ஆசிரியர் அறிக்கை

இந்தியாவில் உள்ள முஸ்லிம்கள், கிறித்தவர்கள் இந்துக்கள்தானாம்!

ஆர்.எஸ்.எஸ். தலைவரின் அரசமைப்பு சட்ட விரோதப் பேச்சு

இந்த ஆபத்தை முளையிலேயே கிள்ளி எறிய

மதசார்பற்ற சக்திகள் கிளர்ந்து எழ வேண்டும்!

தமிழர் தலைவர் ஆசிரியர் வெளியிட்ட முக்கிய அறிக்கை

ஆர்.எஸ்.எஸ். தலைவரான மோகன் பாகவத் இந்தியாவில் வாழும் வேறு மதத்தவர்கள்கூட இந்துக்கள் என்று ஒப்புக் கொள்ள வேண்டும் என்று கூறுகிறார். இந்திய அரசமைப்புச் சட்டத்தில் கூறப்பட்டுள்ள மதச் சார்பின்மைக்கு விரோதமான இந்த மதவாதப் போக்கை முளையிலேயே கிள்ளி எறிய மத  சார்பற்ற சக்திகள் கிளர்ந்து எழ வேண்டும் என்று திராவிடர் கழகத் தலைவர் ஆசிரியர் கி. வீரமணி அவர்கள் விடுத்துள்ள அறிக்கை வருமாறு:

வடநாட்டில் 'பேட்டூல்' என்ற ஊரில் பேசிய ஆர்.எஸ்.எஸ். சங்பரிவாரின் தலைவரான மோகன்பாகவத்  பேசி யுள்ளதாவது:

இந்தியாவில் வாழும் அனைவரும் இந்துக்கள்தானாம்!

"இந்துஸ்தான் என்ற இந்த நாட்டில் வாழும் அனைவருமே ஹிந்துக்கள்தான்.

எப்படி பிரிட்டனில் உள்ளவர்கள் பிரிட்டிஷ்காரர்களோ, அமெரிக்காவில் உள்ளவர்கள் அமெரிக்கர்களோ அதுபோலவே இந்த நாட்டில் வாழும் முஸ்லீம்களும்கூட ஹிந்துக்கள்தான்.

மத - நம்பிக்கை - அடிப்படையில் கிறிஸ்தவர்கள், முஸ்லிம்கள் என்றாலும் நாட்டு அடிப்படையில் அவர்கள் ஹிந்துக்கள்தான்" என்று கூறியுள்ளார் - மோகன் பாகவத்

கோல்வால்கர் என்ன கூறுகிறார்?

இது இவராகக் கூறுவதில்லை. ஆர்.எஸ்.எஸ். அமைப்பின் கொள்கை விளக்கக் கர்த்தாவாகிய ஆர்.எஸ்.எஸ். இரண்டாவது தலைவர் ஆன கோல்வால்கரின் விளக்கம்தான் இது!

இங்கே வாழும் முஸ்லீம்கள்,  கிறித்துவர்கள் தங்களை ஹிந்துக்கள் என்று ஒப்புக் கொள்ள வேண்டும்.

அதோடு, இராமனையும், கிருஷ்ணனையும் அவர்கள் கடவுளாக ஏற்றுக் கொள்ள வேண்டும் என்று எழுதியுள்ளார்.(ஆதாரம்: Bunch of Thoughts - 'ஞானகங்கை' நூல்)

