எழுத்துரு அளவு Larger Font Smaller Font

 

 

புயல் புகுந்ததோ புலிகள் பாய்ந்தனவோ புது வெள்ளம் புரண்டதோ என்றும் திகைக்கும் வகையில் தஞ்சாவூர் மாவட்டம், திருக்காட்டுப் பள்ளியில் நேற்று திராவிடர் கழகம் நடத்திய பேரணி கிடுகிடுக்க வைத்தது.

மாலை 5 மணிக்கு திருக்காட்டுப்பள்ளி லூர்து மேனிலைப் பள்ளி எதிரிலிருந்து பண்பாட்டுப் படையெடுப்பை முறியடிக்கும் பேரணி புறப்பட்டது.

திராவிடர் கழகப் பேரணி என்றாலே எப்பொழுதும் பெண்களுக்குத்தான் முன்னுரிமை! இருவர் இருவராகக் கட்டுப்பாட்டுடன் தோழர்கள் அணி வகுத்து நின்றனர்.

தஞ்சாவூர் மாவட்ட விவசாய அணித் தலைவர் இரா.பால சுப்பிரமணியன் பேரணிக்குத் தலைமை வகித்தார்.  கழகப் பொதுக்குழு உறுப்பினர் கை. முகிலன் கொடி அசைத்துப் பேரணியைத் தொடங்கி வைத்தார்.

சோம.நீலகண்டன் (மண்டல இளைஞரணி செயலாளர்),

இரா. வெற்றிக்குமார் (மாவட்ட இளைஞரணி அமைப்பாளர்), அண்ணா. மாதவன் (மண்டல மாணவரணி செயலாளர்), இரா. மணிகண்டன் (மாவட்ட மாணவரணி அமைப்பாளர்), லெ.கவுதமன் (பூதலூர் ஒன்றிய அமைப்பாளர்) அ.தனபால் (மாவட்ட இளைஞரணி தலைவர்)

ப. விஜயகுமார் (மாவட்ட இளைஞரணி து.தலைவர்), வே.தமிழ்ச்செல்வன் (மாவட்ட மாணவரணி தலைவர்), கா. பேரறிவாளன் (பூதலூர் ஒன்றிய இளைஞரணி தலைவர்), ச. பிரபு (பூதலூர் ஒன்றிய இளைஞரணி அமைப்பாளர்) வே. இராஜவேல் (மாவட்ட இளைஞரணி செயலாளர்) இரா. இராஜ்கிரண் (மாவட்ட இளைஞரணி து.செயலாளர்) இரா.கதிரவன் (மாவட்ட மாணவரணி செயலாளர்), ந. அரிமாத்தமிழன் (பூதலூர் ஒன்றிய இளைஞரணி செயலாளர்) போட்டோ சக்ரவர்த்தி (திருவையாறு ஒன்றிய இளைஞரணி தலைவர்) ஆகியோர் முன்னிலை வகித்தனர்.

முதுகில் அலகுக் குத்தி கோயில் விழாக்களில் சிறு தேர்களைப் பக்தர்கள் இழுப்பதுண்டு; கேட்டால் கடவுள் சக்தி என்று கதை அளப்பார்கள். அந்த மூடநம்பிக்கையை முறியடிக்கும் வகையில்  கருஞ்சட்டைத் தோழர்கள் முதுகில் அலகு குத்தி கடவுள் இல்லை, கடவுள் இல்லை என்று கர்ச்சித்து கார்களை இழுத்து வருவர்.

திருக்காட்டுப் பள்ளியில் தஞ்சை ஒன்றிய கழக செயலாளர் ஆட்டோ ஏகாம்பரம் ஒன்றிய இளைஞரணி அமைப்பாளர் ஆட்டோ செந்தில் ஆகியோர் முதுகில் அலகுக் குத்திக் கொண்டு அதன் வழியாக வேன் ஒன்றை இழுத்து வந்து அசத்தினர். கடவுள் சக்தி என்று சொல்லி தேர் இழுக்கும் பக்தர்களே, கடவுள் இல்லை என்று சொல்லிக் கார் இழுக்கும் கருஞ்சட்டைத் தோழர்களைப் பாரீர் பாரீர் என்று முழக்கமிட்டும், கடவுள் இல்லை இல்லவே என்று முழக்கமிட்டும் அவர்கள் சென்றபோது பொது மக்கள் ஆச்சரியத்தின் உச்சிக்கே சென்றனர்.

