மின்சாரம்

சென்னையில் பாரதியார் 137ஆம் ஆண்டு பிறந்த நாள் விழா 11.12.2018 அன்று நடைபெற்றது. அதில் பாரதியார் சிலை சென்னைத் திருவல்லிக்கேணி பார்த்தசாரதி கோயிலிலிருந்து அலங்கரிக்கப்பட்ட பல்லக்கில் வைத்துப் பவனி வரச் செய்யப்பட்டது.

படம் ஒன்றைக் கவனியுங்கள்.

இதில் பல்லக்கினைத் தோளில் சுமப்பவர்கள் யார் யார்?

மாப்பிள்ளை போல பவனி வருபவர்கள் யார் யார் என்பதைக் கருத்தூன்றிக் கவனமாகப் பாருங்கள்.

எச்.ராஜா, இல.கணேசன், அதிமுகவைச் சேர்ந்த மயிலை சட்டமன்ற உறுப்பினர் ஆர்.நட்ராஜ் ஆகிய பார்ப்பனர்கள் பல்லக்கினைத் தூக்கவில்லை என்பதும், நமது சூத்திரர்கள் (துணை முதல் அமைச்சர் ஓ.பன்னீர்செல்வம், தமிழ் வளர்ச்சித் துறை அமைச்சர் மாஃபா பாண்டியராஜன் உட்பட) பாரதியாரின் பல்லக்கினைத் தூக்கிச் சுமந்து வருவதும் கவனிக்கத் தக்கதாகும்.

இவ்வாண்டு மட்டுமல்ல - கடந்தாண்டு பாரதியார் விழாவிலும் இதே கூத்துதான். (படம் இரண்டைக் கவனியுங்கள்).

பாரதியார் சிலை பல்லக்கில் பவனி வருவதும், அதற்கு முன் நடன மங்கையர் ஆடி வருவதும் - பக்கத்தில் பிஜேபியின் தேசிய செயலாளர் இல.கணேசன், ஆர்.நட்ராஜ் எம்.எல்.ஏ. ஆகிய பார்ப்பனர்கள் நடந்து வருகிறார்கள்.

இப்பொழுது மூன்றாவது படத்திற்கு வாருங்கள்.

தூக்கி வரப்படும் பல்லக்குக் காணப்படுகிறது. இதில் 85 வயது நிறைந்த இலக்கியச் செல்வர் குமரி அனந்தன் அவர்கள் பல்லக்கினைச் சுமந்து வர, மேற்கண்ட பார்ப்பனர்கள் வழக்கம்போல ராஜ நடைதான் - ஒருவர் மிஸ்ஸிங்!

சூத்திரனுக்கொரு நீதி, தண்டச் சோறுண்ணும் பார்ப்பானுக்கு ஒரு நீதி என்று பாடிய பாரதியார் பிறந்த நாள் விழாவிலேயே அவர் பாட்டு நிரூபிக்கப்பட்டுள்ளதா இல்லையா?

இப்பொழுதெல்லாம் பார்ப்பனர்கள் அப்படியில்லை - எவ்வளவோ திருந்தி விட்டனர் என்று கூறும் சூத்திர மேதா விலாச தமிழர்களின் கண்கள் திறக்குமா?

காஞ்சி மடத்துக்குச் சென்ற பார்ப்பனரான சுப்பிரமணிய சாமி சங்கராச்சாரியார் ஜெயேந்திரர் சரசுவதியின் பக்கத்தில் நாற்காலியில் அமர்ந்திருக்க, மத்திய இணை அமைச்சர் பொன்.இராதாகிருஷ்ணன் (சூத்திரர்) தரையில் உட்கார்ந்திருந்ததையும், மூத்தவரான திருநாவுக்கரசர் பொடியன் திருஞானசம்பந்தனைப் பல்லக்கில் தூக்கி வந்ததையும் இந்த இடத்தில் நினைவு கூர்க!

கவிஞர் கலி.பூங்குன்றன்

முற்போக்குக் கொள்கை உடைய திரைப்பட இயக்குநர் தோழர் பா.ரஞ்சித் அவர்களின் பேட்டி ஒன்று  தி எக்னாமிக் டைம்ஸ் ஏட்டில் (2018 நவம்பர்: 25 டிசம்பர்:1) வெளிவந்துள்ளது.

ஜாதி அமைப்பு முறையின் அடிவேர் வரை சென்று அலசி எடுத்திருக்கிறார். அதன் பார்ப்பன மூலத்தையும் அடையாளம் கண்டு தோலுரித்துத் தொங்க விடுகிறார்.

அன்றாட வாழ்க்கையில் ஜாதியின் தாக்கங்களைத் தங்குத் தடையின்றி விமர்சனக் கோடாரியால் பிளந்து தள்ளியுள்ளார்.

நாட்டில் நடைபெறும் ஜாதிய வாதம் -  தாழ்த்தப்பட்டவர்கள் மீதான வன்முறைகள் பற்றி எல்லாம் பொறுப்புணர்ச்சியுடனும், வேதனைக் குமுறலுடனும் விளாசித் தள்ளி யுள்ளார். பாராட்டுகள்.

அதே நேரத்தில் பெரியார் இயக்கம் பற்றி அவர் விமர்சித்துள்ள பகுதிகள் நமது விமர்சனத்துக்கு உட்பட்டவையாகும்.

பெரியார் இயக்கம் என்பது பார்ப்பனரல் லாதோர் மற்றும் பார்ப்பனர்களுக்கிடை யேயான போராட்டம் என்றுதான் கூறலாம். பார்ப்பனர்கள் கைகளில் இருந்து பார்ப்பனரல் லாதார் கைகளுக்கு அதிகாரங்கள் வந்த பிறகு அவர்கள் பார்ப்பனர்களுக்குத் துணை போகும் செயலில் இறங்கி விட்டார்கள் என்று ஓரிடத்தில் குறிப்பிட்டுள்ளார்.

பார்ப்பனரல்லாதார் என்று சொல்லும் போது அதில் ஆண்டாண்டுக் காலமாக ஒடுக்கப்பட்ட - தாழ்த்தப்பட்ட மக்களும் இடம்பெற மாட்டார்களா?

அண்ணல் அம்பேத்கர் பார்ப்பனர்களை எதிர்க்கவில்லையா - அவர்கள் மூலக்கருத்தை மூர்க்கமாக தாக்கவில்லையா? பார்ப்பனர் களை எதிர்த்த வரிசையில் தாழ்த்தப்பட்ட வர்கள் மட்டும்தான் என்று பொருள் கொள்ள முடியுமா?  அதன் பலன் யாரிடம் போய் சேர்ந்தது என்பதை இயக்குநர் இரஞ்சித் போன்றவர்கள்  விளக்குவது நல்லது.

பெரியார் இயக்கத்தால் நடத்தப்பட்ட பார்ப்பன எதிர்ப்புப் போராட்டங்களால் பிரச்சாரத்தால்  தாழ்த்தப் பட்டவர்களுக்கு எந்த பலனும் கிடைக்கவில்லை என்பதுதான் தோழர் இரஞ்சித்தின் கருத்தா?

வைக்கத்தில் தந்தைபெரியார் நடத்திய போராட்டமும் சேரன்மாதேவியில் நடத்திய போராட்டமும் தாழ்த்தப் பட்டவர்களை நீக்கித்தானா?

வைக்கத்தில் பெரியார் நடத்திய போராட்டம் தாழ்த்தப்பட்டவர்களுக்கான உரிமைப் போராட்டத்தை மகத்தில் நடத்திட அண்ணல் அம்பேத்கருக்குத் தூண்டு கோலாக   இருந்தது என்று அம்பேத்கர் வாழ்க்கை வரலாற்றை எழுதிய தனஞ்செய் கீர் குறிப்பிடவில் லையா? தாழ்த்தப்பட்ட மக்களுக்குத் தனித் தொகுதி கேட்டுப் போராடி வெற்றி பெற்றார் அண்ணல் அம்பேத்கர்.அதன் பலன் கிடைக்காமல் போனதற்குக் காந்தியார்தான் காரணம். அதனை எதிர்த்து காந்தியார் உண்ணாவிரதம் இருந்தார். அண்ணல் அம் பேத்கருக்கு கடும் நெருக்கடி கொடுக்கப் பட்டது. அய்ரோப்பிய நாடுகளில் சுற்றுப் பயணத்தில் இருந்த தந்தை பெரியார். ஒரு காந்தியாருடைய உயிரை விட ஆறு கோடி தாழ்த்தப்பட்ட மக்களின் உயிர் உங்கள் கைகளில் இருக்கிறது என்பதை மறந்து விடாதீர்கள் என்று தந்தி கொடுத்தது யாருடைய உரிமைக்காக?

