எழுத்துரு அளவு Larger Font Smaller Font

பவள விழா (75 ஆம் ஆண்டு) காணும் திராவிட மாணவர் கழகத்தின் திராவிட மாணவச் செல்வங்கள் எடுத்துக்கொள்ளும் - கொண்ட உறுதிமொழிகள் வருமாறு:

1. ஜாதிமறுப்புத் திருமணம், விதவை மறுமணம், மணவிலக்குப் பெற்றோரை மறுவாழ்வுத் திருமணம் செய்துகொள்வேன். வர(ன்)தட்சணை வாங்குவது சுயமரியாதை இழக்கும் கொத்தடிமை முயற்சி, என்னை நான் ஒருபோதும் விற்க மாட்டேன் என்று சூளுரைக்கிறேன்.

2. கடவுள், மதம், ஜாதி, சினிமா, மது, மருந்து என்ற பலவகைப் போதைகளும், மூடநம்பிக்கைகளும் என் வாழ்வை அண்டாத பெரு நெருப்பாகவே வாழ்வேன்.

3. சுற்றுச் சூழலைத் தூய்மையாக்குவதிலும், பொதுச்சொத்துகளுக்கு சேதம் ஏற்படாது காக்கும் பொழுது ஒழுக்கத்தை நிலைநாட்டவும் என்னையே நான் ஒரு சமூகக் காவலனாக ஆக்கிக் கொண்டு வாழ்வேன்.

4. நல்ல உடல் நலமே, நல்ல உள்ளத்திற்கான ஊற்றுக்கண். உளநலத்திற்கான ஊற்றுக்கண் என்பதை உணர்ந்து வாழ்வதுடன் ஊர் நலம், உலக நலம் ஓம்பும் மானுடத்தின் உண்மைத் தொண்டனாக என்னையே நான் அர்ப்பணித்துக் கொள்வேன்.

5. கடவுளை மற, மனிதனை நினை, என்று அறிவு ஆசான் தந்தைபெரியார் கூறிய வழிப்படியே மனிதநேய மாண்பாளனாகவே எனது வாழ்வை அமைத்து, சொல்வதைச் செய்வதும், செய்வதை மட்டுமே சொல்வதுமே சுயமரியாதை சுகவாழ்வு என்று நான் வாழ்ந்து காட்டுவேன்.

6. வேலை கேட்டு விண்ணப்பம் போட்டு அலுக்காமல், மற்றவருக்கு வேலை தரும் நிலைக்கு உயரும் வகையில் மிகுந்த தன்னம்பிக்கையுடன் கடும் உழைப்பையே எனது கடமையாகக் கருதி வாழ்வேன்.

7. எளிமை, சிக்கனம், பிற பாலரிடம் பண்புடன் பழகும் பான்மை இவைகளை என்றும் வளர்த்துக் கொள்வேன்.

இணையதளம், தொலைக்காட்சி, நுகர்வுக் கலாச்சாரம் இவைகளை உணவுக்கு உப்பு போல, தேவைக்கு மட்டுமே பயன்படுத்திக்கொள்வோம். இவற்றுக்கு ஒருபோதும் அடிமையாகோம். எங்கள் உரிய நேரத்தை இதற்கு, இந்த போதைக்கு பலியாகி நாங்கள் வீணடிக்க மாட்டோம்.

8. பண்பாட்டுப் படையெடுப்புகளினால் பாழான எமது இனத்தின் மீட்புக்கான களப் பணியாளனாக என்றும் இருப்பேன்.

9. இளமை என்பது வளமைக்காக என்று நினைக்காமல் தொண்டுக்கான, அதுவும் சமுதாயத் தொண்டுக்கான வாய்ப்பே என்று கருதி என்றும் உழைப்பேன்.

10. மற்றவர் உன்னை எப்படி நடத்த வேண்டும் என்று நீ விரும்புகிறாயோ அப்படி நீ பிறரிடம் நடந்துகொள். அதுவே ஒழுக்கம் என்ற தந்தை பெரியார்தம் உயர் ஒழுக்கநெறியான மனிதநேயப் பண்புடன் என்றும் அதை சிந்தையில் ஏற்றுச் செயலாற்றி புதிய உலகினை உருவாக்கும் தூதுவனாக  என்னை நான் என்றும் மாற்றிக்கொண்டு எமது பகுத்தறிவு, சுயமரியாதை வாழ்வுப் பயணத்தை தொடர்வோம். எமது பணி சுயலாபத்திற்கு அல்ல. பொதுநலத்திற்காக, இன நலத்திற்காக, சமூக நலத்திற்காக, நாட்டு நலத்திற்காக.

இதன்படி மாணவ மணிகள் நல்லொழுக்க நாயகர்களாக, விஞ்ஞான மனப்போக்குடைய வித்தகர்களாக, மனிதநேயச் சின்னங்களாகத் திகழ,

ஒவ்வொரு உயர்நிலைப்பள்ளி

ஒவ்வொரு மேல்நிலைப்பள்ளி

ஒவ்வொரு கல்லூரி

ஒவ்வொரு பல்கலைக் கழகங்களிலும்

மேற்கண்ட கட்டுப்பாட்டுக்கு ஒத்திசைவு தரும் மாணவர்களைக் கொண்டு, உடனடியாக தனித்தனியே திராவிட மாணவர் கழகங்களை அமைத்து, விடுதலை'க்குச் செய்தி அனுப்புங்கள். (ஒரு யூனிட்'- one unit).

குறைந்த பட்சம் - அமைப்பாளர்கள் 5-க்கு மேற்பட்டவர்கள் - அமைப்பு ரீதியாக

தலைவர், செயலாளர், அமைப்பாளர் என்ற பொறுப்புகளில் அமர்த்தி உடனே பதிவு செய்யுங்கள்.

ஏற்கெனவே மாநில அமைப்பில் உள்ள திராவிட மாணவர் கழகப் பொறுப்பாளர்களே, பம்பரம் எனச் சுழன்று அமைப்புகளை உருவாக்கி, மாணவர் உலகத்தில் புத்தாக்கச் சிந்தனைகளை உருவாக்குங்கள்!

அந்தந்த கல்வி நிறுவனத்தின் கிளையாகவே அவை அங்கீகரிக்கப்படும். இது அரசியல் அமைப்பு அல்ல!

 

கி.வீரமணி,

தலைவர் திராவிடர் கழகம்,

சென்னை

10.7.2018