ஆசிரியர் அறிக்கை

தமிழ்நாடு அரசுக்குத் தமிழர் தலைவர்  வேண்டுகோள்

ராமராஜ்ஜிய யாத்திரை என்று  கூறி விசுவ இந்து  பரிஷத் என்ற சங் பரிவார் அமைப்பு தமிழ்நாட்டுக்குள் நுழைகிறது; அமைதிப் பூங்காவான தமிழ்நாட்டை  அமளிக்காடாக்கத்  திட்டமிட்டுள்ளனர். வருமுன் காக்கும் வகையில் தக்க கவனம் செலுத்தி, இந்த அமளி ராம யாத்திரைக்குத் தமிழ்நாடு அரசு அனுமதியளிக்கக் கூடாது என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

அமைதிப் பூங்காவாகத் திகழும் தமிழ்நாட்டை ஜாதி வெறி, மதவெறி என்ற வெறிகளா ல் அமளிக்காடாக்கிட தூபம்போடும் விசுவ இந்து பரிஷத்தின் ராமராஜ்ஜிய ரத யாத்திரையை தமிழ்நாட்டில் அனுமதிக்கக் கூடாது என்று தமிழக சட்டமன்றத்தில் கவன ஈர்ப்புத் தீர்மானம் கொடுத்துள்ள நான்கு சட்டமன்ற உறுப்பினர்கள் (தனியரசு, தமிமுன் அன்சாரி, கருணாஸ், முகமது அபுபக்கர்) ஆகியோரின் நியாயமான கோரிக்கையை தமிழக அரசு பரிசீலிக்கவேண்டும்.

மதுரை - காஞ்சிபுரத்தில்...

தற்போது சில இடங்களில் மதுரை, காஞ்சிபுரம் பகுதி களில் கிறித்துவ சமுதாயத்தினரைத் தாக்கியும், பெண்களின் கையில் உள்ள பைபிளைக் கிழித்தும், அதுபோல முசுலீம்களின்  வழிபாட்டு இடத்தில் திரிசூலத்தை நட்டும்-  வீண்வம்பு, வன்முறைக் கலவரங்களை  ஆர்.எஸ்.எஸ்., பா.ஜ.க., சங் பரிவார்கள் விதைத்து, செயல்படுத்தி வருகின்றனர்.

தமிழக அரசின் காவல்துறை கைகட்டி வேடிக்கைப் பார்க்கும் அவல நிலை உள்ளது!

புதுச்சேரியில் காவல்துறையின்  அனுமதி பெற்று நடத்தப்பட்ட திராவிடர் கழகக் கூட்டத்தில்  கலவரத்தில் ஈடுபட்டுள்ளனர்.

பாபர் மசூதி இடிக்கப்பட்ட  1992 இல்  இந்தியா முழுவதும் இரத்த ஆறுகள், கொலைகள், மதக்கலவரங்கள் நடைபெற்ற நிலையில், அமைதிப் பூங்காவாக தமிழ் நாடுதான் விளங்கியது. ‘பெரியார் பூமி'தான் என்பதையும் நிரூபித்தது.

மேலும் இதற்குக் காரணம் திராவிட இயக்க ஆட்சிகள் என்று ஏடுகளே எழுதின. அந்த வரலாற்றைத் தலைகீழாக்கி, ‘‘பெரியார் சிலையை உடைப்போம்; அம்பேத்கர் சிலையை சேதப்படுத்துவோம்'' என்றெல்லாம் விஷமங்களுக்கு ஆர்.எஸ்.எஸ்., சங்பரிவார் வகையறாக்கள் வித்தூன்றுவது வீண்கலவரங்களை விதைக்கும் தவறான முயற்சிகளே!

எனவே, தற்போதுள்ள அ.தி.மு.க. அரசு இதில் கண் டிப்பாக சட்டம், ஒழுங்கைப் பராமரித்திட காவல்துறைக்குத் தக்க சுற்றறிக்கை ஆணைகளைப் பிறப்பிக்கவேண்டும்.

திராவிடர் கழகம் எந்த மதத்திற்கும் சார்பானது அல்ல; அதே நேரத்தில், மனிதநேயம், மனித உரிமைகள் அடிப்படையில் இப்படிப்பட்ட வன்முறைகளைத் துவக்கினால், அது அடக்கப்படுதல் வேண்டும் என்பதில் உறுதியாக உள்ள ஓர் இயக்கம்.