பறையன் பட்டம் போகாமல் உங்களுடைய சூத்திரப் பட்டம் போய்விடும் என்று கருதுவீர்களானால் நீங்கள் வடிகட்டின முட்டாள்களேயாவீர்கள் (குடிஅரசு, 11.10.1931) என்று பிற்படுத்தப்பட்ட மற்றும் முன்னேறிய மேல்ஜாதி மக்களான சூத்திரர்களுக்கு சாட்டை அடி கொடுத்தவர் தந்தை பெரியார் அல்லவா?

தாழ்த்தப்பட்ட குடியிருப்புகளுக்குச் சென்று சுயமரியாதைத் திருமணங்களை நடத்தி வைத்து உணவுண்டு - சூத்திர பஞ்சம மக்கள் என்ற பார்ப்பன வருணா சிரமத்தால் பிளவுண்டு கிடந்த மக்களி டையே  இணைப்புப் பாலத்தை ஏற்படுத் தியது பெரியார் இயக்கம் தானே - ஒரு எடுத்துக்காட்டு

கேள்வி: தந்தை பெரியார் அவர்களோடு தாங்கள் இணைந்து பணியாற்றிய நிகழ்ச்சிகள் பற்றிக் கூறுங்கள்.

பதில்: நான் ஏராளமான சுயமரியாதைத் திருமணங்களுக்கு தலைமை தாங்கி நடத்தி இருக்கிறேன்.  பெரியார் அவர்கள் கலந்து கொண்ட திருமணங்களிலும் கலந்து கொண்டு பேசி இருக்கிறேன்.

சென்னை பெரம்பூரில் பெரியார் தலை மையில் ஒருசுயமரியாதைத் திருமணம் நடைபெற்றது. கடுமையான மழை, தாழ்த்தப்பட்டோர் பகுதி... ஒரே சேறும் சகதியுமாகி விட்டது. திருமணம் முடிந்து சாப்பிட்டுப் போகச் சொன்னார்கள். நான் ஏதோ சமாதானம் சொல்லி சாப்பிடவில்லை. பெரியார் என்ன செய்தார் தெரியுமா? மேலே இருந்த ஓலையைக் கீழே எடுத்துப் போட்டு அப்படியே உட்கார்ந்து சாப்பிட ஆரம்பித்து விட்டார். பெரியார் எந்தவித ஏற்றத்தாழ்வும் பார்க்க மாட்டார். (நீதிக்கட்சி பவளவிழா மலரில் மீனாம்பாள் சிவராஜ்பேட்டி -1992 பக்கம் 125)

திராவிடர் கழகத்திற்கே பள்ளன் கட்சி, பறையன் கட்சி என்று தானே பெயர் சூட்டப்பட்டது.

தங்களை தாழ்த்தப்பட்டவர்களை விட உயர் வானவர்கள்  என்று மமதை கொண்டிருந்தவர்களின் மண்டையில் அடிக்கும் வண்ணம் பஞ்சமன் என்பதை விட சூத்திரன் என்பது தான் கேவலம், சூத்திரன் என்றால் வேசி மகன்,  பஞ்சமன் என்றால் அவர்கள்தான், அவர்கள் அப்பா அம்மாவிற்கு முறையாக பிறந்தவன் என்று முகத்தில் அடித்துச் சொன்னவர் தந்தை பெரியார். (குடிஅரசு - 16.6.1929)

மனித வாழ்க்கையின் நன்மைகளை உத்தேசித்தும், ஜீவகாருண்யத்தைப் முன் னிட்டும், தேச முன்னேற்றத்துக்காகவும் பொறுத்தும் நம் நாட்டில் பெரும் பகுதியினர் மீது சுமத்தப்பட்டுள்ள தீண்டாமை என்னும் கொடிய தடையை விலக்க பொது ஜனங்களிடையே இடைவிடாது பிரச்சாரம் செய்து அவர்களைக் கண்விழிக்கச் செய்ய வேண்டும் என்று தந்தை பெரியார் அவர்களே இரண்டாவது சென்னை மாகாண தீண்டாமை விலக்கு மாநாட்டில் முன்மொழிந்தார் (குடியரசு 17.2.1929).

ஆண்டாண்டுக் காலமாக தீண்டத் தகாதவர்கள் என்று ஒதுக்கப்பட்ட ஒடுக் கப்பட்ட மக்களின் தீண்டாமை கொடு மையை வெறும் சட்டத்தால் ஒழித்து விட முடியாது -  மக்கள் மத்தியில் சிந்தனை மாற்றத்தை செய்தாக வேண்டுமே. அதன் முன்னணி ஆயுதமாக இருப்பது பிரச்சாரமே அதனை ஒரு நூற்றாண்டு காலமாக செய்து வருவது பெரியார் இயக்கம் இல்லையா? இதுபோல் எந்த மாநிலத்திலாவது பத்தில் ஒன்று நடந்திருக்கிறது என்று சவால் விட்டு கேட்க முடியுமே!

சென்னைத் தீண்டாமை விலக்கு மாநாடு, (10.2.1929)

கள்ளக்குறிச்சி - தென்னார்க்காடு மாவட்ட ஆதிதிராவிடர் மாநாடு (16.6.1929)

சென்னை ஆதிதிராவிடர் மாநாடு (21.7.1929)

இராமநாதபுரம் ஆதிதிராவிடர் மாநாடு (25.8.1929)

திருநெல்வேலி தீண்டாமை விலக்கு மாநாடு (10.6.1931)

சேலம் ஆதிதிராவிடர் மாநாடு (16.5.1931) லால்குடி தாலுகா ஆதிதிராவிடர் மாநாடு (7.6.1931)

திருச்சி ஆதிதிராவிடர் மாநாடு (5.7.1931)

கோவை ஆதிதிராவிடர் மாநாடு (5.7.1931)

தஞ்சை ஜில்லா ஆதிதிராவிடர் மாநாடு (4.7.1931) கோவை ஆதிதிராவிடர் மாநாடு (7.12.1931)

லால்குடி தீண்டப்படாதவர் மாநாடு (7.2.1932)

அருப்புக்கோட்டை தாலுகா தாழ்த்தப் பட்டோர் மூன்றாவது மாநாடு 28.8.1932

லால்குடி தாலுகா ஆதிதிராவிடர் கிறித்துவர் மாநாடு (7.5.1933)

சென்னை தாழ்த்தப்பட்ட கிறித்துவர் மாநாடு (7.8.1933)

தஞ்சை ஜில்லா மூன்றாவது ஆதிதிராவிடர் மாநாடு (9.7.1935)

சீர்காழி ஆதிதிராவிடர் மாநாடு (10.7.1935)

சேலம் ராசிபுரம் ஆதி திராவிடர் மாநாடு (29.9.1935)

திருச்செங்கோடு ஆதிதிராவிடர் மாநாடு (7.3.1936)

பெரியகுளம் தாலுகா தேவேந்திரகுல மாநாடு (3.81936)

சேலம் ஜில்லா ஆதிதிராவிடர் மாநாடு (2.9.1936)

சிதம்பரம் ஆதிதிராவிடர் மாநாடு (6.5.1937)

ஆம்பூர் ஆதிதிராவிடர் மாநாடு (4.7.1937)

திருச்செங்கோடு தாலுகா ஆதிதிராவிடர் மாநாடு (8.7.1937) அருப்புக்கோட்டை தாழ்த்தப்பட்டோர்  மாநாடு 3.1.1938 இப்படியாக அடுக்கிக் கொண்டே போகலாம்.

தீண்டாமை ஒழிப்பு, பொதுவுரிமை, கல்வி வேலைவாய்பில் இட ஒதுக்கீடு - இவற்றை உள்ளடக்கிய தீர்மானங்கள் தான் ஒவ்வொரு மாநாட்டிலும்- பிரச்சாரமோ அடைமழை! அடைமழை!! இவையெல்லாம் வீண் போகவில்லை. ஏய், டேய், போடா, வாடா என்ற சொல் பிர யோகங்கள் புதையுண்டுப் போகவில்லையா? சூத்திரச்சி வந்து விட்டாளா என்று இன்று கேட்க முடியுமா?

