ஆசிரியர் அறிக்கை

காந்தியை சுட்டுக் கொன்ற கொலை பாதகன் நாதுராம் கோட்சேவுக்கு

தமிழ்நாட்டில் வீர வணக்கம் செலுத்தும் விழாவா?

தமிழ்நாடு அரசு இதை அனுமதிக்கிறதா? சட்டம் என்ன செய்கிறது?

தமிழர் தலைவர் ஆசிரியர் அறிக்கை

 

அண்ணல் காந்தியாரைச் சுட்டுக் கொன்ற கொலை பாதகன் நாதுராம் விநாயக் கோட்சேவுக்கு தமிழ்நாட்டில் வீர வணக்கம் செலுத்தும் விழாவா? தமிழக அரசு இதை அனுமதிக்கிறதா? சட்டம் என்ன செய்கிறது? அமைதிப் பூங்காவான தமிழ்நாட்டை அமளிக் காடாக்கி மதவெறிக் காய்ச்சல் மக்களின் நல்லிணக்கத்தைப் பாழ்ப்படுத்த அனுமதிக்கலாமா? உடனே அரசு நடவடிக்கை எடுக்க வேண்டும் என திராவிடர் கழகத் தலைவர் ஆசிரியர் கி. வீரமணி அவர்கள் விடுத்துள்ள அறிக்கை வருமாறு:

 

இன்றைய (17.11.2017) 'தினஇதழ்' நாளேட்டின் முதற் பக்கத்தில் வெளியாகியுள்ள ஒரு விளம்பரம் - படிப்போர் அத்துணை பேரையும் அதிர்ச்சியில் ஆழ்த்தும் என்பது உறுதி.

இதோ அவ்விளம்பரம்:

17.11.2017 'தின இதழ்' பக்கம்: 1

தேசப் பிதா என்று அனைவராலும் மதிக்கப்படுகிற அண்ணல் காந்தியாரைச் சுட்டுக் கொன்ற (30.1.1948) மராத்தி சித்பவன் பார்ப்பனர்தான் நாதுராம் விநாயக் கோட்சே! இவர் ஆர்.எஸ்.எஸ்.  அமைப்பில் பயிற்சி பெற்று ஹிந்து மகாசபையில் இறுதியில் சேர்ந்தவர்.

இந்த கோட்சேவுக்கு பா.ஜ.க. ஆளும் மத்தியப் பிரதேச, குவாலியரில் சிலை திறப்போம் என்று மார்த் தட்டுகின்றனர். கோட்சேவுக்குக் கோயில் கட்டுவதுடன் அங்கு அவரது மார்பளவு சிலையும் வைத்து அதை கும்பிடும்படிச் செய்யப் போவதாகவும், குவாலியரில் தான் கோட்சே ஆயுதப் பயிற்சி எடுத்தார் - காந்தியைச் சுட்டுக் கொல்லும் முன்பு என்று ஜெகதீஷ் பரத்வாஜ் என்ற பார்ப்பனர் - (அகில பாரதீய ஹிந்து மகா சபையின் தலைவர்)  கூறியது நேற்று ஏடுகளில் வந்துள்ளது.

வரலாற்றையே திசை திருப்பும் முயற்சி

மற்றொரு பக்கம் ஆர்.எஸ்.எஸ். அமைப்பின் துணை அமைப்புகளில் ஒன்றான அபிநவ பாரத் என்ற அமைப்பு (மாலேகான் குண்டு வெடிப்பு வழக்கில் சம்பந்தப்பட்ட குற்றவாளிகளைக் கொண்ட அமைப்பு) 70 ஆண்டுகளுக்குப்பின் - உச்சநீதிமன்றத்தில் காந்தியைக் கொன்றது கோட்சேயின் குண்டு அல்ல என்று வரலாற்றையே திசை திருப்பும் முயற்சிக்கான புது வழக்குத் தொடுத்துள்ளது. (இதை எடுத்த எடுப்பில் தள்ளுபடி செய்யாமல் அந்நீதிமன்றம் ஆராயும் வாய்ப்பையும் கொடுத்துள்ளது).

இந்நிலையில் தமிழ்நாட்டிலேயே சில காவிகள் இப்படி ஒரு விளம்பரம் கொடுக்க எப்படித் துணிந்தார்கள்?

இங்கு நடப்பது பா.ஜ.க., ஆர்.எஸ்.எஸ். ராஜ்யமா? எந்த தைரியத்தில் இப்படி ஒரு சிந்தனை - செயல் துவக்கம்!

பழமொழி ஒன்று உண்டு.

"ஆட்டைக் கடித்து, மாட்டைக் கடித்து, தோலைக் கடித்து, துருத்தியைக் கடித்து, பின் மனிதனையே கடித்தது'" என்று!

அந்நிலையில் தமிழ்நாட்டில் அதுவும் அதிமுக என்ற திராவிடர் கட்சி என்று முத்திரை - அண்ணா பெயர் கொண்ட கட்சி, எம்.ஜி.ஆருக்கு நூற்றாண்டு விழாக் கொண்டாடிக் கொண்டே டில்லிக்கு நிபந்தனையற்ற சலாம் போட்டு 'நீட்' போன்றவற்றில் மாநில உரிமையை வலியுறுத்தாமல்  அடகு வைத்த கொடுமையான நிலையில், இப்படி ஒரு துணிச்சல் எப்படி வந்தது?

அந்நாளேடு தான் எப்படி இந்த விளம்பரத்தினை வெளியிட முன் வந்துள்ளது? வியப்பாக உள்ளது!

காவல்துறை ஏன் வேடிக்கை பார்க்கிறது?

