ஆசிரியர் அறிக்கை

ஒப்பாரும் மிக்காரும் இலாத ஒரே தலைவரான

தந்தை பெரியார் தம் சுயமரியாதைச் சூரணத்தை,

கவிதைத் தேனில் குழைத்துத் தந்த குவலயம்

போற்றிட்ட நம் புரட்சிக்கவிஞர் புதுஉலகம்

காண பூபாளம் பாடிய கவிதை மழையோன்!

பெயரில் ‘பாரதிக்கு தாசன்’ என்பது  நன்றியாலும், பண்பாலும்.

ஆனால், கொள்கை லட்சிய நெறியில்

அவருக்கு இணை எவருமிலர்!

‘‘காற்செருப்பை பிறறொருவன் கழிவிடத்தில்

தள்ளிடினும் பொறாத உள்ளம்‘’  -

இதைவிட சுயமரியாதைக்கு விளக்கம் எளிதாக எவரால் தர முடியும்?

‘‘கோழியும் தன் குஞ்சுதனைக் கொல்லவரும்

வான்பருந்தை சூழ்ந்தெதிர்க்க அஞ்சாத

தொல்புவியில்....’’

என்னே சுயமரியாதை உணர்வின் கொப்பளிப்பு!

‘‘காட்டிலொரு முயற்குட்டி துள்ளக்கூடும்

கருஞ்சிறுத்தைக் கண் விழித்தால் தெரியும் சேதி!

தோட்டத்து புடலங்காயா? தமிழர் நாடு

உடையோன் தூங்கி விழித்தால்

உரிப்பான் தோலை!’’

எப்படி உரிமை முழக்கங்கள்!

இன்றும் பொருந்தும் பொய்யா மொழிகள் அல்லவா இவைகள்?

புரட்சிக்கவிஞரின் புகழ் வேண்டா லட்சிய நோக்கு,

‘‘மானம் ஒன்றே நல்வாழ்வெனக்கொண்டு

வாழ்ந்த எம் மறவேந்தர்

பூனைகள் அல்லர்; புலிநிகர் தமிழ்மாந்தர்!’’

என்ற பிரகடனங்கள் இன்றும் முழக்கப்பட வேண்டிய அவர் தந்த கவிதை ஆயுதங்கள்!

இந்த மானுடக் கவிஞன் மாப்புகழ் பாடி, மானமீட்பர்களாகத்  திகழ சூளுரைப்போம்!

அந்த சுயமரியாதைக்கு சூடு போட்ட கவிஞனின் பிறந்த நாளில்...!

 

கி.வீரமணி
தலைவர், திராவிடர் கழகம்.


சென்னை
29.4.2017  

தமிழ் எழுத்துச் சீர்திருத்தத்தைக் கொண்டு வந்தவர் தந்தை பெரியார் இல்லையா?

‘இந்து’ (தமிழ்) நாளேட்டில் குத்தூசி குருசாமி ‘சுயமரியாதையின் அடையாளம்‘ எனும் தலைப்பில் ஒரு கட்டுரை வெளியாகியுள்ளது. அதில் எழுத்துச் சீர்திருத்தத்தை முதன் முதலாகப் பேசியவர் குருசாமி என்றும், அதனை ‘குடிஅரசில்’ முதன் முதலாகப் பயன்படுத்தவும் செய்தார் என்றும், குத்தூசி குருசாமிமுன்வைத்த தமிழ் எழுத்துச் சீர்திருத்தத்தை, அவரது மறைவிற்குப் பிறகு 1978 இல் எம்.ஜி.ஆர். அரசாங்கம் நடைமுறைப்படுத்தியது என்றும் ஒரு புதிய ஸ்தலப் புராணம் புனையப்பட்டுள்ளது.

இதற்கு எந்தவித ஆதாரத்தையும் எடுத்துக்காட்டாமல் மனம் போன போக்கில் யாரோ கிறுக்குவதையெல்லாம் வெளியிடுவது சரியானதுதானா?

