ஆசிரியர் அறிக்கை

 

முக்கால் நூற்றாண்டுகளுக்கு மேலான பொதுவாழ்க்கை; அரை நூற்றாண்டு காலம் கட்சியின் தலைமை; 13 முறை சட்டமன்ற உறுப் பினர்; 5 முறை தமிழ்நாடு முதலமைச்சர் முதலிய பொறுப்புகளை ஏற்று, அவற்றில் முத்திரைகளை பதித்த மானமிகு சுயமரியாதைக் காரரான கலைஞர் அவர்கள் இன்று மறைவுற்றார் என்பது மிகப்பெரும் துயரத்திற்குரிய செய்தியாகும்.

தமிழ்நாட்டின் பொதுவாழ்விலும் திராவிட இயக்க வரலாற்றிலும் நின்று நிலைத்துப் பேசப்படும் பெருமைக்குரிய பெருமகன் தலைவர் கலைஞர் ஆவார்.

தன்னை மிக மிக பிற்படுத்தப்பட்டவன் (எத்தனை “மிக மிக” வேண்டுமானாலும் போட்டுக்கொள்ளலாம்) என்று சட்டப்பேரவையிலே அறிவித்த மானமிகு கலைஞர் அவர்கள் எவரும் எளிதில் எட்டமுடியாத இமயத்திற்கு உயர்ந்தார் என்றால் அதற்குக் காரணம் அவரின் யாருடனும் ஒப்பிடமுடியாத உழைப்பு! உழைப்பு!! உழைப்பே!!!

தந்தை பெரியார் அவர்களின் சீடராக “குடிஅரசில்” பணியாற்றி திராவிடர் கழகத்தின் எழுத்தாளராக பேச்சாளராக பரிணமித்து, இலக்கிய உலகின் எழுத்துலக வேந்தராக ஒளிவீசி ஆட்சித்துறையில் நிகரற்ற நிர்வாக திறமை கொண்ட - எதிலும் விரைவாகவும் விவேகமாகவும் செயல்படும் பேராற்றலின் முழுவடிவம் தான் நமது கலைஞர் அவர்கள்.

நிறைவாழ்வு வாழ்ந்து மறைந்துள்ளார் அந்தப் பகுத்தறிவாளர்! அவர் பிரிவால் துயருறும் குடும்பத்தினருக்கும், தங்கள் தலைவரை உயிரினும் மேலாக மதிக்கும் திமுக தோழர்களுக்கும்  குறிப்பாக திமுக பொதுச்செயலாளர் இனமானப் பேராசிரியர் க. அன்பழகன், செயல்தலைவர், தளபதி மு.க.ஸ்டாலின் உள்ளிட்டோருக்கும் தமிழ் நாட்டு மக்களுக்கும் திராவிடர் கழகத்தின் சார்பில் இரங்கலையும் ஆறுதலையும் தெரிவித்துக் கொள்கிறோம். ஒரு வாரத்திற்கு துக்கம் கடைபிடிக்கும் வகையில் திராவிடர் கழகக் கொடி அரைக்கம்பத்தில் இறக்கப்படும். கழக நிகழ்ச்சிகள் ஒரு வாரத்திற்கு ரத்து செய்யப் படுகின்றன.

திராவிட இயக்கத் தீரருக்கு திராவிடர் கழகம் தன் வீர வணக்கத்தை தெரிவித்துக் கொள்கிறது.

மானமிகு கலைஞர் உடலால் மறைந்திருக்கலாம். அவர் எந்தக் கொள்கைக்காக இலட்சியத்திற்காக  திராவிட இயக்கத்திற்காக உழைத்தாரோ அதை குன்றாது மேலும் ஒளிவீசித் திகழ்ந்திட உறுதிமொழி எடுப்பதே நாம் அவருக்குக் காட்டும் மிகப்பெரிய மரியாதையாகும்.

கலைஞர் மறைந்தார் அவர் போற்றிய கொள்கைகள் ஓங்குக!

கடந்த 11 நாட்களாக காவேரி மருத்துவமனையின் மருத்துவர்கள் உள்ளிட்ட பணியாளர்கள் குறிப்பாக மருத்துவமனையின் நிர்வாக இயக்குநர் டாக்டர் அரவிந்தன் செல்வராஜ் ஆகியோரின் சிறந்த மருத்துவ உதவிகளுக்கு நமது நன்றியைத் தெரிவித்துக் கொள்கிறோம்.

 

 

(கி.வீரமணி)

தலைவர், திராவிடர் கழகம்

 

 

‘என் உயிரினும் மேலான கழக உடன்பிறப்பே' என்று வாஞ்சையுடன் அழைக்கும் நமது முத்தமிழ் அறிஞர் மானமிகு கலைஞர் அவர்கள் முழுநலம் பெற்று வெளிவருவதற்கு சில நாள் பிடிக்கலாம்.

