ஆசிரியர் அறிக்கை

அம்பேத்கர் அவர்களைப்  பரப்புவதைவிட - அதுதானே பரவுவது காலத்தின் கட்டாயம் - பாதுகாப்பதே - திரிபுவாதங்கள், திசை திருப்பல் களிலிருந்து காப்பதே அவசரமான,  அவசியமான பணியாகும் என்று திராவிடர் கழகத் தலைவர் ஆசிரியர் கி.வீரமணி விடுத்துள்ள அறிக்கை வருமாறு:

ஒடுக்கப்பட்ட மக்களின் உரிமைக் குரலாய் திகழ்ந்து ஒளி பாய்ச்சிய புரட்சியாளர் ‘பாபா சாகேப்’ அண்ணல் அம்பேத்கரின் 127 ஆவது பிறந்த நாள் இன்று (14.4.2017)!

அம்பேத்கரின் நிகழ்த்தப்படாத உரை!

தமிழ்நாட்டைப் பொறுத்தவரை 1934 ஆம் ஆண்டிலேயே டாக்டர் அம்பேத்கரை, தனது பச்சை அட்டை ‘குடிஅரசு’ வார ஏட்டின்மூலம் முதன்முதலில் மக்களுக்கு அறிமுகமாகும் வண்ணம் அவரது நிகழ்த்தப்படாத உரையான ‘‘ஜாதி ஒழிப்பினை’’ வெளியிட்டவர் தந்தை பெரியார்.

பஞ்சாப் ஜாட்பட் தோரக் மண்டல் என்ற அமைப்பு - அம்பேத்கர் அவர்களை ஜாதி ஒழிப்பு மாநாட்டிற்குத் தலைமை தாங்க அழைத்தபோது, அவர் அந்த அழைப்பினை ஏற்றார். உரையை முன்கூட்டியே தந்தால், அச்சிட வசதியாக இருக்கும் என்று கூறியதால், அம்பேத்கர் அவர்களும் எழுதித் தந்தார்.

அதில் இந்து மதம், கீதை, கடவுள்கள், பார்ப்பனியத்தைக் கண்டித்து, ஜாதிக்கு ஆதாரமாக முட்டுக்கொடுக்கும் இவைகளையெல்லாம் வேரோடு பெயர்த்து எறிந்தால்தான் ஜாதி ஒழியும் என்று அறிவியல் பூர்வ வாதங்களோடு உரையைத் தயாரித்து அனுப்பினார்.

ஜாதியை ஒழிக்க வழி!

அதன் சில பகுதிகளை நீக்கி விடும்படி மாநாட்டினர் கேட்டனர்; டாக்டர் அம்பேத்கர் அவர்கள் அதற்கு ஒப்புக்கொள்ளவில்லை. எனவே, முதன்முதலில் தந்தை பெரியார் அவர்கள், டாக்டர் அம்பேத்கர் அவர்களிடம் அதைக் கேட்டுப் பெற்று தமிழாக்கம் செய்து பரப்பியதோடு, ‘‘ஜாதியை ஒழிக்க வழி’’ என்ற தலைப்பில் குறைந்த விலையில் வெளியிட்டுப் பரப்பினார்! முதல் அறிமுகம் அப்போதுதான்! அதன்பின் இரு புரட்சியாளரும் மேலும் 3, 4 தடவை நேரில் சந்தித்தும் உரையாடினர்.

பெரியாரும் - அம்பேத்கரும் ஒரு நாணயத்தின் இரண்டு பக்கங்கள்

உலக பவுத்தர்கள் மாநாடு அன்றைய பர்மா (இன்றைய மியான்மாவில்) நடைபெற்றது. அழைப்பு பெற்று அய்யா அந்த மாநாட்டிற்குச் சென்றார்; டாக்டர் அம்பேத்கர் அவர்களும் அழைப்பு பெற்று சென்று, பவுத்தத்தில் சேருவதுபற்றிய ஆலோசனையை கலந்து பேசினார்.

இப்படி பற்பல கொள்கைப் பிரகடனங்கள்- லட்சியப் போர்களில் - மனுதர்ம எரிப்பு உள்பட இருவரும் ஒரு நாணயத்தின் இரண்டு பக்கங்கள் ஆயினர்!

வைக்கம் போராட்டம்தான், மகாராஷ்டிர மாநிலம் சவுதார் குளத்தில் தாழ்த்தப்பட்டோர் தண்ணீர் எடுக்கும்  - அம்பேத்கர் நடத்திய போராட்டத் திற்கு முன்னோடி - முக்கிய ‘உற்சாக ஊக்கி’யாகவே டாக்டர் அம்பேத்கருக்கு அது அமைந்தது!

நவீன வேஷம் போடும் காவிகள்!

இத்தகைய அம்பேத்கரை இப்போது காவிகள் ஆக்கிரமித்து, தாழ்த்தப் பட்டோரின் வாக்கு வங்கியைப் பறிக்க நவீன வேஷம் போடுகின்றனர். மதவாதம் ஒப்பனைகளால் அம்பேத்கரை கபளிகரம் செய்யத் துடிக்கிறது. எச்சரிக்கையாக இருக்கவேண்டிய தருணம் இது!

எனவே, அம்பேத்கரைப் பரப்புதைவிட - அதுதானே பரவுவது காலத்தின் கட்டாயம் - பாதுகாப்பதே - திரிபுவாதங்கள், திசை திருப்பல்களிலிருந்து காப்பதே அவசரமான ,  அவசியப் பணியாகும்!

வாழ்க அம்பேத்கர்! வருக அவர் விரும்பிய புதிய சமுதாயம்!



சென்னை                                                                                           தலைவர்
14.4.2017                                                                                     திராவிடர் கழகம்


மேற்கு வங்கத்தில் காலூன்ற ஆயுதம் தாங்கிய ஆர்.எஸ்.எஸ். பேரணிகள் நடத்திட திட்டம்

திரிணாமுல், கம்யூனிஸ்டு, காங்கிரஸ்

இதனை எப்படி சந்திக்கும் - இது முக்கிய கேள்வி

ராமநவமி பக்தர்களே ராமன் பிறப்பென்ன தெரியுமா?