தமிழக ஆட்சி - உள்துறை, காவல்துறை ஏன் வேடிக்கை பார்க்கிறது?

உடனே சட்டப்படி உரிய நடவடிக்கை எடுக்க தமிழக அரசு முன் வருவதோடு, தமிழகத்தின் உரிமைக்குக் குரல் கொடுப்போர்மீது பாயும் தேசத் துரோக மற்றும் குண்டர் சட்டங்கள் ஏன் ஊமைகளாய் நிற்கின்றன!

உடனே தகுந்த தடுப்பு நடவடிக்கை சட்டப்படி எடுத்து கைது செய்து வழக்குத் தாக்கல் செய்ய முன் வர வேண்டியது அவசியம்!

அமைதிப் பூங்காவான தமிழ்நாட்டை அமளிக் காடாக்கி மதவெறிக் காய்ச்சல் மக்களின் நல்லிணக்கத்தைப் பாழ்ப்படுத்த அனுமதிக்கலாமா?

எனவே உதவாது இனி தாமதம்; உடனே நடவடிக்கை வேண்டும்!

 

கி.வீரமணி
தலைவர்,     திராவிடர் கழகம்

சென்னை   
17-11-2017

==================

காந்தியைக் கொலை செய்த கோட்சேவிற்கு சிலையாம் - இந்து மகாசபைமீது வழக்குப் பதிவு

"மத்தியப் பிரதேச மாநிலம் குவாலியரில், அகில பாரத இந்து மகாசபையினர் காந்தியை சுட்டுக்கொன்ற கோட்சேவுக்கு மார்பளவு சிலையை அவர்களது அலுவலகத்தில் புதன் கிழமை திறந்து வைத்து கோட்சேவுக்கு கோவில் கட்ட சபதம் எடுத்துள்ளனர். இது பொதுமக்களிடையே அதிர்ச்சியை ஏற்படுத்தி உள்ளது.

காந்தியை சுட்டுக்கொன்ற, நாதுராம் கோட்சே ஒரு தேசபக்தர் என்றும், அவருக்கு கோவில் கட்டப்படும் என்றும் ஏற்கெனவே ஆர்எஸ்எஸ் தலைவர்கள் கூறி வந்துள்ள நிலையில், தற்போது,  குவாலியரில் உள்ள அகில பாரத இந்து மகாசபா அலுவலகத்தில் கோட்சேவுக்கு மார்பளவு சிலை திறக்கப்பட்டுள்ளது.

கோவில் கட்ட மாவட்ட நிர்வாகம் அனுமதி மறுத்துள்ள நிலையில், அதையும் மீறி அகில பாரத இந்து மகா சபா அவரது மார்பளவு சிலையை அவர்களது அலுவலகத்துள்ளேயே திறந்துள்ளது. இதுகுறித்து கூறிய அகில பாரத இந்து மகா சபா நிர்வாகிகள்,  எங்கள் அலுவலக வளாகத்துக்குள்ளேயே கோட்சேவுக்கு கோவில் கட்ட எவரும் தடை விதிக்க முடியாது என்று கூறினர். காந்தியை சுட்டுக் கொன்ற கோட்சேவின் நினைவு நாள் தியாகிகள் தினமாகக் கடைப்பிடிக்கப்படும் என்று இந்து மகாசபா அறிவித்துள்ள நிலையில், நாதுராம் கோட்சே தூக்கிலிடப்பட்ட நவம்பர் 15ஆம் தேதியன்று கோட்சே சிலைக்கு மாலை அணிவித்து மரியாதை செலுத்தினர்.

இதற்கு காங்கிரஸ் கடும் கண்டனம் தெரிவித்து உள்ளது. கோட்சேவுக்கு கோவில்  கட்டுபவர்கள்மீது தேசத் துரோக வழக்கு பதிவு செய்ய வேண்டும் என்றும் வலியுறுத்தியுள்ளது.

இது குறித்து இந்துமகாசபையின் தலைவர்களுள் ஒருவரான ஜெயதீஷ் பட்வால் என்பவர் கூறும் போது கோட்சே குவாலியரில் தான் தேசத்தின் நலனுக்காக நீதிதவறாமல் நடந்துகொள்வேன் என்று சபதமிட்டார். இங்கு தான் அவர் ஆயுதப்பயிற்சிபெற்றார்.  ஆகவே குவாலியர் நாதுராம் கோட்சேவிற்கான மிகவும் முக்கியமான ஊராகும். ஆகவே இங்கு கோட்சேவிற்கு கோவில் எழுப்புவதில் எந்த தவறுமில்லை என்று கூறினார்.

நாடு முழுவதும் கடுமையான எதிர்ப்பலையை ஏற்படுத்தி யுள்ள கோட்சே கோவில் விவகாரத்தில் இதுவரை சிவ்ராஜ் சிங் சவுகான் தலைமையிலான மத்தியப் பிரதேச அரசும், மத்திய அரசும் எந்த ஒரு கருத்தையும் தெரிவிக்கவில்லை.