இதில் முழு கவனத்தையும் தற்போதுள்ள ஆட்சி செலுத்தி, சமூக நல்லிணக்கத்தைக் குழிதோண்டி புதைக்க முயலும் நாசகார மதவெறிச்  சக்திகளை அடக்கி வைக்க, தயவு தாட்சண்யமின்றி உரிய நடவடிக்கைகளை காவல் துறைமூலம்  எடுக்கவேண்டியது அவசரம், அவசியம்!

குதிரை காணாமல் போன பின் லாயத்தை இழுத்துப் பூட்ட வேண்டாம்;  முன்கூட்டியே நடவடிக்கை தேவை! தேவை!!

தலைவர்

திராவிடர் கழகம்

சென்னை  
19.3.2018

உலகம் போற்றும் வியத்தகு விஞ்ஞானியான ஸ்டீபன் ஹாக்கிங் (Stephen Hawking) அவர்கள் இன்று (14.3.2018) காலமானார் என்ற செய்தி அறிவியல் உலகத்திற்கும், அறிவு உலகத்தவர்களுக்கும் மிகவும் துன்பம் தரும் பெரும் செய்தியாகும்!

அவரது வாழ்வே பல விந்தைகளை உள்ளடக்கிய வாழ்க்கையாகும்!

சில மாதங்கள்கூட உயிருடன் இருக்கமாட்டார் என்று மருத்துவர்களால் கூறப்பட்ட அவரது வாழ்வு, இவ்வளவு காலம்வரை நீண்டதனால் மனித குலம், அறிவியல் ஆராய்ச்சித் துறை பெற்ற நன்மைகள் - சமூக நலன்கள் ஏராளம்! ஏராளம்!!

அத்துணை ஆபத்தான ‘விசித்திர' நோய் பாதிப் பினால் முடக்கப்பட்டு, சக்கர நாற்காலி வாழ்வினராகி, மணமுடித்து, குழந்தை பெற்ற வாழ்க்கையை வாழ்ந் தவர். அறிவியல் - மருத்துவவியலின் வியக்கத்தகுந்த வளர்ச்சியினால் கிடைத்த விழுமிய பயன் எத்த கையது என்பதை உலகுக்கு நீண்ட அவரது வாழ்வும், ஆயுளும் புகட்டின!

உலகம் என்பது படைக்கப்பட்டதல்ல என்ற அறிவியல் கருத்தின் அடிப்படையில் பரிணாம வளர்ச்சி மாற்றங்கள்மூலம் நிகழ்ந்ததன் விளைவு என்று எழுதிய அவர், முதலில் பெருவெடிப்பு (Big Bang) என்ற தத்துவத்தின் அடிப்படையில் உலகம் வளர்ந்து கிளைத்தது என்று கூறி,  பிறகு ‘கடவுள்' என்பதே கற்பனை என்பதை நான் முழுமையாக ஏற்பதோடு, கடவுள் நம்பிக்கை அறிவியலின் அடிப்படையில் ஆதாரமற்றது என்று தானும், மற்றொரு ஆய்வாளரும் இணைந்து எழுதிய ‘தி கிராண்ட் டிசைன்'  (The Grand Design)  என்ற நூலில் தெளிவாக எழுதினார்.

76 வயது வரை வாழ்ந்த அவரது வாழ்வு, எண் ணற்ற ஆய்வுகள் உலகுக்கும், எதிர்கால அறிவியல் தளத்திற்கும், ஆராய்ச்சியாளர்களுக்கும் பயன்படக் கூடியவை; அவர் தனது பாரம்பரிய ஆய்வுச் செல் வங்களை விட்டுவிட்டு  (Legacy)  விடை பெற்றுள்ளார்.

அவருக்கு நமது வீர வணக்கம்!

அவரை இழந்து தவிக்கும் அவரது குடும்பத்தின ருக்கும், அறிவியல் உலகக் குடும்பத்தினருக்கும் நமது ஆழ்ந்த இரங்கலையும், ஆறுதலையும் தெரிவித்துக் கொள்கிறோம்.

 

 

கி.வீரமணி
தலைவர் ,    திராவிடர் கழகம்.

சென்னை

14.3.2018

(Big Bang)

கழகப் பேச்சாளரும், இனமான நடிகருமான பகுத்தறிவுக் கலைச்சுடர் எம்.ஏ. கிரிதரன் (வயது 74) நேற்று (12.3.2018) திண்டுக்கல்லையடுத்த நத்தத்தில் மறைவுற்றார் என்பதை அறிவிக்க வருந்துகிறோம்.

முன்னாள் இராணுவ வீரரான அவர் கழகப் பிரச்சாரத்தில் முக்கிய பங்கு வகித்தவர், கழகக் கொள்கை  விளக்க நாடகங்களைத் தயாரித்து நடித்தவர்.