தமிழர் தலைவர் ஆசிரியர் விடுத்துள்ள முக்கிய அறிக்கை

மேற்கு வங்கத்தில் கால் பதிக்க அரசியல் நோக்கத் தோடு ஆயுதம் தாங்கிய, ராமனைக் கையில் எடுத்துக்கொண்டு ஆர்.எஸ்.எஸ். பேரணி நடத்திடத் திட்டமிடப்பட்டுள்ளது. மம்தாவின் திரிணாமுல் காங்கிரஸ், கம்யூனிஸ்டுக் கட்சி, காங்கிரஸ் - மதச்சார்பற்ற கட்சிகள் இதனை சந்திக்க எந்தத் திட்டத்தைக் கையில் வைத்துள்ளன என்பது மிக முக்கியமான கேள்வி என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

ஆர்.எஸ்.எஸ். இயக்கம் அதன் அரசியல் வடிவமான பா.ஜ.க.வை மேற்கு வங்காளத்தில் கால் ஊன்றச் செய்ய தற்போது ‘பகீரதப் ‘ பிரயத்தனத்தில் இறங்கியுள்ளனர். அதற்கான முன்னோடியாக இராமனைத் துணை கொண்டுள்ளனர்.

ஆர்.எஸ்.எஸ். என்ற ஆரிய சனாதன ஹிந்துத்துவாவை பரப்ப அது எதை எளிமையான ஊடுருவல் முறையில் செய்யும் தெரியுமா?

விநாயகர் ஊர்வலத்தின் நோக்கம்

பாமர மக்களிடம் படிந்துள்ள பக்திப் போதையை - கடவுள் போதையை - திருவிழாக்கள் - வழிபாடு இவைகளைக் கொண்டாடி, அங்கே ஆர்.எஸ்.எஸ். - ஹிந்து முன்னணியின் கொடியைப் பரப்பி, கால் ஊன்ற முயலுவது அவர்களது வழமையான முறை (Modus Operandi).

மகராஷ்டிரத்தில் - முந்தைய பம்பாயில் - விநாயகர் ஊர்வலம் சதுர்த்தி என்ற பெயரில், தங்களது இயக்கமான ஹிந்து மகாசபையை, பிறகு அதன் வழி ஆர்.எஸ்.எஸைக் கட்டும் வேலைக்கு பிள்ளையார் பக்தியை ஒரு கருவியாக்கிக் கொண்டனர். தமிழ்நாட்டிலும் கூலிக்கு ஆள் பிடித்து பிள்ளையார் ஊர்வலம் - அதன்மூலம் ‘ஒரு கல்லில் இரண்டு மாங்காய்’ என்பதற்கேற்ப, மசூதிகள் பக்கம் பிள்ளையார் ஊர்வலத்தைத் திருப்பச் செய்து கலவரத் தூண்டல்மூலம் தமது ஆர்.எஸ்.எஸ். இயக்கத்தை வளர்த்தது.

பாபர் மசூதி இடிப்பு வழக்கு என்னாயிற்று?

அதுபோலவே ஒன்றுமில்லா மூன்றடி உயரமுள்ள ‘இராமலல்லா’ (சிறிய இராமர் குழந்தை) உருவத்தை வைத்துப் படிப்படியாக, காங்கிரசு பார்ப்பனராகிய பண்டித வல்லப பந்த் போன்ற உ.பி. முதல்வராக இருந்த வாய்ப்பை பயன்படுத்தி வளர்த்து, ‘இராம ஜன்ம பூமியாக்கி’  - இராமன் பிறந்த இடத்தை இடித்து, பாபர் மசூதி கட்டினர் என்று கூறி, 400 ஆண்டுகள் பழைமை வாய்ந்தது என்ற பாபர் மசூதியை இடித்தனர்  (அத்வானி, முரளிமனோகர் ஜோஷி, உமாபாரதி, வினய்கட்டியார் போன்றவர்கள்மீது 1992 ஆம் ஆண்டு தொடங்கிய வழக்கு இன்னமும் கிரிமினல் கோர்ட்டில் நிலுவையில் உள்ளது).

இராமன்  பிரச்சாரம் - டில்லியில் இராமலீலா - பிரதமர்களும், குடியரசுத் தலைவர்களும் - மதச்சார்பின்மையைக் காலில் போட்டு மிதித்துக்கொண்டே - இராவணன் எரிப்பை இராமலீலா பண்டிகைமூலம் கொண்டாடுவதா? என்று தென்னாட்டில் எழும்பிய கேள்வியைப் புறக்கணித்து அதனை உ..பி. ஆட்சியைப் பிடிக்கும் ‘உபாயமாக்கினர்’ - கோவில் பக்தி அரசியலுக்கு நீர்ப் பாய்ச்சிட அது உதவியது.

மேற்கு வங்கத்தில் காலூன்ற

ஆர்.எஸ்.எஸ். முயற்சி!

இப்போது மேற்கு வங்கத்தில் அடுத்து நடைபெறவிருக்கும் தேர்தலை மனதிற்கொண்டு, ஆர்.எஸ்.எஸ். - பா.ஜ.க. கூட்டு என்ன மாதிரி முயற்சியில் ஈடுபட்டுள்ளன தெரியுமா?

‘துர்கா பூஜை’,  ‘காளிபூஜை’ என்றே பிரபலமான பண்டிகை யாகக் கொண்டாடப்பட்டு வருகின்றது மேற்கு வங்கத்தில். (கம்யூனிஸ்டுகளின் நீண்ட கால ஆட்சி கூட இதனை எதிர்த்து எந்தப் பகுத்தறிவுப் பிரச்சாரமும் செய்யவில்லை - வாக்கு வங்கிக் கண்ணோட்டத்தின் காரணமாக இருக்கலாம்).