அதற்கான ஆதாரம் எதுவும் கொடுக்கப்படவில்லை. மொட் டைத் தாதன் குட்டையில் விழுந்தான் என்பதுபோல ஒருவர் எழுது வதும், அதனை ஓர் ஏடு வெளியிடுவதும்தான் பத்திரிகா தர்மமா?

தமிழ் எழுத்துச் சீர்திருத்தம் என்றாலே அது பெரியார் கொண்டு வந்தது என்பது எல்லோருக்கும் தெரிந்த ஒன்றே.

தமிழ் எழுத்துச் சீர்திருத்தம்பற்றி ‘பகுத்தறிவு’ இதழில் (30.12.1934) தந்தை பெரியார் அறிவித்து, 13.1.1935 ‘குடிஅரசு’ இதழில் செயல்பாட்டுக்குக் கொண்டு வரப்பட்டது.

தந்தை பெரியார் நூற்றாண்டையொட்டி தமிழ் எழுத்துச் சீர்திருத்தத்தை அமல்படுத்த தமிழ்நாடு அரசு வெளியிட்ட ஆணையிலேயே (பொதுத் (செய்தி மக்கள் தொடர்பு) துறை செய்தி வெளியீடு எண்: 449 நாள்: 19.10.1978) - ஓர் உண்மை தெளிவாகவே திட்டவட்டமாகக் கூறப்பட்டுள்ளது.

‘‘பெரியார் ஈ.வெ.ராமசாமி அவர்கள் மேற்கொண்ட தமிழ் எழுத்துச் சீர்திருத்தத்தை தமிழக அரசு ஏற்று அதனை நடைமுறைப்படுத்த ஆணை பிறப்பித்துள்ளது’’ என்று ஆணையிலேயே குறிப்பிடப்பட்டுள்ளது.

ஆனால், தமிழ் ‘இந்து’ ஏட்டில் வெளிவந்துள்ள கட்டுரையிலோ குத்தூசி குருசாமி முன்வைத்த தமிழ் எழுத்துச் சீர்திருத்தத்தை, அவரது மறைவிற்குப் பிறகு 1978 இல் எம்.ஜி.ஆர். அரசாங்கம் நடைமுறைப்படுத்தியது என்று எழுதுகிறது என்றால், இது எவ்வளவுப் பெரிய பொய் மூட்டை என்பது எளிதில் விளங்கும்.

யார் மூளையிலோ உதித்த தமிழ் எழுத்துச் சீர்திருத்தத்தைத் தானே கொண்டு வந்தது போல ஆக்கிக் கொள்ளும் அவசியம் தந்தை பெரியாருக்குக் கிடையாது - அந்தத் தன்மை உடையவரல்ல தந்தை பெரியார் என்பது நாடு அறிந்த ஒன்று.

ஒரு மாபெரும் புரட்சியாளர் தந்தை பெரியார்;  அவர் தொடர்பான கருத்தை வெளியிடும் போது யோக்கியமான அணுகுமுறையும், பொறுப்புணர்ச்சியும் இருக்கவேண்டாமா?


கி.வீரமணி
தலைவர்,  திராவிடர் கழகம்.

சென்னை
26.4.2017     

அம்பேத்கர் அவர்களைப்  பரப்புவதைவிட - அதுதானே பரவுவது காலத்தின் கட்டாயம் - பாதுகாப்பதே - திரிபுவாதங்கள், திசை திருப்பல் களிலிருந்து காப்பதே அவசரமான,  அவசியமான பணியாகும் என்று திராவிடர் கழகத் தலைவர் ஆசிரியர் கி.வீரமணி விடுத்துள்ள அறிக்கை வருமாறு:

ஒடுக்கப்பட்ட மக்களின் உரிமைக் குரலாய் திகழ்ந்து ஒளி பாய்ச்சிய புரட்சியாளர் ‘பாபா சாகேப்’ அண்ணல் அம்பேத்கரின் 127 ஆவது பிறந்த நாள் இன்று (14.4.2017)!