"ஹிந்துஸ்தானத்தில் வாழும் ஹிந்துக்களல்லாதார் ஹிந்துப் பண்பாடு, மொழி ஆகியவற்றை மேற்கொண்டு, ஹிந்து சமயத்தை உயர்ந்த மதிப்பில் வைத்துப்போற்றி, ஹிந்து இனம், அதனுடைய பண்பாடு ஆகிய இரண்டின் புகழைத் தவிர வேறு எதையும் அவர்கள் வரவேற்கக் கூடாது. அதாவது அவர்கள் இந்நாடு, அதனுடைய பழமையான பாரம்பரியம் ஆகியவற்றைக் காண சகியாத தன்மையினையும், நன்றி கெட்ட தன்மையினையும் முற்றிலும் நீக்கிவிட்டு உறுதியான எண்ணத்துடன் அன்பையும், பக்தியையும் அவைகளுக்குப் பதிலாகக் கொள்ளுதல் வேண்டும். ஒரே வார்த்தையில் கூற வேண்டுமானால் அவர்கள் அந்நியராக இருப்பதை விட்டொழிக்க வேண்டும். அவ்விதம் இருக்க அவர்கள் விரும்பவில்லை என்றால், அவர்கள் ஹிந்து சமுதாயத்திற்கு முற்றிலும் கீழ்ப்பட்ட மக்களாக, சலுகைகள் எதுவும் பெறத் தகுதியற்றவர்களாக, கண்ணியமாக நடத்தப்படுவதனையோ அல்லது பிரஜா உரிமையினையோ கூட அடைய அருகதையற்றவர்களாக, சுருங்கக் கூறுமிடத்து எதனையும் கோர முடியாத மக்களாக வாழ்தல் வேண்டும். இவ் வழியினைத் தவிர அவர்கள் பின்பற்றுவதற்கு வேறு வழியே கிடையாது." (We or Our Nation Hood Defined) என்று கூறியுள்ளார்.

அதில் ஒரு பகுதியை மறைத்து விட்டு மீண்டும் அதனைப் புதுப்பிக்கிறார் மோகன்பகவத் என்ற ஆர்.எஸ்.எஸ். தலைவர் .

"ஸ்ரீராமபிரான், ஸ்ரீகிருஷ்ணபகவான் ஆகியோருடைய ரத்தம்தான் தங்களுடைய நரம்புகளில் ஓடிக் கொண்டிருக்கிறது என்பதை முஸ்லீம்கள் ஒப்புக் கொள்ள வேண்டும்."             (தினமணி 16.10.2000)

இவ்வாறு கூறியவர் மேனாள் ஆர்.எஸ்.எஸ். தலைவர் கே.எஸ். சுதர்சன்.

இந்திய அரசமைப்புச் சட்டத்துக்கு எதிரானதே!

இந்தியா - அரசியல் சட்டப்படி ஒரு மதச் சார்பற்ற நாடு; Secular State) இந்தியாவின் குடிமகன் இந்தியன் என்று அழைக்கப்படுவதே இன்றுள்ள நடைமுறை வழமையாகவும் உள்ளது. அதில் பன்மதத்தவர், பல இனத்தவர், பல மொழியினர், பல பண்பாட்டுக்கு உரியவர்கள் உண்டு.

மனுதர்மத்தில் திராவிடம்

ஏன் இவர்கள் கொண்டாடும்  - இந்திய அரசியல் சட்டத்திற்குப் பதிலாக இடம் பெற வைக்க விரும்புகிற மனுதர்ம சாஸ்திரத்தில்கூட,

மனுதர்மம் பத்தாவது அத்தியாயம் சுலோகம் 44-இல்

"பௌண்டரம் ஔண்டரம் திரவிடம்

காம்போசம் யவ நம் சகம் பாரதம்

பால் ஹீகம் சீநம் கிராதம் தரதம் கசம்"

(வங்கம், புந்தேல்கண்ட்(உத்திரப்பிரதேசம், பிகார்), திராவிடம், கம்போடியா, பாலி, யவனம், சீனம், கிராதம் (ஆப்கான்), தக்கானம் இப்பிரதேசங்களை உள்ளடக்கியவர்கள், பாரத தேசத்தவர்கள் அனைவரும் சூத்திரர்களாகிவிட்டனர்.)

"திராவிடம்" என்பது மனுதர்மத்திலேயே இடம் பெற்றுள்ளதே!