நாளும் நலம் பெற்று, பலம் பெற்று வருகிறார். அவர் அடித்தட்டு மக்கள் உள்பட அனைவரது உள்ளம் கவர்ந்த தலைவர். அவரது முதுமை வயது, தொற்றுநோய் காரணமாகவே காவேரி மருத்துவ மனையில் சேர்க்கப் பட்டு, மிகச் சிறந்த மருத்துவ நிபுணர்களின் கண்காணிப் பில் உடல்நலம் தேறி நாளும் முன்னேறி வருகிறார்.

இதற்கிடையில் இந்த அதிர்ச்சி, மனவேதனை, மன அழுத் தத்தில் கழக உடன்பிறப்புகள் சிலர் மறைவுற்றார் கள் என்பதை அறிய இரத்தக் கண்ணீர் வருகிறது. இம்மாதிரி முயற்சிகளில் அருள்கூர்ந்து ஈடுபடாதீர்கள்.

தி.மு.க. செயல் தலைவர் சகோதரர் மு.க.ஸ்டாலின் அவர்கள் விடுத்துள்ள உருக்கமான வேண்டுகோளை ஏற்று, எவரும் அதிர்ச் சியோ, தற்கொலை முயற்சியிலோ ஈடுபடாமல் பொறுமையுடன் காத்திருங்கள் கலைஞரைச் சந்திக்க. கவலை வேண்டாம் - காரணம், காலத்தை வென்ற தலைவர் அவர்!

நேற்றிரவு கலைஞர் அவர்களின்  உடல் நிலையில் மேலும் முன்னேற்றமாக அவர் நாற்காலியில் அமர வைக்கப்பட்டார். முதலில் மருத்துவர்கள் அவரை படுக்கையில் சிறிது நேரம் அமரவைத்தனர். அதன் பிறகு அருகில் இருந்த நாற்காலியில் அமரவைத்து சிறிது நேரம் பயிற்சிகள் அளித்தனர் என்ற தகவல் நம் எல்லோரையும் மகிழ்ச்சிக் கடலில் ஆழ்த்தியுள்ளது.

எந்த எதிர்நீச்சலிலும் வெற்றி பெற்ற ஏந்தல் அவர்!

தலைவர்

திராவிடர் கழகம்

சென்னை

2.8.2018

 

 

சேலத்திற்கான புறவழிச்சாலை அமைப்பை எதிர்த்து வழிநடைப் பிரச்சாரம் செய்ய, திருவண்ணா மலையிலிருந்து நேற்று (1.8.2018) துவங்கி பிரச்சாரம் செய்வதை ஏன் தமிழக காவல்துறையினர் தடுத்து மார்க்சிஸ்ட் கம்யூனிஸ்ட் கட்சியின் தமிழ் மாநிலச் செயலாளர் தோழர் கே. பாலகிருஷ்ணன் அவர்களையும் அவருடன் சென்ற சுமார் 500 தோழர்களையும் கைது செய்தது. ஜனநாயக நாட்டின் கருத்துரிமை, பேச்சுரிமை, கூடும் உரிமைகள் ஆகிய அரசமைப்புச் சட்டம் வழங்கியுள்ள அடிப்படை உரிமைகளை பறிக்கின்ற செயலாகும்.

வன்முறைகளில் ஈடுபட, அவர்கள் இயக்கம் நடத்தவில்லை; குமுறும் ஏழை, எளிய விவசாயிகள், உழவர்களின் உரிமைக் குரலாய் கிளம்பியுள்ளனர்.

இதனை ஈர நெஞ்சத்தோடு தமிழக அரசு அணுக வேண்டும்; மக்கள் விரும்பாத, மக்கள் எதிர்க்கின்ற திட்டங்கள் ஒரு போதும் "மக்கள் நலத் திட்டங்கள்" ஆகா!

எனவே மக்களின் ஆதரவினை - ஒப்புதலைப் பெற்று மக்கள் நலத் திட்டங்களில் அரசுகள் ஈடுபடுதலே ஜனநாயக மாண்பினைக் காப்பதாகும்.

சுமார் 200 கோடிக்கு மேல் மக்கள் வரிப் பணம் செலவில் சேது சமுத்திர கால்வாய்த் திட்டம், சென்னை - மதுரவாயல் பறக்கும் சாலைத் திட்டம், கட்டிய தூண்கள் துருப்பிடிக்கிறதே என்று எண்ணி கவலை கொள்ளும் வண்ணம்  போன்றவைகளை முடிக்க தமிழக அரசு, மத்திய அரசினை வற்புறுத்தினால் தமிழ்நாட்டின் வேலை வாய்ப்புகளும், பொருளாதார வளர்ச்சியும் மேலும் சிறப்படையும்  அதில் தமிழக அரசும் முதல்வரும் கவனம் செலுத்துவது அவசர அவசியம்.

தலைவர்

திராவிடர் கழகம்

சென்னை

2.8.2018

‘க.ச.' அய்யா என்று அந்தப் பகுதியில் மிகுந்த அன்போடும், மதிப்போடும் அனைவராலும் அழைக்கப்படும் பொத்தனூர் மானமிகு க.சண்முகம் அவர்களின் 96 ஆம் ஆண்டு பிறந்த நாள் இந்நாள்.