பெயருக்குப் பின்னால் ஜாதி வால் தொங்குவது அறவே ஒழிந்து போனது தமிழ்நாட்டில்தான் என்றால் இதற்கு வித்திட்டது பெரியார் இயக்கம் அல்லவா?

நீதிக்கட்சி ஆட்சியில் தானே இட ஒதுக்கீடு கொண்டு வரப்பட்டது தாழ்த்தப் பட்டவர்களுக்கு உட்பட.(1928)

" எந்தப் பொது சாலையிலோ, தெருவிலோ, அது எந்தக் கிராமத்திலோ அல்லது நகரத்திலோ இருந்தாலும் அதில் எந்த இனத்தைச் சேர்ந்த மனிதனாய் இருந்தாலும் நடப்பதற்கு உள்ள உரி மையை யாரும் தடுக்க முடியாது என் பதையும், எந்த அரசாங்க அலுவலகமாக இருந்தாலும், அல்லது கிணறு, குளம் போன்றவைகளாய் இருந்தாலும், அல்லது பொது வர்த்தகம் நடைபெறும் இடமாய் இருந்தாலும், இவைகளில் எல்லாம் ஜாதி இந்துக்களுக்கு என்னென்ன உரிமைகள் இருக்கின்றனவோ, அவ்வளவு உரிமை களும் தாழ்த்தப்பட்ட மக்களுக்கு உண்டு என்பதையும் சென்னை அரசாங்கம் ஒப்புக்கொண்டு, அதைத் தீர்மானமாக நிறைவேற்றி, எல்லா மாநகராட்சி, நகராட்சி, பஞ்சாயத்து மற்றும் அரசாங்கத்தில் உள்ள எல்லா இலாகாக்களுக்கும் அனுப்பப் பட்டது (அரசு ஆணை எண் 2660 உள்ளூர் மற்றும் மாநகராட்சி 25.9.1924) 1936 வாக்கில் இந்த வகையில் 9614 பள்ளிகள் வழிக்குக் கொண்டு வரப்பட்டன.

நீதிக்கட்சி ஆட்சியில் பனகல் அரசர் பிரதமராக இருந்த போது கொண்டு வரப்பட்ட ஆணை இது! தாழ்த்தப்பட்டவர்கள் பேருந்துகளில் அனுமதி, பள்ளிகளில் அனுமதியெல்லாம் நீதிக்கட்சி ஆட்சியில் தான். தொழிலாளர் துறை என்பது முழுக்க முழுக்க தாழ்த்தப் பட்டவர்களின் முனற்னேற்றத்திற்கே!

இவையெல்லாம் பழைய கதை என்று சொல்லலாம் - தந்தை பெரியார் அவர்களின் இறுதி மூச்சு அடங்கும் வரை உரிமை மறுக்கப்பட்ட மக்கள் பக்கமே தன் சிந்தனைகளையும், செயல்களையும் அர்ப்பணித்தார். கோயில் கருவறைக்குள்  தாழ்த்தப் பட்டவர்கள் போகக்கூடாதா? அவர்கள் அர்ச்சனை செய்ய மறுப்பது ஏன் என்ற களத்தில் நின்று தானே இறுதி மூச்சையும் துறந்தார். இன்று அது செயல்பாட்டுக்கு வந்து விட்டதே. முதலில் மனிதனுக்குச் சுயமரியா தையை ஊட்டுவது,  மூட நம்பிக்கைகளி லிருந்து விடுதலை செய்து பகுத்தறிவுப் பாதையில் திருப்புவது, எதைக் கொடுத் தாலும் கல்வியைக் ஒடுக்கப்பட்ட மக்களுக்குக் கொடுக்கக் கூடாது என்ற வர்ணாசிரம கோட்பாடுக் கோட்டையை உடைத்து, கல்வி வேலைவாய்ப்புகளில் உரிய பங்கு பெறுவது என்பது தாழ்த்தப் பட்டவர்களுக்கும் பெரியார் இயக்கத்தின் பங்களிப்பு இல்லாமல் வேறு எங்கிருந்து குதித்தது?- இவை எல்லாம் அதிகார பங்கேற்பதற்கான உந்துதல் இல்லையா?

சென்னை உயர்நீதிமன்றத்தில் தாழ்த்தப் பட்டவர்கள் ஏன் நீதிபதியாக வர வாய்ப் பில்லை என்ற தந்தை பெரியாரின் கேள்விக்கு விடைத்தானே ஒரு ஜஸ்டிஸ் வரதராஜன்.

தந்தை பெரியாரின் அழைப்பு

(வகுப்புவாரி உரிமைக்காக தந்தை பெரியார் காங்கிரசை விட்டு வெளியேறுவதற்குக் காரணமான காஞ்சிபுரம் மாநாட்டிற்காக குடிஅரசு இதழில் தந்தை பெரியார் வெளியிட்ட அறிக்கை)

காஞ்சிபுரத்தில், 31 ஆவது ராஜீய மகாநாடு நாளது நவம்பர் மாதம் 21, 22ந் தேதிகளான சனி, ஞாயிற்றுக்கிழமைகளில் சென்னை 'நவசக்தி', ஆசிரியர் ஸ்ரீமான். திரு. வி.கல்யாணசுந்தர முதலியாரவர்கள் அக்ராசனத்தின் கீழ் கூடும்.

அது சமயம் சர்வகக்ஷியார்களும் மடங்கிய பிராமணரல்லாதார் மகாநாடொன்றும் கூடும். பிராமணரல்லாதார் முன்னேற்றத்தில் கரிசனமுள்ள தமிழ்நாட்டுப் பிராமணரல்லாதார் அனைவரும் வந்திருந்து, தங்களது முன்னேற்றத்திற்கான ஒரு திட்டத்தைக் காணவும், அதைச் சரிவர அமுலுக்குக் கொண்டு வரவும் ஏற்பாடு செய்ய வேணுமாய்க் கேட்டுக் கொள்ளுகிறேன்.

இது விஷயத்தில் ஒவ்வொருவரும் தங்கள் ராஜீய அபிப்பிராய பேதங் காரணமாகவாவது, சொந்த அசவுகரியங் காரணமாகவாவது அலக்ஷியமாய்   இருந்துவிடாமல் கண்டிப்பாய் வரவேண்டுமாய் மறுபடியும் வினயத்துடன்  கேட்டுக் கொள்ளுகிறேன்.

தீண்டாமையை ஒழிக்கவேண்டியது பிராமண ரல்லாதாருக்கு மிகவும் முக்கியமானதொரு கடனாகும். ஏனெனில், தீண்டாதார் களின் முன்னேற்றந்தான் பிராமண ரல்லாதார்களின் முன்னேற்றமாகும். தீண்டாதார்களின் துன்பந்தான் பிராமணரல் லாதாரின் துன்பமாகும். தீண்டாமை ஓழிவதன் முலமாய்த்தான் பிராமணரல்லாதார் கடைத் தேறமுடியும். தீண்டாமை ஒழிவதன் மூலமாய்த்தான் நாடு சுயராஜ்யமடையும். ஆதலால், தீண்டாமை விலக்கில் கவலையுள்ளவர்களும், தீண்டாதாரென்று சொல்லப்படுபவரும் அவசியம் காஞ்சிபுரத்திற்கு வந்து அதற்கென்று, ஓர் மகாநாடு கூட்டி காரியத்தில் பலன் தரத்தக்க திட்டங்களைக் காண வேண்டுமாயும் கேட்டுக்கொள்ளுகிறேன்.

ஈ.வெ.ராமசாமி

ஈரோடு, 15.11.1925

தாழ்த்தப்பட்டவர்கள் மீது எந்த அளவு கவலையும், அக்கறையும் கொண்டிருந்தார் என்பதற்கு வேறு எடுத்துக் காட்டும் தேவையோ?

அவர்தானே உச்ச நீதிமன்றத்திற்குள்ளும் நுழைந்த முதல் தாழ்த்தப்பட்ட சமூகத்தைச் சேர்ந்த நீதிபதியு  கூட! சென்னை உயர்நீதிமன்றத்தில் ஒரே நேரத்தில் 10 தாழ்த்தப்பட்ட சமூகத்தைச் சேர்ந்த நீதிபதிகள் வருவதற்கான கால்கோள் விழாவை நடத்தியது யார்? அது அதிகாரப் பகிர்வின் கீழ் வராதா?