இதனிடையே இந்து மகாசபைமீது வழக்கு பதிவு செய்யப்பட்டுள்ளது. காந்தி கொலை நடந்து முடிந்து சுமார் 70 ஆண்டுகளுக்குப் பிறகு மும்பையைச் சார்ந்த 'அபினவ் பாரத்' என்ற அமைப்பைச் சார்ந்த டாக்டர் பங்கஜ் பத்னிஸ் என்பவர் உச்சநீதிமன்றத்தில் வழக்கு தொடர்ந்திருக்கிறார். அதில் காந்தியை மூன்று முறை மட்டுமே கோட்சே சுட்டார். ஆனால் காந்தி உடலில் 4ஆவது குண்டு பாய்ந்திருக்கிறது. அது எப்படி வந்தது? அந்த நான்காவது குண்டுதான் காந்தியின் உயிரை எடுத்திருக்கிறது. இது குறித்து விசாரிக்க 1966ஆம் ஆண்டு நியமிக்கப்பட்ட நீதிபதி கபூர் ஆணையம் இது குறித்து விசாரிக்கவில்லை. கோட்சே பயன்படுத்திய இத்தாலி பெரட்டகம் சிறிய துப்பாக்கியை அவருக்கு தந்தவர் கங்காதர் தாண்டவே என்பவர். இந்த தாண்டவே, ஜெகதீஸ் கோயல் என்பவரிடமிருந்து இந்த துப்பாக்கியை பெற்றிருக்கிறார். இதற்கு மேல் 4ஆவது துப்பாக்கி குண்டு எங்கிருந்து வந்தது? இதை விசாரிக்க வேண்டும் என்கிறார் மனுதாரர்.

காந்தி கொலையாளிகளில் ஒருவர்

இந்திய விமானப்படையைச் சேர்ந்தவரா?

குட்டையைக் குழப்பும் இந்துத்துவ அமைப்புகள்

இங்கிலாந்தைச் சேர்ந்த எழுத்தாளர்  மேட் தியோடன் என்பவர் காந்தி கொலையின் கருப்புப் பக்கம் என்ற பெயரில் ஆங்கில நூல் ஒன்றை எழுதியுள்ளார். அதில் கோட்சேவுடன் தூக்கிலிடப்பட்ட நாராயண் ஆப்தே ராயல் இந்தியன் விமானப்படையில் பணிபுரிந்தார் என்று குறிப்பிட்டுள்ளார். இது குறித்து முன்னாள் பாதுகாப்புத்துறை அமைச்சர் மனோகர் பாரிக்கரிடம் கேட்ட போது நாராயண் ஆப்தே விமானப்படையில் இருந்தார் என்ற குறிப்புகள் எங்களிடம் இல்லை என்று கூறிவிட்டார்.

இந்துத்துவ அமைப்புகள் கொலையை கோட்சே செய்யவில்லை; ஏற்கெனவே விமானப்படையில் பணிபுரிந்த நாராயண் ஆப்தே தான் காந்தியைக் கொன்றார் என்று போலியாக மக்களிடம் காண்பிப்பதற்கு இப்படி ஒரு பொய்யான தகவலை பரப்பி வருகின்றனர்.

எழுத்தாளர் மேட் தியோடன் காந்தி குறித்து நூல் எழுத இந்தியா வந்த போது அவருக்கு காந்தி கொலைகுறித்த தகவல்களை இந்துமகாசபையினர்தான் அதிகம் கூறினார்கள் என்பதும் இங்கே குறிப்பிடத்தக்கது."

தமிழ்நாட்டில் நடப்பது ஆளுநர் ஆட்சியா?

மக்களால் தேர்ந்தெடுக்கப்பட்ட ஆட்சி இருக்கும்போது நிர்வாக நடவடிக்கைகளில் ஆளுநர் நேரிடையாகத் தலையிடுவதா?

தமிழர் தலைவர் ஆசிரியர் கண்டன அறிக்கை

நிரபராதி பேரறிவாளனை உடனே விடுதலை செய்க!

தமிழ்நாட்டில் நடப்பது ஆளுநர் ஆட்சியா? மக்களால் தேர்ந்தெடுக்கப்பட்ட ஆட்சி இருக்கும்போது நிர்வாக நடவடிக்கைகளில் ஆளுநர் நேரிடையாகத் தலையிடுவதா? இது முற்றிலும் ஜனநாயக விரோத, அரசியல் சட்ட விதிகளை குழி தோண்டிப் புதைக்கும் நடவடிக்கை ஆகும்! இதை வன்மையாகக் கண்டிக்கிறோம்! என திராவிடர் கழகத் தலைவர் ஆசிரியர் கி. வீரமணி அவர்கள் விடுத்துள்ள அறிக்கை வருமாறு:

தமிழ்நாட்டுக்குப் புதிதாக வந்துள்ள மாநில ஆளுநர் பன்வாரிலால் புரோகித் அவர்கள் கோவை பாரதியார்  பல்கலைக் கழக பட்டமளிப்பு விழாவிற்கு பல்கலைக் கழக வேந்தர் என்ற பொறுப்பில் (ex officio) உள்ளதால் சென்றுள்ளார்.

அங்கு சென்றவர்,  திடீரென 'இன்ஸ்பெக்ஷன்' செய்யும் வகையில், மாவட்ட ஆட்சித் தலைவர் அலுவலகம் சென்று ஆய்வுகளைச் செய்துள்ளார் என்பது மிகவும் விசித்திரமான, மக்களால் தேர்ந்தெடுக்கப்பட்ட தமிழ்நாடு அ.இ.அ.தி.மு.க. அரசினைக் கேலிக் கூத்தாக்கிடும், ஜனநாயக விரோத நடவடிக்கையாகும்.

தமிழ்நாட்டில் மக்களால் தேர்ந்தெடுக்கப்பட்ட ஒரு மாநில அரசு இருக்கும்போது, ஆளுநர் இப்படி தனியே ஒரு ஆளுமையை ஏற்படுத்திக் கொள்ளுதல் எவ்வகை அரசியல் சட்ட வழிமுறைகளாகும்?

தேர்ந்தெடுக்கப்பட்ட அரசு இருக்கும்போது...

