ஆசிரியர் அறிக்கை

தந்தை பெரியார் சிலையை உடைப்போம் என்று

முகநூலில் பதிவு செய்துள்ள

எச்.ராஜா மீது நடவடிக்கை எடுக்கப்படுமா?

தமிழக அரசுக்கு கழகத் தலைவர் கேள்வி

திரிபுராவில் லெனின் சிலையை உடைத்ததுபோல, தமிழ் நாட்டிலும் பெரியார் சிலை உடைக்கப்படும் என்று முகநூலில் பதிவு செய்துள்ள பா.ஜ.க.வின் தேசிய செயலாளர் எச்.ராஜாமீது அ.தி.மு.க. அரசு நடவடிக்கை எடுக்கவேண்டும் என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

பாரதீய ஜனதா கட்சியின் தேசிய செயலாளராக இருக்கக் கூடிய எச்.ராஜா என்பவர் முகநூலில் கீழ்க்கண்டவாறு பதிவு செய்துள்ளார்.

மேற்கண்டவாறு பதிவு செய்துள்ளார் பா.ஜ.க. தேசிய செயலாளர்.

நேற்றுதான் தமிழக முதலமைச்சர் மாவட்ட ஆட்சியர்கள், காவல்துறை அதிகாரிகளை அழைத்து நாட்டில் சட்டம்- ஒழுங்கு சரியாகப் பராமரிக்கப்படவேண்டும் என்று அறிவுறுத்தியுள்ளார்.

அந்த அறிவுரையின் ஈரம் காய்வதற்குள்ளாகவே பி.ஜே.பி.யின் தேசிய செயலாளர் தமிழ்நாட்டின் ஒப்பாரும், மிக்காரும் இல்லாத - தந்தை பெரியார் என்று ஒட்டுமொத்த மக்களால் மதிக்கப்படும் தலைவர் தந்தை பெரியாரின் சிலை உடைக்கப்படும் என்று முகநூலில் பதிவு செய்துள்ளார்.

இந்தத் தைரியம் இவர்களுக்கு எப்படி வந்தது?

மத்தியில் பா.ஜ.க. ஆட்சி இருக்கிறது என்பதாலா?

அல்லது மாநிலத்தில்  இருக்கக் கூடிய ஆளும் கட்சி பி.ஜே.பி.யின் கோலுக்கு ஆடுகிற, தங்களுக்குச் சாதகமான அல்லது தங்களால் மிரட்டப்படும் ஆட்சியாக இருக்கிறது என்ற நினைப்பிலா?

நாட்டில் கலவரத்தை உண்டாக்கவேண்டும் என்ற வேலையில், பி.ஜே.பி. - சங் பரிவார்க் கும்பல் ஈடுபடத் திட்டமிட்டுள்ளதைத்தான் இது தெரிவிக்கிறது.

இதுபோன்ற பதிவுகளுக்கு எதிர்விளைவு வந்தால், அதன் நிலை என்னாகும் என்று நினைத்துப் பார்க்கவேண்டாமா?

‘தடி எடுத்தவன் தண்டல்காரன்' என்ற நிலை இப்பொழுது  தமிழ்நாட்டில் உருவாகிவிட்டதா? இது அரசியல் அநாகரிகம் ஆகும்.

அமைதிப் பூங்காவான தமிழ்நாட்டை அமளிக்காடாக்கிட காவிகளின் ஏற்பாடு அறிவிப்பா?

சட்டம்- ஒழுங்கைக் காப்பாற்றுவதில் தமிழ்நாடு அரசுக்கு உண்மையிலேயே அக்கறை இருக்குமானால், தொடர்ந்து வன்முறை வெறித்தனப் பேச்சுகளில் ஈடுபட்டு வரும் இந்த ஆசாமிமீது, இந்தச் சந்தர்ப்பத்திலாவது நடவடிக்கை எடுக்கவேண்டும்.

அ.தி.மு.க. அரசு நடவடிக்கை எடுக்குமா?

எங்கே பார்ப்போம்!

- கி.வீரமணி,
தலைவர்,    திராவிடர் கழகம்

சென்னை
6.3.2018  


நமது பேரன்பிற்குரிய மேனாள் உச்சநீதிமன்ற நீதிபதி மாண்பமை - ஜஸ்டீஸ் எஸ்.ரத்தினவேல் பாண்டியன் (வயது 89) அவர்கள் இன்று (28.2.2018) காலை காலமானார் என்ற செய்தி கேட்டு அதிர்ச்சியும், தாங்கொணாத துயரமும் அடைந்தோம்!

திராவிடர் இயக்கத் தொட்டிலில் வளர்ந்து, திறமை மிக்க வழக்குரை ஞராகி, அரசியல் களத்தில் சிறிது காலம் தொண்டாற்றி, பிறகு கலைஞர் ஆட்சி யில், மாநில குற்றவியல் தலைமை வழக்குரைஞராகி, பிறகு உயர்நீதிமன்ற நீதிபதி, உச்சநீதிமன்ற நீதிபதி, மத்திய அரசு பணியாளர் 5ஆவது ஊதியக் கமிஷன் தலைவர், தேசிய பிற்படுத்தப்பட்டோர் ஆணையத் தலைவர் போன்ற பல்வேறு பொறுப்புகளை ஏற்று முத்திரை பதித்தவர்.

