது.

தமிழ்நாட்டில் காவி ஊடுருவ முடியவில்லை என்றால் அதற்குக் காரணம் இங்குதான் பெரியார் பிறந்தார்.

திராவிட இயக்கத்தால் தமிழ்நாட்டு மக்கள் சமூக நீதி பெற்றனர். ஏராளமான அளவில் மருத்துவர்கள் தோன்றினார்கள். 'நீட்' என்ற பெயராலே இதனை ஒழித்துக்கட்டத் திட்டம் தீட்டிவிட்டனர். நம் வீட்டுக்குள் புகுந்து நம் பிள்ளைகளின் கண்களைப் பிடுங்கும் வேலையில் ஈடுபட்டுள்ளனர்.

நீட் தேர்வு எழுதிட 1 லட்சத்து 2000 பேர் விண்ணப் பித்தனர் அதில் 30 ஆயிரம் பேர் நீட் தேர்வு எழுதிட வில்லை என்றால் காரணம் என்ன?

தமிழ்நாட்டில் 'நீட்' தேர்வு எழுதிட வசதி செய்து கொடுக்க முடியாதா? வெளிமாநிலங்களுக்குச் சென்று எழுதிட எத்தனைப் பேருக்கு வாய்ப்பு இருக்கிறது - வசதியிருக்கிறது?

ஒருவர் எழுதுகிறார் - செம்மரம் வெட்ட வெளிமாநிலங் களுக்குப் போகும் போது 'நீட்' எழுதிட வெளி மாநிலத் துக்குப் போக முடியாதா என்று கேட்கிறார் என்றால் - இவர்களின் மனம் என்பது வெறும் மரக்கட்டைதானா? என்ற வினாவை எழுப்பினார் பிரச்சார செயலாளர்.

கடந்த ஆண்டு இந்த நீட்டுக்காக ஓர் அனிதாவை பறி கொடுத்தோம் என்றால் இவ்வாண்டு மூன்று தந்தை யர்களை இழந்தோம் என்ற வேதனையை வெளிப்படுத் தினார்.

திராவிடர் கழகப் பொதுச் செயலாளர் வீ.அன்புராஜ் தனது உரையில் இம்மாநாட்டிலே நிறைவேற்றப்பட்ட 12 தீர்மானங்களும் சம்பிரதாயமானவையல்ல, வருங்காலத் தில் அரசின் சட்டங்களாகக் கூடியவை. திராவிடர் கழகத்தின் கடந்த கால வரலாற்றை எடுத்துக் கொண்டால் இதன் உண்மை புரியும்.

பெண்களுக்குக் கல்வி உரிமை, சொத்துரிமை என்பவை எல்லாம் நமது இயக்கத்தில் நிறைவேற்றப்பட்ட தீர்மானத்தின் தொடர்ச்சிதான் என்று குறிப்பிட்டார்.

ஒரு வெளிநாட்டுத் தோழர் இன்று என்னை சந்தித்த போது கணியூரில் நடைபெற்ற திராவிடர் கழக மகளிர் அணி மாநாட்டின் சிறப்பைப் பற்றிப் பெருமையாகக் குறிப்பிட்டார்.

மாற்றங்கள், வளர்ச்சிகள் என்பது பற்றி மோடி பேசி யதை நம்பி ஏமாந்தவர்களுள் நானும் ஒருவன். அதற்காக நானும் கொஞ்சம் பாடுபட்டிருக்கிறேன்; ஆதரவும் தெரி வித்திருக்கிறேன்.

நான் நம்பியது நினைத்தது தவறு என்று இப்பொழுது உணர்கிறேன். திராவிடர் கழகத்துக்கு என்னால் இயன்ற உதவியைச் செய்வேன் என்று குறிப்பிட்டதைக் கழகப் பொதுச் செயலாளர் வீ.அன்புராஜ் எடுத்துக் கூறியதுதான் எத்தகைய உண்மை!

12 தீர்மானங்கள்

மாநாட்டுத் தீர்மானங்களை கழகப் பொதுச் செயலாளர் தஞ்சை இரா.ஜெயக்குமார் முன்மொழிய மக்கள் கடல் பலத்த கர ஒலிக்கிடையே ஆதரித்தது. திராவிடர் கழகத் துணைத் தலைவர் கலி.பூங்குன்றன் தனது உரையில், இந்தியா சுதந்திரம் அடைந்ததாகக் கூறப்பட்டு 71 ஆண்டுகள் ஆனநிலையிலும், இன்றைய மாநாட்டில் கூட தீண்டாமை ஒழிப்பைப் பற்றியும், ஜாதி ஒழிப்புக் குறித்தும் தீர்மானம் நிறைவேற்ற வேண்டிய நிலையில்தான் இருக்கிறோம். இந்தியா சுதந்திரம் அடைந்து விட்டதாக நாம்கூற முடியுமா?

தந்தை பெரியார் கேட்டாரே ஜாதி இருக்கும் இடத்தில் உண்மையான சுதந்திரம் இருக்க முடியுமா? சுதந்திரம் இருக்கும் நாட்டில் ஜாதிதான் இருக்கலாமா என்ற தந்தை பெரியார் கூற்றை நினைவூட்டினார்.

இந்திய அளவில் நிருவாகம், நீதித்துறைகளில் எல்லாம் பார்ப்பனர்கள் இன்னும் ஆதிக்கக் கொடிக்கட்டி பறந்து கொண்டு இருப்பதைப் புள்ளி விவரங்களுடன் எடுத்துக் கூறினார். இறுதியாகக் கழகத் தலைவர் நிறைவுரையாற் றினார். மாநாடு இரவு 10 மணிக்கு முடிந்தது. கும்மிடிப்பூண்டி மாவட்ட இளைஞரணி அமைப்பாளர் கா.கார்த்தி நன்றி கூறினார்.

மாநாட்டின் சிறப்பம்சம் எங்கு நோக்கினும் கருமேகமாக உலாவந்த கழக இளைஞர் பட்டாளம்தான்.


மின்சாரம்

"விடுதலை" கேள்விகளுக்கு விடை எங்கே? எங்கே??

(1)     கலாச்சார சீரழிவு, ஒழுக்கக் கேடு இவற்றின் ஒட்டு மொத்த குத்தகைக் காடாகக் காட்சியளிக்கும் இந்துக் கடவுள்களின் ஒழுக்கக் கேட்டை பட்டியல் போட்டுக் காட்டியதே 'விடுதலை' அதற்குத் 'துக்ளக்' விடையளிக்காதது ஏன்?  விடை இல்லையென்றால் 'துக்ளக்' கூட்டம் ஏற்றுக்கொண்டதாகக் கருதலாமா?

(2)     இந்து மதம் குறித்து விவேகானந்தர் கூறிய கருத்தை எடுத்துக் காட்டியிருந்தோமே அந்தப் பக்கம் ஏன் செல்லவில்லை?

(3)     கோயில் கருவறைகளுக்குள் பார்ப்பன அர்ச்சகர்கள், குருக்கள் அடித்த சல்லாபங்களை எடுத்துக் காட்டினோமே ஏன் அவற்றை எதிர் கொள்ளவில்லை?

(4)     பா.ஜ.க. ஆளும் மாநிலங்களில் பாலியல் வன்கொடுமை பா.ஜ.க.வினராலேயே நிகழ்த்தப்பட்டதற்கான ஆதாரங்களை அடுக்கினோமே -  அதற்கெல்லாம் திராவிட இயக்கம்தான் காரணமா என்று கேட்டோமே மவுனம் ஏன்?

(5)     இந்து மத சாமியார்களின் இலட்சணங்களைத் தோலுரித்துக் காட்டியதே "விடுதலை" - ஏன் விவாதிக்கவில்லை 'துக்ளக்'?

(6)     காம சூத்திரம் எப்படி வந்தது என்ற கேள்விக்குப் பதில் எங்கே?

(7)     சிற்றின்பம் என்பதுதான் இந்து மதத்தின் ஆணி வேராக உள்ளது என்ற கார்ல் மார்க்சின் எடுத்துக்காட்டுக்கு என்ன பதில்?

(8)     'எங்கள் கடவுள் கிருஷ்ணன் செய்த லீலைகளைத்தான் நானும் செய்தேன்' என்று நீதிமன்றத்திலேயே ஆசாராம் சாமியார் சொன்னது - அந்த சாமியாரை மன அமைதிக்காக அடிக்கடி பிரதமர் நரேந்திர மோடி சந்தித்ததையெல்லாம் படத்தோடு எடுத்துப் போட்டுக் காட்டினோமே - கண் மூடிக் கொண்டது ஏன் 'துக்ளக்'?

(9)     பக்திக்கும் ஒழுக்கத்துக்கும் சம்பந்தமில்லை என்று திருமுருக கிருபானந்த வாரியார் - ஏன் 'துக்ளக்' இதழும் (கார்ட்டூனோடு) கூறியதை எடுத்துக்காட்டினோமே ஏன் பதில் இல்லை? குருமூர்த்தி அய்யர்வாளே ஓடாமல் பதில் சொல்லுங்கள் பார்ப்போம்.

('துக்ளக்'கில் வெளிவந்த பதில் கட்டுரையில் விடுதலையில் எழுதியிருந்த

இக்கேள்விகளுக்கெல்லாம் விடை இல்லையே ஏன்? ஏன்??)


"கூறுகெட்ட குருமூர்த்திகளே கேட்பீர்!" என்று 'விடுதலை'யில் எழுதப்பட்ட மின்சாரத்தின் மூன்று கட்டுரைகளுக்குப் பதில் சொல்லுவதாக நினைத்துக் கொண்டு இந்த வார 'துக்ளக்'கில் (16.5.2018 பக்கம் 22,23) "சேற்றைவாரி இறைப்பது 'துக்ளக்'கா? 'விடுதலை'யா? என்ற தலைப்பில் இரண்டு பக்கங்களில் பதில் சொல்ல முயற்சித்திருக்கிறது - வரவேற்கிறோம்.