நடைமுறைப்படி ஆளுநர் ஆட்சி (Governor  rule under Article 356)

நடைபெற்றால் அவர் இப்படி ஒவ்வொரு மாவட்டத்திற்கும் சென்று 'ஆளுமை' செய்யலாம்! ஆனால் தமிழ்நாட்டில் தேர்ந்தெடுக்கப்பட்ட ஒரு மாநில அரசு இருக்கும் போதே -  அது செயல்படாத அரசு என்றோ அல்லது போதிய பெரும்பான்மையில்லாத அரசு என்றோ ஏதோ ஒரு காரணம் காட்டியோ, அல்லது காரணமே காட்டாமல்  ''Otherwise'  என்ற வார்த்தையைப் பயன்படுத்தி  முன்பு ஆர். வெங்கட்ராமன் குடியரசுத் தலைவராக இருந்தபோது - ஆளுநர் பர்னாலாவின் அறிக்கையைக்கூட பெறாமலேயே  - திமுக ஆட்சியை 'டிஸ்மிஸ்' செய்தது போன்றோ (அநியாயம் என்பது அப்புறம்) - தங்களுக்குள்ள அதிகார மத்திய அரசின் செயலை செய்து விட்டு, இப்படி தினமும் ஒவ்வொரு அலுவலகத்திற்கும் சென்று ஆய்வு நடத்தினால், முதல் அமைச்சர், அமைச்சர்கள் பதவியில் இல்லாததால் 356இன் படியோ அல்லது வேறு சில சட்ட விதிகளின் படியோ செய்கிறார் என்றாவது நியாயப்படுத்திட முயலலாம்!

எவ்வகையில் சரியானது?

எதுவுமே இல்லாமல் இப்படிப்பட்ட முயற்சிகளில் ஈடுபடுவது, இதைக் கண்டித்த எதிர்க்கட்சிகளின் விமர்சனங்களைப் புறந்தள்ளிவிட்டு, "நான் இனி எல்லா மாவட்டங்களுக்கும் சென்று ஆய்வு நடத்தியே தீருவேன்" என்று கூறுவது, எவ்வகையில் சரியானது?

ஆளுநருக்கு பா.ஜ.க.வினர் வக்காலத்து வாங்குவது, அவர் பிரதமர் மோடி அரசால் இங்கு அனுப்பி வைக்கப்பட்டவர் என்பதால் ஒரு வேளை இருக்கலாம்!

இக்கட்சி ஆளும் மாநில கட்சியாக இருந்து, மத்தியில் வேறு எதிர்க்கட்சி ஆளும் கட்சியாக இருந்து இப்படி ஒரு ஆளுநர் நடந்து கொண்டால் இவர்களால் அதை ஏற்க  முடியுமா? இதில் கட்சிக் கண்ணோட்டம் இல்லாது அரசியல் சட்டப்படி ஜனநாயக உரிமைகள் பாதுகாப்புக் கண்ணோட்டம் மட்டுமே இருக்க வேண்டும் - பொது ஒழுக்கப்படி.

உச்சநீதிமன்றமே சுட்டிக்காட்டி உள்ளதே!

புதுச்சேரியிலும், டில்லியிலும் உள்ள துணைநிலை ஆளுநர்களின் இத்தகைய தலையீடுகள் - போட்டி அரசாங்க நடவடிக்கைகளால் அம்மாநிலங்களின் வளர்ச்சி வெகுவாக தடைப்படும் நிலை உள்ளதே, உச்சநீதிமன்றமே இதைச் சுட்டிக்காட்டியும் உள்ளதே!

மாநிலத் தகுதியுள்ள தமிழ் நாட்டில் ஆளுநர் என்பவர்  பெயரில் மாநில ஆட்சித் தலைவர் என்பதே நடைமுறையில் - காட்சித் தலைவர்தான் அரசியல் சட்டப்படி! எடுத்துக்காட்டாக,

சட்டமன்றத்தில் ஆளுநர் (கவர்னர்) உரை நிகழ்த்தப்படுகிறது. அதை ஆளுநரா எழுதுகிறார்? தயாரிக்கிறார்? அது தமிழக அரசின் கொள்கை முடிவுகளையொட்டி, அமைச்சரவை தயாரித்து, ஆளுநரை விட்டுப் படிக்கச் செய்வதுதான்!

ஆளுநர்கள் "நான் படிப்பதை நானேதான் தயாரிப்பேன்" என்று அடம் பிடிக்க முடியுமா?

இந்த உதாரணம் போலும்தான் அவரது "மேற்பார்வையும்" இருக்க வேண்டும்.

திறனற்ற அரசாக இருப்பதால் இந்நிலை!

ஆளும் (அதிமுக)  கட்சியின் பிளவினைப் பயன்படுத்தி, 'ஊர் இரண்டு பட்டால் கூத்தாடிக்குக் கொண்டாட்டம்' என்ற பழமொழிபோல டில்லி அரசு இங்கே உள்ள அரசை பொம்மை அரசாக்கி - எடுத்ததெற்கெல்லாம் சலாம் போட்டு - நீட் தேர்வு மசோதாக்கள் இரண்டின் நிலை என்னவாயிற்று என்று கூட அழுத்தந் திருத்தமாகக் கேட்டு வலியுறுத்தி வெற்றி பெற இயலாத, ஒரு செயல் திறனற்ற அரசாக இருப்பதால் இந்நிலை! 'அம்மா அரசு', 'அம்மா அரசு'  என்று மூச்சுக்கு முன்னூறு தரம் பேசுவோர் - அந்த 'அம்மா' (ஜெயலலிதா) ஆட்சியில் இருந்தபோது டில்லிக்கு இப்படியா 'சலாம்' போட்டு 'குலாம்' ஆகவா நடந்து கொண்டார்?