இந்தியாவின் பல நாடுகளின் உள்ள டக்கமே இந்தியா என்பதற்கு மனுதர்ம சாஸ்திரமே தக்க சான்று அல்லவா!

ஆர்.எஸ்.எஸ். தலைவரின் இந்தப் பேச்சில் புதைந்துள்ள மாபெரும் ஆபத்து இது ஹிந்து ராஷ்டிரம் -ஹிந்து நாடுதான் என்ற பிரகடனம் ஒளிந்து தலையை மெல்ல எட்டிப் பார்த்து, 'நாடி'ப் பார்க்கிறது

செக்யூலர் இந்தியா அல்ல இது என்று மறுக்கும் ஹிந்துத்துவ ஆணவம்தானே இது!

இந்து என்று ஒப்பவில்லையென்றால்

குடியுரிமை கூட கிடையாதாம்!

கோல்வால்கர் கூறியபடி கிறித்தவர்கள் இராமனை வணங்க வேண்டும். இஸ்லாமி யர்கள் கிருஷ்ணனை வணங்க வேண்டும், இன்றேல் அவர்களுக்கு ஹிந்து நாடாகிய இந்த நாட்டில் வாழ உரிமை இல்லை என்பது தான் இப்போது ஒத்திகையாகக் களத்திற்கு வந்துள்ளது. எனவே, இந்த விஷமத்தை முளையிலேயே வேரோடும், வேரடி மண்ணோடும் கிள்ளி எறிய வேண்டும்!

மதசார்பற்ற சக்திகளே கிளர்ந்தெழுக!

இது ஹிந்துஸ்தான் அல்ல; இந்தியா.. இந்தியா.. இந்தியா...

நாட்டில் உள்ள அனைத்து மதச் சார்பற்ற முற்போக்கு சக்திகள், கட்சிகள், அமைப்புகள் அனைத்தும் ஓரணியில், ஓர் குரலில் இந்த மாபெரும் ஆபத்தினைக் கண்டித்து பெரு முழக்கம் பெருந்திரள்  அணியாக எழ வேண்டும்! எழ வேண்டும்!!

 

கி.வீரமணி
தலைவர், திராவிடர் கழகம்


சென்னை
9-2-2017

தமிழ்நாட்டில் தற்போது நிலவும் அசாதாரண அரசியல் சூழ்நிலைக்கு அடிப்படைக் காரணங்களில் ஒன்று, கடந்த பல மாதங்களாக நிரந்தர ஆளுநரை மத்திய அரசு நியமிக்காமல் தள்ளிக் கொண்டே, பொறுப்பு ஆளுநரை அதுவும் மகராஷ்டிரத்தின் ஆளுநரை, நியமனம் செய்ததால், ஆளுநர் பணியை குடியரசு நாளில்கூட அவர் செய்யவேண்டியதை - மற்றவர், முதல்வர் செய்தார் என்பது ஒரு சிறு எடுத்துக்காட்டு.

அதுபோலவே ஜனநாயகம் தமிழ்நாட்டில் எங்கே தீவிர சிகிச்சைப் பிரிவுக்கு அனுப்பப்பட்டு விடுமோ என்ற கவலை பல முற்போக்கு ஜனநாயகவாதிகளிடம் இருப்பதற்குக் காரணம் - உடனடியாக தமிழ்நாட்டிற்கு நிரந்தர ஆளுநரை மேலும் காலந்தாழ்த்தாமல் நியமிக்கவேண்டும்.

அந்த நியமனம் என்ன அவ்வளவு கடினமான ஒன்றா மத்திய அரசுக்கு?, பலருக்கும் புரியவில்லை! ‘‘அரசியல்'', இதிலும் உள்ளதோ என்று பலரும் அய்யுறும் அவலம் ஏற்பட்டுள்ளது.