இப்போது ஆர்.எஸ்.எஸ். அங்கே அதிகமான மக்கள் கொண்டாடாத இராம நவமியைக் கொண்டாட வைக்கும் வேலை அரசியல் தூண்டிலில் இராமனை மாட்டி பெரிய அளவில் வருகின்ற ஏப்ரல் 10 ஆம் தேதி மேற்கு வங்க மாநிலம் முழுவதிலும் 350 பேரணிகளை; 22 மாவட்டங்களிலும் கொண்டாட ‘மெகா’ ஏற்பாடுகளைச் செய்து வருகின்றனராம்.

கொல்கத்தாவில் 6 முக்கிய இடங்களிலும், வெளி மாவட்டங் களில் 5 இடங்களில் ஆயுதங்களுடன் பேரணி நடத்த ஆயத்த மாகின்றனர்.

1000 ஆர்.எஸ்.எஸ். தொண்டர்கள் ஏற்பாடு; 10 ஆயிரம் மக்கள் கொல்கத்தா நகரத்தில் திரள வைக்கத் திட்டம்.

ஆயுதம் தாங்கிய ஊர்வலமாம்!

கடந்த ஒரு மாதமாக 70 ஆயிரம் தொண்டர்களை கொல்கத்தா - மேற்கு வங்கம் மற்ற பகுதிகளிலிருந்து அழைத்து வந்து அணிவகுக்கச் செய்வதோடு, ஆயுதம் தாங்கி வரவும் ஏற்பாடு.

இராமன் பயன்படுத்திய வாள்கள், திரிசூலங்கள், அம்பு, வில்களுடன் இந்தப் பேரணிகள் இருக்குமாம்! - அவர்கள் பகிரங்கமாக அறிவிக்கின்றனர்!!

ஆயுதந் தாங்கிய இந்தப் பேரணிகள்மூலம் புதிய கால் ஊன்றுதலில் (அரசியலை மனதிற்கொண்டே) இறங்கியுள்ளனர்!

தமிழ்நாட்டிற்குமுன் அதற்கு இப்படி ஒரு முயற்சி - ஒருபுறம் மம்தாவின் ஆட்சி, மற்றொருபுறம் கம்யூனிஸ்ட், காங்கிரசு அரசியல் எதிர்க்கட்சிகள்.

எல்லோரையும் ‘‘ஒழிக்க’’ இராமனை அங்கு பயணம் பண்ண, கலவரங்களுக்கு வித்தூன்ற - பண்டிகைமூலம் (ஹிந்துத்துவ) கொடியேற்ற முனைகின்றனர்!

மேற்கு வங்க அரசும் - கம்யூ., காங்கிரசும் என்ன செய்யப் போகின்றன?

மேற்கு வங்க அரசும், மம்தாவும், கம்யூனிஸ்டுகளும், காங்கிரசும் - மதச்சார்பற்ற கொள்கையில் நம்பிக்கை யுள்ளவர்களும் - இதனை எப்படி எதிர்கொள்ளவிருக்கின்றன என்பதுதான் இன்றைய மில்லியன் டாலர் கேள்வியாகும்!

‘இராவணனைக் கொல்ல இராமன் இப்படி கலவரங்களைத் தூண்டும் முயற்சியிலா ஈடுபட்டான்?’ என்று முதலமைச்சர் மம்தா பானர்ஜி கேள்வி கேட்டுள்ளார். அதுமட்டும் போதுமா?

இராமநவமி கொண்டாடும்

பக்தர்களுக்குச் சில கேள்விகள்!

இராம நவமி கொண்டாடும் பக்தர்களே, இக்கேள்விகளுக்கு விடையென்ன?

1. இராமன் எப்படி பிறந்தான்? அசுவமேதம் புத்ரகாமேஷ்டி யாகம்மூலம் புரோகிதப் பார்ப்பனர்கள், குதிரை இவைகள் மூலம்தானே இராமன் பிறந்தான்  என்று வரலாற்று ஆசிரியர் தத் மற்றும் ஆய்வாளர் அமிர்தலிங்க அய்யர் வால்மீகி இராமாயணத்தில் உள்ளதைச் சொல்லுகிறார்கள் - அதற்குப் பதில் என்ன?

2. கதைப்படி ‘அவதாரக் கடவுளான’ இராமன் தன் மனைவி சீதையின் கற்பைச் சந்தேகப்படலாமா? ஞானதிருஷ்டியில் உண் மையை அறிந்திருக்க வேண்டாமா? சலவைத் தொழிலாளியின் கூற்றுதான் ஆதாரமா?

3. இன்று எந்த மனைவியையாவது நெருப்பில் குளித்து, கற்பை   நிருபிக்க எந்த கணவனாவது வற்புறுத்தினால் இந்திய தண்டனைச் சட்டமும், காவல்துறையும் அனுமதிக்குமா?  நியாயமா?

மனைவிகளை - பெண்களை நடத்தும் முறையா இது?

பெண்ணுரிமை இயக்கவாதிகளே, இதைக் கண்டிக்க முன்வர வேண்டாமா?

4. மரத்திற்குப் பின் ஒளிந்து நின்று வாலியைக் கொன்ற இராமன் வீரனா? அது யுத்த தர்ம நேர்மையா?

பக்தி வந்தால் புத்தி போகும்!

5. தனது ‘இராம ராஜ்ஜியத்தில்’  பார்ப்பனச் சிறுவன் உயிர் பிழைக்கத்  தவஞ்செய்த சூத்திர சம்பூகன் தலையை விசா ரணையே இன்றி வெட்டி வீழ்த்தியது ஏன்? தர்மமா, நியாயமா?

கேட்டால், ‘உத்திரகாண்டமே இல்லை’ என்று ஒரே அடியாகக் கூறுவோர், இராமாயணத்தில் மற்ற காண்டம் மட்டும் உண்டு (அதில் உள்ளவைகளுக்குப் பதில் இல்லையே) என்பது முரண் அல்லவா?