தந்தை பெரியார், அறிஞர் அண்ணா, கலைஞர் ஆகிய முதுபெரும் தலைவர்களின் அன்புக்குப் பாத்திரமானவர். நம்மிடம் தனி அன்பு காட்டியவர். மண்டல் கமிஷன் வழக்கில் 9 நீதிபதிகள் தீர்ப்புரையில், தனித்தன்மையுடன் தனியே எழுதி, அதில் தந்தை பெரியார் பற்றி  சமூக நீதி காவலர் பிரதமர் வி.பி.சிங், நாடாளுமன்றத்தில் பேசியதை மேற்கோளாக எடுத்துக்காட்டி பதிவு செய்த சமூகநீதி சரித்திரம் படைத்த சான்றோர் ஆவார்.  பெரியார் திடலில், நீதிக்கட்சி நூற்றாண்டு விழாவில் அவரை அழைத்து நாம்சிறப்பு செய்து பாராட்டிய போது - அவர் ஆற்றிய நன்றியுரை சிறப்புமிக்கது. அவரது இழப்பு அவரது குடும்பத்தினருக்கு மட்டுமல்ல. நமது திராவிடர் சமுதாயத்திற்கே பேரிழப்பாகும். அவருக்கு நமது வீரவணக்கம்.!

அவரது பிரிவால் வாடும் அவரது மகன்கள், மகள்கள், குறிப்பாக நீதிபதி ஜஸ்டிஸ் திரு.சுப்பையா அவர்களுக்கும் நமது இரங்கல், ஆறுதல் உரித்தாகுக.


கி.வீரமணி
தலைவர், திராவிடர் கழகம்

சென்னை
28.2.2018



விற்கு தனது ஆழ்ந்த இரங்கலைத் தெரிவித்துக் கொள்கிறது.


நீட் ஒழிப்பு: மாணவர் அமைப்புகளின் செயல்பாடுகள் பாராட்டுக்குரியவை!

‘நீட்' எதிர்ப்புக் கனல் குறையாமல் செயல்படுவோம்!

தமிழர் தலைவர் ஆசிரியர்  அறிக்கை

 

சமூகநீதிப் பாதுகாப்புக்கான பேரவை (அனைத்து மாணவர் இயக்கங்களின் கூட்டமைப்பு) சார்பாக நீட்டை எதிர்த்துத் துண்டறிக்கைகள் விநியோகம், மாவட்டத் தலைநகரங்களில் ஆர்ப்பாட்டம் ஆகியவை சிறப்பாக எழுச்சியுடன் நடைபெற்றமைக்குப் பாராட்டுத் தெரிவித்துள்ள திராவிடர் கழகத் தலைவர் ஆசிரியர் கி.வீரமணி அவர்கள், அடுத்த கட்ட நடவடிக்கைகளிலும் ஈடுபடுவோம் - நீட் எதிர்ப்புக் கனல் ஆறாமல் பார்த்துக் கொள்வோம் என்று கூறியுள்ளார்.

அறிக்கை  வருமாறு:

நீட் தேர்வுக்காக திராவிடர் கழக அழைப்பின் பேரில், தமிழ்நாட்டின் முக்கிய அரசியல் கட்சிகளின் மாணவர் பிரிவுகளான - தி.மு.க. மாணவரணி, மாணவர் காங்கிரசு, ம.தி.மு.க. மாணவரணி, அனைத்திந்திய மாணவர் பெரு மன்றம் (சி.பி.அய்.), முஸ்லிம் மாணவர் பேரவை (முஸ்லிம் லீக்), முற்போக்கு மாணவர் கழகம் (வி.சி.க.), சமூகநீதி மாணவர் இயக்கம் (ம.ம.க.), கேம்பஸ் ஃப்ரண்ட் ஆஃப் இந்தியா, மாணவர் இந்தியா (ம.ஜ.க.), திராவிட இயக்கத் தமிழர் பேரவை, இந்திய சமூகநீதி இயக்கம், அகில இந்திய கிராமப்புற மாணவர் சங்கம் உள்ளிட்ட பல்வேறு  அமைப்புகளின் பிரதிநிதிகள் பங்கேற்ற கூட்டம் 10.2.2018 அன்று சென்னை பெரியார் திடலில் எழுச்சியுடன் நடைபெற்றது.

இரு திட்டங்களும் வெற்றி - பாராட்டு!