ஆனால் 'விடுதலை' எழுப்பிய வினாக்களுக்குத்தான் விடையில்லை.

"பெரியாரின் சமுதாய சீர்திருத்த சிந்தனைகளுக்கு அறிவுசார் சொத்துரிமை (மிஸீtமீறீறீமீநீtuணீறீ றிக்ஷீஷீஜீமீக்ஷீtஹ்) பெரியாரு டையது அல்ல. பல்லாயிரக்கணக்கான ஆண்டுகளுக்கு முன்பு வடநாட்டில் வாழ்ந்த சாருவாக முனி, குறிப்பாக ஆன்மிக மற்றும் பாலுறவு சம்பந்தப்பட்ட விஷயங்களில் சமஸ்கிருதத்தில் என்ன கூறினாரோ அதைத்தான் பெரியார் இங்கு தமிழில் கூறினார் என்ற கருத்தை 'விடுதலை' மறுக்கவில்லை" என்கிறது 'துக்ளக்'.

இப்பொழுது பிரச்சினை கடவுள் மறுப்பு குறித்து, வேத எதிர்ப்புகள் குறித்து யார் சொல்லியிருந்தாலும் அதனை 'துக்ளக்' ஏற்றுக் கொள்கிறதா என்பதுதான் முதல் கேள்வி.

தந்தை பெரியார் கூறும் இந்தக் கருத்துகளுக்குப் பதில் சொல்ல வக்கில்லாத கையறு நிலையில், பார்ப்பனீயத்துக்கே உரித்தான திசை திருப்பும் திரிநூல் புத்தியோடு இந்தக் கருத்தையெல்லாம் பெரியாராக சொல்லவில்லை; இன்னொருவர் சொன்னதைத்தான் பெரியார் சொல்லுகிறார் என்று சொல்லுவது தான் 'துக்ளக்'கின் குற்றச்சாட்டா?

அப்படிப் பார்க்கப் போனால் வேத எதிர்ப்பு என்பது புத்தர் காலத்தில் அவரால் உயர்த்திப் பிடிக்கப்பட்ட ஒன்றுதான். புத்தர் எதிர்த்தார் என்பதற்காக பெரியாரும் எதிர்க்கக் கூடாதா? அப்படி எதிர்த்தால் பெரியார் ஒன்றும் புதிதாக சொல்லவில்லை; புத்தர் சொன்னதைத்தான் பெரியாரும் சொன்னார் என்று சொல்லப் போகிறதா துக்ளக்?

புத்தர் சொன்னாலும் சரி, சாருவாகனர் கூறினாலும் சரி, பெரியார் சொன்னாலும் சரி - அவர்கள் எல்லோருமே வேதங்களை வேர் வரை சென்று பந்தாடியிருக்கிறார்களே - அதற்கு என்ன பதில் பார்ப்பனர்களே என்பதுதான் நம் கேள்வி.
சாருவாகன் சொன்னால் ஏற்போம், பெரியார் சொன் னால் ஏற்க மாட்டோம் என்ற இரட்டை அளவு கோலை வைத்துள்ளனரா?

சரி, 'துக்ளக்' வழிக்கே வருவோம். சாருவாக முனி கூறியதைத்தான் பெரியாரும் கூறியிருக்கிறார் - சொந்த சரக்கல்ல பெரியாருடையது என்று காட்டி ஓர் அற்ப சந்தோஷம் அடையும் 'துக்ளக்'கைக் கேட்கிறோம்.

அப்படியானால் பெரியார் கருத்துகளை வரவேற்க வேண்டியதுதானே! எதற்காகக் கோணல் கழி வெட்ட வேண்டும்? பெரியாரால்தான் கலாச்சாரம் சீரழிந்து விட்டது என்று எழுத வேண்டும்? பெரியார் கருத்து எப்போது போற்றப்படத் துவங்கியதோ அப்போதே கலாச்சார சீரழிவு துவங்கிவிட்டது என்று எழுதுவானேன்?

அப்படி எழுதப் போய்தானே 'விடுதலை'க்கு பதிலடி கொடுக்க வேண்டிய அவசியம் ஏற்பட்டது.

'துக்ளக்'குக்கு ஏனிந்த தடுமாற்றம்?

'துக்ளக்' ஹிந்துத்துவா ஆதரவாளர்களையும் எதிர்த்து எழுதியதுண்டாம். அதன் காரணமாக அவர்களின் கடுமை யான விமர்சனத்துக்கு 'துக்ளக்' ஆளானதும் உண்டாம். இதன் மூலம் என்ன சொல்ல வருகிறது? 'துக்ளக்' ஒன்றும் பிஜேபி - சங்பரிவார்களுக்கு ஆதரவான இதழ் இல்லை என்பதற்காகத்தானே  இப்படி எழுதுகிறது!

'பா.ஜ.க.வைப் பிடித்த சனி' என்ற தலைப்பில்  'துக்ளக்'கில் வெளிவந்த கட்டுரைக்கு பா.ஜ.க. ஆதர வாளர்கள் கடுமையாகக் கண்டித்து முகநூலில் கருத்துகளை வெளியிட் டுள்ளதை அதற்கு ஆதாரமாகக் காட்டு கிறது 'துக்ளக்'.

உண்மைதான், 'துக்ளக்' கண்டித்து எழுதியது உண்மைதான். ஆனால் அந்தக் கண்டிப்பு எத்தன்மையது என்பதுதான் முக்கியமாகும்.

பிஜேபியின் எச். ராஜாவும், எஸ்.வி. சேகரும் வெளியிட்டு வரும் கருத்து களுக்கு கட்சிகளைக் கடந்து பொதுத் தளத்தில் கடும் எதிர்ப்பு வெடித்துக் கிளம்பிய நிலையில், அதனால் பிஜேபிக்குக் கெட்ட பெயர், சேதாரம் வரும்; ஆகையால், பிஜேபிக்குப் பாதகம் வந்து விடக் கூடாது என்னும் அதீத அக்கறையில் எழுதப்பட்ட கட்டுரை தானே தவிர பிஜேபிக்கு எதிரான ஒன்றல்ல.

தன் குழந்தைக்கு மாந்தம் வந்துவிடக் கூடாது என்று பரிதவிக்கும் தாயின் உணர்வு கொண்டது என்பதுதானே - அந்தக் கட்டுரை?

'துக்ளக்' - இது போன்ற இடங்களில் எல்லாம் இந்த இனஉணர்வோடு தான் எழுதியது என்பதிலிருந்தே பிஜேபியின்மீது அதற்கு இருக்கும் பந்த பாசத்தைப் புரிந்து கொள்ளலாம். அதுபோல மற்ற கட்சிகளுக்கு எழுதுமா?

'துக்ளக்'குக்கு ஒரு முக்கியமான கேள்வி உண்டு

இந்தியாவில் தோன்றிய சமூக சீர்திருத்தக்காரர்கள் எல்லோரும் புத்தர் முதல், ஜோதி பாபுலே, நாராயணகுரு, வேமண்ணா, அண்ணல் அம்பேத்கர், சித்தர்கள், தந்தை பெரியார் அனைவருமே பார்ப்பனர் எதிர்ப்பாளர்களாக - பார்ப்பனீயத்தை சல்லி சல்லியாகப் பதம் பார்க்கிறார்களே ஏன் - ஏன்?

ஏன் அக்கிரகார பாரதிகூட தண்டச் சோறுண்ணும் பார்ப்பனர் என்று தோலுரிக்கிறாரே ஏன் - ஏன்?

மூடங் கெடாதோர் சிகைநூல்
முதற் கொள்ளில்
வாடும் புவியும் பெருவாழ்வு மன்னனும்
பீடொன்றிலனாகும் ஆதலாற் பேர்த்துணர்ந்
தாடம்பர நூற் சிகையறுத்தல் நன்றே
என்று திருமந்திரத்தில்...                (பாடல் எண் 241)

பார்ப்பானின் உச்சிக்குடுமியையும், பூணூலையும் அறுக்க வேண்டும் என்று திருமூலர் கூடத்தான் சொல்லி யிருக்கிறார்.

குருமூர்த்தி அய்யர்களுக்கு குன்றிமணி அளவுக்கு மூளையிருந்தால் பார்ப்பனர்களைப் பெரியார் மட்டும் சாடவில்லை - வேதங்களைப் பெரியார் மட்டும் மட்டை இரண்டு கீற்றாகக் கிழிக்கவில்லை சாருவாகனனும் கிழித்தார் என்று எடுத்துக்காட்டுவாரா?

புத்தரின் ஆரிய வேத வேள்வி மறுப்பின் வெப்பத்தைத் தாங்கிக் கொள்ள முடியாத பார்ப்பனீயம் புத்தரையும் மகா விஷ்ணுவின் அவதாரம் என்று சொன்னது போலவே சாரு வாகனனின் வேத மறுப்பு - இறை மறுப்புக் கொள்கையை இந்து மதத்தின் ஒரு அம்சம் என்றும் ஆக்கிக் கொண்டனர். ஆதி சங்கரர் சாருவாகனின் கருத்தை வேத மதத்தின் உட்பொருள் என்று மாற்றியவர் ஆயிற்றே!

வேத மறுப்புத் தத்துவத்தைக் கூறிய வரையே வேத மதத்தின் உட்பொருள் என்று கூறும் இவர்களின் அறிவு நாண யத்தை - இந்த வெட்கம் கெட்ட நிலையை எப்படி மதிப்பிடுவது! எத்தனை ஆயிரம் வேண்டுமானாலும்  வெட்கத்தைப் பெருக்கி அவர்களின் கழுத்தில் மாலையாக சூட்ட லாம்!