அவர் பிரிவால் வருந்தும் குடும்பத்தினருக்கு ஆழ்ந்த இரங் கலையும், ஆறுதலையும் தெரிவித்துக் கொள்கிறோம்.

கழகத்தின் சார்பில் திண்டுக்கல் மண்டல திராவிடர் கழகத் தலைவர் தோழர் வீரபாண்டியும், கழகத் தோழர்களும் இறுதி மரியாதை செலுத்துவார்கள்.

- கி. வீரமணி

தலைவர், திராவிடர் கழகம்

சென்னை

13.3.2018

குறிப்பு: இன்று (13.3.2018) மாலை 4 மணிக்கு இறுதி நிகழ்வு நடைபெறுகிறது.


தமிழ்நாட்டின் எழுச்சியை அணையாமல் காப்போம்!

கழகத் தோழர்களுக்கும் -  இன உணர்வாளர்களுக்கும்

ஓர் அன்பு வேண்டுகோள்!

தந்தை பெரியார் சிலையை உடைக்கத் தூண்டுதல் செய்த வர்கள் தமிழ்நாட்டு மக்களின் - ஏன் உலகெங்கும் உள்ள பகுத்தறிவாளர்களின், நல்லுணர்வாளர்களின் எழுச்சி கண்டு - எதிர்ப்புக் கண்டு அஞ்சி நடுங்கி, ஒடுங்கி வருத்தம் தெரிவித்துள்ளனர். ஒரு 24 மணிநேரத்தில் இந்தியாவே பதற்றம் கொண்டது சாதாரணமானதல்ல; எதற்கும் வாய்த் திறக்காத பிரதமர் மோடியே 24 மணிநேரத்தில் வாய்த் திறந்துள்ளார்.

என்றாலும், அந்த எச்.ராஜா என்ற வாய்க்கொழுப்பு வக்கிர மத்தின் திமிர் இன்னமும் அடங்கியதாகத் தெரியவில்லை; ஒட்டன்சத்திரத்தில் தந்தை பெரியார்பற்றித் தவறான தகவலை ஒரு பேட்டியின்மூலம் தெரிவித்துள்ளார். அவர்கள் திருந்தப் போவதில்லை என்பதைத்தான் இது காட்டுகிறது. வம்பையும் விடப்போவதில்லை.

இந்த நேரத்தில் நாம் செய்யவேண்டியதென்ன?

தந்தை பெரியாரைக் கொச்சைப்படுத்துவதால்,

திருப்பத்தூரில் தந்தை பெரியார் சிலையைச் சேதப்படுத்திய தால்,

நாம் அடங்கி விட்டோமா?

ஆர்த்து எழுந்துவிட்டோமா என்பதைக் காட்டவேண்டாமா?

அதை அமைதி வழியில், அறவழியில் ஒன்றுபட்டுக் காட்டு வோம்.

மாவீரர் லெனின் சிலை, அண்ணல் அம்பேத்கர் சிலை, தந்தை பெரியார் சிலை என்று குறி வைக்கும் அந்தக் கோணல் புத்திக்காரர்கள் - வெளியில் கூறாவிட்டாலும் அதே உணர்வோடு இருக்கக்கூடிய ஆதிக்க மதவாத சக்திகளுக்கு, சமூகநீதி அழிப்பு சக்திகளுக்கு அறிவார்ந்த முறையில் உணர்த்த வேண்டாமா?

எழுந்துள்ள தமிழ்நாட்டு எழுச்சியை அணையாமல் காக்க வேண்டாமா?

அதன் குறியீடாக வரும் 11.3.2018 ஞாயிறு மாலை தந்தை பெரியார் சிலை, அம்பேத்கர் சிலை உள்ள முக்கிய ஊர்களில்,

அனைத்துக் கட்சிகள், சமூக அமைப்புகள், உணர்வாளர்களை ஒருங்கிணைத்து தந்தை பெரியார் சிலைக்கு மாலை அணிவிக்க வேண்டுகிறோம். அதிக தூரம்கூட தேவையில்லை.

அறிவு ஆசான் தந்தை பெரியார், மாவீரர் லெனின், அண்ணல் அம்பேத்கர் ஆகிய முப்பெரும் புரட்சியாளர்களின் உருவப் படங்களையும் ஏந்திச் சென்று கீழ்க்கண்ட முழக் கங்களை மட்டும் ஒலித்துச் செல்லுமாறு கேட்டுக்கொள்கிறோம்.

1. ஜாதியை ஒழிப்போம் - சமதர்மம் படைப்போம்

2. மதவெறி மாய்ப்போம் - மனிதநேயம் காப்போம்!