அம்பேத்கரின் நிகழ்த்தப்படாத உரை!

தமிழ்நாட்டைப் பொறுத்தவரை 1934 ஆம் ஆண்டிலேயே டாக்டர் அம்பேத்கரை, தனது பச்சை அட்டை ‘குடிஅரசு’ வார ஏட்டின்மூலம் முதன்முதலில் மக்களுக்கு அறிமுகமாகும் வண்ணம் அவரது நிகழ்த்தப்படாத உரையான ‘‘ஜாதி ஒழிப்பினை’’ வெளியிட்டவர் தந்தை பெரியார்.

பஞ்சாப் ஜாட்பட் தோரக் மண்டல் என்ற அமைப்பு - அம்பேத்கர் அவர்களை ஜாதி ஒழிப்பு மாநாட்டிற்குத் தலைமை தாங்க அழைத்தபோது, அவர் அந்த அழைப்பினை ஏற்றார். உரையை முன்கூட்டியே தந்தால், அச்சிட வசதியாக இருக்கும் என்று கூறியதால், அம்பேத்கர் அவர்களும் எழுதித் தந்தார்.

அதில் இந்து மதம், கீதை, கடவுள்கள், பார்ப்பனியத்தைக் கண்டித்து, ஜாதிக்கு ஆதாரமாக முட்டுக்கொடுக்கும் இவைகளையெல்லாம் வேரோடு பெயர்த்து எறிந்தால்தான் ஜாதி ஒழியும் என்று அறிவியல் பூர்வ வாதங்களோடு உரையைத் தயாரித்து அனுப்பினார்.

ஜாதியை ஒழிக்க வழி!

அதன் சில பகுதிகளை நீக்கி விடும்படி மாநாட்டினர் கேட்டனர்; டாக்டர் அம்பேத்கர் அவர்கள் அதற்கு ஒப்புக்கொள்ளவில்லை. எனவே, முதன்முதலில் தந்தை பெரியார் அவர்கள், டாக்டர் அம்பேத்கர் அவர்களிடம் அதைக் கேட்டுப் பெற்று தமிழாக்கம் செய்து பரப்பியதோடு, ‘‘ஜாதியை ஒழிக்க வழி’’ என்ற தலைப்பில் குறைந்த விலையில் வெளியிட்டுப் பரப்பினார்! முதல் அறிமுகம் அப்போதுதான்! அதன்பின் இரு புரட்சியாளரும் மேலும் 3, 4 தடவை நேரில் சந்தித்தும் உரையாடினர்.

பெரியாரும் - அம்பேத்கரும் ஒரு நாணயத்தின் இரண்டு பக்கங்கள்

உலக பவுத்தர்கள் மாநாடு அன்றைய பர்மா (இன்றைய மியான்மாவில்) நடைபெற்றது. அழைப்பு பெற்று அய்யா அந்த மாநாட்டிற்குச் சென்றார்; டாக்டர் அம்பேத்கர் அவர்களும் அழைப்பு பெற்று சென்று, பவுத்தத்தில் சேருவதுபற்றிய ஆலோசனையை கலந்து பேசினார்.

இப்படி பற்பல கொள்கைப் பிரகடனங்கள்- லட்சியப் போர்களில் - மனுதர்ம எரிப்பு உள்பட இருவரும் ஒரு நாணயத்தின் இரண்டு பக்கங்கள் ஆயினர்!

வைக்கம் போராட்டம்தான், மகாராஷ்டிர மாநிலம் சவுதார் குளத்தில் தாழ்த்தப்பட்டோர் தண்ணீர் எடுக்கும்  - அம்பேத்கர் நடத்திய போராட்டத் திற்கு முன்னோடி - முக்கிய ‘உற்சாக ஊக்கி’யாகவே டாக்டர் அம்பேத்கருக்கு அது அமைந்தது!