அக்கூட்டத்தில்,

1. நீட் தேர்வினைக் கண்டித்து துண்டறிக்கை விநி யோகம்

2. 22.2.2018 அன்று, மாணவர்களே முன்னின்று நாடு தழுவிய ‘நீட்' தேர்வுக்கான எதிர்ப்பு ஆர்ப்பாட்டங்கள் நடத்துவது என்ற முடிவின்படி, நேற்று (22.2.2018) திராவிடர் மாணவர் கழக மாநில செயலாளர் பிரின்சு என்னாரெசு பெரியார், தி.மு.க. மாணவரணி செயலாளர் சி.வி.எம்.பி.எழிலரசன் எம்.எல்.ஏ., தமிழ்நாடு மாணவர் காங்கிரசு பொறுப்பாளர் நவீன், ம.தி.மு.க. மாணவரணி மாநில செயலாளர் மணவை தமிழ் மாணிக்கம், அனைத் திந்திய மாணவர் பெருமன்றம் மாநில செயலாளர் சீ.தினேஷ், முஸ்லிம் மாணவர் பேரவை மாநில தலைவர் அன்சாரி, முற்போக்கு மாணவர் கழக மாநில துணை செயலாளர் செஞ்சுடர், சமூகநீதி மாணவர் இயக்க மாநில செயலாளர் நூருதீன், கேம்பஸ் ஃப்ரண்ட் ஆஃப் இந்தியா மாநில செயலாளர் முஸ்தபா, மாணவர் இந்தியா மாநில செயலாளர் அசாருதீன், தமிழ்நாடு மாணவர் முன்னணி தலைவர் இளையராஜா, திராவிட இயக்கத் தமிழர் பேரவை மாணவரணி பிரதிநிதி சிறீநாத்,  அகில இந்திய கிராமப்புற மாணவர் சங்க ஒருங்கிணைப்பாளர் அமுதரசன் மற்றும் பல்வேறு கட்சிகளின்  மாநில, மாவட்டப் பொறுப்பாளர்கள் எடுத்த முயற்சியின் காரணமாக நாடு தழுவிய ஆர்ப்பாட்டம் ஒரு தொடர் அறப்போரின் அடுத்தடுத்த கட்டங்களாக நடைபெற்றிருப்பது, பாராட்டத்தகுந்ததாகும்.

அத்துணைக் கட்சிப் பொறுப்பாளர்களின் ஒத்துழைப்பு மிகப்பெரிய வெற்றியைத் தேடிக் கொடுத்துள்ளது. இனி அடுத்த கட்டத்திற்குச் செல்லவேண்டும்; முதல்வர், துணை முதல்வர் சந்திப்புகளையும், நீதிமன்றத்தில் அடுத்தகட்ட சட்டப் போராட்டங்களையும்பற்றி சிந்தித்து செயலாற்றிட முனையவேண்டும்.

27 ஆம் தேதி மாலை சென்னைப் பெரியார் திடலில் சட்ட வல்லுநர்கள் உரை

27.2.2018 அன்று மாலை சென்னை பெரியார் திடலில் சட்ட வல்லுநர்களாகவும், சமூகநீதிக் களத்தில் தக்க மதிஉரைஞர்களாகவும் உள்ள சென்னை உயர்நீதிமன்ற (ஓய்வு பெற்ற) நீதிபதிகளான டாக்டர் ஜஸ்டீஸ் ஏ.கே.ராஜன், ஜஸ்டீஸ் அரிபரந்தாமன் ஆகியோர் எனது தலைமையில் நீட் தேர்வு விலக்கு - அடுத்த கட்டம்பற்றி விளக்க இருக்கும் சிறப்புப் பொதுக்கூட்டமும் நடைபெற உள்ளது.

நீட் நெருப்பின் கனல் குறையக் கூடாது; கனன்று கொண்டே இருக்கவேண்டும்.

இதற்கு முன்பும்

வெற்றி பெற்றுள்ளோம்!

பிற்படுத்தப்பட்டோருக்கான வருமான வரம்பு ஆணை, நுழைவுத் தேர்வு ஆகியன எப்படி தொடர் அறப்போராட்டங்களின்மூலம் விரட்டப்பட்டனவோ, அதுபோலவே, ‘நீட்' தமிழ்நாட்டு ‘அனிதாக்களை' மேலும் பலி கொள்ளாமல் தடுக்க இளைஞர்கள், மாணவர்கள், பெற்றோர்கள், ஆசிரியர்கள், வழக்குரைஞர்கள் அனை வரும் ஜல்லிக்கட்டு எழுச்சியை இந்த மல்லுக்கட்டிலும் ஒருமுகப்பட்ட எழுச்சியாக உருவாக்குவோமாக!

வாழ்த்துகள்!!

 

கி.வீரமணி
தலைவர்
திராவிடர் கழகம்.

 

 

சென்னை

23.2.2018

 

இந்தியக் கம்யூனிஸ்ட் கட்சியின் (மார்க் சிஸ்டு) மாநில செயலாளராக ஒருமனதாகத் தேர்ந்தெடுக்கப்பட்டுள்ளதோழர்

கே.பாலகிருஷ்ணன் அவர்களுக்கு வாழ்த்துகளையும், பாராட்டுகளையும் தெரிவித்துக் கொள்கிறோம்.

மதச் சார்பின்மைக்கும், சமூகநீதிக்கும் அறைகூவல்கள் தோன்றியுள்ள இந்தக் காலகட்டத்தில், இவரின் பணி சிறப்பாக இருக்கும்  என்பதில் அய்யமில்லை. வாழ்த்துகள்!

- கி.வீரமணி,

தலைவர், திராவிடர் கழகம்

Banner
Banner