முற்றிலும் ஜனநாயக விரோதம்

டில்லி அல்லவா அவருக்கு இங்கே வந்து 'சலாம்' போட்டது. குறைந்தபட்சம் அந்த நினைவாவது நமது முதல் அமைச்சர் உட்பட்ட அனைவருக்கும் வர வேண்டாமா?

அதற்காக, "அறிவிக்கப்படாத ஒரு ஆளுநர் ஆட்சியை நான் நடத்துவேன்" என்று ஆளுநர் மூலம் டில்லி முயற்சிப்பது முற்றிலும் ஜனநாயக விரோத, அரசியல் சட்ட விதிகளை குழி தோண்டிப் புதைக்கும் நடவடிக்கை ஆகும்! இதனை உடனே கைவிட்டு, வேலிகள் பயிரை மேயும் நிலை இருக்காமல், தங்கள் எல்லையில் நிற்பதே சிறந்தது!

இதை வன்மையாகக் கண்டிக்கிறோம்!

 

கி. வீரமணி
தலைவர்,       திராவிடர் கழகம்

சென்னை
16-11-2017

பேரறிவாளன் விசாரணையில் வாக்குமூலத்தைப் பதிவு செய்ததில்

ஒரு தலைப்பட்சமாக நடந்து கொண்டது உண்மைதான்!

விசாரணை அதிகாரி ஒப்புதல் சொன்னதன் அடிப்படையில் பேரறிவாளனின்                      மனுவை உச்சநீதிமன்றம் ஏற்றுக்கொண்டது புதிய திருப்பம்!

நிரபராதி பேரறிவாளனை உடனே விடுதலை செய்க!

தமிழர் தலைவர் ஆசிரியர் விடுத்துள்ள அறிக்கை

 

ராஜீவ்காந்தி கொலைவழக்கில் விசாரணைக் கைதியாக உள்ள பேரறி வாளனிடம் பெறப்பட்ட வாக்குமூலத்தின் முக்கிய பகுதியைப் பதிவு செய்யத் தவறிவிட்டோம் என்று சிபிஅய் விசா ரணை அதிகாரி தியாகராஜன் கூறிய தன் அடிப்படையில், பேரறிவாளன் உச்சநீதிமன்றத்தில் தாக்கல் செய்த சிறப்பு மனுவை ஏற்றுக்கொண்டு மத்திய அரசுக்கு நோட்டீஸ் அனுப்பி யுள்ளது வரவேற்கத்தக்கது. இதன் மூலம் பேரறிவாளன் நிரபராதி என்பது வெளிப்படை. அவரை உடனே விடுதலை செய்ய மாநில, மத்திய அரசுகள் முன்வரவேண்டும் என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

மேனாள் பிரதமர் ராஜீவ் காந்தி கொலை வழக்கில் தண்டனை பெற்ற கைதிகளான பேரறி வாளன் உட்பட 7 பேர், கடந்த 25ஆண்டுகளாக வெஞ்சிறையில் வாடி வருகின்றனர்.

ஆயுள் தண்டனையாகக் குறைப்பு

18.2.2014 அன்று உச்சநீதிமன்றத்தால் பேரறி வாளன், சாந்தன், முருகன் ஆகிய மூவரின் மரண தண்டனை, ஆயுள் தண்டனையாக மாற்றப்பட்டது.

இந்த வழக்கில் விசாரணை சி.பி.அய் அதி காரியாக பணியாற்றி பேரறிவாளனை விசாரித்த தியாகராஜன் அவர்கள் தெரிவித்த தகவல் முக்கியமானது.

ஒரு தலைப்பட்சமாக பேரறிவாளனிடம் விசாரணை நடத்தப்பட்டது உண்மை. பேரறி வாளனின்  வாக்குமூலத்தின் முக்கியப் பகுதி பதிவு செய்யப்படவில்லை என்று தமக்கு ஏற் பட்ட மன உறுத்தலை சிபிஅய் அதிகாரி

தியாகராஜன் செய்தியாளர்களிடம் ஒப்புக் கொண்டார்!

தன்னால் வாங்கிக்கொடுக்கப்பட்ட பேட்டரி எந்தக் காரணத்துக்காகப் பயன்படுத்தப்படப் போகிறது என்பது தனக்குத் தெரியாது என்று பேரறிவாளன் கூறியதை நாங்கள் பதிவு செய்ய வில்லை என்று செய்தியாளர்களிடம் கூறினார்.

அதுபோலவே உச்சநீதிமன்றத்தில் வழக் கினை விசாரித்த ஜஸ்டிஸ் திரு.கே.டி.தாமஸ் அவர்களே ராஜீவ்காந்தி கொலை வழக்கு விசாரணையில் பல குளறுபடிகள் நடந்தன என்பதைத் தனது ஓய்வுக்குப் பின் ஒப்புக் கொண்டாரே!

உச்சநீதிமன்றத்தில்

பேரறிவாளன் மனு

அதனைத் தொடர்ந்து பேரறிவாளன் உச்ச நீதிமன்றத்தில் தாக்கல் செய்த சிறப்பு அனுமதி மனுவில் (Special leave petition)   இந்தக் கார ணங்களைக் காட்டி, தண்டனையிலிருந்து தன்னை விடுவிக்க வேண்டும் என்று கேட்டுக் கொண்டார்.