நவீன வேஷம் போடும் காவிகள்!

இத்தகைய அம்பேத்கரை இப்போது காவிகள் ஆக்கிரமித்து, தாழ்த்தப் பட்டோரின் வாக்கு வங்கியைப் பறிக்க நவீன வேஷம் போடுகின்றனர். மதவாதம் ஒப்பனைகளால் அம்பேத்கரை கபளிகரம் செய்யத் துடிக்கிறது. எச்சரிக்கையாக இருக்கவேண்டிய தருணம் இது!

எனவே, அம்பேத்கரைப் பரப்புதைவிட - அதுதானே பரவுவது காலத்தின் கட்டாயம் - பாதுகாப்பதே - திரிபுவாதங்கள், திசை திருப்பல்களிலிருந்து காப்பதே அவசரமான ,  அவசியப் பணியாகும்!

வாழ்க அம்பேத்கர்! வருக அவர் விரும்பிய புதிய சமுதாயம்!



சென்னை                                                                                           தலைவர்
14.4.2017                                                                                     திராவிடர் கழகம்


மேற்கு வங்கத்தில் காலூன்ற ஆயுதம் தாங்கிய ஆர்.எஸ்.எஸ். பேரணிகள் நடத்திட திட்டம்

திரிணாமுல், கம்யூனிஸ்டு, காங்கிரஸ்

இதனை எப்படி சந்திக்கும் - இது முக்கிய கேள்வி

ராமநவமி பக்தர்களே ராமன் பிறப்பென்ன தெரியுமா?

தமிழர் தலைவர் ஆசிரியர் விடுத்துள்ள முக்கிய அறிக்கை

மேற்கு வங்கத்தில் கால் பதிக்க அரசியல் நோக்கத் தோடு ஆயுதம் தாங்கிய, ராமனைக் கையில் எடுத்துக்கொண்டு ஆர்.எஸ்.எஸ். பேரணி நடத்திடத் திட்டமிடப்பட்டுள்ளது. மம்தாவின் திரிணாமுல் காங்கிரஸ், கம்யூனிஸ்டுக் கட்சி, காங்கிரஸ் - மதச்சார்பற்ற கட்சிகள் இதனை சந்திக்க எந்தத் திட்டத்தைக் கையில் வைத்துள்ளன என்பது மிக முக்கியமான கேள்வி என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

ஆர்.எஸ்.எஸ். இயக்கம் அதன் அரசியல் வடிவமான பா.ஜ.க.வை மேற்கு வங்காளத்தில் கால் ஊன்றச் செய்ய தற்போது ‘பகீரதப் ‘ பிரயத்தனத்தில் இறங்கியுள்ளனர். அதற்கான முன்னோடியாக இராமனைத் துணை கொண்டுள்ளனர்.

ஆர்.எஸ்.எஸ். என்ற ஆரிய சனாதன ஹிந்துத்துவாவை பரப்ப அது எதை எளிமையான ஊடுருவல் முறையில் செய்யும் தெரியுமா?

விநாயகர் ஊர்வலத்தின் நோக்கம்

பாமர மக்களிடம் படிந்துள்ள பக்திப் போதையை - கடவுள் போதையை - திருவிழாக்கள் - வழிபாடு இவைகளைக் கொண்டாடி, அங்கே ஆர்.எஸ்.எஸ். - ஹிந்து முன்னணியின் கொடியைப் பரப்பி, கால் ஊன்ற முயலுவது அவர்களது வழமையான முறை (Modus Operandi).