அதே நேரத்தில் ஒன்றைக் குறிப்பிட வேண்டும் சாருவாகனனின் கூற்றுகளை உள்ளடக்கி சாருவாக மதம் என்று கலைக் களஞ்சியமும் சரி, என்சைக்ளோபீடியா பிரிட்டானிகாவும் சரி, அபிதான சிந்தாமணி யும் சரி ஒரே மாதிரியாக சொல்லுகிறதே - அந்த மாதிரி எந்த ஒரு மதத்தையும் தந்தை பெரியார் உருவாக்கவில்லை. மதம் என்பதை முற்றிலும் மறுக்கும் முழுப் பகுத்தறிவு நிலைதான் தந்தை பெரியாருடையது.

"'துக்ளக்' (13.9.2017) இதழில் 'சாமியார்களின் பின்னால் அலையும் மூடர்கள்'  என்ற தலைப்பில் வெளிவந்துள்ள கட்டுரையைப் படித்தபோது, 1944க்கு முந்தைய பெரியார் ஈ.வெ.ரா.வின் 'குடிஅரசு' இதழைப் படித்த உணர்வு எனக்கு ஏற்பட்டது.

1944க்கு முன் பெரியார் ஈ.வெ.ரா. தம் மீது முத்துசாமி வல்லத்தரசு,  ஜீவானந்தம் உள்ளிட்டோர் வெளிப்படுத்திய குற்றச்சாட்டுகளை அப்படியே வெளியிட்டு, 'குடிஅரசு' இதழில் எழுதிய விளக்கங்களை நான் படித்திருக்கிறேன். அது போலவே 'முரசொலி' இதழில் ஸ்டாலின் வெளிப் படுத்திய குற்றச்சாட்டை 'துக்ளக்' இதழில் வெளியிட்டு குருமூர்த்தி விளக்கத்தைப் படித்தபோது, அதுவும் என் ஞாபகத்திற்கு வந்தது. (1944க்கு முந்தைய 'குடிஅரசு' திசையில் 'துக்ளக்')".

இவ்வாறு  'துக்ளக்' எழுத்தாளர் எழுதியிருக்கிறார். அப்பாடி இப்பொழுதாவது பெரியாரைப் பற்றிப் பாராட்ட 'துக்ளக்'குக்கு மனம் வந்ததற்காக ஒரு பாராட்டு.

இந்த இடத்தில் மறக்காமல் குறிப்பிட வேண்டிய ஒன்று இருக்கிறது. 'சாமியார் பின்னால் அலையும் மூடர்கள்' என்னும் 'துக்ளக்' கட்டுரையில் (மறைந்த) காஞ்சி சங்கராச்சாரியார் ஜெயேந்திர சரஸ்வதி பற்றிக் குறிப்பிடாதது ஏன்? பெண்கள் விஷயத்தில் அவர் எவ்வளவு மோசம் என்று கொலையுண்ட சங்கரராமனின் (அவர் சாதாரண மானவரல்லர் - சங்கர மடத்திலேயே இருந்தவர்தான் - காஞ்சி வரதராஜப்பெருமாள் கோயில் மேலாளரும்கூட) கடிதங்கள் ஒரு பெரிய பட்டியலையே வெளிப்படுத்துகிறதே!

அதை விட்டுத் தள்ளுங்கள் - பிரபல எழுத்தாளரும், அக்கரகாரப் பெண்மணியுமாகிய அனுராதா ரமணன் என்ன கூறினார்? சங்கர மடத்தின் சார்பில் பத்திரிக்கை நடத்த வேண்டும் என்பதுபற்றி ஆலோசிப்பதற்காக அழைத்து, தன் கையைப் பிடித்து இழுத்தவர்தான் ஜெயேந்திரர் என்று கண்ணீரும் கம்பலையுமாக தொலைக் காட்சிகளில் கதறினாரே! இதில் என்ன கொடுமை என்றால், அந்த அனுராதா ரமணன் மீதே பொய்யான தகவல் கூறித் திசை திருப்பியவர் தான் இந்தக் குருமூர்த்தி அய்யர் ('துக்ளக்' 29.12.2014 பக்கம் 34).

குருமூர்த்தியின் பொய்யுரையை நார் நாராக கிழித்துப் பேட்டி கொடுத்தார் அந்த எழுத்தாளர் அனுராதா ரமணன் (குமுதம் 10.1.2005 பக்கம் 61-63).

ஈ.வெ.ரா. அவர்களைப் போலவே, "சாருவாக முனி அப்படிக் கூறியதற்காக யாரும் அவரைத் தூற்றவில்லை" என்று 'துக்ளக்' கட்டுரையில் வெளிவந்துள்ள கருத்தானது, யாருடைய கருத்துக்காகவும் அவரைத் தூற்றாமல் அறிவுப் பூர்வமாகவே விமர்சிக்க வேண்டும் என்பதை உணர்த் துவது ஆகாதா என்று, தன் தோளைத் தட்டிக் கொள்கிறது 'துக்ளக்'.

இந்தக் கட்டுரையாளர் 'துக்ளக்' இதழைத் தொடர்ந்து படிக்காதவர்போல் தோன்றுகிறது.

கடந்த 2.5.2018 நாளிட்ட 'துக்ளக்'கைப் படித்துப் பார்க்கட்டும்.

"கலாச்சார சீரழிவை சமுதாய சீர்திருத்த அரசியல் இயக்கமாக பெரியாரும், அவருடைய சீடர்களும் ஆக்கினார்களாம்."

எவ்வளவுப் பெரிய அபாண்டம் - பெரியார் ஜாதி யையும், தீண்டாமையையும் ஒழிக்கப் பாடுபட்டதும், மூடநம்பிக்கைகளை எதிர்த்துப் பிரச்சாரம் செய்ததும், பெண்ணுரிமைக்காக குரல் கொடுத்ததும், சமூக நீதிக்காகத் தொடர்ந்து சமர்க்களம் கண்டதும், ஒழுக்கம் பொதுச் சொத்து, பக்தி தனிச் சொத்து என்று பரப்புரை செய்ததெல்லாம் கலாச்சார சீரழிவுகளா?

சீரழிவு என்பதற்கு இவர்கள் தனியாக அகராதி தயாரித்து வைத்துள்ளார்களா?

எத்தனை முறை சிறைச்சாலைகளைச் சந்தித்தார். நாட்டு நலனுக்காக!

தந்தை பெரியாரின் சமூக சீர்திருத்தத்தை அய்.நா.வே வியந்து பாராட்டி விருது வழங்கிய வரலாறெல்லாம் இந்த வன்கணாளர்களுக்குத் தெரியாதா?

ஒழுக்கச் சீரழிவின் ஒட்டு மொத்த உருவமாக இருப்பது இந்துமதம்தான் என்பதற்கு இந்து மதக் கடவுள்களின் ஒழுக்கத்தையே கேள்விக்குறியாக்கி இந்துக் கடவுள்களின் ஆபாசக் கிடங்குத்தனமானவற்றைப் பட்டியலிட்டது "விடுதலை" (27.4.2018).

இந்துக் கடவுள்களின் விபச்சாரத்தனத்தை, கற்பழிப்புப் படலத்தை எடுத்துச் சொல்லுவது தான் கலாச்சார சீரழிவு என்று 'துக்ளக்' கருதுகிறதோ!

இந்து மதத்தில் கடவுள்களும், கடவுளச்சிகளும், அதன் பரிவார்களும் நடந்து கொண்ட ஆபாசங்களை, ஒழுக்கக் கேடுகளை எடுத்து ஒரு நீண்ட பட்டியலையே வெளி யிட்டது "விடுதலை". அதற்கு மறுப்போ, பதிலோ சொல்ல முடியாத நிலையில் 'துக்ளக்' கட்டுரையாளர் மிக மிக சாமர்த்தியமாக என்ன எழுதுகிறார்?

"'விடுதலை' கட்டுரையில் புராணங்களில் உள்ள 'ஆபாசங்கள்' தொடர்பான தகவல்கள் வெளி வந்துள்ளன. அவை தொடர்பான எனது பதிவுகளுக்கு, இதுவரை அறிவுப் பூர்வமாக 'விடுதலை'யிலிருந்து மறுப்பு ஏதும் வரவில்லை. இனி வந்தாலும் வரவேற்பேன்" என்று பூடகமாக எழுதுகிறதே துக்ளக். எப்பொழுது எழுதினார் - எந்தத் தேதி 'துக்ளக்'கில் வெளி வந்தது என்று குறிப்பிட வேண்டாமா?

எடுத்துக்காட்டுகளோ, தேதிகளோ ஆதாரங்களோ குறிப்பிட்டு எழுதுவது என்பது 'துக்ளக்'கின் அகராதியில் கிடையாது - இதையும் அந்தப் பட்டியலில் வைக்க வேண்டியதுதான்.

பார்வதியும், சிவனும் நூறு தேவ வருட காலம் புணர்ந் தனர் என்பதற்கெல்லாம் 'துக்ளக்' எழுத்தாளர் அறிவுப் பூர்வமான விளக்கத்தை வைத்துள்ளாராம். அப்படி விளக் கினால் அது இதைவிட ஆபாசமாகத் தானிருக்க முடியும்.
கடைசியில் 'துக்ளக்' கட்டுரை தந்தை பெரியாரிடம் சரண் அடைந்து விட்டதே!

"பொதுத் தொண்டருக்கான இலக்கணம், பொது மக்களுக்கும், பொதுச் சொத்துகளுக்கும், பொது அமைதிக்கும் ஊறு விளைவிக்காத ஆனால் காரியம் சாதிக்கும் போராட்டம் ஆகிய இரண்டிலும் ஆர்.எஸ்.எஸ். உள்ளிட்ட ஹிந்துத்துவா ஆதரவு மற்றும் எதிர்ப்பு அமைப்புகள் எல்லாம் ஈ.வெ.ரா. செயல்பூர்வமாக முன்னிறுத்திய வழியில் பயணித்தால் மட்டுமே தமிழின், தமிழ்நாட்டின் மீட்சி சாத்தியமாகும்" என்ற குறிப்புரையோடு முடித்திருக்கிறார் துக்ளக் கட்டுரையாளர்.