உச்சநீதிமன்றம்  ஏற்பு

மனுவை ஏற்றுக் கொண்ட உச்சநீதிமன்றம் மத்திய அரசுக்கு 2 வாரத்தில் பதில் அளிக்கும்படி நோட்டீஸ் அனுப்பியுள்ளது. பேரறிவாளன் குற்றமற்றவர் என்பதற்கு இதைவிட ஆதா ரங்கள் தேவைப்படாது. இந்த நிலையில் பேரறிவாளன் முழு விடுதலை பெறுவதற்கு முழுத் தகுதியைப் பெற்றுவிட்டார் என்பது வெளிப்படையாகிவிட்டது.

மாநில - மத்திய  அரசுகள்

செய்ய வேண்டியது என்ன?

மறைந்த முதலமைச்சர் செல்வி ஜெயலலிதா அவர்கள் இப்பிரச்சினையில் காட்டிய ஆர் வத்தைப் புரிந்துகொண்டு, பேரறிவாளனை விடுதலை செய்வதற்கான முயற்சியில் ஈடு படுமாறு  தமிழ்நாடு அரசைக் கேட்டுக் கொள் கிறோம்.

மாநில அரசும், மத்திய அரசும் வேறு பிரச்சினைகளை இதில் இணைத்துக் குழப்பிக் கொள்ளாமல் பேரறிவாளனை விடுவிக்க ஆவன செய்யுமாறு வலியுறுத்துகிறோம்!

 

கி.வீரமணி
தலைவர்,       திராவிடர் கழகம்.

சென்னை
15.11.2017

தமிழர் தலைவர் ஆசிரியர் அறிக்கை

இலங்கைத் தீவில் தமிழர்களின் பண்பாட்டு அடையாளங்களை அழிக்கும் வேலையில் இலங்கை அரசு ஈடுபட்டு வருகிறது. குறிப்பாக மலையகத் தமிழர்களின் உரிமைகளுக்காகத் தொடர்ந்து போராடி வெற்றி பெற்ற சவுமிய தொண்டமான் பெயரில் இருந்த நிறுவனங்களின் பெயர்கள் மாற்றப்படுகின்றன. இந்தத் தமிழர் விரோத நடவடிக்கைகளைக் கண்டித்து வரும் 20ஆம் தேதி அன்று காலை 11 மணிக்கு சென்னையில் கண்டன ஆர்ப்பாட்டம் நடைபெறும் என்று திராவிடர் கழகத் தலைவர் ஆசிரியர்

கி. வீரமணி விடுத்துள்ள அறிக்கை வருமாறு:

 

இலங்கையில் தற்போது ஆளும் சிறீசேனா தலைமையிலான அரசு தமிழர்கள் - ஈழத் தமிழர்கள் - மலையகத் தமிழர்கள் உட்பட பலரும் வாக்களித்ததால்தான், அவர் ராஜபக்சேயைத் தோற்கடித்துப் பதவிக்கு வர முடிந்தது என்பது மறுக்கப்பட முடியாத உண்மை.

ஆனால் இந்த அரசு வந்தும் தமிழர்களின் நியாயமான மனித உரிமைகள் இன்னும் அவர்களுக்குக் கிடைக்கவில்லை.

அய்.நா.வின் மனித உரிமைக் குழுவின் நீர்த்துப் போகச் செய்யும் நடவடிக்கை

போர்க் காலத்தில் நிகழ்ந்த அதீதக் கொடுமைகளை விசாரிக்க அய்.நா.வின் மனித உரிமைக் குழுவின் நடவடிக்கைகள் ஏதோ ஒப்புக்கு, உலகத்தாரின் கண்களில் மண்ணைத் தூவுவது போல, அக்குழுவின் பணியையே - விசாரணையையே - நீர்த்துப் போகுமாறு செய்து விட்டது உலகறிந்த உண்மை.

தமிழர்கள் வாழும் பகுதிகளைச் சுற்றி நிற்கும் இராணுவம் இன்னமும் திரும்ப அழைக்கப் படவில்லை.

அவர்களின் நிலங்களில், காணிகளில் சிங்களக் குடியேற்றங்களை சட்ட பூர்வமாக, அரசு செய்து வருகிறது.

தமிழர்களின் பண்பாட்டு

அடையாளங்களை அழிப்பதா?

யாழ்ப்பாணத்தில் மக்களால் தேர்ந்தெடுக்கப் பட்ட ஓர் அரசு, தமிழர் (திரு. விக்னேசுவரன்) ஒருவர் தலைமையில் உள்ளதால், அது  அதிகா ரங்கள்  வழங்கப்படாத அரசாக - ஏதோ பெயர ளவுக்கு உள்ள ஓர் அரசாகவே நீடிக்கும் நிலை உள்ளது!

இதோடு தமிழர் வாழும் பகுதிகளில் உள்ள கிராமங்கள், ஊர்களில் உள்ள தமிழ்ப் பெயர்களை மாற்றி சிங்களப் பெயர்களையே சூட்டிடும் கொடுமை, இராஜபக்சே ஆட்சிக் காலத்தில் துவங்கியது  - இன்னமும் தொடருகிறது.

தமிழர், தமிழ்ப் பண்பாடு, நாகரிகம் இவற்றின் அடையாளச் சுவடுகளையே அழித்து அடுத்து வரும் தலைமுறைகளுக்குத் தமிழர்களின் பங்களிப்பு, உரிமைகள், பாரம்பரிய பண்பாட்டுத் தடங்கள் அழிக்கப்பட வேண்டுமென்றே திட்ட மிட்டு நடத்த அந்நாட்டு அரசே செய்து வருகிறது.