மகராஷ்டிரத்தில் - முந்தைய பம்பாயில் - விநாயகர் ஊர்வலம் சதுர்த்தி என்ற பெயரில், தங்களது இயக்கமான ஹிந்து மகாசபையை, பிறகு அதன் வழி ஆர்.எஸ்.எஸைக் கட்டும் வேலைக்கு பிள்ளையார் பக்தியை ஒரு கருவியாக்கிக் கொண்டனர். தமிழ்நாட்டிலும் கூலிக்கு ஆள் பிடித்து பிள்ளையார் ஊர்வலம் - அதன்மூலம் ‘ஒரு கல்லில் இரண்டு மாங்காய்’ என்பதற்கேற்ப, மசூதிகள் பக்கம் பிள்ளையார் ஊர்வலத்தைத் திருப்பச் செய்து கலவரத் தூண்டல்மூலம் தமது ஆர்.எஸ்.எஸ். இயக்கத்தை வளர்த்தது.

பாபர் மசூதி இடிப்பு வழக்கு என்னாயிற்று?

அதுபோலவே ஒன்றுமில்லா மூன்றடி உயரமுள்ள ‘இராமலல்லா’ (சிறிய இராமர் குழந்தை) உருவத்தை வைத்துப் படிப்படியாக, காங்கிரசு பார்ப்பனராகிய பண்டித வல்லப பந்த் போன்ற உ.பி. முதல்வராக இருந்த வாய்ப்பை பயன்படுத்தி வளர்த்து, ‘இராம ஜன்ம பூமியாக்கி’  - இராமன் பிறந்த இடத்தை இடித்து, பாபர் மசூதி கட்டினர் என்று கூறி, 400 ஆண்டுகள் பழைமை வாய்ந்தது என்ற பாபர் மசூதியை இடித்தனர்  (அத்வானி, முரளிமனோகர் ஜோஷி, உமாபாரதி, வினய்கட்டியார் போன்றவர்கள்மீது 1992 ஆம் ஆண்டு தொடங்கிய வழக்கு இன்னமும் கிரிமினல் கோர்ட்டில் நிலுவையில் உள்ளது).

இராமன்  பிரச்சாரம் - டில்லியில் இராமலீலா - பிரதமர்களும், குடியரசுத் தலைவர்களும் - மதச்சார்பின்மையைக் காலில் போட்டு மிதித்துக்கொண்டே - இராவணன் எரிப்பை இராமலீலா பண்டிகைமூலம் கொண்டாடுவதா? என்று தென்னாட்டில் எழும்பிய கேள்வியைப் புறக்கணித்து அதனை உ..பி. ஆட்சியைப் பிடிக்கும் ‘உபாயமாக்கினர்’ - கோவில் பக்தி அரசியலுக்கு நீர்ப் பாய்ச்சிட அது உதவியது.

மேற்கு வங்கத்தில் காலூன்ற

ஆர்.எஸ்.எஸ். முயற்சி!

இப்போது மேற்கு வங்கத்தில் அடுத்து நடைபெறவிருக்கும் தேர்தலை மனதிற்கொண்டு, ஆர்.எஸ்.எஸ். - பா.ஜ.க. கூட்டு என்ன மாதிரி முயற்சியில் ஈடுபட்டுள்ளன தெரியுமா?

‘துர்கா பூஜை’,  ‘காளிபூஜை’ என்றே பிரபலமான பண்டிகை யாகக் கொண்டாடப்பட்டு வருகின்றது மேற்கு வங்கத்தில். (கம்யூனிஸ்டுகளின் நீண்ட கால ஆட்சி கூட இதனை எதிர்த்து எந்தப் பகுத்தறிவுப் பிரச்சாரமும் செய்யவில்லை - வாக்கு வங்கிக் கண்ணோட்டத்தின் காரணமாக இருக்கலாம்).

இப்போது ஆர்.எஸ்.எஸ். அங்கே அதிகமான மக்கள் கொண்டாடாத இராம நவமியைக் கொண்டாட வைக்கும் வேலை அரசியல் தூண்டிலில் இராமனை மாட்டி பெரிய அளவில் வருகின்ற ஏப்ரல் 10 ஆம் தேதி மேற்கு வங்க மாநிலம் முழுவதிலும் 350 பேரணிகளை; 22 மாவட்டங்களிலும் கொண்டாட ‘மெகா’ ஏற்பாடுகளைச் செய்து வருகின்றனராம்.