- கி.வீரமணி,

சென்னை  தலைவர்,

8.2.2017   
திராவிடர் கழகம்

 

அ.இ.அ.தி.மு.கவின் சட்டப்பேரவை உறுப்பினர்கள் நேற்று (5.2.2017) பிற்பகலில் கூடிய கூட்டத்தில், தற்போது முதல் அமைச்சராக உள்ள மாண்புமிகு திரு.ஓ.பன்னீர்செல்வம் தனது பதவியை ராஜினாமா செய்வதாக, கடிதத்தை அ.தி.மு.க.வின் தலைமையான பொதுச்செயலாளரிடம் கொடுத்துள்ளார். அவரே கட்சியின் பொதுச்செயலாளரான திருமதி வி.கே.சசிகலா அவர்களே முதல்அமைச்சராகப் பொறுப்பேற்க வேண்டும் என்று  முன்மொழிந்துள்ளார்.

அதன்படி, கட்சியின் சட்டமன்ற உறுப்பினர்களான எம்.எல். ஏக்களால் திருமதி சசிகலா அவர்கள் முதல் அமைச்சராகப் பொறுப்பேற்க தனது இசைவினைத் தெரிவித்த நிலையில்  ஒருமனதாக தேர்ந்தெடுக்கப்பட்டுள்ளார்.

முந்தைய ஜெயலலிதா அரசின் கொள்கை நிலைப்பாடுகளை அப்படியே பின்பற்றும் தனது தலைமையிலான அரசு என்றும் தனது ஏற்புரையில் தெளிவாக்கியுள்ளார்.

ஒருமனதாக இத்தேர்வு அமைந்திருப்பதும், கட்சித் தலைமை வேறு, ஆட்சித்தலைமை வேறு என்று இரட்டை அதிகார நிலைப்பாட்டினால் பலவகையான அதிகார முரண்கள் ஏற்பட இனி இடமில்லை என்பதோடு, முழுப்பொறுப்பையும் ஏற்க வேண்டியவர் ஒருவரே என்பதால், தமிழ்நாட்டில் ஆளுங்கட்சியின் கட்டுக்கோப்பும், கட்டுப்பாடும் நிலை நிறுத்திக்காட்டப்பட்டுள்ளன.

பெரிதும் ஆணாதிக்கம் கோலோச்சும் உலகில் மீண்டும் ஒரு பெண், கட்சித்தலைமை, ஆட்சித்தலைமை இரண்டையும் பெற்று அரசியல் பணிபுரிய வாய்ப்பளிக்கப்பட்டிருப்பது ஒரு நல்ல திருப்பமே! - வரவேற்கப்படவேண்டியதே!

புதிய முதல் அமைச்சருக்கு நமது வாழ்த்துகள்!

- கி.வீரமணி,

தலைவர்,  திராவிடர் கழகம்

சென்னை
5.2.2017

 

அறிஞர் அண்ணாவின் பாடங்களை செயல்படுத்த சூளுரையுங்கள் என்று திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

அறிக்கை வருமாறு:

தான் கண்டதும்- கொண்டதும்

ஒரே தலைவர் தந்தை பெரியார்

இன்று (3.2.2017) அறிஞர் அண்ணாவின் 48 ஆவது ஆண்டு நினைவு நாள்!

அறிஞர் அண்ணா - தந்தை பெரியாரின் தலைமாணாக்கர்! சீரிய பகுத்தறிவாளர்!!

தனது வாழ்நாளில் தான் கண்டதும் கொண்டதும் ஒரே தலைவர் தந்தை பெரியார்தான் என்று கூறியவர்.

‘தனது (தி.மு.க.) அமைச்சரவையே தந்தை பெரியாருக்குக் காணிக்கை’ என்று தமிழ்நாடு சட்டமன்றத்தில் பிரகடனப்படுத்தித் தனித்த வரலாறு படைத்தவர்!