தொடக்கத்திலும், இடையிலும் எதை எதையோ எழுதிவிட்டு, கடைசிக் கடைசியாக பொதுத் தொண்ட ருக்கான இலக்கணம்  மக்களுக்கு, பொதுச் சொத்துக்கு, பொது அமைதிக்கும் ஊறு விளைவிக்காத ஆனால் காரியம் சாதிக்கும் போராட்டம் இரண்டிலும் பெரியாரைப் பின்பற்ற வேண்டும் என்று ஆர்.எஸ்.எஸ். உள்ளிட்ட ஹிந்துத்துவா வகையறாக்களுக்கு அறிவுறுத்தியுள்ள 'துக்ளக்' கட்டுரையாளரைப் பாராட்டுகிறோம்.

தந்தை பெரியார்மீது குற்றப் பத்திரிக்கை படிக்க  ஆரம் பித்து கடைசியில் தந்தை பெரியாரிடமே சரணடைந்து விட்டதே துக்ளக்!

இனி மேலாவது இந்த ஒப்பற்ற, உன்னத வழிகாட்டும் தலைவரைக் கொச்சைப்படுத்தி எழுத மாட்டார்கள் என்று நம்புவோமாக!

நாட்டு நடப்புகள் கோடை வெயிலைவிட சுட்டெரிக்கிறது. நீட் டெனும்  பெயரால்  தமிழ் மண் கட்டிக்காத்த சமூக நீதியின் கழுத்தில் கட்டாரி பாய்ச்சப்பட்டு விட்டது. அதன் விளைவு பட்டிக்காட்டானும், பஞ்சமனும், சூத்திரனும்  மருத்துவக்கல்லூரிக்குள் நுழைந்து ஸ்டெதாஸ் கோப்புடன் டாக்டர் என்ற தகுதியுடன் கம்பீரமாக வெளிவந்தானே - அந்த மாதிரியெல்லாம் இனி வரமுடியாது.

மாடு தின்னும் பறையா - உனக்கு மார்கழி திருநாளா? என்று நந்தனைப் பார்த்துக் கேட்ட கூட்டம், நீயெல்லாம் டாக்டரா - நாங்கள் எல்லாம் நோயாளிகளா? என்று ஆரியம் கேட்காமல் கேட்டு மருத்துவக் கல்லூரி இடங்களை யெல்லாம் வாரிச் சுருட்டிக் கொண்டு விட்டது. எந்த நுழைவுத்தேர்வை திமுக ஆட்சி ஒழித்ததோ, அந்த நுழைவுத் தேர்வுக்கு  நீட் என்று குஞ்சம் கட்டி ஒடுக்கப்பட்ட மக்களின் டாக்டர் கனவை தீவிர அவசரப் பிரிவில் படுக்க வைத்து விட்டது.

2017 நீட் தேர்வு எழுதும் அரசுப் பள்ளிகளில் படித்த மாணவர்களுக்குக் கிடைத்த இடங்கள் எத்தனை தெரியுமா? அய்ந்தே அய்ந்துதான்.

குதிரை குப்புறத் தள்ளியதோடு மட்டுமல்லாமல் குழியும் பறித்த கதையாக - ஏ குப்பனே, சுப்பனே - நீ தேர்வு எழுத சிக்கிமுக்குப்போ - ராஜஸ்தானுக்குப் போ என்று போகாத ஊருக்கு வழிகாட்டி விட்டது.

ஆரியம் எப்பொழுதும் மார்பை நிமிர்த்தி சமருக்கு  நேருக்கு நேர் வந்ததில்லை. மரத்தின் பின்னால் ஒளிந்து வாலியைக் கொன்ற இராமன் பரம்பரை இப்பொழுது அதே வேலையை செய்து விட்டது. நுழைவுத் தேர்வை ஒழித்த கருணாநிதியே - இதோ பார் அதிலும் கூர்மையான நீட் என்னும் வாளால் உங்கள் சமூக நீதி என்னும் சம்பூகனின் தலையை வெட்டுகிறோம் பார் என்று சவால் விட்டு கொல்லைப்புற வழியாகப் புகுந்து நம் கதையை முடித்து விட்டது ஆரியம். பார்ப்பனீயமும், கார்ப்பரேட்டும் கைக்கோத்து கலகம் விளைவிக்கிறது என்கிறார் நிவேதா சுந்தர் என்ற பெண்மணி முகநூலில். உயர்ஜாதிக் கூட்டம் நான்கு மடங்கு அதிகமாகத் தட்டிப் பறித்திருக்கிறது என்று முகநூல் நண்பர் ஒருவர் கூறுகிறார்.

நீட்டை ஆதரிப்பவர்கள் எல்லாம் யார்? எதிர்ப்பவர்கள் எல்லாம் யார்? என்று பார்த்தாலே சொடக்குப் போடுவதற்குள் விஷயம் தெரிந்து விடும்.

நீட் எழுத வெளிமாநிலம் சென்ற மூன்று மாண வர்களின் தந்தையர்கள் மாரடைப்பால் மரணக் குழிக்குத் தள்ளப்பட்டனர். இன்னும் எத்தனை நரபலிகள் ஆரியத்திற்குத் தேவையோ!

கொதிநிலையில் இருக்கிறது நாடு - இது ஒரு பக்கம். உழுதுண்டு வாழ்வாரே வாழ்வார் என்ற உன்னதத்தை உலகுக்கு வழங்கிய தமிழ்நாட்டு வயல்கள் எல்லாம் வறண்டு போய் வறுமையின் கோரப்பிடியில் சிக்கி விட்டன. விவசாயம் பாவத் தொழில் என்கிற மனுதர்ம வாதிகள் தமிழ்நாட்டை வஞ்சிக்கிறார்கள் - விவ சாயம் என்னும் விலா எலும்பை முறித்து விட்டார்கள். இந்தப் பஞ்சமனும், சூத்திரனும் பிறகு என்ன செய்வார்கள் பார்ப்போம் என்று பழி தீர்த்துக் கொண்டுள்ளனர். இது ஒரு பக்கம். வேலையில்லா திண்டாட்டம் என்னும் வெப்பு நோய் வாட்டி வதைக்கிறது.

பெண்கள் என்றால் போகப் பொருள் என்ற நிலையை உருவாக்கி விட்டது இந்துத்துவா கூட்டம்.

பச்சிளம் பெண்ணை கோயில் கர்ப்பக் கிரகத்தில் அடைத்து பலநாள்கள் பதறப்பதறச் சிதைத்து எச்சிலைப் போல தூக்கி எறிந்து விட்டனர்.

பெண்களுக்குப் பாதுகாப்பு என்பது குதிரைக் கொம்பாகி விட்டது. தாழ்த்தப்பட்ட மக்களுக்குப் பாதுகாப்பு அரணாக இருந்த வன்கொடுமைத் தடுப்புச்சட்டத்திற்கும் லாடம் கட்டியாயிற்று!. எங்கும் அவலம் - அவலம்! எங்கும் போதாமை - போதாமை! எங்கும் பற்றாக்குறை- பற்றாக்குறை!

செத்துச் சுண்ணாம்பான சமஸ்கிருதத்துக்குச் சிம்மாசனம்.

மூன்றாவது மொழியாக இருந்த ஜெர்மன் மொழிக்குக் கல்தா கொடுத்து விட்டு, அந்த இடத்தில் இறந்து போன பார்ப்பன சமஸ்கிருதத்துக்கு சட்டாம்பிள்ளை அந்தஸ்து.

தேசியக் கல்விக் கொள்கை என்று ஒன்று வருகிறதாம். குஷ்டரோகியின் கைகளில் வெண் ணெய் புட்டுப் போல இந்துத்துவாவாதிகளின்  கைகளில் ஆட்சி அதிகாரம் சிக்கிக் கொண்டதால், இப்பொழுது  இல்லையென்றால் வேறு எப்பொழுது? என்று  ஆரியம் அவசர அவசரமாக  ஆதிக்கபுரிக்கான  அஸ்திவாரத்தை பலமாகப் போட்டு வருகிறது.

இராமனை முன்னிறுத்துகிறார்கள் என்றால் என்ன பொருள்? திராவிடர்களைச் சிதைப்பதற்கான கத்தி தீட்டும் படலம் தொடங்கி விட்டது என்பதுதான்.

செத்துப்போன பசுமாட்டின் தோலை உரித்த தாழ்த்தப்பட்டத் தோழர்களின் தோலை உரிக்கிறான் சங்பரிவார்க்காரன். அவனை யானைமேல் அம்பாரி வைத்து மாப்பிள்ளை ஊர்வலம் போல அழைத்துச் செல் கிறார்கள் குஜராத் பிஜேபி ஆட்சியில். என்னதான் வழி? இந்த வன்முறைப் போக்கின் விஷவேரை வீழ்த்துவது எப்படி? சமூகநீதியைக் காப்பது எப்படி?சம்பூக வதை யைத் தொடர விடாமல் தடுப்பது எப்படி? மண்ணின் உரிமையை மீட்பது எப்படி? ஆட்சி அதிகாரத்துடன் நீதிமன்றமும் கூட்டுச் சேர்ந்துள்ள இந்த இக்கட்டுக்குப் புதை குழியை உருவாக்குவது எப்படி? பிரச்சாரம், பரப்புரைப் பிரச்சாரம்  - போராட்டம் - மக்களை இயக்கும் ஈர்க்கும் போராட்டம்!

திட்டங்கள்- இளைஞர்களை ஈர்க்கும் திட்டங்கள்! அணிவகுப்புகள் - ஆர்.எஸ்.எஸை வீழ்த்தும் அணி வகுப்புகள்!

முழக்கங்கள் -  மக்கள் மத்தியில் நம் கொள்கைகள் போய்ச் சேருவதற்கான முழக்கங்கள்!