6. நிறைமாதக் கர்ப்பிணி சீதையை காட்டிற்கு அனுப்பியவன் ‘‘புருஷ உத்தமனா? நடுநிலையாளர்களே, இராம பக்தர்களே, அறிவுக்கு வேலை கொடுங்கள் - பக்தி வந்தால் புத்தி போய்விடும் என்று பெரியார் சொன்னதை நிரூபித்துக் காட்டுகிறீர்களே!

‘இராம நவமி’யின் பின்னால் உள்ள ஆபத்து புரிகிறதா?

அது சர்க்கரைப் பூச்சுள்ள விஷ உருண்டை - ஆபத்து புரிந்திடுவீர்!

கி.வீரமணி

தலைவர்,  திராவிடர் கழகம்.

 

கூட்டுறவு வங்கிகளில் விவசாயிகள் வாங்கிய பயிர்க் கடனைத் தள்ளுபடி செய்யவேண்டும் என்று சென்னை உயர்நீதிமன்றத்தில் நீதிபதிகள் நாகமுத்து, முரளிதரன் ஆகியோர் அடங்கிய அமர்வு இன்று ஆணை பிறப் பித்துள்ளது.

இது மிகவும் வரவேற்கத்தக்கதாகும். இந்தத் தீர்ப்பின்மீது மேல்முறையீடுக்குச் செல்லாமல் தமிழ்நாடு அரசு உயர்நீதிமன்ற ஆணையை செயல்படுத்தவேண்டும்.

ரூ.7000 கோடி விவசாயக் கடனை கலைஞர் அவர் கள் முதலமைச்சராக இருந்தபோது, மாநில அரசே அந்தச் சுமையை ஏற்று தள்ளுபடி செய்தது என்பதை நினை வூட்டுகிறோம். கூட்டுறவுக் கடன்கள் மட்டுமன்றி, தேசிய மயமாக்கப்பட்ட வங்கிகளில் விவசாயிகள் வாங்கிய கடனையும் தள்ளுபடி செய்ய மத்திய அரசு முன்வரவேண்டும் என்றும் வலியுறுத்துகிறோம்.

கி.வீரமணி

தலைவர்,        திராவிடர் கழகம்.


சென்னை
4.4.2017

 

உடனடி உதவிகளை அரசு செய்யட்டும்!!

கழகத் தோழர்களே களப் பணியில் ஈடுபடுவீர்!

தமிழர் தலைவர் ஆசிரியர் விடுத்துள்ள முக்கிய அறிக்கை

இராசபாளையம் அடுத்த கே.தொட்டியபட்டி யில் வாழும் அருந்ததியினர் மீது ஜாதி வெறியினர் நடத்திய கொடூர தாக்குதலைக் கண்டித்து திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

இராசபாளையம் அருகே கே.தொட்டியபட்டியில் நானூறுக்கும் மேற்பட்ட கம்பளத்து நாயக்கர் குடும்பங் களும், அய்ம்பதுக்கும் மேற்பட்ட அருந்ததியின மக்களும் அருகருகே வசித்து வருகின்றனர்.

நாயக்கர் ஜாதி மக்கள் அருந்ததியின மக்களை அரசு பொதுநலக் கூடத்தைப் பயன்படுத்த அனுமதிக்காமலும், பொதுக் குழாயில் தண்ணீர் பிடிக்க குறைந்த நேரமே அனுமதித்தும் அவர்களை தீண்டாமைக் கண்ணோட் டத்தோடு புறக்கணித்து வந்தனர்.

இதை அவர்கள் மாற்றிக் கொண்டு சகோதரத்துவ உணர்வுடன் வாழ முயலவேண்டும்.

பாதிக்கப்பட்ட அருந்ததியினர்

அருந்ததியின மக்கள் தங்கள் உரிமையைத் தொடர்ந்து வலியுறுத்தி வந்ததைப் பொறுக்காமல் கடந்த 30.3.2017 அன்று மாலை 200-க்கும் மேற்பட்ட நாயக்கர் ஜாதியினர் திட்டமிட்டு அருந்ததியினர் குடியிருப்பில் புகுந்து 40-க்கும் மேற்பட்ட வீடுகளின் ஓடுகளை உடைத்து உள்ளே இறங்கி பொருட்களை சேதப்படுத்தியும், குடிசைகளை அடியோடு கொளுத் தியும், மக்களை அடித்துக் காயப்படுத்தியும், சுமார் ஒன்றரை மணிநேரம் வன்முறை வெறியாட்டம் நடத்தியுள்ளனர் என்று கூறப்படுகிறது. முன்கூட்டியே குடும்பத்திற்கு 2000 ரூபாய் வரை வரி போட்டு, பணம் வசூலித்து இந்த வன்முறை வெறியாட்டத்தை திட்டமிட்டு நிகழ்த்தியுள்ளனர் என்றும் கூறப்படுகிறது.

உள்ளிருப்புப் போராட்டம்!

உடைக்கப்பட்ட வீடுகளுக்கு, எரிக்கப்பட்ட வீடு களுக்குப் பதிலாக புதிய வீடுகள் கட்டித்தரக் கோரியும், அடிப்படை வசதிகளும், காயமடைந்தவர்களுக்கு உரிய இழப்பீடும் பெற்றுத்தரக் கோரியும், வன்முறையில் ஈடுபட்டவர்களைக் கைது செய்து வன்கொடுமைத் தடுப்புச் சட்டத்தின்கீழ் வழக்குப் பதியக் கோரியும்  அருந்ததியின மக்கள் உள்ளிருப்புப் போராட்டம் நடத்தி வருகின்றனர்.

துப்புரவுப் பணியாளர்களாகவும், கூலி வேலை செய்பவர்களாகவுமே அந்த மக்கள் வாழ்வாதாரத்தை மேற்கொண்டுள்ளனர். ஏழை, எளிய மக்களுக்கு இவ்வளவு தொல்லை நியாயமா?