தி.மு.க., பிரிவினைக் கொள்கையைக் கைவிட் டாலும், அதற்கான காரணங்கள் அப்படியே இருக்கின்றன என்பதைத் தெளிவாக திட்டவட்டமாக அறிவித்தவர் அறிஞர் அண்ணா.

மதச் சார்பற்ற அரசில் கடவுள், கடவுளச்சிகள் படங்களை அரசு அலுவலகங்களிலிருந்து அப்புறப் படுத்த வேண்டும் என்று அரசின் சுற்றறிக்கையை அனுப்பியவர் முதல்வர் அண்ணா!

தனது ஓராண்டு கால ஆட்சியில் அண்ணாவின் முப்பெரும் வரலாற்றுச் சாதனைகளான -

(1) சுயமரியாதைத் திருமணச் செல்லுபடி சட்டம்

(2) ‘சென்னை ராஜ்யம்‘ தமிழ்நாடாக மாற்றப்பட்ட சட்டம்

(3) தமிழ், ஆங்கிலம் மட்டுமே தமிழ்நாட்டில் - இந்திக்கு இடமில்லை;

தனது (தி.மு.க.) ஆட்சி என்பது வெறும் காட்சி அல்ல; திராவிட இனத்தின் மீட்சிக்கானது என்பதை வரலாற்றில் அண்ணா பதிய வைத்தது - தனிப்பெரும் வரலாறு படைத்தவர்.

மாநிலங்களுக்குத் தேவையான அதிகாரங்களை மாநிலங்கள் எடுத்துக் கொள்ளட்டும்!

‘‘மாநில சுயாட்சி வேண்டும் என்று நாம் கேட் கிறபோது, இப்படிப் பேசுவது மத்திய அரசைக் குலைப்பதாகும்; நாட்டுக்குப் பெருத்த ஆபத்து வரும் என்று கூறுகின்றனர். மக்களின் சுக துக்கத்தோடு பின்னிப் பிணைந்திருப்பது மாநில அரசுதானே தவிர, மத்திய அரசு அல்ல; மாநில அரசுதான் மக்களின் குறைகளை நேருக்கு நேர் சந்திக்க வேண்டியவர்கள்; மத்திய அரசின் வலிவு அச்சத்தைத் தர, கலக்கத்தைத் தர என்றால், நமது கூட்டு சக்தியின்மூலம், நம்மில் ஒவ்வொருவருடைய வலுவையும் கொண்டு அந்த அக்கிரம வலிவை சிறுகச் சிறுகக் குறைப்பதுதான் எங்கள் கடமையாக இருக்கும்.’’

‘‘நாட்டுப் பாதுகாப்பைத் தவிர, மற்ற அதி காரங்கள் அனைத்தையும்பற்றிச் சிந்திப்போம். மாநிலங்களுக்குத் தேவையான அதிகாரங்களை மாநிலங்கள் எடுத்துக் கொள்ளட்டும்; பின்னர் மாநிலங்கள் விரும்பித் தருகின்ற அதிகாரங்களை மத்திய அரசு எடுத்துக் கொள்ளட்டும்.’’

- முதலமைச்சராக இருந்தபோதே  இப்படி முழங்கியவர் அறிஞர் அண்ணா.

முதல்வர் பதவி அவரை முடங்கிவிடச் செய்ய வில்லை; மாறாக, முழக்கமிடவே செய்தது!

அ.தி.மு.க. இதனைப் பாடமாகக் கொள்ளவேண்டும்!

அத்தகைய அண்ணா வழிச் செல்லும் அரசு என்று சொல்லும் ஆளும் அ.தி.மு.க. இதனைப் பாடமாகக் கொள்ளவேண்டும்.

கலைஞர் தலைமையில் தி.மு.க.வின் அய்ம் பெரும் முழக்கங்களில் ஒன்று, ‘‘உறவுக்குக் கைகொடுப்போம்; உரிமைக்குக் குரல் கொடுப்போம்‘’ என்ற முழக்கம்!