தாழ்த்தப்பட்ட சமுதாயத்தை சேர்ந்த இளவரசன், திவ்யா என்ற பிற்படுத்தப்பட்ட சமுதாயத்தை சேர்ந்த பெண்ணைக் காதலித்துத் திருமணம் செய்து கொண்ட நிலையில் - தர்மபுரி மாவட்டத்தைச் சேர்ந்த நத்தம் பழைய கொண்டாம்பட்டி, அண்ணா நகர், புதிய கொண்டாம்பட்டி, வாழ் தாழ்த்தப்பட்ட மக்களின் குடியிருப்புகளைக் ஜாதி வெறியர்கள் கொளுத்தி சாம்பலாக்கிய நிலையில் (7.11.2012) உடனடியாக பாதிக்கப் பட்ட பகுதிக்கு திராவிடர் கழகத் தலைவர் வீரமணி அவர்களின் தலைமையில் கழகப் பொறுப் பாளர்கள் நேரில் சென்று ஆறுதல்  கூறியதுடன் உடனடியாக அங்கு ஜாதி ஒழிப்பு மாநாட்டை அனைத்து கட்சியின ரையும் அழைத்து நடத்தியது திராவிடர் கழகம் தானே. (9.12.2012)

ஓசூர் அருகே சூடைக்காந்தப் பள்ளியைச் சேர்ந்த ஜாதி மறுப்புத் திருமணம் செய்து கொண்ட  நந்திஷ் சுவாதியை பெற்றோர் களே தீவைத்து எரித்துக் கொன்ற கொடூர நிலையில் (13.12.2018) வரும் 30ஆம் தேதி ஜாதி -தீண்டாமை ஒழிப்பு மாநாடு திராவிடர் கழகத்தின் சார்பில் ஓசூரில் நடத்தப்பட உள்ளதே.

இவையெல்லாம் அலட்சியப்படுத்தப்பட வேண்டி யவை என்று கண்டிப்பாக இயக்குநர் தோழர் ரஞ்சித் சொல்ல மாட்டார் என்று நமக்கு உறுதியாகவே தெரியும்.

எல்லாம் முடிந்து விட்டது - சமத்துவமும், சகோதரத்துவமும் கைகோர்த்து விட்டன என்று யாரும் மார்தட்டவில்லை. ஆயிரம் ஆயிரங்காலத்து வருணாசிரமம் நம் மக்களின் மூளையில் விலங்காக பூட்டப்பட்டு விட்டது.

மூளையில் மாட்டப்பட்ட விலங்கை அவ்வளவு எளிதாக விலக்க முடியாது.  அதே நேரத்தில் நாம் தோல்வி அடைந்துவிட்டோம் என்ற தாழ்வு மனப்பான்மை  தேவையில்லை. நடந்திருக்கின்ற மாற்றங்களை  பரிகசிப்பதோ,  உதாசீனப்படுத்துவதோ,  ஆரோக்கிய மானதுமல்ல! மகத்தான உழைப்பும், தியாகமும்,  இந்த மாற்றத்தின் வேரில் குருதியாகக் கொட்டப்பட்டுள்ளது. இந்திய அரசமைப்புச் சட்டத்தில் ஜாதியைப் பாதுகாக்கும் பகுதியை நீக்க வேண்டும் என்று கூறி, ஜாதியைப் பாது காக்கும் சட்டப் பகுதியை எரித்து மூன்றாண்டு காலம் வரை சிறைத்தண்டனை ஏற்ற 10 ஆயிரத்திற்கும் மேற்பட்ட திராவிடர் கழக கருஞ்சட்டைக் குடும்பத்தினரைக் கொஞ்சம் நினைத்துப் பாருங்கள் இரஞ்சித் அவர்களே!

நமது ஒடுக்கப்பட்ட மக்கள் மத்தியிலேயே கூட உயர்வு தாழ்வு, மேல் - கீழ்நிலை இருக்கத்தானே செய்கிறது. இட ஒதுக்கீடே எங்களுக்கு வேண்டாம் என்றும், நாங்கள் ஜாதியில்  உசத்தி - தேவேந்திரர் என்று சொல்லு பவர்களும் நம்மிடத்தில் இருக்கத் தானே செய்கிறார்கள்.

இவர்களையும் நாம் எதிர்க்க வேண்டிய கெட்ட வாய்ப்பையும் நினைக்க வேண்டிய தருணம் இது.

அதனால் அண்ணல் அம்பேத்கர் தோற் றுப் போய்விட்டார் என்று விரக்திக்காதை எழுதி விடலாமா?

ஜாதி அமைப்பின் பலமே அண்ணல் அம்பேத்கர் கூறிய  GRADED IN EQUALITY என்பதுதான்; ஏணிப் படிக்கட்டு முறைதான். மனித சமத்துவம் ஊட்டும் கல்விமுறை கொணர்வது,  பகுத்தறிவு, விஞ்ஞான சிந்த னைகளை வளர்ப்பது என்கிற முறையிலே மாற்றங்கள் கொண்டு வர தாழ்த்தப் பட்டவர்களும், பிற்படுத்தப்பட்டவர்களும் ஒன்றிணைந்து பயணிக்க வேண்டும். இருவரும் வலதுகரம், இடதுகரம் என்று அண்ணல் அம்பேத்கர் கூறியதை கவனத்தில் கொள்ள வேண்டும். தந்தை பெரியார் பார்ப்பனர் - பார்ப்பனரல்லாதார் போராட்டத்தைத் தொடங்கி அவர் நினைத்த அளவில் இல்லையென்றாலும் எதிரிகள் மிரளும் அளவிற்கு மகத்தான வெற்றி பெற்றுள்ளார் என்பது தான் வரலாறு.

234 சட்டமன்ற உறுப்பினர்கள் உள்ள தமிழ்நாடு சட்டப்பேரவையில் இரண்டே இரண்டு பார்ப்பனர்கள் தான் உறுப்பினர்கள். இந்த நிலை இந்தியாவில் எந்த மாநிலத்தில் உண்டு - சற்றே எண்ணிப் பார்க்கவேண்டும்! நண்பர்கள் யார், பகைவர்கள் யார்? என்பதைத் தெரிந்து கொள்வதில் கூட இன்னும் தயக்கமும் குழப்பமும் இருப்பது எந்த வகையிலும் நியாயமாகாது!

பெரியார் இயக்கம் பார்ப்பன அல்லாதோர் மற்றும் பார்ப்பனர்களுக் கிடையேயான போராட்டம் என்றுதான் கூறலாம். பார்ப்பனர்களில் இருந்து பார்ப் பனர் அல்லாதாவர்களுக்கு அதிகாரங்கள் வந்த பிறகு அவர்கள் பாரப்பனர்களுக்குத் துணைப் போகும் செயலில் இறங்கி விட்டார்கள். ஜாதியை எதிர்த்துப் போராட முன் வரவில்லை. அதிகாரத்தின் சுவையில் மூழ்கி விட்டார்கள். பார்ப்பனீயத்தை அழிக்க வேண்டுமென்றால் பார்ப்பனிய சிந்தனையை ஒழிக்க வேண்டும். பார்ப்பனர்களின் கைகளில் இருந்து அதிகாரத்தைத் தங்கள் கைகளில் எடுத்துக் கொண்டு தாங்கள் பார்ப்பனியக் கொள்கை களைக் கடைப்பிடிக்கத் துவங்கி விட்டனர். பார்ப்பனர்  - பார்ப்பனர் அல்லாதோர் போராட்டம் தற்போது தாழ்த்தப்பட்ட மற்றும் நடுநிலை ஜாதியினருக் கிடையேயான போராட்டமாகி விட்டது. என்றெல்லாம் பொத்தாம் பொதுவாக இயக்குநர் இரஞ்சித் குற்றப் பத்திரிகை படிப்பது சரிதானா?

திமுக சார்பில் ஆட்சிக்கு வந்த கலைஞர் அப்படி என்ன உயர்ந்த ஜாதிப் பட்டியலில் இடம் பெற்றவர்தானா? கதர் சட்டைக்குள் கறுப்புச் சட்டை என்று பார்ப்பனர்களால் அடையாளம் காட்டப்பட்ட காமராசர் அப்படியென்ன பெரிய ஜாதி?