தீர்மானங்கள் - திசை காட்டும் வழித்தடங்களைக் காட்டும் தீர்மானங்கள்!

சமதர்ம சமத்துவ ஒப்புரவு உலகிற்கான  வழி காட்டுதல்கள் தேவை - தேவை!

கொழுக் கொம்பில்லாது  தவிக்கும்   இளை ஞர்களே வாருங்கள்! நீட் தேர்வால் நிலைகுலைந்து போன இருபால் மாணவர்களே வாருங்கள்! - வாருங்கள்!!

மோடி அரசின் பொருந்தாப் பொருளாதாரக் கொள்கைகளால் கொள்ளை போன குடிமக்களே வாருங்கள்! புதிய பாசறை அமைப்போம்!

புதிய போர்முகம் காண்போம்!

பொன்னேரியில் வரும் 12ஆம் தேதி சென்னை மண்டல இளைஞரணி மாநாடு - மாநாடு!

விஞ்ஞான மனப்பான்மையை வெளிப்படுத்தும் பேரணி!

கூடிவாழ்ந்தால் கோடி நன்மை என்பது வெறும் பேச்சல்ல. திராவிடர் கழகம் கூட்டும் இந்த மாநாட்டுக்கு வந்துப் பாருங்கள். புத்தொளி கிடைக்கும் - புதுத்தெம்பும் வெடிக்கும்! புதிய வரலாறு படைப்போம்! - பொன்னேரிக்கு வாருங்கள்! பிற்பகல் பேரணியோடு தொடங்குகிறது எழுச்சி மாநாடு. இனம் எழுச்சிப் பெற - இளைஞர்கள் உணர்ச்சிப் பெற - மாணவர்கள் மான உணர்வு பெற - மங்கை யர்கள் மாண்புப் பெற புறப்படுங்கள்! புறப்படுங்கள்!! - பொன்னேரிக்கு.

இப்பொழுதே மாநாடு களைகட்டி விட்டது. சென்னை மண்டலம் முழுவதும் சுவரெழுத்துகள் - ஊரெங்கும் கழகக் கொடிக்காடுகள்.

கணியூரில் சனாதனத்தைச்சாடி சமதர்மத்தைத் தேடிய தாய்குலமே! பொன்னேரிக்கு வருக! புலிப் பாய்ச்சலாக வருக!

அறிவு ஆசான் காண விரும்பிய புத்துலகைப் படைப்போம் வாரீர்! வாரீர்!! தமிழர் தலைவர் தலைமை யிலே தந்தைபெரியார் பணி முடிப்போம் வாரீர்! வாரீர்!!

ஆடவருக்கும் இடம் உண்டு என்ற வகையில் நடைபெற்ற கணியூர் மகளிர் எழுச்சி மாநாடு

தொகுப்பு: மின்சாரம்

கோவை மண்டல திராவிடர் கழக மகளிரணி, மகளிர்ப் பாசறை சார்பில் தாராபுரம் கணியூரில் கடந்த ஞாயிறன்று நடைபெற்ற திராவிடர் மகளிர் எழுச்சி மாநாடு பெண்ணுரிமை வரலாற்றிலும், கழகத்தின் வரலாற்றிலும் நிரந்தர நங்கூரம் பாய்ச்சக் கூடியது.

திகைக்க வைத்த கணியூர் மங்கையர்ப் பேரணி

ஒவ்வொரு சிறு நிகழ்வும் கூட திட்டமிட்ட வகையில் ஒழுங்கு செய்யப்பட்டிருந்தது.

பேரணி சரியாக பிற்பகல் 4 மணிக்கு கடத்தூர்சாலை யிலிருந்து, சென்னை - பெரியார் சுயமரியாதைத் திருமண நிலைய இயக்குநர் பசும்பொன் செந்தில்குமாரி பச்சைக் கொடி காட்டித் தொடங்கி வைக்க, கோவை மண்டல திராவிடர் கழக மகளிரணி செயலாளர் ப.கலைச்செல்வி தலைமையில் வீறு கொண்டு புறப்பட்டது.

தாராபுரம் மாவட்ட மகளிரணி செயலாளர் எம்.ஜெயந்தி, கோவை மாவட்ட மகளிரணி செயலாளர் சி.கவிதா, திருப்பூர் மாவட்ட மகளிரணி செயலாளர் த.வசந்தி, நீலமலை மாவட்ட மகளிரணி செயலாளர் நா.சாரதாமணி, தாராபுரம் மாவட்ட மகளிர் பாசறை செயலாளர் சாந்தி, கோவை மாவட்ட மகளிர் பாசறை செயலாளர்செ.தனலட்சுமி, திருப்பூர் மாவட்ட மகளிர் பாசறை செயலாளர்பா.சிந்துமணி, மேட்டுப்பாளையம் மாவட்ட மகளிர் பாசறை அமைப்பாளர் இரா.நாகம்மை உள்ளிட்டவர்கள் முன்னிலையேற்க கணியூர் அதிர மகளிர் பேரணி நடைபெற்றது.

பேரணி கடத்தூர் சாலை, கிழக்குத் தெரு வழியாக மாநாடு நடக்கும் பெரியார் திடலை வந்தடைந்தது. பெரியார் பிஞ்சுகளும், மகளிரும் கழகக் கொடி  ஏந்தி கொள்கை முழக்கமிட்டு அணிவகுத்து வந்த காட்சி இராணுவ மிடுக்காகச் சிலிர்த்தது.

கழகக் கொள்கை விளக்க முழக்கங்கள் அவை. சோழ மாதேவி மாயவன் குழுவினரின் சிலம்பாட்டம் மற்றும் வீர விளையாட்டு நிகழ்ச்சிகள் பொது மக்களை வெகுவாகக் கவர்ந்தன. இந்த வீர விளையாட்டுகளில் மகளிர் 'வித்தை'கள் வித்தியாசமாக இருந்தன.

திராவிடர் கழகப் பேரணி என்றால் மூடநம்பிக்கை ஒழிப்பு விளக்கக் காட்சிகள் முக்கியமாக இடம் பெறும். ஆறறிவுள்ள மனிதனை அடிமைப்படுத்துவதில், சிந்தனா சக்தியைச் சிதறடிப்பதில், தன்னம்பிக்கையைக் குழி தோண்டிப் புதைப்பதில், பாடுபட்டுச் சேர்த்த பொருளை விரயமாக்கி தலைகுப்புறத் தள்ளுவதில், காசைக் கரியாக்குவதில் முதலிடத்தில், முண்டாதட்டி நிற்பதில் மூடநம்பிக்கைகளுக்குத்தானே முதலிடம்!

அந்தக் கும்மிருட்டிலிருந்து மக்களை விடுவிப்பது என்பது மானிடத்திற்குச் செய்யும் மகத்தான பணியல்லவா - அதனைத்தான் பகுத்தறிவுப் பகலவன் தந்தை பெரியாரும், அவர்கள் கண்ட திராவிடர் கழகமும் தொடர்ந்து செய்து கொண்டே வருகிறது.

இந்தியாவிலேயே தென்னாட்டில் மகத்தான மக்கள் எழுச்சி, முற்போக்குச் சிந்தனைகள் தலைநிமிர்ந்து நிற்பதற்குக் காரணம் பெரியார் ஈ.வெ.இராமசாமி என்பது அமெரிக்காவின் மூத்த பேராசிரியர்களின் கருத்து என்று ஜான் ரைலி குறிப்பிட்டிருந்ததை 'ஆனந்த விகடன்' வெளியிட்டதுண்டு.

தீச்சட்டி இங்கே - மாரியாத்தா எங்கே?

இத்தகு திட்டமிட்ட பணிகளால், பிரச்சாரத்தால், போராட்டங்களால் அவை நிகழ்ந்தன என்பதுதான் உண்மை - உண்மையிலும் உண்மை! கணியூர் வீதிகளில் மகளிரே தீச்சட்டி ஏந்தி தீச்சட்டி இங்கே  - மரியாத்தாள் எங்கே? என்று உணர்ச்சிப் பூர்வமாக முழக்கமிட்டு வீர நடை போட்டு வந்தகாட்சி புதிய புறநானூறாகும்.

கோவை தோழர்கள் கலைச்செல்வி, தேவிகா, திலகா, யாழினி, புனிதா, காரமடை அன்புமதி, கவுசல்யா, திருச்சி அம்பிகா, கணியூர் சரசுவதி, காரமடை  அம்ச வேணி, இரா.நாகமணி, காரத்தொழுவு நா.சரசுவதி ஆகியோர் தீச்சட்டி ஏந்தி அரிமா முழக்கமிட்டு வந்தனர்.

அலகுக் குத்தி சப்பரம் இழுப்பது ஆண்டவன் செயல் என்ற அடிமுட்டாள் தனத்தைத் தோலுரித்துக் காட்டும் வகையில் சிவகிரி தோழர் சண்முகம் தலைமையில் தாராபுரம் கழகத் தோழர்கள் முனீஸ்வரன், சின்னப்பதாசு ஆகியோர் முதுகில் அலகுக் குத்தி கார் இழுத்ததோடு, கடவுள் இல்லை - இல்லவே இல்லை என்று முழக்கமிட்டு வந்த காட்சி இளைஞர்கள் மத்தியில் ஈர்ப்பை ஏற்படுத்தியது என்றே கூறவேண்டும். மக்கள் கையசைத்து ஆதரவு காட்ட, கழக மகளிர் அணியினரின் பேரணி மாலை நேர மூடநம்பிக்கை ஒழிப்புச் செயல் விளக்கமாக (ஞிமீனீஷீஸீக்ஷீணீவீஷீஸீ) இருந்தது இப்பேரணிக்கான தனிச் சிறப்பாகும்.