திராவிடர் கழகத்தின் சார்பில்...

திராவிடர் கழகத்தின் சார்பில் மாவட்டத் தலைவர் இல.திருப்பதி, அமைப்பாளர் இரா.பாண்டி முருகன், செயலாளர் பூ.சிவக்குமார், மா.முருகன், த.இசக்கிபாண்டியன், அரிராம் சேட், இரா.கோவிந்தன் ஆகியோர் சந்தித்து ஆறுதலும், ஆதரவும் தெரிவித்தனர். வேண்டிய உதவிகளையும் செய்து வருகின்றனர்.

மேலும் கழகத்தின் களப்பணிகள் தொடரும்!

2012 ஆம் ஆண்டில் தருமபுரி மாவட்டத்தில் நத்தம் காலனி, அண்ணாநகர், கொண்டாம்பட்டி பகுதி களில் தாழ்த்தப்பட்டோர் வீடுகளைக் கொளுத்தி, பொருள்களைச் சூறையாடியதற்குப் பின்னர் நிகழ்ந்தி ருக்கிற கேவலமான வெறியாட்டம் இது!

அவசர அவசரமாக குற்றவாளிகள்மீது நடவடிக்கைகள் தேவை!

பாதிக்கப்பட்ட மக்களுக்குத் தேவையான உதவிகளை அரசு செய்யக்கூடும், செய்யவும் வேண்டும். அதைவிட முக்கியம் ஒடுக்கப்பட்ட மக்களைச் சூறையாடும் கொடியவர்கள்மீதான சட்ட ரீதியான நடவடிக்கைகள் போர்க்கால அடிப்படையில் நடைபெறவேண்டும்.

அரசு நிர்வாகம், நீதித்துறை நடவடிக்கைகள் வழமை யான எறும்பு ஊரும் மெத்தன நடவடிக்கைகளாலும், சட்டத்தின் சந்துப் பொந்துகளில் நுழைந்து குற்றவாளிகள் தப்பிவிடுவதாலும், ஆறின கஞ்சி பழங்கஞ்சி என்ற பாணியில் தீர்ப்புகள் குற்றவாளிகளுக்குச் சாதகமாகும் நிலைதான் தொடர்கிறது.

இந்த நடைமுறையை மாற்றி, உடனுக்குடன் குற்றவாளிகள் கடுமையாகத் தண்டிக்கப்படுவதற்கு மாநில அரசு வேகத் தடைகளையுடைத்து விரைந்து செயல்படவேண்டும் என்று வலியுறுத்துகிறோம்.

முற்போக்கு அமைப்புகள் கூட்டாகப் பாதிக்கப்பட்ட மக்களுக்கு ஒருங்கி¬ணைந்து உரிய உதவிகளைச் செய்வது அவசியம்.

அரசு செய்யவேண்டியது என்ன?

கொளுத்தப்பட்ட, இடிக்கப்பட்ட வீடுகளைப் புதிதாகக் கட்டவும், நட்ட ஈட்டைத் தாராளமாக வழங்கவும் பாதிக்கப்பட்ட மக்களுக்கு அடிப்படையான குடிநீர் வசதி, கழிப்பறை வசதிகள் போன்ற இன்றியமையா ஏற்பாடுகளை உடனடியாக செய்யவும்வேண்டும் என்று வலியுறுத்துகிறோம்.

கழகத்தின் பிரச்சார நடவடிக்கைகள்

மக்கள் மனதில் வேர்ப் பிடித்து வெறியூட்டிக் கொண்டி ருக்கும் தீண்டாமை, ஜாதி உணர்வுகளைக் கெல்லி எறிந்திட கழகம் தனது பிரச்சாரப் பயணத்தை அந்த வட்டாரங்களில் மேற்கொள்ள ஆவன செய்யப்படும்.

திராவிடர் கழகம் என்ன செய்கிறது என்று வெறும் குற்றப் பத்திரிகைகளைப் படித்துக் கொண்டிராமல், அதன் சமூகப் பணிகளுக்கு ஒத்துழைக்க முன்வரவேண்டும் - வெறும் வார்த்தை உபதேசிகள்!

 

கி.வீரமணி
தலைவர்,   திராவிடர் கழகம்.


4.4.2017
சென்னை

 

 

‘‘திருமணம் - பொதுக்கூட்டம் - சந்திப்புகள் என்று

திகட்டா நிகழ்ச்சிகளால் மகிழ்ச்சியில் திளைத்தோம்!’’

 

கடந்த வாரம் முழுவதுமே நமக்குப் பணிச் சுமைகள் அதிகம். மார்ச் மாதம் என்றாலே ஒவ்வொரு ஆண்டும் கூடுதலாகப் போராட்டங்களும், பரப்புரைகளும், கழகப் பணியின் ஆக்கபூர்வத் திட்டங்களும் நமது அனைவரது உழைப்பையும் பன்மடங்கு பெருக்கி விடுகின்றன.

நமது கழகக் குடும்பத்தினர் எவரும் இதனைச் சுமை யாகக் கருதாது, சுகமாகவே அனுபவித்து மகிழ்வதைக் கண்டு, உங்களில் ஒருவனான நானும், புத்தாக்கமும், புத்தெழுச்சியும் பெறுகிறேன்.

ஜனநாயக உரிமைகள்

பாதுகாப்பு

மார்ச் மாதம் 27 ஆம் தேதி ஒத்தக் கருத்துள்ள கட்சிகளின் கொள்கைச் சங்கமத்தில், வரும் ஆபத் துக்களிலிருந்து நாட்டைப் பாதுகாக்கும் புது வியூ கத்தினையும்பற்றி ஆலோசித்து, ஒரு திட்டம் உரு வாக்கப்பட்டுள்ளது.