கலைஞரையும் சரி, காமராஜரையும் சரி பார்ப்பனர்கள் ஏற்றுக் கொண்டு விட்டனரா - இன்று வரை கூட? கலைஞர் வீட்டில் தாழ்த்தப்பட்ட சமூக மருமகள்கள் வரவில்லையா? - அது ஒரு நம்பிக்கை ஏற்படுத்தாதா? அரசியல் தேர்தல் பதவி பக்கம் செல்லாத திராவிடர் கழகம் ஜாதி - தீண்டாமை ஒழிப்பு - மூடநம்பிக்கை ஒழிப்புப் பணிகளில் மட்டுமே கவனம் செலுத்தி தன் ஆயுளையே ஒப்படைத்துக் கொண்டு பணியாற்றுகிறதே!  திராவிடர் கழகத்தினரிடமிருந்து ஸ்டாலின் விலகி இருக்க வேண்டும் என்று பார்ப்பன ஏடுகள் இலவசமாக அறிவுரை சொல்லுவது எந்த அடிப்படையில்?

வெறும் விமர்சனம் செய்யும் இடத்தில் உட்கார்ந்து கொண்டு  எதை வேண்டு மானாலும் பேசலாம். நாங்கள் களத்தில் நிற்பவர்கள். அத்தகையவர்களை நோக்கி களங்கமான கற்களை வீசுவது - யாருக்கோ தான் பயன்படும்.

கல்வி, வேலைவாய்ப்பில் வளர்ச்சி என்பதே ஒரு வகையான அதிகார மேல்நிலைதான். முதல் அமைச்சர் நாற்காலியில் வந்தால் தான் ஏற்கமுடியும் என்பதல்ல. ஒரு பாலகிருஷ்ணன் உச்சநீதிமன்ற தலைமை நீதிபதியாக வந்த நிலையில் அனைத்து ஜாதியினருக்கும் அர்ச்சகர் உரிமை வழக்கில் சமூக நீதியான தீர்ப்பு கிடைக்கும் என்று எதிர்பார்த்தோம். வழக்கின் கட்டைத் தொட்டுக்கூட பார்க்கவில்லை என்பதற்காக வருத்தப்படலாம் அவ்வளவுதான் - அதற்குமேல் விமர்சிக்கலாமா? விமர்சன கர்த்தாக்கள் கீழே இறங்கி வரட்டும், கைகோக்கட்டும் - வரவேற்கிறோம்.

பெரியார் இயக்கத்தின் பெரும் பணியை கொச்சைப்படுத்துவது, பெரியார் சிலையை உடைப்பவர்களுக்கும், இந்துத்துவா சக்திகளுக்கும்தான் தீனிப் போட உதவும். தோழர் இரஞ்சித் போன்றவர்கள் பெரியார், அம்பேத்கர் சிந்தனைகளை உள்வாங்கி நடைபோடட்டும்.

ஏற்கெனவே தலித் அல்லாதார் கூட்டணியை உண்டாக்க முயற்சித்தவர்கள் கரங்களை வலுப்படுத்தி விடக்கூடாது. தோழர் இரஞ்சித்துக்கு வாழ்த்துகள்.

திருப்பதி ஏழுமலையான் கோயிலைப்

புத்தர் விகாரமாக மாற்றத் தயாரா?

அயோத்தியில் ராமன் கோயில் எழுப்புவதன் அவசியம் குறித்து திருவாளர் குருமூர்த்தி அய்யர் 'துக்ளக்'கில் (21.11.2018 பக்கம் 33,34) எழுதித் தள்ளியுள்ளார். சோம்நாத் கோயில் பிரச்சினையில் சமரசம் நடந்தது போல அயோத்தியிலும் மசூதியை வேறு இடத்தில் கட்டிக் கொள்ளலாம் என்று பூணூல் நியாயம் பேசுகிறது.

ராமன் இருக்கும் இடம் அயோத்தி என்கிறார்களே, அந்த ராமன் கோயிலை வேறு இடத்தில் கட்டினால் என்ன? அங்கும் ராமன் இருக்கத்தானே செய்வான்?

ராமன் கோயிலை இடித்துத்தான் அதன்மீது பாபர் மசூதி கட்டினார் என்று விவாதத்துக்காக ஒப்புக் கொள்வதாகவே வைத்துக் கொள்வோம்.

வரலாற்றைப் பின்னோக்கி நகர்த்தினால் எத்தனைப் பவுத்த பள்ளிகள், சமணப் பள்ளிகள் இந்துக் கோயில்களாக மாற்றப்பட்டன என்பதற்கு வரலாறு நெடுக ஆதாரங்கள் உண்டே!

வெகு தூரம் போவானேன்? திருப்பதி ஏழுமலையானே புத்தரின் நின்ற கோலம் என்று ஆய்வு செய்து மும்பையில் ஆய்வு நூல் வெளி வந்துள்ளதே!

“Tirupati Balaji was a Buddhist Shrine” என்ற ஒரு நூல் வெளிவந்துள்ளது. மராட்டியத்தைச் சேர்ந்த டாக்டர் கே. ஜமனாதாஸ் F.R.C.S. என்பவர் எழுதியுள்ளார். இந்நூலைப் பற்றிய குறிப்புரை இதோ: Lord Venkateswara, the presiding deity on the famous Tirumali Hills, popularly known as Balaji of Tirupati, is an important Vaishnava Shrine of South India. The Nature of Lord Venkateswara has always been a matter of dispute for centuries. Some consider Him as Vishnu some as Siva, Some as Sakti, some as Skanda and some as Harihara. In fact it was an old Buddhist shrine, murthi itself being Buddhist; and it was taken over for Brahmanic worship during the general fall of Buddhism. He was a god of tribal Buddhist and was,Vaishnavized by saints and latter sanskritized and brahmanized by pundits to his present form. The weapons on Him are not original but provided at a latter date. How this was brought about, is explained with all historical and archaeological evidences. Cults of Vitthala of pandarpur, Jagannatha of Prui, Ayappa on Sabarimala etc., which were originally Buddhist are discussed and many other Buddhist shrines which were hinduized are described and the history of India in general and South India in particular, from seventh to tenth century, during the period of fall of Buddhism and rise of Brahmanic Tirupati, is traced.”

"வெங்கடாசலபதி கடவுள் இருக்கும் திருப்பதி கோயில் என்பது தென்னகத்தில் உள்ள புகழ்பெற்ற வைஷ்ணவக் கோயிலாகும். வெங்கடாசலபதியின் வடிவம் பல நூற்றாண்டுக் காலமாகப் பிரச்சினைக்-குரியதாகவே இருந்து வந்திருக்கின்றது. சிலர் அந்தக் கடவுளை விஷ்ணு என்றும், வேறு சிலர் சிவா என்றும், சக்தி என்றும், ஸ்கந்தா என்றும், ஹரிஹரன் என்றும் பலவாறாகக் கருதுகிறார்கள். உண்மையிலேயே திருப்பதி கோயில் என்பது துவக்கத்தில் புத்தர் கோயிலாகவே இருந்தது; உள்ளே இருக்கும் மூர்த்தி சிலை என்பது புத்தபிரானே ஆவார்.

புத்த மார்க்கம் இந்தியாவில் வீழ்ச்சி அடைந்த போது, அது பார்ப்பனீயத்தால் தங்களுடைய வழிபாட்டுக்குரிய இடமாக மாற்றப்பட்டது.

புத்தர் கோயில் வைஷ்ணவ கோயிலாக இப் போதுள்ள தன்மையில் பார்ப்பன மயமாக்கப்பட்டது - அப்பொழுது இருந்த பார்ப்பனப் பண்டிதர்களால்!

தொல்பொருள் ஆய்வு, வரலாற்று ஆய்வு அடிப்படையிலே இந்தக் கருத்தை இந்நூலில் நூலாசிரியர் நிறுவியுள்ளார். பந்தர் பூர், பூரி செகந்நாதம், சபரிமலை அய்யப்பன் இவை யெல்லாமே ஒரு காலத்தில் புத்த விகார்களாக இருந்து பிற்காலத்தில் இந்துக் கோயில்களாக மாற்றம் செய்யப்பட்டுள்ளன.