இன்றைய காலகட்டத்தில் அண்ணாவின் இந்தப் பாடங்களை திராவிட இயக்கத்தவர்களும், தன்னாட்சி - தனியாட்சி அல்ல - கோருவோரும் படித்து, பயன்பெற்று, நடைமுறைப்படுத்த முன் வருதலே அறிஞர் அண்ணா நினைவு நாளில் தக்க சூளுரையாக அமையவேண்டும்.

கி.வீரமணி
தலைவர்,   திராவிடர் கழகம்.

 

3.2.2017
சென்னை

தாழ்த்தப்பட்ட மக்களுக்கான நிதி உதவி ஏமாற்றத்தை அளிக்கிறது

ரயில்வே துறை என்பது சவலைப் பிள்ளையாகி விட்டது!

பழைய கள் - புதிய மொந்தையே மத்திய பட்ஜெட்

தமிழர் தலைவர் ஆசிரியர் வெளியிட்டுள்ள அறிக்கை

மத்திய பி.ஜே.பி. அரசால் தாக்கல் செய்யப்பட்ட நிதிநிலை அறிக்கை என்பது  ‘பழைய கள் - புதிய  மொந்தை' என்ற நிலையில் தான் உள்ளது என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

ஜனவரி  31 ஆம் தேதியோடு

நிதி ஆண்டு முடியும் என்ற ஏற்பாடு- புதிய ஏற்பாடு

இந்த நிதி ஆண்டு என்பது, மாற்றத்திற்கு உள்ளாகியுள்ளது. இதற்குமுன் ஏப்ரல் முதல் தொடங்கி மார்ச் 31 வரை முடியும். இப்போது பிரதமர் மோடி தலைமையில் உள்ள அரசு ஒரு மாற்றம் செய்து பிப்ரவரி ஒன்றாம் தேதி நிதிநிலை அறிக்கை (பட்ஜெட்) ஒவ்வொரு ஆண்டும் இனி தாக்கல் செய்யப்படும் - ஜனவரி  31 ஆம் தேதியோடு நிதி ஆண்டு முடியும் என்ற ஏற்பாடு புதிய ஏற்பாடு.

மற்றொன்று - பொது பட்ஜெட்டுக்குமுன், ரயில்வே பட்ஜெட்டை ரயில்வே துறை அமைச்சர் நாடாளுமன்றத்திலேயே சமர்ப்பிப்பார். அதன்மீது ஓரிரு நாள்கள் விவாதம் நடைபெற்று நிறைவேறும் என்ற பழைய ஏற்பாட்டுக்கு விடை கொடுத்து, பொது பட்ஜெட்டுடன் ரயில்வே வரவு - செலவுகளும் இணைக்கப்பட்டு ஒரே பட்ஜெட்டாக ஆக்கப்பட்டுள்ளது.

ஆங்காங்கே சிறுசிறு ஒப்பனைகள்

இந்த இரண்டும்தான் புதுமையானவை. மற்றவையெல்லாம் பழைய முறைகள்தான் - ஆங்காங்கே சிறுசிறு ஒப்பனைகள்தான்!

பொதுவான ஒரு உண்மை என்னவென்றால், அரசு சம் பளங்கள், கட்டணங்கள், ஓய்வூதியங்கள் இவைகளுக்கு 60 விழுக்காடு செலவினம் - ஆண்டுதோறும் (இவ்வாண்டு 7 ஆவது சம்பளக் கமிஷன் பரிந்துரை தாக்கமும் உண்டு) அதற்குமேல் இராணுவத்துக்கான செலவு, ஆண்டுக்காண்டு பெருத்துக்கொண்டே செல்வது மற்றும் வழமையான செலவினங்கள் என்று ஒட்டுமொத்தமாகப் பார்த்தால், 85 விழுக்காடு போக, நிதியமைச்சராக உள்ளவர் செய்யும் ஒப்பனை - நிதி ஒதுக்கீடு, அதிரடி அறிவிப்புகள் - மாற்றங்களை இந்த 15 விழுக்காடுகளில்தான் திரும்பத் திரும்பச் செய்தாகவேண்டிய நிர்ப்பந்தம் நிதி நிலை தயாரிக்கும் நிதியமைச்சருக்கும், அவரது அமைச்சகத்திற்கும் உண்டு.