அதுபோல கழகத் தோழர்கள் அலகுக் காவடி எடுத்து வந்தது பார்த்தோரைப் பிரமிக்கச் செய்தனர்.

தோழர்கள் கோ.பிளாட்டோ, அண்ணா மாதவன், பி.அறிவுக்கரசு, மூ.முகில்வேந்தன், ஆகியோர் அலகுக் காவடி எடுத்து வந்தனர்.

தீச்சட்டி ஏந்தி வந்த மகளிர்

எரியும் சூடத்தைப் வாயில் போட்டு அணைத்துக் கடவுள் சக்தி என்பதெல்லாம் ஏமாற்று வேலை என்று தோழர்கள் பிரச்சாரம் செய்து வந்தனர். அரங்க.பகீரதன், ஏ.லெனின் ஆகியோர் இதனைச் செய்து காட்டி வந்தனர். மண்ணச்சநல்லூர்  அட்டலிங்கம் உடுக்கடிப் பிரச்சாரம் செய்து வந்தார். தீச்சட்டி ஏந்தி வந்த கழக மகளிரணியினர் தீச்சட்டி இங்கே - மாரியாத்தாள் எங்கே? காளியாத்தாள் எங்கே? என்று முழக்கமிட்டு வந்தது பொதுமக்களை - குறிப்பாக பெண்களை மூக்கின் மேல் விரலை வைக்க வைத்தது.

மகளிர் தோழர்கள், மாநில மகளிரணிச் செயலாளர் கலைச்செல்வி, எஸ்.மலர்க்கொடி, சி.அஞ்சுகம், ஏ.பாக்கியம், கலைவாணி, அல்லிராணி, விடுதலை அரசி, பரிமளா, துரை.அல்பேனியா, சமத்துவம் ஆகிய மகளிரணித் தோழர்கள் கம்பீரமாக தீச்சட்டி ஏந்தி வந்து கடவுள் சக்தியின் ஏமாற்றுத்தனத்தை தோலுரித்து காட்டி வந்தனர்.

சிலம்ப விளையாட்டு

தஞ்சாவூர் கலைத்தாய் சிலம்பாட்டக்குழுவைச் சேர்ந்த இளைஞர்கள் எம்.பி.சந்திரன், சே.ஆர்.பி.மணி, ஆர்.மாயக்கண்ணன் ஆகியோர் தமிழர்களின் கலையான சிலம்பாட்டத்தை செய்து காட்டி மெய்சிலிர்க்க செய்தனர்.

மயிலாடுதுறை எம்.ஆற்றலரசு மேளம், தஞ்சை சிறீதர் வாசுகி ஆண்கள், பெண்கள் தப்பாட்டக் குழுவினர், பறை முழக்கம் செய்து பொதுமக்களுக்கு கட்டியம் கூறினர். தஞ்சை ரெட்டிப்பாளையத்தை சேர்ந்த தோழர்கள் இவர்கள்.

லூர்து மாதா மேனிலைப் பள்ளி அருகிலிருந்து புறப்பட்ட கழகப் பேரணி பழமநேரி, லயன்கரை, ஒன்பது வேலி, அங்காடி கடைவீதி வழியாக வந்தது. இருபக்கமும் பொதுமக்கள், தாய்மார்கள், இளைஞர்கள் கடைவீதி வியாபாரிகளும் ஆர்வமுடனும் ஆச்சரியத்துடனும் கண் குளிர பேரணியைப் பார்த்து ரசித்தனர். கைதட்டி ஆரவாரமும் செய்தனர். இது ஒரு பண்பாட்டு மீட்பு பணியாகவே கருதப்பட்டது.