பேரணியின் இரு மருங்கிலும் பொது மக்களும், வியாபாரிகளும், இளைஞர்களும், மாணவர்களும், பிஞ்சுகளும், பெரும் அளவில் திரண்டனர். திராவிட மகளிர் அணி - மகளிர்ப் பாசறை நடத்திக் காட்டிய மூடநம்பிக்கை ஒழிப்பு பேரணியின் நேர்த்தியைக் கண்டு வாய்விட்டுப் பேசி மகிழ்ந்தனர்.

களிப்பூட்டும் கலை நிகழ்ச்சிகள்

முதுபெரும் பெரியார் பெருந்தொண்டர் தாராபுரம் மானமிகு வடிவேலு அவர்களின் வாழ்விணையரும், கழக மகளிரணித் தோழருமான வ.துளசியம்மாள் நினைவரங்க மேடையில் மாநாட்டு நிகழ்ச்சிகள் அரங்கேறின.

கழக குடும்பத்தைச் சேர்ந்த சிறுமிகளின் கொள்கை விளக்கப் பாடலுக்கான நடனம் இரசிக்கத்தக்க முறையில் அமைந்திருந்தது. பாவலர் அறிவுமதியின் பெரியாரை நம்படா நம்பு எனும் பாடலுக்கு திருச்சி யாழினியும், கவிஞர் காளமேகம் அவர்களின் வா தோழா என்ற பாடலுக்கு பெரியார் பிஞ்சுகள் கண்மணி, கவுசல்யா ஆகியோரும், ஆறறிவு மனிதனுக்கு ஜாதி எதற்கு? என்ற பாடலுக்கு திருவாரூர் மாவட்டம் - கண்கொடுத்தவனிதம் கு.குணவதி, பகுத்தறிவு சந்துரு ஆகியோர் கரகாட்ட முறையில் நடனத்தை அமைத்துக் கொண்டது வெகு சிறப்பு.

மாநாட்டில் தருமபுரி அன்பு, கலை இலக்கிய அணியின் சார்பாக கலை இலக்கிய நிகழ்ச்சிகள் நடத்தப்பட்டன. நாடக பயிற்சி அளிக்கப்பட்டது. மாரவாடி கிராம பெரியார் பிஞ்சுகள், மென்மை, தென்னரசு பெரியார், செந்தமிழ்ச்செல்வன், சஞ்சய், ஹரிஷ், கொட்டாவூர் கிராம செம்மொழி, வீரமணி, பந்தரள்ளி கிராம மு.க.ஸ்டாலின், மத்தூர் கிராம சிறீதர், அகரன், புதுப்பட்டி கிராம அஸ்மிதா, அபிநயா ஆகிய பெரியார் பிஞ்சுகள் கலந்து கொண்டு நடத்தினர்.

நடத்தப்பட்ட நாடகங்கள்

1. ஈ.வெ.ராமசாமி நாயக்கராகிய நான்!

2. ஆம்பளை வாயா? பொம் பளை வாயா?

3. எனக்கும் கொஞ்சம் பூ கொடுங்க!

4. ரத்தம் என்ன க்ரூப்?

நடனம்

5. மகளிர் சார்பாக தமிழர் தலை வருக்கு அளிக்கப்பட்ட வர வேற்பு நடனம். பயிற்சியாளர்: தகடூர் தமிழ்ச் செல்வி, மாநில அமைப்பாளர், மகளிரணி மற்றும் மகளிர் பாசறை.

நிமிர வைத்த நிமிர்வுக் கலைக் குழுவினர்

கோவையைச் சேர்ந்த பல்வேறு துறைகளில் பணியாற்றிக் கொண்டு இருக்கக் கூடியவர்களும், முதுநிலைப் பட்டதாரிகளும் அடங்கிய இருபால் இளைஞர்களும் மானமும் அறிவும் மனிதர்க்கழகு என்ற தந்தை பெரியார் அவர்களின் புரட்சி மொழியை முன்மொழிந்து பெரியாரைப் படி - அம்பேத்கரைப் படி என்ற சூளுரையுடன் போர்ப் பறையாக நடத்திக் காட்டினர்.

உண்மையிலேயே அது போர்ப்பறைதான்! கண்டோர் ஒவ்வொருவரின் உணர்வையும் சமுதாய விடுதலைப் போர்க் களத்திற்கு அழைத்துச் செல்லும் பறையோசையாக, இடி முழக்கமாக அமைந்தது என்பதில் அய்யமில்லை.

தாளம் தவறாமல் அவர்கள் பறையை முழக்கின போதெல்லாம் பார்வையாளர்களின் காலடிகளும் அவர்களை அறியாமலேயே அசைந்தாடியதையும் காண முடிந்தது.

திறந்த வெளி மாநாடு

கோவை மண்டல திராவிடர் கழக மகளிர் அணி, மகளிர்ப் பாசறை சார்பாக நடத்தப்பட்ட திராவிட மகளிர் எழுச்சி திறந்த வெளி மாநாட்டுக்குத் திராவிடர் கழகப் பொருளாளர் டாக்டர் பிறை நுதல் செல்வி தலைமை வகித்தார்.

கோவை மாவட்ட மகளிரணி தலைவர் செ.முத்துமணி, கோவை மாவட்ட மகளிர் பாசறை தலைவர் கு.தேவிகா, திருப்பூர் மாவட்ட மகளிரணி தலைவர் க.திவ்யா, திருப்பூர் மாவட்ட மகளிர் பாசறை தலைவர் லெ.திவ்யா, நீலமலை மாவட்ட மகளிரணி தலைவர் க.ஜோதிமணி, நீலமலை மாவட்ட மகளிர் பாசறை தலைவர் வே.அருணா ஆகியோர் முன்னிலை வகித்தனர்.

மத்தியில் ஒரு மதவாத ஆட்சி - மாநிலத்திலோ அதற்கு ஆமாம் சாமி ஆட்சி நடைபெறுகிறது. இவ்விரண்டையும் வீட்டுக்கு அனுப்ப வேண்டும் என்றும், மனுதர்மமும், கீதையும் பெண்களை இழிவுப்படுத்தும் இந்து மதநூல்கள் என்றும் எடுத்துக்காட்டி தலைமை உரை நிகழ்த்தினார் திராவிடர் கழகப் பொருளாளர் டாக்டர் பிறைநுதல் செல்வி.

மாநாட்டு வரவேற்புரையாற்றிய வடசென்னை மாவட்டக் கழக மகளிரணி செயலாளர் பொறியாளர் ச.இன்பக்கனி அவர்கள், குழந்தைப் பருவத்தில் தந்தைக்கும், வாலிபத்தில் கணவருக்கும், வயோதிகப் பருவத்தில் மகனுக்கும் கட்டுப்பட்டுத் தான் ஒரு பெண் இருக்க வேண்டும் என்று மனுதர்மம் கூறுவதை எடுத்துக்காட்டி, மனுதர்மத்தை எரிப்பது மகளிர் கடமை என்றும், அதனை எரித்துக் காட்டியது திராவிடர் கழகம் என்றும் எடுத்துரைத்தார்.

திராவிடர் கழக மகளிரணி - மகளிர்ப் பாசறை ஆகியவற்றின் மாநில அமைப்பாளர் தகடூர் தமிழ்ச்செல்வி அவர்கள் திராவிடர் கழகக் கொடியை ஏற்றி வைத்து உரையாற்றிபோது - தந்தை பெரியார் அவர்களின் கொள்கை இழையால் பின்னப்பட்டது தான் திராவிடர் கழகக் கொடி என்றும், நம் இனத்தைச் சூழ்ந்திருக்கும்  இழிவை வெளிப்படுத்துவதுதான் கழகக் கொடியின் கருப்பின் அடையாளம் என்றும், இந்த இழிவை ஒழிக்கப் புரட்சி செய் என்பதுதான் கழகக் கொடியின் சிவப்பு வண்ணம் என்றும் எடுத்துரைத்தார்.

மனுதர்மத்தை ஒழிப்போம் எனும் தலைப்பில் உரையாற்றிய வழக்குரைஞர் ம.வீ.அருள்மொழி அவர்கள், பெண்ணுரிமை பற்றி நினைக்கும் பொழுது, நீங்கள் உங்கள் மனைவியை மட்டும் நினைத்துச் சிந்திக்காதீர்கள்; உங்கள் அருமை மகளையும், சகோ தரியையும் நினைத்து யோசியுங்கள் என்று தந்தை பெரியார் தெரிவித்த அரிய கருத்தை விளக்கிப் பேசினார்.

சென்னை மண்டல மாணவரணி அமைப்பாளர் வழக்குரைஞர் பா.மணியம்மை தன்னுரையில், கீதையைத் தேசிய நூலாக்க வேண்டும் என்று சங்பரி வார்கள் கூறுகிறார்கள். உண்மையில் தேசிய நூலாக வைக்கத் தகுதியான நூல் தமிழர் தலைவர் ஆசிரியர் அவர்கள் எழுதிய கீதையின் மறுபக்கம் என்ற நூல்தான் என்று அறிவித்தபோது பலத்த கரஒலி!

மாநில மாணவரணி துணைச் செயலாளர் - சட்டக் கல்லூரி மாணவி மதிவதனி தனது உரையில், இன்றைக்கு வேலையில்லாத திண்டாட்டம் தலைவிரி கோலமாக இருப்பதைச் சுட்டிக்காட்டினார். இதற்கு என்ன தீர்வு என்று கேட்டால் பிரதமர் நரேந்திர மோடி பக்கோடா விற்கச் சொல்கிறார். இதனைப் பார்ப்பனர்களிடத்தில் போய்ச் சொல்லுவாரா என்ற வினாவை எழுப்பினார்.

கற்பழிக்கக் கடவுளிடம் விண்ணப்பம் போட்ட திருஞான சம்பந்தனின் வாரிசாக பா.ஜ.க. செயல்படுவதையும் கண்டித்துப் பேசினார்.

மாநில திமுக இளைஞரணி செயலாளர் மு.பெ.சாமிநாதன் அவர்கள் தனது உரையில், திராவிடர் கழகம் நடத்தும் மகளிர் மாநாடு பழம் புறநானூற்று வீரத்தினைப் பறைசாற்றுகிறது என்று குறிப்பிட்டார்.