7ஆம் நூற்றாண்டிலிருந்து பத்தாம் நூற்றாண்டு வரை புத்த மார்க்கம் வீழ்ச்சி அடைந்த கால கட்டத்தில் இந்தியத் துணைக் கண்டத்திலும், சிறப்பாக தென்னிந்தியாவிலும், புத்த விகாரங்கள் எல்லாம் இந்துக் கோயில்களாக மாற்றப்பட்டுள்ளது பற்றி இந்நூல் விவரிக்கிறது."

இதற்கு என்ன பதில்? பாபர் மசூதிக்கு  முன் ராமன் கோயில் இருந்தது; அதனால் அங்கு ராமன் கோயில் கட்டப்பட வேண்டும் என்றால் திருப்பதி ஏழுமலையான் கோயில் புத்த விகாரமாக இருந்ததே - அதன்படி ஏழுமலையான் கோயில் புத்த விகாரமாக மாற்றப்படுமா? தயார் தானா? குருமூர்த்தி - சங்பரிவார் - பிஜேபி  கம்பெனி பதில் கூறுமா?  பார்ப்போம்!

* மின்சாரம்

கேள்வி 1 :  விஜயபாரதத்தில் ஈ.வே.ரா.வை "பெரியார்" என்று குறிப்பிடுவதில்லையே ஏன்?

பதில்: அவர் திராவிட இயக்கத்தினருக்குப் பெரியாராக இருக்கலாம். விஜயபாரதத்தைப் பொறுத்தவரையில் அவர் ஈ.வே.ராமசாமி நாயக்கர் தான்.

நமது சாட்டை: அப்படியா! ஜாதியை ஒழிப்ப தற்காகப் பணியாற்றிய தலைவர் & 1927ஆம் ஆண்டிலேயே நாயக்கர் பட்டத்தைத் தூக்கி எறிந்தவர். அப்படிப்பட்ட தலைவரை ஜாதியைச் சேர்த்து வெளியிடுவதுதான் விஜயபாரதத்தின் நிலைப்பாடு என்றால் இது விஜய பாரதத்தின் அறிவு, நாணயமற்ற தன்மையையும், ஜாதி இருந்தால் தான் பார்ப்பன உயர் ஜாதித் தன்மையை நிலை நிறுத்த முடியும் என்ற ஆதிக்கத் திமிரை யும்தான் வெளிப்படுத்துகிறது.

இந்தக் கொள்கையுடைய கட்சி மக்களிடையே சமத்துவத்தை விரும்புமா? இப்படியே தொடர்ந்து இந்தக் கும்பல் எழுதி வரட்டும், பேசியும் வரட்டும். கொஞ்ச, நஞ்சம் இருக்கும் கட்சியும் காலா வதியாகக் கடைக்கால் போடுகிறார்கள் என்று பொருள்.

"விஜயபாரதம்" பெரியார் என்று சொல்லாததால் அவரின் மரியாதை குறைந்து போய் விடாது. மாறாக இப்படி எழுதுபவர்களின் மரியாதைதான் - (அப்படி ஒன்று இருந்தால்) காற்றில் பறந்தே போகும்.

பெண்கள் மாநாடு கூட்டி (1938 நவம்பர் 7) கொடுத்த பட்டம் அது. லோகக் குரு என்று தனக்குத்தானே சூட்டிக் கொள்ளும் பட்டமல்ல.

ஜாதி எல்லாம் நாங்கள் பார்ப்ப தில்லை என்று எந்தக் காவிப் பேர் வழியாவது சொன்னால் அவரின் முகத்தில் இந்த விஜய பாரதத்தைத் தூக்கி எறியுங்கள்.

கேள்வி 2: பிராமணர்கள் தமிழர்களா?

பதில்: தி.க.காரன் அகராதியில் அவர்கள் தமிழர்கள் இல்லை. ஆனால் முஸ்லிம்களையும், கிறிஸ்தவர்களையும் தமிழர்கள் என்று ஏற்றுக் கொள்வார்கள். அதாவது தீபாவளி, பொங்கல், தமிழ்ப் புத்தாண்டு கொண்டாடுகிற பிராமணர் தமிழன் இல்லை. கிறிஸ்தவர், ரம்ஜான், பக்ரீத் கொண் டாடுபவன் தமிழன்... இது எப்படியிருக்கு...!

நமது சாட்டை: தமிழர்களில் பிராமணன் ஏது? தன்னைப் பிராமணன் என்று சொல்லிக் கொள்பவன் எப்படி தமிழனா வான்? தன்னை பிராமணன் என்று சொல்லிக் கொள்வதன் வழி இந்நாட்டுக்குரிய தமிழர் களை சூத்திரன் &- பஞ்சமன் & பார்ப்பனர்களுக்கு வைப்பாட்டி மகன் என்று சொல்பவன்  எப்படி தமிழனாக இருக்க முடியும்?

தமிழன் கட்டிய கோயிலில் தமிழன் அர்ச்ச கனாகக் கூடாது, தமிழ் வழிபாட்டு மொழியாகக் கூடாது என்பவன் எப்படி தமிழன் ஆவான்?

தமிழர்களில் மதமற்றவர்கள் உண்டு. பல மதங்களைச் சார்ந்தவர்கள் உண்டு. பல்வேறு மதங்களில் இருப்பதாலேயே அவர்கள் தமிழர்கள் அல்லர் என்று கூற முடியுமா?

ஆனால் தமிழன் தன்னை இந்து என்று மட்டும் சொல்லக் கூடாது; இந்து என்று ஒப்புக் கொண்டால் "விஜயபாரதம்" நம்பும் அந்த வருணதர்மப்படி, ஜாதித் தர்மப்படி தங்களை சூத்திரன் &- வேசி மகன் என்று ஏற்றுக் கொள்ள நேரிடும் &- தாழ்த்தப் பட்ட மக்கள் தங்களைப் பஞ்சமர்கள் என்று ஒப்புக் கொள்ளும் இழிவுதானே வந்துசேரும்.

கேள்வி: 3 ஈ.வே.ரா. சிலைமீது செருப்பு வீசும் சம்பவங்கள் தொடர்கிறதே?

பதில்: தவறுதான், கண்டிக்கப்பட வேண்டியதே. ஆனால் இப்போது இதற்காக கூச்சல் போடுகிறவர்கள் பிள்ளையார் படத்திற்கும், ராமர் படத்திற்கும் செருப்பு மாலை போட்டபோது வேடிக்கை பார்த்தார்களே... அது நியாயமா?

நமது சாட்டை: ராமனுக்குச் செருப்பு மாலை பற்றிப் பரப்பப்படும் அக்கப்போரின் பின்னணி என்ன?

சேலத்தில் 1971இல் திராவிடர் கழகத்தின் சார்பில் மூடநம்பிக்கை ஒழிப்பு மாநாடும், அதனை யொட்டி ஊர்வலமும் நடைபெற்றது. ஊர்வலத்தில் ட்ரக்கில் அமர வைத்து அழைத்துச் செல்லப்பட்ட தந்தை பெரியார்மீது செருப்பை வீசியவர்கள் ஜன சங்கத்துக்காரர்கள் அல்லவா? - அதனுடைய எதிர்வினை தான் ராமனுக்கு செருப்பு மாலை.

ஒன்றை மறைத்து இன்னொன்றைப் 'பூதாகரப் படுத்துவது' 'பூதேவர்களான' பார்ப்பனர்களுக்குக் கை வந்த கலையாகும்.

இன்னொன்றும் முக்கியம். தவமிருந்த சம்பூகன் சூத்திரன் என்பதற்காக அவன் தலையை வாளால் வெட்டிக் கொன்றானே; அதனை எப்படி நியாயப் படுத்தும் விஜயபாரதங்கள்? கொலையைவிட செருப்படி ராமனுக்குச் சாதாரணம்தான்.

ஆமாம் -& ஈரோட்டை அடுத்த சதுமுகையில் பிள்ளையார் சிலைக்குச் செருப்பு மாலை போட்டவர்கள் யார்? கருப்புச் சட்டைக்காரர்கள் என்று பழி சுமத்தியவர்கள் யார்? காவல்துறை வகையாகக் கவனித்த நிலையில் அந்தக் காரியத்தைச் செய்தவர்கள் இந்து முன்னணியினர் என்று அம்பலமாகிடவில்லையா?