கொல்கத்தாவில் 6 முக்கிய இடங்களிலும், வெளி மாவட்டங் களில் 5 இடங்களில் ஆயுதங்களுடன் பேரணி நடத்த ஆயத்த மாகின்றனர்.

1000 ஆர்.எஸ்.எஸ். தொண்டர்கள் ஏற்பாடு; 10 ஆயிரம் மக்கள் கொல்கத்தா நகரத்தில் திரள வைக்கத் திட்டம்.

ஆயுதம் தாங்கிய ஊர்வலமாம்!

கடந்த ஒரு மாதமாக 70 ஆயிரம் தொண்டர்களை கொல்கத்தா - மேற்கு வங்கம் மற்ற பகுதிகளிலிருந்து அழைத்து வந்து அணிவகுக்கச் செய்வதோடு, ஆயுதம் தாங்கி வரவும் ஏற்பாடு.

இராமன் பயன்படுத்திய வாள்கள், திரிசூலங்கள், அம்பு, வில்களுடன் இந்தப் பேரணிகள் இருக்குமாம்! - அவர்கள் பகிரங்கமாக அறிவிக்கின்றனர்!!

ஆயுதந் தாங்கிய இந்தப் பேரணிகள்மூலம் புதிய கால் ஊன்றுதலில் (அரசியலை மனதிற்கொண்டே) இறங்கியுள்ளனர்!

தமிழ்நாட்டிற்குமுன் அதற்கு இப்படி ஒரு முயற்சி - ஒருபுறம் மம்தாவின் ஆட்சி, மற்றொருபுறம் கம்யூனிஸ்ட், காங்கிரசு அரசியல் எதிர்க்கட்சிகள்.

எல்லோரையும் ‘‘ஒழிக்க’’ இராமனை அங்கு பயணம் பண்ண, கலவரங்களுக்கு வித்தூன்ற - பண்டிகைமூலம் (ஹிந்துத்துவ) கொடியேற்ற முனைகின்றனர்!

மேற்கு வங்க அரசும் - கம்யூ., காங்கிரசும் என்ன செய்யப் போகின்றன?

மேற்கு வங்க அரசும், மம்தாவும், கம்யூனிஸ்டுகளும், காங்கிரசும் - மதச்சார்பற்ற கொள்கையில் நம்பிக்கை யுள்ளவர்களும் - இதனை எப்படி எதிர்கொள்ளவிருக்கின்றன என்பதுதான் இன்றைய மில்லியன் டாலர் கேள்வியாகும்!

‘இராவணனைக் கொல்ல இராமன் இப்படி கலவரங்களைத் தூண்டும் முயற்சியிலா ஈடுபட்டான்?’ என்று முதலமைச்சர் மம்தா பானர்ஜி கேள்வி கேட்டுள்ளார். அதுமட்டும் போதுமா?

இராமநவமி கொண்டாடும்

பக்தர்களுக்குச் சில கேள்விகள்!

இராம நவமி கொண்டாடும் பக்தர்களே, இக்கேள்விகளுக்கு விடையென்ன?

1. இராமன் எப்படி பிறந்தான்? அசுவமேதம் புத்ரகாமேஷ்டி யாகம்மூலம் புரோகிதப் பார்ப்பனர்கள், குதிரை இவைகள் மூலம்தானே இராமன் பிறந்தான்  என்று வரலாற்று ஆசிரியர் தத் மற்றும் ஆய்வாளர் அமிர்தலிங்க அய்யர் வால்மீகி இராமாயணத்தில் உள்ளதைச் சொல்லுகிறார்கள் - அதற்குப் பதில் என்ன?