‘‘ஜனநாயக உரிமைகள் பாதுகாப்புக் கூட்டமைப்பு’’  என்பது காலத்தின் கட்டாயம்; எதிர்கால நம்பிக்கையை பெரும்பாலோருக்குத் தரக்கூடியதாகும். இம்முயற்சிக்கு ஒத்துழைப்பும், பேராதரவும் தர முன்வந்தமைக்கு அத்துணைக் கட்சி, இயக்கங்களின் தலைவர்களான பெருமக்களுக்கு திராவிடர் கழகம் தனது உளங்கனிந்த நன்றியைத் தெரிவித்துக் கொள்கிறது.

குமரிமுனையில்

கொள்கைப் பொதுக்கூட்டம்

கடந்த 29, 30 ஆகிய இரு நாட்களில் தென்கோடி குமரிமுனையில் நமது கழகக் கொள்கைப் பிரச்சாரம் நடைபெறும் வகையில், குமரி மாவட்டம் கருங்கல் பாறை என்ற ஊரில் மிக அருமையான பொதுக்கூட்டத்தை, மாவட்டச் செயலாளர் தோழர் மானமிகு கிருஷ்ணேசுவரி அவர்களது சீரிய முயற்சியோடு,  பொதுக்குழு உறுப்பினர் தயாளன், மாவட்டக் கழகப் பொறுப்பாளர்களும், மண்டல இளைஞரணி செயலாளர் வெற்றிவேந்தன், மற்றும் நமது கழக ஆதரவாளர்களின் ஒத்துழைப்போடு மிக அருமையான வகையில் ஏற்பாடு செய்ததும் அதன் கனிந்த பலனும் தொலைதூரப் பயணக் களைப்பை  அகற்றிவிட்டது!

நாகர்கோவில்

கழகப் பெருமக்களே...!

நாகர்கோவிலில் மூத்த பெரியார் பெருந்தொண்டர் நூறு ஆண்டு கண்டுள்ள மானமிகு பெரியவர் முகம்மதப்பா அவர்களைச் சந்தித்து அளவளாவிய மகிழ்ச்சியும், வடிவீசுவரத்தில் முதுபெரும் பெரியார் பெருந்தொண்டரான மானமிகு அய்யா பழனிவடிவேலு அவர்களது மறைவிற்குப் பின் ஓய்வு பெற்ற தலைமை ஆசிரியர் தோழர் ப.சங்கரநாரயணன் அவர்களும் இயக்கத்திற்கு மாவட்டத் தலைமைப் பொறுப்பேற்று நடத்தி புகழுடன் மறைந்தார். துயரத்திலிருந்த அவரது வாழ்விணையர் திருமதி அருணாசங்கரன், மகன் பழனி, மருமகள் சுதா, சம்பந்தி தூத்துக்குடி தி.பா.பெரி யாராடியான், திருமதி தமிழ்மணி, அவரது அன்பு சகோதரர் ஓய்வு பெற்ற ஸ்டேட் வங்கி அதிகாரி ப.தமிழ் மணி குடும்பத்தினருக்கும் ஆறுதல் கூறி, உரையாடி திரும்பியது நமக்கும் ஆறுதலாக இருந்தது.

சுயமரியாதைச் சுடரொளிகளின் மறைவு என்பது சமூக விஞ்ஞானிகளின் மறைவு ஆயிற்றே!

அங்கே முதுமையில் தள்ளாடும் அய்யா பாஸ்கர் அவர்கள் ஓடோடி வந்து கட்டி அணைத்து மகிழ்ந்தார். இயக்கத்தின் வலிமை இந்த உறவில்தானே உள்ளது?

மாவட்டக் கழகத் தலைவர்

மணி அவர்களின் இல்லத் திருமணம்

மாவட்டத் தலைவரும், சீரிய கொள்கைக் குடும்பத் தலைவருமான ஆரல்வாய்மொழி மணி அவரது வாழ்விணையர் திருமதி இந்திரா ஆகியோரின்  இல்ல மணவிழா ஒரு மாநாடு போல் நடைபெற்றது! அவரது சம்பந்திகள் ஆரல்வாய் மொழி திருவாளர்கள் பெரியசாமி-இசக்கியம்மாள் ஆகியோரது ஒத்துழைப்பும் பெரிதும் பாராட்டத்தக்கது.

அனைத்துத் தரப்பினர், கட்சியினர், மதத்தினர் சிறீ நாராயண குரு தர்ம பரிபாலன அடிகளார், பங்கு தந்தை ஜார்ஜ் பொன்னையா அடிகளார், இந்திய கம்யூனிஸ்ட் கட்சி மாவட்டச் செயலாளர் இசக்கி, காமராசர் அறக்கட்டளைத் தலைவர் இராமசாமி, ஊர் பெருந்தனக்காரர் ஆறுமுகம் பிள்ளை, மேனாள் மத்திய இணையமைச்சர் தனுஷ்கோடி ஆதித்தன் முதலியவர்களும், கழக முக்கிய பொறுப்பாளர்களும் குமரி, நெல்லை, தென்காசி, தூத்துக்குடி மண்டலப் பொறுப்பாளர்கள் அத்துணை பேரும் அந்தக் குடும்ப விழாவில் குதூகலத்துடன் கலந்துகொண்டனர்.

தூத்துக்குடி மாவட்டத் தோழர்கள், பொறுப்பாளர்கள், மாவட்டத் தலைவர் காசி, பெரியாரடியான், மண்டல செயலாளர் கனகராசு, மண்டலத் தலைவர் பால்.இராசேந்திரன், மாவட்டச் செயலாளர் முனியசாமி, மாவட்ட இளைஞரணி செயலாளர் செல்வராசு, ஆழ்வார், இராஜபாளையம் மாவட்டத் தலைவர் இல.திருப்பதி, தலைமைச் செயற்குழு உறுப்பினர் டேவிட், செல்லதுரை, தென்காசி மாவட்டத் தலைவர் வழக்குரைஞர் வீரன், நெல்லை மண்டல மாணவரணி செயலாளர் சவுந்திரபாண்டியன், நெல்லை மாவட்டத் தலைவர் காசி, மாவட்டச் செயலாளர் இராமச்சந்திரன், அவரது துணைவியார் இப்படி தென்மாவட்டங்களின் கழகக் குடும்ப சங்கம சந்திப்பாக இருந்தது - உற்சாகம் கரைபுரண்டோடியது!