திமுக மாவட்டச் செயலாளர் இள.பத்மநாபன் அவர்கள் தனது உரையில், தந்தை பெரியார் அவர்களின் கொள்கைகளும், அறிஞர் அண்ணா, கலைஞர் உள்ளிட்ட திராவிட இயக்கத் தலைவர்களும் பாடுபட்டுக் காத்த பெண்ணுரிமையை மனுதர்மவாதிகளால் அழிக்க முடியாது என்று ஆணித்தரமாகப் பேசினார்.

மடத்துக்குளம் சட்டப் பேரவை உறுப்பினர் இரா.செயராமகிருஷ்ணன் அவர்கள், இன்றைக்கு மக்களுக்கு இருக்க வேண்டிய முதற்கட்ட வேலையே மத்திய - மாநில அரசுகளை வெளியேற்றுவதே என்று குறிப்பிட்டார்.

சுப்புலட்சுமி ஜெகதீசன்

திமுக துணைப் பொதுச் செயலாளர் சுப்புலட்சுமி செகதீசன் அவர்கள் மாநாட்டுத் திறப்பாளர் உரையைச் சுருக்கமாகவும், செறிவாகவும் எடுத்துரைத்தார்.

திராவிடர் கழக மகளிர் மாநாடு நடத்தும்போதெல்லாம் என்னைத் தவறாமல் அழைக்கிறார் தமிழர் தலைவர் ஆசிரியர் அவர்கள். நானும் பெரியார் பிறந்த ஈரோட்டு மண்ணைச் சேர்ந்தவள் என்ற கூறும் உரிமையும் எனக்குக் கிடைத்துவிடுகிறது.

தந்தை பெரியார் கொள்கைகளை நூற்றுக்கு நூறு ஏற்றுக் கொள்பவள்நான் என்று சொன்னபொழுது பெருத்த கரஒலி.

பிர்மாவின் நெற்றியில் பிறந்ததாகக் கூறிக் கொண்டிருக்கும் பார்ப்பனர்கள் கல்வி, அரசுப் பணிகள் அனைத்திலும் ஆக்கிரமிப்பை நடத்தினர், வருணாசிரமத்தையும், ஜாதியையும் புகுத்தி மக்களைப் பிளவுப் படுத்தினர்.

இதற்கெல்லாம் முடிவுரையை எழுதினார் தந்தை பெரியார். திராவிடர் இயக்க ஆட்சியால் நாம் எவ்வளவோ வளர்ச்சி பெற்று இருக்கிறோம். அதனை ஒழிக்கத் திட்டம் தீட்டி வருகிறார்கள் அதனை முறியடிக்கும் வல்லமை நமக்குண்டு.

பெண்களுக்கு 50 சதவீதம் இடஒதுக்கீடு தேவை என்றார் தந்தை பெரியார். கலைஞர் ஆட்சியில் முதற்கட்டமாக 30 சதவீதத்திற்கு வழி செய்யப்பட்டது.

ஆரியம் மீண்டும் தலைதூக்குமேயானால் தந்தை பெரியார் தந்த கைத்தடி எங்களிடம் இருக்கிறது என்பதை மறக்க வேண்டாம்.

மாநாட்டுக்கு வந்திருக்கும் நீங்கள் ஒவ்வொருவரும் பத்துப் பேர்களுக்கு மாநாட்டைப் பற்றி சொல்ல வேண்டும் என்றும் கேட்டுக் கொண்டார்.

நிறைவுரையாய் தமிழர் தலைவர்

மாநாட்டு நிறைவுரையை வழங்கிய கழகத் தலைவர் ஆசிரியர் கி.வீரமணி அவர்கள் இயக்க வரலாற்றில் கணியூருக்குள்ள சிறப்புகளை எடுத்துரைத்தார்கள். கே.ஏ.மதியழகன் குடும்பம் - கணியூர் குடும்பம் என்று சொல்லத்தக்க வகையில் இப்பகுதியில் தந்தை பெரியார் கொள்கையை, இயக்கத்தை வளர்த்த அந்த வரலாற்றை நினைவூட்டியபோது பலத்த கரஒலி! (அவர்கள் வீட்டில்தான் தமிழர் தலைவருக்கும், கழகப் பொறுப்பாளர்களுக்கும் உணவு அளித்து உபசரிக்கப்பட்டது. மூத்தவரான கே.ஏ.முருகேசன் அவர்கள் பெயரன் இளங்குமரன் அவர்கள் இதற்காகவே சென்னையிலிருந்து வருகை தந்து உபசரித்தார் என்பது குறிப்பிடத்தக்கது).

இங்கே ஆறு செல்விகள் இருக்கிறார்கள். மாநாட்டுத் தலைவர் டாக்டர் பிறைநுதற் செல்வி, மாநில மகளிர்ப் பாசறை செயலாளர் செந்தமிழ்ச்செல்வி, மாநில மகளிரணி, பாசறை அமைப்பாளர் தகடூர் தமிழ்ச்செல்வி, மாநில மகளிரணி செயலாளர் தஞ்சை கலைச்செல்வி, கோவை மண்டல மகளிரணிச் செயலாளர் பா.கலைச்செல்வி, சென்னை சி.வெற்றிச்செல்வி என்று கழகத்திற்குச் செல்விகளுக்குப் பஞ்சமில்லை என்று கழகத் தலைவர் குறிப்பிட்டபோது ஒரே ஆரவாரம்.

இந்த மாநாட்டின் குறிக்கோள் செயற்களாக - பெண்ணே.... பெண்ணே... சனாதனத்தைச் சாடு...! சமதர்மத்தை நாடு! என்பதாகும். இதன் விளக்கத்தை விரிவுபடுத்தினார் கழகத் தலைவர். (முழு உரை வரும்)

ஆண்களுக்கு இடம் உண்டு, என்று கூறும் அளவுக்கு இப்பெண்கள் மாநாடு பெரு வெற்றி பெற்று இருப்பதைப் பாராட்டினார்.

நீண்ட நேரம் பேசவேண்டும் என்று எண்ணினாலும் எனக்குப் போதாத காலமாக இருக்கிறது. இரயிலுக்குச் செல்ல வேண்டிய அவசியம் இருக்கிறது என்று ஆசிரியர் சொன்னபோது ஒரே சிரிப்பும், கைதட்டலும் அலை மோதின.

மனமில்லாமல் உங்களை விட்டுச் செல்லுகிறேன் என்றாலும் இதே கணியூரில் மீண்டும் உங்களைச் சந்திப்பேன் என்று தமிழர் தலைவர் உருக்கமாக சொன்னபோது பெரும் நெகிழ்ச்சியாக இருந்தது.

எங்குப் பார்த்தாலும் கருப்புடை தரித்த மகளிர் பட்டாளத்தைப் பார்க்க முடிந்தது. மாலை திறந்த வெளி மாநாட்டிற்கு கணியூர்ப் பொதுமக்கள் மட்டுமல்ல; மாவட்டத்தின் பல்வேறு பகுதியிலிருந்தும் ஆயிரக் கணக்கில் கூடி ஆசிரியரின் உரையைச் செவிமடுத்தனர்.

மாநாட்டுத் தீர்மானங்களை மாநில மகளிர் பாசறை செயலாளர் கோ.செந்தமிழ்ச்செல்வி முன்மொழிந்தார்.  மக்கள் அவற்றை வழிமொழியும் வகையில் பலத்த கரஒலி எழுப்பினர். தாராபுரம் மாவட்ட திராவிடர் கழக மகளிரணித் தலைவர் த.விஜயா நன்றி கூற மாநாடு இரவு 9.30 மணி அளவில் வரலாற்றுச் சிறப்புடன் நிறைவுற்றது.

மின்சாரம்

நாட்டில் பெண்கள் மதிக்கப்படாததற்குக் கடந்த கால அந்நியர் ஆட்சியே காரணம். பெண்களை சமூகம் தற்போது காணும் போக்கு வெட்கக் கேடானது. நமது பாரம்பரியப்படி பெண்களை மதிப்போம்!

-இவ்வாறு கூறியிருப்பவர் சாதாரணமானவர் அல்லர்.  குடியரசுத் துணைத் தலைவர் மாண்பமை  வெங்கையா நாயுடு அவர்கள் ஆவார்கள்.

இதில் இரண்டு பிரச்சினைகள் துள்ளி விளையாடுகின்றன.

ஒன்று - பெண்கள் மதிக்கப்படாததற்கு காரணம் அந்நியர் ஆட்சியே.

இரண்டாவது - நமது பாரம்பரியப்படி பெண்களை மதிப்போம் என்பதாகும்.

மிகப்பெரிய பதவி ஆசனத்தில் இப்படி சொல்லியிருக்கும் அவர் சார்ந்திருக்கும் அமைப்பின் காரணமாகவே அவர் இப்படி பேசி இருக்கிறார்.

வெள்ளைக்காரர்கள் செய்ததெல்லாம் என்ன?

கணவன் இறந்தவுடன் அவன் உடலோடு மனைவியை எரித்த சதி என்ற உடன்கட்டை ஏறுதலை ஒழித்தது தான் அவன் செய்த பாவச் செயலா?

வெள்ளைக்கார கவர்னர் ஜெனரல் வில்லியம் பெண்டிங்கால் உடன்கட்டை ஏறுதல் ஒழிக்கப்பட்டது. அது கூடாது - அடாத செயல் என்று துணை குடியரசுத் தலைவர் கூறவும் போகிறாரா?

இதில் என்ன கொடுமை தெரியுமா? வில்லியம் பெண்டிங் இந்த மனிதநேய பெருஞ் செயலைச் செய்த போது மாண்பமை வெங் கய்யா நாயுடு அவர்களால் பெருமையோடு குறிப்பிடப்படும் அந்த முன்னோர்கள் என்ன செய்தார்கள் தெரியுமா?