நீர்மேல் எழுதிய

எழுத்துக்களாகவே உள்ளன!

இந்த ஆண்டு வரவு - செலவுத் திட்டத்தில் ஏதோ விவசாயி களுக்குப் பெரும் அளவில் வசதி வாய்ப்புகளை உருவாக்குவதாகக் கூறப்பட்டாலும்,

சென்ற ஆண்டு நிதியமைச்சர் அளித்த உறுதிமொழிகளில் ஒன்றான விவசாயிகளின் வருமானத்தினை இரட்டிப்பாகப் பெருக்குவோம் என்று சொன்னது - இன்னமும் நீர்மேல் எழுதிய எழுத்துக்களாகவே உள்ளது!

விவசாயிகள் கவலையைப் போக்கவோ, தற்கொலைகளைத் தடுக்கவோ, விவசாயிகள் சுயமரியாதையுடன், கவுரவமான வாழ்க்கை வாழவோ வசதி செய்யக்கூடிய திட்டங்கள் ஏதும் இல்லாததால் விவசாயிகள் நம்பிக்கை தவிடு பொடியாகத் தகர்ந்துள்ளதோடு, பெருத்த ஏமாற்றத்தையே தந்துள்ளது!

எதிர்கால சமுதாய முன்னேற்றத்திற்கான

முதலீடு பெருகவில்லை

அதுமட்டுமல்ல, கல்விக்கான - சுகாதாரத்திற்கான செலவினம் என்பது ஒரு நாட்டின் வரவு - செலவுத் திட்டத்தில் எதிர்கால சமுதாய முன்னேற்றத்திற்கான முதலீடு  (Social Investment)  அது பெருகவில்லை இந்தப் பட்ஜெட்டில்.

மாறாக, இது 1.4 சதவிகிதத்தைத் தாண்டவில்லை! கல் விக்கு 6 சதவிகிதம் ஒதுக்கப்படல் வேண்டும் என்ற  பல கல்வி அறிஞர்களின் குழு பரிந்துரை இன்னமும் எட்டா இலக்காகவே உள்ளது.

கல்வியைப் பொதுப் பட்டியலுக்குக் கொண்டு சென்றாலும், நடைமுறையில் அதை முதல் பட்டியலாக யூனியன் லிஸ்ட் என்ற மத்திய அரசு பட்டியலில் உள்ளது போன்றே, மாநிலங்களை அறவே புறந்தள்ளி - எவ்வித ஆலோசனைகளையும் செய்யாமல் தன்னிச்சையாக, ‘தானடித்த மூப்பாக’ கல்வித் திட்டங்களை மத்திய அரசு செய்கிறது!

மத்திய அரசே நுழைவுத் தேர்வுகளுக்காகத் தனித் துறையை உருவாக்கி, அரசே நடத்த இந்த பட்ஜெட்டில் நிதி ஒதுக்கீடு செய்துள்ளது எதைக் காட்டுகிறது?

அது அப்பட்டமான அரசியல் சட்ட மீறல், சட்ட விரோதமும்கூட;

தேர்வுகள் நடத்தும் உரிமை ஆங்காங்குள்ள பல்கலைக் கழகங்களின் உரிமை, பணி, கடமை!

எதற்கு இந்த வீண் வேலை?

அதனை மத்திய அரசோ, மருத்துவக் கவுன்சிலோ மற்ற அமைப்புகளோ நடத்த தற்போது பல்கலைக் கழக சட்டப்படியோ, மத்திய கல்வி உரிமை சட்டப்படியோ எவ்வித உரிமையும் இல்லை. இதற்கென ஏன் தனித் தேர்வு வாரியம்? எதற்கு இந்த வீண் வேலை?