கேள்வி: 4 கருணாநிதிக்கு 'பாரத ரத்னா' விருது கொடுக்க வேண்டும் என்கிறார்களே?

பதில்: இது ரொம்ப ஓவரா தெரியுமே.

நமது சாட்டை: கலைஞருக்கு பாரத ரத்னா கொடுத்தால் விருதுக்குத்தான் பெருமை. எம்.ஜி.ஆருக்குப் பாரத ரத்னா விருது. ஆனால் அவருக்குத் தலைவராக இருந்த அண்ணாவுக்கு இந்த விருது அளிக்கப்படவில்லை.  பாரத ரத்னா பஜனையில் சுண்டல் கொடுப்பது மாதிரியாகி விட்டதே! கிரிக்கெட் விளையாட்டுக்காரர்   டெண் டுல்கர் வரை பாரத ரத்னா அளிக்கப்பட்டு அந்த விருதின் "கவுரவம்" 'டக்கவுட்' ஆகி விட்டதே!

பச்சை ஆர்.எஸ்.எஸ். பார்ப்பனரும், பனாரசில் இந்துக் கல்லூரி நிறுவனருமான மண்ணுருண்டை மதன் மோகன் மாளவியாவுக்கே பாரத ரத்னா வழங்கியாயிற்று... இந்த ஆர்.எஸ்.எஸ். ஆட்சியில்!

-என்ன அந்த "மண்ணுருண்டை" முத்திரை தெரியுமா? ஓர் இந்துவாக இருக்கக் கூடியவன் கடலைத் தாண்டிப் போகக் கூடாதாம். அதனால் இலண்டனில் நடந்த வட்ட மேஜை மாநாட்டில் கலந்து கொள்ள கடலைத் தாண்டிப் போக வேண்டிய அவசியம் ஏற்பட்டதால் இந்தியாவிலிருந்து ஒரு உருண்டை மண்ணையும் எடுத்துச் சென்றார் (தோஷம் கழிக்கத் தானாம்). பார்ப்பனர்கள் நினைத்தால் சாஸ்திரங்களையும் உண்டாக்கு வார்கள்; அவர்களின் வசதிக்கேற்ப தோஷத்தைக் கழிக்க இதுபோன்ற  மலிவான நிவாரணங்களையும் கைவசம் ரெடியாக வைத்திருப்பார்கள். மாளவியா போன்ற மண்ணுருண்டைகளுக்குக் கொடுக்கப் பட்ட பாரத ரத்னா கலைஞருக்குக் கொடுக்கப் படாததே மேல்!

இவர்கள்தான் கலைஞருக்கு - & ஒப்புக்கு இரங்கல் தெரிவிக்கிறார்களாம்!

பார்ப்பனர்களைப்பற்றி, அதன் ஆதிக்கம்பற்றி விடுதலை தொடர்ந்து எழுதிக்கொண்டுதான் வருகிறது. இன்னும் சொல்லப் போனால் இந்த இயக்கத்திற்கே பார்ப்பனர் அல்லாதார் (Non-Brahmin Movement) இயக்கம் என்றே பெயர்!

நீண்ட காலமாக நடைபெற்றுவரும் ஆரியர் - திராவிடர் போராட்டத்தின் தொடர்ச்சி இது.

நாங்களாக இட்டுக் கட்டி வீண் வம்புக்குப் போவது எங்களின் வேலையும் அல்ல.

விடுதலை எழுதுவதில் குற்றம் கண்டால் தாராளமாக மறுப்புரை எழுதலாம் - விவாதிக்கலாம். வாய்மைப் போருக்கு என்றும் இளையார் என்று தந்தை பெரியார்பற்றி புரட்சிக்கவிஞர் எழுதியுள்ளாரே!

தினமலர் ஏட்டினைத் திரிநூல் ஏடு என்றும், பூணூல் ஏடு என்றும் நாம் எழுதினால், அதற்கு நோக்காடு வருவதைப் புரிந்துகொள்ள முடிகிறது.

ஆனால், அதனைப் பச்சையாக ஏற்றுக்கொள்ளத் தயக்கம். பந்தை அடிக்க முடியவில்லை என்றால், காலை அடி என்கிற தப்பான விளையாட்டுக்கு (Foul Game) மட்டும் தயாராகவே இருக்கிறது.

தினமலருக்கு உண்மையிலேயே பூணூல் பாசம் இல்லையென்றால், தினத்தந்தி மாதிரிதானே நடந்துகொள்ள வேண்டும். ஏன் பார்ப்பனர்களுக்காக வக்காலத்து வாங்கி நிற்கிறது.

ஒரு காவல்துறை அதிகாரி விசாரணைக்கு வருகிறார். யாரை விசாரிக்க வந்தாரோ அவரை அந்த வீட்டில் காண முடியவில்லை - அங்கு நின்று கொண்டிருந்த அவரின் மகனி டம், எங்கே உங்கள் அப்பா? என்று கேட்க, அந்த மகன் சொல்கிறான், எங்களப்பன் இந்தக் குதிருக்குள் இல்லை (பல குதிர்கள் அந்த வீட்டில் உண்டு) என்றானாம். சந்தேகப்பட்டுப் பார்த்தபோது, அந்த அப்பன் அதற்குள் ஒளிந்து கொண்டிருந்தானாம்.

அதுபோல, எத்தனையோ ஏடு களும், இதழ்களும் இருக்க, தின மலரும், துக்ளக்கும், தினமணியும் மட்டும் ஏன் துருத்திக் கொண்டு பூணூலை ஓர் உருவு உருவிக் கொண்டு முண்டா தட்ட வேண்டும்?

இதற்குப் பெயர்தான் எங்களப்பன் குதிருக்குள் இல்லை என்பது.

நேற்று தினமலரில் (2.11.2018) இது உங்கள் இடம்! என்ற பகுதியில் ஆர்.சேக்ஷாத்திரி என்பவர் எழுதிய கடிதம் ஒன்று வெளிவந்துள்ளது. சேக்ஷாத்திரி என்ற பெயரே அவர் யார் என்பதற்கான அடையாளம்தானே!

தினமலர் பத்திரிகை நடுநிலை நாளிதழ் - எல்லா ஜாதியினரும் அதைப் படிக்கின்றனர். ஆனால், பிராமணர் எதிர்ப்பு என்ற துருப்பிடித்த கத்தியை வைத்து, பார்ப்பான் பத்திரிகை என வீரமணி சொல்வதிலிருந்தே அவர் போலி பகுத்தறிவாளர் என்பது வெட்ட வெளிச்சம் என்று எழுதியதோடு நிறுத்தி இருந்தால்கூட அதன் அறி யாமை ஓர் எல்லைக்குள் நின்றிருக்கும்.

அந்தக் கடிதத்தின் இன்னொரு பகுதி என்ன சொல்லுகிறது?

நாட்டில் பிராமணர் என்ன செய்து விட்டனர்? சென்னை மாநகர பஸ்சில் பட்டாக் கத்தியைக் காட்டி பயணிய ரைப் பயமுறுத்தினரா... இல்லை வன்முறையைக் கிளப்பி காவல் துறையைக் கண்ணியம் இல்லாமல் பேசினரா இல்லையே...

உலகத்தோடு ஒட்ட ஒழுகல் பல கற்றும் அறிவிலார் என்பது வள்ளு வரின் குறள். அதுபோல், பிராமணர்கள், எல்லாரிடமும் நன்றாகப் பழகி, நல் உறவு வைத்து வாழ்கின்றனர்; அதை ஏன் கெடுக்கிறீர்கள்? என்று வினா தொடுக்கிறது தினமலர்.

உலகத்தோடு ஒட்ட ஒழுகுகின்றனரா பார்ப்பனர்கள்? இன்றைக்கும் மயிலாப் பூரில் பார்ப்பனர் பகுதிகளில் ஒரு பார்ப்பனரல்லாதாருக்குக் குடியிருக்க வீடு கிடைத்துவிடுமா?

அவ்வளவு தூரம் கூடப் போக வேண்டாம். இந்தக் கடிதம் வந்த அதே தேதியிலேயே தினமலர் 19 ஆம் பக்கத் திலே ஒரு விளம்பரம் வந்திருக்கிறதே!