ஆரல்வாய் மொழி முடித்து, நெல்லை வந்து பாளையங்கோட்டையில் பேராசிரியர் பெரியார் சிந்தனையாளர் மானமிகு தொ.பரமசிவம் அவர்களைச் சந்தித்து நலம் விசாரித்து திரும்புவதாகத்தான் திட்டம்.

எதிர்பாராத இன்ப அதிர்ச்சியான நிகழ்ச்சிகளால், அதன்மூலம் எல்லோரும் பெற்ற எல்லையற்ற மகிழ்ச் சியும்தான்! இந்தப் பயணத்தில் மறக்க முடியாதவை, ஏற்கெனவே திட்டமிடப்படாத புதிய சந்திப்புகள் ஆகும்.

மார்ச் 29 காலை கன்னியாகுமரி எக்ஸ்பிரஸ், இரண்டு மணிநேரம் தாமதாகச் செல்லும் நிலையில், காலையில் நெல்லை சந்திப்பில் செய்தித்தாள் வாங்கித் தந்தனர் தோழர்கள்.

‘குமார விலாஸ்’ பிரம்மநாயகம் அவர்களின் இல்லத்தில்...

முதுபெரும் பெரியார் பெருந்தொண்டரும், நெல்லை மாவட்ட திராவிடர் கழகத் தலைவராக பல ஆண்டுகள் இருந்தவரும் - தந்தை பெரியார் - அன்னை மணியம்மையார், திராவிடர் இயக்க முன்னோடிகள், பிரச்சாரகர்களுக்கு அக்காலத்தில் உணவுக்கூடமாக இருந்த பிரபல உணவு விடுதியான ‘குமாரவிலாஸ்’ உரிமையாளருமான க.மு.பிரம்மநாயகம் (பிள்ளை) அவர்களது 117 ஆம் ஆண்டு பிறந்த நாள் திராவிட திலகம் என்ற வாசகங்களுடன் அவரது இளைய மகன் தோழர் முத்து இருளப்பன், அவரது வாழ்விணையர் கனகாமுத்து இருளப்பன், குடும்பத்தினர் அளித்திருந்த ஒரு விளம்பரத்தை அந்தச் செய்தித்தாளில்

கண்டேன்.

70 ஆண்டுகளாக விட்டது துளிர்த்தது!

உடனே தோழர்கள் மூலமாக நெல்லை மாவட்டச் செயலாளர் தோழர் இராசேந்திரன், நெல்லை மாவட்டத் தலைவர் இரா.காசி ஆகியோரிடம்,  அக் குடும்பத்தினரை தொடர்பு கொள்ளச் சொல்லி, ‘‘நாளை (மார்ச் 30 ஆம் தேதி) நான் அங்கே வந்து அவர்கள் இல்லத்தில்  உள்ள அய்யா பிரம்மநாயகம் அவர்களின் 117 ஆம் ஆண்டு பிறந்த நாள் விழாவில்,  அவருடைய படத்திற்கு மலர்மாலை அணிவிக்க வருவதாக சொல்லச் சொன்னேன்.

‘‘சுயமரியாதைச் சுடரொளி’’ பிரம்மநாயகம் அவர்களது தொண்டறச் சிறப்புப்பற்றி ‘‘உலகத் தலைவர் பெரியார்’’ வாழ்க்கை வரலாற்றில் 3 ஆவது தொகுதியிலும் எழுதப்பட்டுள்ளதுபற்றி நான் கூறி மகிழ்ந்தேன். எனது வாழ்விணையர் மோகனா அந்தப் புத்தகப் பிரதியை அவர்களுக்குத் தந்தால் மகிழ்ச்சி அடைவார்களே என்று கூறினார், அவ்வாறே அந்நூலும்  அளிக்கப்பட்டது.

(‘‘அய்யாவின்அடிச்சுவட்டில்’’என்றுநான் எழுதியுள்ள நூலிலும் பிரம்மநாயகம் அவர்களைப் பற்றிய குறிப்புகள் விரிவாக (முதல் பாகத்தில் உள்ளது).

நாங்கள் அவர்களின் வீட்டுக்கு வருவதை சுவ ரொட்டிமூலம் முத்து இருளப்பனார் குடும்பத்தினர் விளம்பரப்படுத்தி ஒரு பரபரப்பை ஏற்படுத்தி விட்டனர்.

பகல் ஒன்றரை மணியளவில் அங்கு சென்றபோது மகிழ்ச்சி, அன்பு, உபசரிப்பு, உற்சாகம் அனைத்து குடும்ப உறுப்பினர்கள், தி.மு.க. மாவட்டப் பொறுப்பாளர்கள் மற்றும் பொதுவானவர்கள் எல்லாம் குழுமி கலந்து வரவேற்றனர். பெருநிகழ்ச்சி வெள்ளம் கரைபுரண்டது. இடையில் தொய்வுடன் இருந்த கொள்கை உறவு மீண்டும் புதுப்பித்துக் கொள்வதாக அமைந்தது!

அது மட்டுமா? மற்றொரு இன்ப அதிர்ச்சி - மகிழ்ச்சி!

மற்றொரு இன்ப அதிர்ச்சி

சென்னை பெரியார் திடலில் உள்ள பெரியார் மணியம்மையார் மருத்துவமனை - 30 ஆண்டுகளுக்கும்மேலாக இயங்கி ஏழை, எளிய மக்களுக்கு மருத்துவ உதவிகளைச் செய்வதும், அவ்வப்போது மருத்துவப் பரிசோதனை முகாம்களை தக்க மருத்துவர்களின் தொண்டறத்தோடு நடத்திவரும் மருத்துவமனை. இதில் ஊதியத்தைக்கூடப் பெரி தாகக் கருதாது, தொண்டு மனப்பான்மையுடன் பணிபுரிந்தவர்கள் பலர் உண்டு.