2. கதைப்படி ‘அவதாரக் கடவுளான’ இராமன் தன் மனைவி சீதையின் கற்பைச் சந்தேகப்படலாமா? ஞானதிருஷ்டியில் உண் மையை அறிந்திருக்க வேண்டாமா? சலவைத் தொழிலாளியின் கூற்றுதான் ஆதாரமா?

3. இன்று எந்த மனைவியையாவது நெருப்பில் குளித்து, கற்பை   நிருபிக்க எந்த கணவனாவது வற்புறுத்தினால் இந்திய தண்டனைச் சட்டமும், காவல்துறையும் அனுமதிக்குமா?  நியாயமா?

மனைவிகளை - பெண்களை நடத்தும் முறையா இது?

பெண்ணுரிமை இயக்கவாதிகளே, இதைக் கண்டிக்க முன்வர வேண்டாமா?

4. மரத்திற்குப் பின் ஒளிந்து நின்று வாலியைக் கொன்ற இராமன் வீரனா? அது யுத்த தர்ம நேர்மையா?

பக்தி வந்தால் புத்தி போகும்!

5. தனது ‘இராம ராஜ்ஜியத்தில்’  பார்ப்பனச் சிறுவன் உயிர் பிழைக்கத்  தவஞ்செய்த சூத்திர சம்பூகன் தலையை விசா ரணையே இன்றி வெட்டி வீழ்த்தியது ஏன்? தர்மமா, நியாயமா?

கேட்டால், ‘உத்திரகாண்டமே இல்லை’ என்று ஒரே அடியாகக் கூறுவோர், இராமாயணத்தில் மற்ற காண்டம் மட்டும் உண்டு (அதில் உள்ளவைகளுக்குப் பதில் இல்லையே) என்பது முரண் அல்லவா?

6. நிறைமாதக் கர்ப்பிணி சீதையை காட்டிற்கு அனுப்பியவன் ‘‘புருஷ உத்தமனா? நடுநிலையாளர்களே, இராம பக்தர்களே, அறிவுக்கு வேலை கொடுங்கள் - பக்தி வந்தால் புத்தி போய்விடும் என்று பெரியார் சொன்னதை நிரூபித்துக் காட்டுகிறீர்களே!

‘இராம நவமி’யின் பின்னால் உள்ள ஆபத்து புரிகிறதா?

அது சர்க்கரைப் பூச்சுள்ள விஷ உருண்டை - ஆபத்து புரிந்திடுவீர்!

கி.வீரமணி

தலைவர்,  திராவிடர் கழகம்.

 

கூட்டுறவு வங்கிகளில் விவசாயிகள் வாங்கிய பயிர்க் கடனைத் தள்ளுபடி செய்யவேண்டும் என்று சென்னை உயர்நீதிமன்றத்தில் நீதிபதிகள் நாகமுத்து, முரளிதரன் ஆகியோர் அடங்கிய அமர்வு இன்று ஆணை பிறப் பித்துள்ளது.

இது மிகவும் வரவேற்கத்தக்கதாகும். இந்தத் தீர்ப்பின்மீது மேல்முறையீடுக்குச் செல்லாமல் தமிழ்நாடு அரசு உயர்நீதிமன்ற ஆணையை செயல்படுத்தவேண்டும்.

ரூ.7000 கோடி விவசாயக் கடனை கலைஞர் அவர் கள் முதலமைச்சராக இருந்தபோது, மாநில அரசே அந்தச் சுமையை ஏற்று தள்ளுபடி செய்தது என்பதை நினை வூட்டுகிறோம். கூட்டுறவுக் கடன்கள் மட்டுமன்றி, தேசிய மயமாக்கப்பட்ட வங்கிகளில் விவசாயிகள் வாங்கிய கடனையும் தள்ளுபடி செய்ய மத்திய அரசு முன்வரவேண்டும் என்றும் வலியுறுத்துகிறோம்.

கி.வீரமணி

தலைவர்,        திராவிடர் கழகம்.


சென்னை
4.4.2017

Banner
Banner