பார்ப்பனக் குழு ஒன்று இந்திய இராணு வத்தில் கமாண்டர் சீஃப் சர் சார்லஸ் நேப்பியரைச் சந்தித்தனர். அப்போது அவர்கள் வைத்த கோரிக்கை - திரு. வெங்கையா நாயுடு அவர்கள் பெருமைப்படத்தக்கதாக இல்லை.

தேசிய பழக்க வழக்கங்களில் தலையிடு வதில்லை என்று பிரிட்டீஷ் அரசு (விக்டோரியா மகாராணியின் அறிக்கை) உறுதியளித்துள்ள நிலையில், அதற்கு மாறாக சதியை ஒழிப்பது சரியல்ல, என்பதுதான் அந்தப் பார்ப்பனக்குழு வைத்த கோரிக்கை.

அதற்கு சர் சார்லஸ் அளித்த பதில் நாகரீகமான முறையில் ஆயிரம் முறைக் கன்னத்தில் பளார் பளார் என்று அறைந்த தற்குச் சமமானதாகும். என்னுடைய தேசத்திலும் ஒரு வழக்கம் இருக்கிறது. பெண்களை உயிருடன் எரிக்கும் ஆண்களை தூக்கில் தொங்க விடுவதுதான் அந்தப் பழக்கம்.

நாம் எல்லோரும் நமது தேசங்களின் வழக்கப்படி தான்  நடக்கிறோம் என்று நளினமாகத் தெரிவித்தார்.

ஆதாரம்: தி வீக்- அக்டோபர் 11-17 (1987)

வெள்ளைக்காரர்கள் செய்த இன்னொரு பொல்லாத காரியம் என்ன தெரியுமா? அதுதான் குழந்தைத் திருமணங்களை ஒழித்தது.

வெள்ளைக்காரன் காலத்தில் கொண்டு வரப்பட்ட சட்டம் கொடியதா? அல்லது துணைக் குடியரசுத் தலைவர் கூறும் நமது பெருமைக்குரிய முன்னோர்கள் கூச்சல் போட்டது பெருமைக்குரியதா?

அமெரிக்காவைச் சேர்ந்த மிஸ் கேதைரின் மேயோ என்பவர் இந்தியாவிற்கு வந்து சுற்றிப் பார்த்து மதர் இந்தியா என்ற நூலை எழுதினார்.

எதையும் அவர் கற்பனையாக எழுதிட வில்லை; நேரில் கண்டதைத்தான் எழுதினார். மகப்பேறு மருத்துவமனைகளுக்கும் சென்று அவர் பார்த்த அந்த கோரக்காட்சியை எடுத்துரைக்கிறார். படிக்கும் போதே இதயத்தி லிருந்து இரத்தம் உடைத்துக் கிளம்புகிறது.

இனி சென்னை ராஜதானியை எடுத்துக் கொள்வோம்.  வட இந்தியாவிலுள்ள பல பாகங்களை விட சென்னை ராஜதானியில் நடக்கும் சம்பவம் மிக்க பரிதாபகரமானது. இங்கு பெண்களைப் புருஷர்கள் மிகவும் கொடுமைக்குள்ளாக்கியிருக்கின்றனர். ஒரு தனிப்பட்ட மாகாணத்தைப் பற்றி நாம் பேசுவானேன்? இந்தியாவின் எப்பாகத்திற்குச் சென்றாலும் பெண்களின் விஷயம் இது போலேவே தானிருக்கிறது. இது சம்பந்தமாக ஒரு பிரபல ஆங்கிலேய ஸ்திரீ வைத்தி யரிடம் பேசிக் கொண்டிருக்கையில், அவர் என்னிடம் கூறியதாவது: இந்தியப் பெண்களில் உடல் வலிமையுள்ளவர்களைப் பார்ப்ப தென்பது, மிகவும் துர்லபம். அதிகமாக சிற்றின்பத்திலீடு படுவதும், புருஷர்கள்  பெண்கள் விஷயத்தில் கொஞ்சமும் இரக்கமின்றி நடந்து கொள்வதுமே இதற்குக் காரணம். புருஷர்களில் பெரும்பாலோருக்கு மேகரோக மிருக்கின்றது.  ஒவ்வொரு நாளும் இரண்டு மூன்று தடவைகளுக்கு அதிக மாகவே புருஷர்கள் பெண்களுடன் புணர்ச்சி செய்கிறார்கள்.

சென்ற 33 வருடங்களுக்கு முன்பு, பெண்களுக்கு  விவாகம் செய்யும்  வயதை உயர்த்த வேண்டுமென்று இந்திய சட்ட சபையில் ஒரு மசோதா கொண்டு வரப்பட்ட பொழுது, இந்தியாவிலிருக்கும் என்போன்ற பல ஆங்கில ஸ்திரீ வைத்தியர்கள் சேர்ந்து பெண்கள் இந்நாட்டில் படும் துயரத்தை வைசிராய்க்கு ஒரு மகஜர் மூலமாக தெரியப்படுத்தினோம். அம்மகஜரில் குறிப் பிட்ட சில விஷயங்களை இங்கு எடுத்துக் கூறுவது பொருந்தும். சில ஆஸ்பத்திரிகளில் அடியில் குறிப்பிட்ட விவரப்படி பெண்கள், வியாதியினால் துன்பப்பட்டதாகக் கணக் கிடப்பட்டிருக்கிறது.

9 வயது: கல்யாணமான மறுநாள் இடதுகால் எலும்பு பிசகி விட்டது, கருப்பப்பை கவிழ்ந்து விட்டது. உள்ளே புண்.

10 வயது: நிற்கக் கூட சக்தியில்லை. பெண் குறியில் புண்ணுண்டாகி, ரத்தம் பெருகி ஒழுகுகின்றது.

9 வயது: ஸ்திரீ அவயத்தில் அதிக ரணம். ரண சிகிச்சை செய்வதுகூட முடியாமலாய் விட்டது. இவளைத் தவிர இவளுடைய புருஷனுக்கு இரண்டு மனைவிகள் - அவர்கள் உயிருடனிருக்கின்றார்கள். இப்பெண் ஆங்கிலக் கல்வி கற்றவள்.

7 வயது: சிற்றின்ப விஷயத்தில் புருஷ னுடைய கொடுமை பொறுக்க முடியாமல் உயிர் துறந்தாள்.

10 வயது: ஆஸ்பத்திரிக்கு வரும் பொழுது நடக்கக் கூட சக்தியில்லை. கல்யாணம் ஆனதிலிருந்து  அவளால் எழுந்திருந்து நிற்கவும் சக்தியில்லாது போய்விட்டது.

இம்மாதிரி பல உதாரணங்கள் அந்த மகஜரில் குறிப்பிடப்பட்டிருந்தன. இது 1891ஆம் வருடத்தில் மற்றொரு முறை அம்மசோதா இந்திய சட்டசபை யாலோசனைக்கு வந்த பொழுது, மீண்டும் ஆங்கில ஸ்திரீ வைத்தி யர்கள் ஒரு மகஜரைத் தயாரித்து வைசிராய்க்கு அனுப்பினர். 1891ஆம்  வருடத்திலிருந் ததற்கும் 1922ஆம் வருடத்தில் நடந்திருப்ப தற்கும்  அதிக  வித்தியாசமில்லை. 1891ஆம் வருடத்திலிருந்ததை விட 1922ஆம் வருடத் தில் அதிகமான பால்ய விவாகங்கள்  நடந்திருக்கின்றன  வென்பதை எவரும் மறுக்க முடியாது மேயோவின் கற்று இது. வெள்ளைக்காரன் வராமல் இருந்தி ருந்தால் இந்தியாவின் நிலை எப்படி இருந்திருக்கும்?

ஒரு கணம் சிந்திக்கட்டும் துணைக் குடியரசுத் தலைவர்.

நமது பாரம்பரியப்படி பெண்களை மதிப்போம்  என்கிறாரே  - என்ன நமது பாரம்பரியம். கீதையைத் தேசிய நூலாக  அறிவிக்க வேண்டும் என்கிறார்களே - அந்தக் கீதை பெண்களைப் பற்றி என்ன கூறுகிறது?

பெண்களும், வைஸ்யர்களும், சூத்திரர் களும் பாவ யோனியில் பிறந்தவர்கள் (கீதை, அத்தியாயம் 9, சுலோகம் 32) என்கிறதே கீதை - இதுதான் நமது பெருமை மிக்கப் பாரம்பரியமா?

(இந்து மதத்தில் பெண்களின் நிலை பெட்டிச் செய்தி. தனியே காண்க)

வெகு தூரக் காலத்திற்குச் செல்வானேன்? மாண்பமை  வெங்கையா நாயுடு  அவர்களின் ஆர்.எஸ்.எஸ்.  குருநாதர்  திருவாளர் மோகன்பாகவத்துக்கு பெண்களைப் பற்றிய மதிப்பீடு என்ன? மனைவி என்பவள் கணவனின் தேவைகளை நிறைவேற்றுவதை மட்டுமே தலையாயக் கடமையாகக் கொள்ள வேண்டும். வீட்டைக் கவனிக்க வேண்டும். கணவனுக்கு இன்பம் தரவேண்டும். இது பெண்மையின் கடமை. இந்தக் கடமையி லிருந்து மனைவி விலகி விட்டால் அவள் தேவையில்லை. அவர்களுக்கான ஒப்பந்தம் முடிந்து விட்டது; விலக்கிவிட  வேண்டும் என்று இந்தூர்  பொதுக்கூட்டத்தில் (1-7-2014) ஆர்.எஸ்.எஸ்.  தலைவர் மோகன்பாகவத் பேசினாரா இல்லையா?

பெரும்பதவியில் இருக்கும் வெங்கையா நாயுடு அவர்கள் சிந்திக்கட்டும்!

Banner
Banner