கல்வியை ஒரே இந்திய சீரமைப்புத் தகுதி திறமை  அடிப்படையில் தருகிறோம் என்று கூறி, இந்தியாவை பன்முகம், பல கலாச்சாரம், பன்மொழி என்ற பன்முகத்தினை அழித்து, ஒரே கட்டின் கீழ் கொண்டு வருவதற்கான முக்காடு போட்ட முதல் முயற்சி இது.

மாநில அரசுகள் கடுமையாக எதிர்த்தாக வேண்டும்

இதை மாநில அரசுகள் கடுமையாக எதிர்த்தாக வேண்டும் - நீதிமன்றங்களில் சட்டப்படி, இப்படி அமைக்க உரிமை இல்லை என்று வழக்குகள் போட்டு சட்ட நிலையைத் தெளிவுபடுத்தவேண்டும்.

தாழ்த்தப்பட்ட, பிற்படுத்தப்பட்ட மலைவாழ் மக்களின் உரிமைகளைப் பேண - நல்வாழ்வுத் திட்டங்களுக்கான நிதி - அளவு மிகப்பெரிய ஏமாற்றத்தைத் தருவதாக உள்ளது! அம்மக்கள் தொகையைக் கணக்கிட்டு, அவர்களது வாழ்வாதாரம், வளர்ச்சிபற்றி எந்தக் கவலையும் இதில் காட்டப் படவில்லை.

‘மகாத்மா காந்தி கிராமப்புற வேலை வாய்ப்புத் திட்டத்திற்கான’ நிதி ஒதுக்கீடும் பெரும் அளவு போல் பேசப்பட்டாலும், உண்மையில் கூடுதலாக ஒதுக்கியுள்ளது செலவினத்தில் 501 கோடி ரூபாய்தான்.

புதிய வேலை வாய்ப்புகள்பற்றி ஆக்கப்பூர்வமான திட்டங்கள் - அறிவிப்புகள் ஏதுமில்லை.

மாற்றம் மாற்றம் என்பது

வெறும் ஏமாற்றமே!

ரயில்வே பட்ஜெட்டை - பொது பட்ஜெட்டுடன் இணைத்தது தவறு என்று காட்டுவதுபோல, எந்தப் புதியதொரு திட்டங்கள், வளர்ச்சிகள்பற்றி எந்தவித முக்கியத்துவமும் இல்லாமல் ஆக்கப்பட்டு விட்டது! சவலைப்பிள்ளையாக்கப்பட்டு விட்டது.

லாலுபிரசாத் ரயில்வே அமைச்சராக இருந்தபோது, புதிய கூடுதல் கட்டணங்களை விதிக்காமல், ரூ.30,000 கோடி பொது பட்ஜெட்டுக்கு வருவாய் ஈட்டித் தந்ததெல்லாம் வெறும் பழங்கதைதான் போலும்!

இதுபற்றி மறுபரிசீலனைகள் அவசியம் தேவை. மாற்றம் மாற்றம் என்பது வெறும் ஏமாற்றம் என்பதாக முடியலாமா?

எனவே, வழமையான சில வரவேற்பு அம்சங்களைத் தவிர, மற்ற பெரும்பாலானவை ‘பழைய கள், புதிய மொந்தை’ என்பதாகவே இருக்கிறது!

ஏழை விவசாயி, முதுகெலும்பு உடைய பாடுபடும் உழைப்பாளிக்கு முகமலர்ச்சியை, அக மலர்ச்சியை இந்த பட்ஜெட் தருகிறது என்று உறுதியுடன் கூற முடியாத நிலைதான்!

 

கி.வீரமணி
தலைவர்,        திராவிடர் கழகம்.


சென்னை
2.2.2017

Banner
Banner