மாலை 5 மணிக்கு புறப்பட்ட மூடநம்பிக்கை ஒழிப்புப் பேரணி 6.30 மணிக்கு முப்பெரும் விழா நடக்கும் இடத்திற்கு வந்து சேர்ந்தது. அப்பொழுதே ஏராளமான பொதுமக்கள் இருக்கைகளில் அமர்ந்து மேடையில் நடைபெற்ற பகுத்தறிவு இன்னிசை நிகழ்ச்சியை கேட்டு மகிழ்ந்து கொண்டு இருந்தனர்.

உரந்தை கருங்குயில் கணேசன், வழக்குரைஞர் சிங்கார வேலு, ஆசிரியர் ராஜூ, தா.போகன்ராஜ் ஆகியோர் சீர்திருத்தப் பாடல்களை பாடி பார்வையாளர் நெஞ்சங்களை கொள்ளை கொண்டனர்.

வீதி நாடகம்

மாநிலக் கலைத்துறைச் செயலாளர் ச.சித்தார்த்தன், மாநில வீதி நாடகக் கலைக்குழு அமைப்பாளர் சி.பெரியார்நேசன் குழுவினரின் ‘திராவிட வீரன்’ எனும் தலைப்பில் வீதி நாடகம் கருத்தாக்கம் கொண்டதாக நடத்தப்பட்டது.

கைபர் கணவாய் வழியாக ஆடு மாடுகளை ஓட்டி வந்த ஆரியக் கூட்டம் திராவிடர்களை எப்படியெல்லாம் அடிமைப்படுத்தியது, கரிகாற்சோழப் பெருவளத்தான், இன்றைக்கு 19 நூற்றாண்டுகளுக்கு முன் கல்லணையைக் கட்டிய அருஞ்செயல், திராவிட மாவீரன் இராவணனின் கீர்த்தி பற்றியெல்லாம் இசைப்பாடல்களுடனும், வலிமை யான வசனங்களுடனும் நிகழ்த்திக் காட்டப்பட்டது.

‘தென்திசையைப் பார்க்கிறேன், என் தோள் களெல்லாம் பூரிக்குதடடா!’ என்ற புரட்சிக்கவிஞரின் வீரம் கொப்பளிக்கும் பாடல் வரிகளுக்கு தெற்கு நத்தம் சித்தார்த்தன் வேடமும், நடிப்புத் திறனும் போற்றத் தக்கதாகும்.

வால்மீகி இராமாயணத்தின்படி குதிரைக்கு நாம் பிறந்தவர்கள் என்பதால் நாம் (இராமனும், இலட்சுமணனும்) இன்றைக்கும் காட்டில் அலைகிறோமோ என்ற வசனம் சிரிப்பலைகளை ஏற்படுத்தும்.

பெரியார்நேசன் தனக்கே உரித்தான தனித்தன்மை யோடு நடித்தார். உடன் நடித்த தோழர்களும் பாராட்டுக் குரியவர்களே!

அறிவூட்டும் முழக்கங்கள்
கடவுள் இல்லை இல்லவே இல்லை
கடவுளை மற  - மனிதனை நினை
ஒழிப்போம் ஒழிப்போம்
ஜாதியை ஒழிப்போம்!
மாய்ப்போம் மாய்ப்போம்
மதவெறியை மாய்ப்போம்!
காப்போம் காப்போம்
மனிதநேயம் காப்போம்!
முறியடிப்போம் முறியடிப்போம்
மூடநம்பிக்கைகளை முறியடிப்போம்!
உள்ளிட்ட முழக்கங்களை மாணவரணித் தோழர்கள்

அஜிதன், மதிவதினி, யாழ் திலீபன் ஆகியோர் முழங்கி வந்தனர்.

 


தொகுப்பு: மின்சாரம்

தமிழில் கருத்துக்களை தெரிவிக்க -  


Security code
Refresh

Banner
Banner