சமையலுக்கு பிராமணப் பெண் தேவை என்று. இதுதான் பார்ப்பனர் கள் மாறி விட்டனர் என்பதற்கான விலாசமா?

இதே தினமலர் வார மலர் (13.6.2004) என்ன எழுதிற்று?

கேள்வி: தமிழ் மொழியை செம்மொழியாக்க சட்டம் கொண்டு வந்தால் என்னென்ன பயன்?

பதில்: காவிரி ஆற்றில் தண்ணீர் பெருக்கெடுத்து ஓடும் - ஏழை நெசவாளர் வீட்டுத் தறி நிற்காமல் இயங்கும் - ஒரு வேளை கஞ்சிக்கே வழி இல்லா தவருக்கு மூன்று வேளையும் மட்டன் பிரியாணி கிடைக்கும் என்று எழுதிற்றா, இல்லையா?

தினமலருக்கு உண்மையிலேயே தமிழ்மீது பற்று இருந்தால், இதுபோன்ற பதில் வருமா? இதனைச் சுட்டிக்க ட்டினால், வீரமணி பொல்லாதவரா? விடுதலை ஏடு வேண்டாத ஒன்றா?

அதோடு நின்றதா தினமலர்? டவுட் தனபாலு என்ற பகுதியில் ஒரு செய்தி:

தமிழகப் பொதுப் பணித் துறை செயலாளர் ராமசுந் தரம்: தமிழகத்திற்குக் கரு நாடகா ஆண்டுக்கு 205 டி.எம்.சி. தண்ணீர் தரவேண்டும், மேட்டூர் அணையிலிருந்து ஒவ்வொரு ஆண்டும் ஜூன் 12 ஆம் தேதி தண்ணீர் திறந்து விடப்படும்; கருநாடக அரசு குறித்த நேரத் தில் தண்ணீர் திறந்துவிடாததால், இந்த ஆண்டு தாமதமாக கடந்த 7ஆம் தேதிதான் திறந்துவிட் டோம்.

டவுட் தனபாலு: அதனால் என்னங்க. பெங்களூருல திரு வள்ளுவர் சிலை திறந்துவிட் டோமா இல்லையா? அதுக்கப் புறம் டெல்டாப் பகுதிகளில் முப் போகம் விளையாதா என்ன?

- தினமலர், 18.8.2009

திருவள்ளுவர் சிலை திறப்பை எதோடு ஒப்பிட்டு எழுதுகிறது பார்த்தீர் களா? இது நல்லெண்ணத்தின் அடிப் படையில் எழுதப்படும் எழுத்துக்களா?

கேலியும், கிண்டலும் கிளர்ந்தெழும் பார்ப்பனர் அல்லாதார் மீதான கொந் தளிக்கும் வெறுப்புணர்வு எப்படி எல் லாம் நெருப்புத் துண்டங்களாக எழுத் தில் வந்து விழுகிறது பார்த்தீர்களா?

இந்தப் பார்ப்பனர் புத்தியைத் தோலுரித்துக் காட்டினால் தினமலருக் குப் பற்றிக் கொண்டு எரிகிறது - இதுதானே உண்மை.

குடமுழுக்கையும், கும்பமேளாவை யும் சுட்டிக்காட்டி, தீபாவளியையும் எடுத்துக்காட்டி நாட்டில் மாதம் மும்மாரி பொழியப் போகிறது பாருங்கள்,  ஒவ் வொரு வீட்டிலும் பணம் கூரையைப் பிய்த்துக்கொண்டு கொட்டப் போகிறது பார்க்கத்தானே போகிறீர்கள் என்று எழுதிட எவ்வளவு நேரம் ஆகும்?

தினமலர் மட்டுமா? அதன் ஜோடிப் பொருத்தமான துக்ளக் என்ன எழுது கிறது?

கேள்வி: பெங்களூரில் திருவள் ளுவர் சிலை திறக்கப்படுவதன் மூலம் கன்னடர் - தமிழர் இடையே நல்லுணர்வு, நல்லிணக் கம் ஏற்படும் என்று கருநாடக முதல்வர் எடியூரப்பா கூறியுள் ளாரே?

பதில்: நல்லுறவா? நல்ல உறவு தான். யாராவது கன்னட வெறி யர்கள் ஒரு சமயம் பார்த்து அந்தச் சிலையை அவமதிக் காமல் இருந்தால் போதுமே!

(துக்ளக், 19.8.2009)

இதன் கவட்டு எண்ணம் என்ன? கன்னடியர்களால் திருவள்ளுவர் சிலை அவமதிக்கப்படவேண்டும் என்பது தானே?

திருக்குறள் மனுதர்மத்தின் சாரம் என்று கூறும் கூட்டமாச்சே!

திருவள்ளுவர் பகவன் என்ற பார்ப் பனருக்கும், ஆதி என்ற பறைச்சிக்கும் பிறந்தவர் என்று எழுதியவர்தானே வ.வே.சு.அய்யர். (The Kural or the maxims of Thiruvalluvar).

திருவள்ளுவர் என்ற அறிஞர் பார்ப்பனரல்லாதவனுக்குப் பிறந்திருக்க முடியாது என்ற அந்த எண்ணத்தின் பின்னணியில் இருப்பது என்ன?

பார்ப்பன ஜாதிக் கர்வம்தானே!

இதனை எடுத்துச் சொன்னால், வீரமணி பார்ப்பன எதிர்ப்பு என்ற  துருப் பிடித்த கத்தியை எடுத்துக்கொண்டு உள்ளார் என்ற இழிதகைப் பேச்சா?

வன்முறையைத் தூண்டுவதுண்டா? பார்ப்பனர்கள் என்கிறதே தினமலர்? காந்தியாரைக் கொன்றவன் யார்? சொல்லுங்கள் பார்க்கலாம்.

தமிழ்நாடு பிராமணர் சங்கம் வெள்ளி விழா மாநாடு என்று சொல்லி, சென்னை அண்ணா நகர் சிறீ கிருஷ்ணா தோட்ட த்தில் நடத்தப்பட்ட மாநாட்டில், எழுத் தாளர் சுஜாதா, இயக்குநர் பாலச்சந்தர் உள்ளிட்ட பிரமுகர்கள் பங்கேற்க வில்லையா? அந்த மாநாட்டில் பார்ப்பனர் மேடையிலேயே பகிரங்கமாக அரிவாளைத் தூக்கிக் காட்டி வன் முறைக்குத் தயார் என்று காட்டுக் கூச்சல் போடவில்லையா?

பழனியிலே மாநாடு கூட்டி திராவிடர் கழகத் தலைவர் வீரமணி அவர்களைப் பாடை கட்டித் தூக்கிச் செல்லவில் லையா?

இன்னும் எவ்வளவோ உண்டு. எடுத்துரைத்தால் ஏடு தாங்காது. கடைசி பூணூல் உள்ளவரை - ஆதிக்கத்தின் நஞ்சு அழிக்கப்படும்வரை வீரமணிகள் இருந்துகொண்டே தான் இருப்பார்கள். பெரியார் அலை ஓயவும் ஓயாது - எச்சரிக்கை!

குறிப்பு: வீரமணியும் ஜெகவீரபாண்டி யனும் பார்ப்பனர்களைப் பற்றி தேவை யில்லாமல் பேசுகிறார்களாம். ஜெகவீர பாண்டியன் இறந்து போனதுகூடத் தெரியாமல் தினமலருக்கு பித்தம் தலைக்கேறியது பரிதாபம்!

பார்ப்பனர்கள் வன்முறையை

தூண்டும் வகையில் பேசுவதில்லையா?

வன்முறையாக பார்ப்பனர்கள் பேவதுண்டா என்று எந்தத் தைரியத்தில் தினமலர் பேசுகிறது - பிஜேபி தேசிய செயலாளர் எச்.ராஜாவை இடுப்பில் தூக்கி வைத்துக் கொண்டு, காவல்துறை கண்ணியமில்லாமல் பார்ப்பனர் பேசுவதுண்டா? என்று தினமலர் எழுதுகிறதே - உயர்நீதிமன்றத்தையே எவ்வளவுக் கீழ்த்தரமான வார்த்தையைக் கொண்டு அர்ச்சித்தார்! காவல்துறை அதிகாரிகளை எவ்வளவு கேவலமாகப் பேசினார். மக்கள் மறந்து விடுவர் என்ற மமதையோ!

Banner
Banner