அவர்களில் ஒருவர் டாக்டர் திருமதி சாரதா - அவரது வாழ்விணையரும் டாக்டர். இருவரும் தற்போது நெல்லையில் மருத்துவத் தொண்டு புரிகின்றனர். இது எனக்கு அப்போது நினைவில் இல்லை. அவர் சென்னையில் பல்வேறு மருத்துவக் கல்லூரி - பல்கலைக் கழகங்களில் பணிபுரிகிறார் என்றே நினைத்திருந்தேன்.

அவர் நெல்லைக்குச் சென்று தெற்கு ரத வீதியில் ஒரு அருமையான கிளினிக் அமைத்து, புற்றுநோய் பரிசோதனை - சிகிச்சை பல ஊர்களில் முகாம் என்று இப்படி பணி செய்து வருகின்றனர்.

ஒரு நண்பர் மூலம் தெரிந்து, பிரம்மநாயகம் அவர்கள் இல்லத்திற்கு முன் தெருவில்தான் தனது ‘கிளினிக்‘ உள்ளது, வந்தால் மகிழ்ச்சியடைவோம் என்று சொல்லி தகவல் அனுப்பினார்கள். அந்த அழைப்பு எங்களுக்கும் மகிழ்ச்சியைத் தந்தது; நானும், எனது வாழ்விணையரும் தோழர்களுடன் சென்றோம்; மிகுந்த பாசம், நன்றியுணர்ச்சியுடன் கலந்த மகிழ்ச்சி - இவைகளைக் காட்டி டாக்டர் சாரதா அவர்கள் மதியம் ஒரு மணிக்கு வரவேற்று தனது மருத்துவமனையைக் காட்டி ஒரு அன்பு வரவேற்பினைத் தந்தார்.

எங்களுக்கும் மகிழ்ச்சி - நன்றி உணர்வின் வெளிச்சம்போல் பளிச்சிட்டது! பெற்றோரைக் கண்ட மகளின் அன்பு வெளிப்பட்டது. பிறகு அய்யா பிரம்மநாயகம் அவர்களது இல்லம் சென்றோம்.

பேராசிரியர் தொ.ப.இல்லத்தில்...

பிற்பகல் சிறிய ஓய்வுக்குப் பின்னர் பாளையில் உள்ள பெரியார் சிந்தனையாளர் பேராசிரியர் மானமிகு தொ.பரமசிவம் அவர்களது இல்லத்திற்குச் சென்று உடல்நலம் விசாரித்து உரையாடி மகிழ்ந்தோம்.

தி.மு.க.தலைமைச் செயற்குழு உறுப்பினர் பகுத் தறிவாளர் பாளை சுப.சீதாராமன் மற்றும் தி.மு.க. தோழர்களும் அப்பகுதிவாழ் ஏனைய கட்சிப் பிரமுகர் களும் அன்புடன் எங்களை வரவேற்றனர்.

பேராசிரியர் தொ.ப. அவர்கள் உடல்நலம் குன்றிய நிலையில் உள்ளார். அவரது வயது 69தான். எங்களுக்கு மிகுந்த வருத்தத்தைத் தந்தது. தமிழ்நாட்டில் இவரைப் போன்ற ஆய்வறிஞர்கள் மிகவும் அரிதிலும் அரிது. இவர் ஒரு பல்கலைக் கொள்கலன். பெரியாரிய சிந்தனையாளர்.

எனது வாழ்விணையரும், நானும், தோழர்களும் அவர்களது குடும்பத்தாரிடமும், நண்பர்களிடமும் பேசி மகிழ்ந்தது பெரிய மனநிறைவைத் தந்தது.

உடல்நலக் குறைவு என்றாலும், அவரது உள் ளத்தின் உறுதியையோ, கருத்து திண்மையையோ, பளிச்சென்று பதில் அளிக்கும் பாங்கையோ அதன் மூலம் பாதித்துவிடவில்லை. அவர் போன்ற அறிஞர் பெருமக்களின் வாழ்வு பொதுச் சொத்தல்லவா? போதுமான அளவு பாதுகாக்கப்பட வேண்டாமா?

கலைஞர் உடல்நிலைபற்றி அவர் கவலையோடு நம்மிடம் விசாரித்தார். தொ.ப. உடல்நிலை பாதிப்புக்கு எது காரணம் என்று கேட்டதற்கு, புகைப் பிடித்ததும், சர்க்கரை நோயும்தான் என்று கூறினார். உடல்நலம் பேண இவைகளிடமிருந்து பாதுகாப்போடு இருப்பது அவசியம் என்ற பாடத்தையும் போதித்தார்!

கழகத் தோழர்களுடன் நாங்கள் உரையாடலுக்குப் பின் பிரியா விடைபெற்றுத் திரும்பினோம். ‘விடுபூக்கள்’ என்ற புதிய நூல் பிரதிகளை எமக்களித்தார். பெரியார்  நூல்கள் - புதிதாக பதிப்பிக்கப்பட்டவைகளை அவரி டம் தந்து விடை பெற்றோம்!

கண்டறியா இன்பங் கண்டோம்!

இந்த இரண்டு நாள் தென்மாவட்டப் பயணம் அடுக்கடுக்கான நிகழ்ச்சிகளின் அணிவகுப்புதான் என்றாலும், அயர்வு தராத, புது உற்சாகத்தினைப் பொழிந்த ஒரு மாமருந்தாக நமக்கும், நமது தோழர் களுக்கும் அமைந்தது!

கண்டறியாத இன்பம் கண்டோம்!

இந்த இனிய அனுபவங்களை என்றும் மறக்க முடியாது!

பயணங்கள் முடிவதில்லை -

லட்சியங்கள் தோற்பதில்லை.

 

கி.வீரமணி
தலைவர், திராவிடர் கழகம்.


3.4.2017
சென்னை

Banner
Banner