3. பெண்ணடிமை தகர்ப்போம் - பேசும் பெண்ணுரிமை காப்போம்!

4. மூடநம்பிக்கைகளை ஒழிப்போம் - பகுத்தறிவை வளர்ப் போம்!

5. பேதமற்ற சமுதாயம் படைப்போம்! படைப்போம்!!

தந்தை பெரியார், அம்பேத்கர் சிலைகளுக்கு மாலை அணிவிப்பீர்!

- கி.வீரமணி,

தலைவர்,      திராவிடர் கழகம்

சென்னை

8.3.2018


தந்தை பெரியார் சிலையை உடைப்போம் என்று

முகநூலில் பதிவு செய்துள்ள

எச்.ராஜா மீது நடவடிக்கை எடுக்கப்படுமா?

தமிழக அரசுக்கு கழகத் தலைவர் கேள்வி

திரிபுராவில் லெனின் சிலையை உடைத்ததுபோல, தமிழ் நாட்டிலும் பெரியார் சிலை உடைக்கப்படும் என்று முகநூலில் பதிவு செய்துள்ள பா.ஜ.க.வின் தேசிய செயலாளர் எச்.ராஜாமீது அ.தி.மு.க. அரசு நடவடிக்கை எடுக்கவேண்டும் என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

பாரதீய ஜனதா கட்சியின் தேசிய செயலாளராக இருக்கக் கூடிய எச்.ராஜா என்பவர் முகநூலில் கீழ்க்கண்டவாறு பதிவு செய்துள்ளார்.

மேற்கண்டவாறு பதிவு செய்துள்ளார் பா.ஜ.க. தேசிய செயலாளர்.

நேற்றுதான் தமிழக முதலமைச்சர் மாவட்ட ஆட்சியர்கள், காவல்துறை அதிகாரிகளை அழைத்து நாட்டில் சட்டம்- ஒழுங்கு சரியாகப் பராமரிக்கப்படவேண்டும் என்று அறிவுறுத்தியுள்ளார்.

அந்த அறிவுரையின் ஈரம் காய்வதற்குள்ளாகவே பி.ஜே.பி.யின் தேசிய செயலாளர் தமிழ்நாட்டின் ஒப்பாரும், மிக்காரும் இல்லாத - தந்தை பெரியார் என்று ஒட்டுமொத்த மக்களால் மதிக்கப்படும் தலைவர் தந்தை பெரியாரின் சிலை உடைக்கப்படும் என்று முகநூலில் பதிவு செய்துள்ளார்.

இந்தத் தைரியம் இவர்களுக்கு எப்படி வந்தது?

மத்தியில் பா.ஜ.க. ஆட்சி இருக்கிறது என்பதாலா?

அல்லது மாநிலத்தில்  இருக்கக் கூடிய ஆளும் கட்சி பி.ஜே.பி.யின் கோலுக்கு ஆடுகிற, தங்களுக்குச் சாதகமான அல்லது தங்களால் மிரட்டப்படும் ஆட்சியாக இருக்கிறது என்ற நினைப்பிலா?

நாட்டில் கலவரத்தை உண்டாக்கவேண்டும் என்ற வேலையில், பி.ஜே.பி. - சங் பரிவார்க் கும்பல் ஈடுபடத் திட்டமிட்டுள்ளதைத்தான் இது தெரிவிக்கிறது.

இதுபோன்ற பதிவுகளுக்கு எதிர்விளைவு வந்தால், அதன் நிலை என்னாகும் என்று நினைத்துப் பார்க்கவேண்டாமா?

‘தடி எடுத்தவன் தண்டல்காரன்' என்ற நிலை இப்பொழுது  தமிழ்நாட்டில் உருவாகிவிட்டதா? இது அரசியல் அநாகரிகம் ஆகும்.

அமைதிப் பூங்காவான தமிழ்நாட்டை அமளிக்காடாக்கிட காவிகளின் ஏற்பாடு அறிவிப்பா?

சட்டம்- ஒழுங்கைக் காப்பாற்றுவதில் தமிழ்நாடு அரசுக்கு உண்மையிலேயே அக்கறை இருக்குமானால், தொடர்ந்து வன்முறை வெறித்தனப் பேச்சுகளில் ஈடுபட்டு வரும் இந்த ஆசாமிமீது, இந்தச் சந்தர்ப்பத்திலாவது நடவடிக்கை எடுக்கவேண்டும்.

அ.தி.மு.க. அரசு நடவடிக்கை எடுக்குமா?

எங்கே பார்ப்போம்!

- கி.வீரமணி,
தலைவர்,    திராவிடர் கழகம்

சென்னை
6.3.2018  

Banner
Banner