மேனாள் அமைச்சர்

சவுமிய தொண்டமான் பெயர் நீக்கம்

அண்மையில் நெஞ்சு கொதிக்கும் ஒரு செய்தி. அரசு நிறுவனங்களுக்குச் சூட்டப் பெற்று பல்லாண்டுகளாக இருந்த தமிழர் முன்னாள் அமைச்சர் திரு. சவுமியமூர்த்தி தொண்டமான் அவர்களின் பெயரை நீக்கி விட்டு வேறு பெயர்களை வைப்பது மேலே கூறியதற்கு ஆதாரமான அண்மைக்கால அரசின் நடவடிக்கை.

இதை இந்திய அரசு வேடிக்கைப் பார்த்து இருப்பதா?

பெரு மதிப்பிற்குரிய தொண் டமான் அவர்கள் மலையகத் தமிழர்களின் ஒப்பற்ற தலைவராக வாழ்நாள் இறுதிவரை (30.8.1913 - முதல் 30.10.1999 வரை) இருந்த தலை சிறந்த அரசியல் ஞானி - தொண்டறச் செம்மல்.

இலங்கையின் (1947) முதல் நாடாளுமன்றத்தில் திரு. தொண்டமான் அவர்களின் தலைமையில்  இந்திய வம்சாவளியைச் சார்ந்தவர்கள், ஏழு நாடாளுமன்ற உறுப்பினர்களாக தேர்ந் தெடுக்கப்பட்டனர் என்பது வரலாறு அல்லவா?

1948இல் மலையகத் தமிழர்களின் வாக்குரிமை பறிக்கப்பட்ட பின், ஏறத்தாழ 40 ஆண்டுகள் தொடர் போராட்டத்தினை நடத்தி மீண்டும் 1987இல் மலையகத் தமிழர்களுக்கு குடிஉரிமை கிடைக்க அரும்பாடுபட்ட வரலாறு படைத்தவர் திரு சவுமிய தொண்டமான் அவர்கள்.

நாடாளுமன்ற வளாகத்திலும்,

தொண்டமான் சிலை உள்ளதே!

அவரது அளப்பரிய தொண்டினைப் பாராட்டி - வருங்கால சந்ததியினரும் உணர வேண்டி தொண்டமான் அவர்களுக்கு நாடாளுமன்றத் தில் சிலை நிறுவப்பட்டுள்ளது.

அங்கே நிறுவப்பட்ட ஒரே தமிழன் சிலை அய்யா தொண்டமானின் சிலைதான்.

"தொண்டமான் தொழிற் பயிற்சி மய்யம்", "தொண்டமான் விளையாட்டு மைதானம்" "தொண்டமான் கலாச்சார மன்றம்" என்று அவரது பெயர்  சூட்டப் பெற்று, பல ஆண்டுகளாக புழக்கத்திலிருந்த அந்த வரலாற்றுச் சின்னங்களின் பெயர்களை இப்போதுள்ள இலங்கை அரசு பூல்பேங்க் தொழிற்பயிற்சி மய்யம் (Pool Bank Vocational Training Centre) டன்பார் விளையாட்டு அரங்கம் (Dunbar Playground) ராம்போடா கலாச்சார மய்யம் (Ramboda Cultural Centre)  என்று பெயர் மாற்றம் செய்துள்ளனர்!

என்னே கொடுமை! தமிழரின் தலைவருக்கு இப்படிப்பட்ட கொடுமை புரிவதா?

20ஆம் தேதி கண்டன ஆர்ப்பாட்டம்

நமது இந்திய வெளியுறவுத் துறையும், பிரதமரும் இதில் தலையிட்டு மீண்டும் அப்பெயர்கள் இடம் பெற முழு அழுத்தம் கொடுக்க வேண்டியது அவசர அவசியமாகும்.

இதனை வலியுறுத்தியும், தமிழக மீனவர்களின் வாழ்வாதாரமான மீன் பிடித்தலிலும், அடிக்கடி கைதுகள், படகுகள் பறிமுதல் என்பதற்கு ஒரு நிரந்தரத் தீர்வு காண வேண்டும் என்பதை வலியுறுத்தியும், ஓர் ஆர்ப்பாட்டத்தை 20.11.2017 அன்று காலை 11 மணியளவில் சென்னையில் திராவிடர் கழகம் நடத்துகிறது.  திராவிடர் கழகத்தினரும், ஒத்த கருத்துடையோரும், மின்னஞ்சல்களை பிரதமருக்கும், வெளியுறவுத் துறைக்கும் குவிக்குமாறு கேட்டுக் கொள்கிறோம்.

 

கி. வீரமணி
தலைவர்,    திராவிடர் கழகம்


சென்னை 
14-11-2017

முசுலிம்களை சிறுமைப்படுத்தும் இந்தப் பாடலை

பயன்படுத்த தமிழக அரசு முயற்சிக்கக் கூடாது!

தமிழர் தலைவர் விடுத்துள்ள எச்சரிக்கை அறிக்கை

'வந்தே மாதரம்' எனும் பாடலைப் பள்ளிகளில் பயன்படுத்திட சென்னை உயர்நீதிமன்ற நீதிபதி தெரிவித்துள்ள கருத்து  - மதச் சார்பின்மைக்கு விரோத மானது - முசுலிம்களைப் பன்றிகள் என்று சிறுமைப்படுத்தும் நாவலில் இடம் பெற்ற இந்தப் பாடலை தமிழக அரசு புறக்கணிக்க வேண்டும் என்று திராவிடர் கழகத் தலைவர் ஆசிரியர்

கி. வீரமணி அவர்கள் விடுத்துள்ள அறிக்கை வருமாறு:

'வந்தே மாதரம்' பாடலை கட்டாயம் பள்ளிகளில் பாட வேண்டும் என்று சென்னை உயர்நீதிமன்ற நீதிபதி ஒருவர், வழக்குக்கு அப்பிரச்சினை நேரடியான சம்பந்தம் உடையதல்லாததாக இருந்தபோதிலும் தீர்ப்பு வழங்கினார்.