திருச்சி நேஷனல் கல்லூரியில் படித்த மாணவர் பருவந்தொட்டு, திராவிடர் கழகக் கொள்கைகளால் ஈர்க்கப்பட்டு, தந்தை பெரியார், அன்னை மணியம்மையார் தொடங்கி இன்றுவரை நூலிழை பிறழாமல் கொள்கைத் தீவிரத்துடனும், கட்டுப்பாட் டுடனும், கண்ணியத்துடனும் பண்பாட்டின் பெட்டகமாக அடக்கத்தின் உருவமாக நம்மிடையே அவர் வாழ்ந்து வருகிறார் என்பது அவருக்கு மட்டுமல்ல; நமக்கும், இயக்கத்திற்கும் பெருமையாகும்.

ஒருங்கிணைந்த சேலம் மாவட்டத்தின் தலைவராகவும், மண்டலத் தலைவராகவும், பெரியார் சுயமரியாதைப் பிரச்சார நிறுவனத்தின் செயற்குழு உறுப்பினராகவும் (தந்தை பெரியார் காலத்திலேயே), அதன் துணைத் தலைவராகவும், தற்போது அதன் தலைவராகவும் இருக்கக் கூடிய கொள்கைச் சீலர் ஆவார்.

சேலம் மாவட்டத் தலைவராக இருந்து கழகம் நடத்திய பேராட்டங்களில் எல்லாம் புன்னகை முகத்தோடு பங்கு கொண்டு சிறைப்பட்டவர்.

‘மிசா'வில் சிறைப்பட்டு ஓராண்டு காலம் சிறையில் இருந்தவர்.

அவருடைய பொதுவாழ்வு என்பது திறந்த புத்தகம் - கட்சிகளுக்கு அப்பாற்பட்டு மதிக்கத் தக்க பண்பாளர்.

அவரின் தனிவாழ்வுக்கும், பொதுவாழ்வுக்கும் உற்ற துணைவராக இருந்தவர் அவரது துணைவியார் மறைந்த திருமதி சுந்தரம்பாள் அம்மையார் ஆவார். இந்த நேரத்தில் அவரையும் நினைவு கூர்வது அவசியமாகும்.

இவர் தந்தை பெரியார் வாழ்ந்த வயதுவரை வாழ விரும்பினார் - அதனைச் சாதித்தும் முடித்துள்ளார்! மானமிகு பொத்தனூர் க.சண்முகம் அவர்கள் நூற்றாண்டும் கண்டு இயக்கத்திற்கும், பொதுத் தொண்டுக்கும் பயன்படவேண்டும் அதற்கு நல்ல உடல் நலத்துடன் அவர் நீடு வாழ வேண்டும் என்பதே நமது அவா!

கடவுள் மறுப்பாளர்கள் பலரும் இத்தகைய 90 ஆண்டுகளைத் தாண்டி 100 ஆண்டு சதம் அடித்தவர்கள் உள்பட விரைவில் ‘‘கழகப் பாராட்டு விழா'' ஒன்றை சென்னையில் சிறப்பாக நடத்தவிருக்கிறோம்.

96 ஆம் ஆண்டு பிறந்த நாள் காணும் முதுபெரும் பெரியார் பெருந்தொண்டருக்குக் கழகத்தின் சார்பில் அன்பு நிறைந்த வாழ்த்து களைத் தெரிவித்துக் கொள்கிறோம்.

வாழ்க பெரியார்! வளர்க பகுத்தறிவு!

தலைவர்

திராவிடர் கழகம்.

சென்னை

2.7.2018

 

மார்க்சிஸ்ட் கம்யூனிஸ்ட் கட்சியின் (சிறிவி) நாளேடான 'தீக்கதிர்' 56ஆம் ஆண்டில் அடியெடுத்து வைப்பதற்கு 84ஆம் ஆண்டில் உள்ள 'விடுதலை' நாளேடு  வாழ்த்துகிறது.

கொள்கை ஏடுகள் - அதிலும் நாளேடு நடத்துவது சறுக்குப் பாறையில் ஏறும் பணி; எதிர் நீச்சல் பணியே!

லட்சியங்களைப் பரப்பும் போது லட்சங்களை எதிர்பார்க்க முடியாது.

நமது கொள்கை நாளேடுகளான 'முரசொலி' 'தீக்கதிர்'; இப்போது வார ஏடான, 'ஜனசக்தி' போன்றவைகளை பொது மக்கள் வாங்கிப் படித்தால், அவர்களின் அறியாமை இருள்போய், பொது அறிவும், சமூகநீதி பற்றியும், வருண - வர்க்கப் போராட்ட வரலாறும், பின்னணியும் புரியும்.

இந்த அறிவாயுதங்கள் இன்றைய இருள்சூழ்ந்த கால கட்டத்தில் மிகவும் தேவை.

வாழ்க  பணி - வெல்க, வெல்கவே!

- கி. வீரமணி

ஆசிரியர்

'விடுதலை'

Banner
Banner