வரவேற்கத்தக்க மேல் முறையீட்டுத் தீர்ப்பு

இதன்மீது மேல் முறையீடு சென்ற நிலையில், சென்னை உயர்நீதிமன்ற அமர்வு நீதிபதிகள் 'இது அரசின் கொள்கை முடிவாக தீர்மானிக்கப்பட வேண்டிய பிரச்சினை; எனவே தமிழக அரசின் முடிவுக்கே இதனை விட்டு விடுகிறோம்; அரசு முடிவு எடுக்கட்டும்' என்பதாகத் தீர்ப்பு வழங்கினர்.

இது வரவேற்கத்தக்க தீர்ப்பாகும். தமிழக அரசும் இதுபற்றி ஆழமாகப் பரிசீலித்தது, இருப்பதை அப்படியே பள்ளிகள் முறையாக இருக்க (Status quo) முடிவு எடுப்பது அண்ணா தி.மு.க. ஆட்சிக்கு உகந்ததாக, 'தேவையில்லாத வம்பை விலைக்கு' வாங்காததாகவும் அமையும்.

'வந்தே மாதரத்தின்' பின்னணி என்ன?

இத்தலைமுறையில் பலருக்கு இந்த 'வந்தே மாதரம்' பாடல் - வரலாறு தெரியாது.

வங்காளத்தில் பங்கிம் சந்திர சட்டர்ஜி என்ற பார்ப்பனப் புதின ஆசிரியர் எழுதிய  "ஆனந்தமடம்" எனும் (1882இல்) புதினத்தில் ஹிந்து - முசுலீம் பிரச்சினையை மய்யப்படுத்தி எழுதியுள்ளார். அதில்தான் இந்த 'வந்தே மாதரம்' பாடல் இடம் பெற்றதை பிறகு இந்துத்துவா பார்வையுடன், பின்னணியில் தேசியத்தார்களான அக்கால காங்கிரசினர் இதை ஒரு கோஷமாகவே பயன்படுத்தத் தொடங்கினர்.

ஹிந்து மதத்தவரை உயர்த்தியும், இஸ்லாமியர் களைக் கீழ்மைப்படுத்தும் வரிகள் (பன்றிகள் என்றெல்லாம் வர்ணனை அதில் உண்டு) அந்தப் புதினத்தில் வந்துள்ளன. அந்த நாவலை சிறுபான்மையினரான இஸ்லாமிய மக்கள் கடுமையாக எதிர்த்தனர். மதச் சார்பற்ற கொள்கையினரும் எதிர்த்தனர்.

ராஜகோபாலாச்சாரியார்

முதல் அமைச்சராக இருந்தபோது நடந்தது என்ன?

அன்றைய சென்னை ராஜ தானியில் 1938இல் பதவிக்கு வந்த சி. இராஜகோபாலச்சாரியார் (இராஜாஜி) ஆட்சியில் சென்னை சட்டசபை துவங்கும் முன்பு இப்பாடலை 'வந்தே மாதரப் பாடலை'ப் பாட ஆணை பிறப் பித்தார்.

அதை முசுலீம் உறுப்பினர்களும், ஏனைய பொதுவானவர்களும் கடுமையாக எதிர்த்தனர்.

"ஹிந்துக்களும் -  முசுலிம்களும் இதர வகுப்பினர்களும் கலந்துள்ள சட்டசபையில் முசுலிம்களை அவமதிக்கக்கூடிய 'வந்தே மாதரப் பாடலை'ப் பாடச் செய்வது அவர்களது உணர்வுகளைப் புண்படுத்துவதாகும்" என்று அந்த சட்டசபையில் எதிர்த்து கிளர்ச்சி செய்ய ஆரம்பித்தனர்.

பிறகு முதல் அமைச்சர் ஆச்சாரியார் அம்முடிவைக் கைவிட்டு, அந்த ஆணையைத் திரும்பப் பெற்றார்!

தேசப் பக்தி  முலாம் பூசுவதா?

இந்த வரலாறு தெரி யாமலேயே இதற்கு 'தேச பக்தி' முலாம் பூசி இப்போது பள்ளிகளில் பாட வேண்டும் என்றால் மதம் சார்ந்த பிள்ளைகளும் (இஸ்லாமியர் உட்பட), மதம் சாராதவர்களின் பிள்ளைகளும் படிக்கும் பள்ளிகளில், சமூக நல்லிணக்கத்தைப் பாழ்படுத்தி, மக்களைப் பிளவு படுத்தும் இப்பாடலைப் பாடுவது தேவையேயில்லை. வீண் கலவரங்களுக்கும், குழப்பத்திற்கும் தான் இது இடம் அளிக்கும்.

தமிழக முதல் அமைச்சரும், அரசும் இதில் விழிப்போடு இருக்க வேண்டும். எந்தவித நிர்ப்பந்தங்களுக்கு  - நெருக்கடிகளுக்கு ஆளாகி, தங்கள் ஆட்சியின் தலையில் நெருப்பை அள்ளிக் கொட்டிக் கொள்ளக் கூடாது என்பதையும் சுட்டிக் காட்ட கடமைப்பட்டுள்ளோம்.

 

கி. வீரமணி
தலைவர்,      திராவிடர் கழகம்


சென்னை    
13-11-2017

Banner
Banner