வியாழன், 17 மே 2012 09:30

0 Comments

சென்னை, மே 17-தமிழ்நாட்டில் உள்ள மொத்த அய்.ஏ.எஸ். அதிகாரிகள் 355 பேர்களில் தமிழகத்தை சேர்ந்தவர்கள் 170 பேர்தான் உள்ளனர். இதேபோல், 259 அய்.பி.எஸ். அதிகாரிகளில் 108 பேர்தான் தமிழ்நாட்டை சேர்ந்தவர்கள் உள்ளனர் என்ற தகவல்கள் வெளியாகியுள்ளன.

அரசின் நிருவாக சக்கரத்தை சுழற்றுவதில் பெரும் பங்கு அய்.ஏ.எஸ். அதிகாரிகளுக்கு உள்ளது. ஆண்டுதோறும் சிவில் சர்வீசஸ் தேர்வை மத்திய தேர்வாணையம் நடத்துகிறது. இதில் உயர் மதிப்பெண் பெறுபவர்கள் அய்.ஏ.எஸ். அதிகாரிகளாகவும், அடுத்த மதிப்பெண் பெறுபவர்கள் அய்.பி.எஸ். அதிகாரிகளாகவும் நியமனம் செய்யப்படுகின்றனர்.

மொத்தமாக தேர்வு செய்யப்படுபவர்களில் 3-ல் ஒரு பகுதி அய்.ஏ.எஸ். அதிகாரிகள் சொந்த மாநிலத்தை சேர்ந்தவர்கள் இடம் பெறுகின்றனர். 3-இல் 2 பகுதியினர் அந்தந்த மண்டலம், அதாவது அண்டை மாநிலங்களில் விருப்ப தேர்வு அடிப்படையில் பணி ஒதுக்கீடு செய்யப்படுகின்றனர்.

சமீபத்தில் அகில இந்திய பணிகளுக்கான தேர்வு பெற்றோர் பட்டியலை மத்திய தேர்வாணையம் வெளியிட்டது. இதில், அய்.ஏ.எஸ்., அய்.பி.எஸ். போன்ற பணிகள் அடங்கும். 715 ஆண்களும், 195 பெண்களும் சேர்த்து மொத்தம் 910 பேர் தேர்வு பெற்றனர். தமிழ்நாட்டில் இருந்து 68 பேர்கள் மட்டுமே தேர்வில் வெற்றி பெற்றிருப்பது பெரிய மனக்குறையாக உள்ளது.

இந்த ஆண்டு 8 அய்.ஏ.எஸ். அதிகாரிகள் தமிழ்நாட்டு பணிக்கு ஒதுக்கப்பட்டு, பயிற்சிக்காக சேர உள்ளனர். அதில், கோவை மாவட்ட உதவி ஆட்சியர் பயிற்சிக்கு சேர உள்ள எஸ்.திவ்யதர்ஷினி, மதுரை மாவட்ட உதவி ஆட்சியர் பயிற்சிக்கு சேர உள்ள எம்.அரவிந்த், ஈரோடு மாவட்ட உதவி ஆட்சியர் பயிற்சிக்கு சேர உள்ள கே.விஜய கார்த்திகேயன் ஆகியோர் மட்டுமே தமிழ்நாட்டை சேர்ந்தவர்கள்.

நெல்லை மாவட்டத்தில் பயிற்சிக்கு சேர உள்ள சந்திரசேகர் சக்முரி, கடலூர் மாவட்டத்தில் பயிற்சிக்கு சேர உள்ள வி.ஜெயசந்திர பானு ரெட்டி, திருச்சி மாவட்டத்தில் பயிற்சிக்கு சேர உள்ள மந்திரி கோவிந்தராவ், வேலூர் மாவட்டத்தில் பயிற்சிக்கு சேர உள்ள பி.மதுசூதன் ரெட்டி ஆகியோர் ஆந்திர மாநிலத்தை சேர்ந்தவர்கள்.

திருவள்ளூர் மாவட்டத்தில் பயிற்சிக்கு சேர உள்ள எஸ்.அனீஷ்சேகர் கேரளாவை சேர்ந்தவர். ஆக, தமிழ்நாட்டில் இருந்து 3 பேர்தான் தமிழக அய்.ஏ.எஸ். பணிக்கு வருகிறார்கள். ஆனால், ஆந்திராவில் இருந்து 4 பேர் வருகின்றனர்.

இப்போதுள்ள சூழ்நிலையில் தமிழகத்தில் பணிபுரியும் 355 அய்.ஏ.எஸ். அதிகாரிகளில் 170 பேர் மட்டுமே தமிழ்நாட்டை சேர்ந்தவர்கள். அதிலும் நேரடியாக அய்.ஏ.எஸ். தேர்வு பெற்றவர்கள் 71 பேர்தான். மீதமுள்ள 99 பேர் தமிழக அரசு பணியில் இருந்து அகில இந்திய ஆட்சிப் பணிக்கு (அய்.ஏ.எஸ்.) உயர்வு பெற்றவர்கள்.

இதேபோல், தமிழகத்தில் மொத்தம் உள்ள 259 அய்.பி.எஸ். அதிகாரிகளில் நேரடியாக பணிக்கு வந்தவர்கள் 179 பேர். இதில், தமிழ்நாட்டை சேர்ந்தவர்கள் 108 பேர். அதிலும், மாநில காவல்துறை பணியில் சேர்ந்து அய்.பி.எஸ். அதிகாரிகளாக பதவி உயர்வு பெற்றவர்கள் 80 பேர். அப்படிஎன்றால் தமிழ்நாட்டில் இருந்து நேரடியாக அய்.பி.எஸ். அதிகாரியாக வந்தவர்கள் 28 பேர்தான்.

ஆக, இனி அதிக அளவில் தமிழகத்தை சேர்ந்தவர்கள் அய்ஏ.எஸ்., அய்.பி.எஸ். தேர்வில் வெற்றி பெறுவதற்கு பல்கலைக்கழகங்கள் அதிக முயற்சி எடுக்க வேண்டும். மத்திய அரசும் 3 இல் ஒரு பங்கு அய்.ஏ.எஸ். அதிகாரிகளை சொந்த மாநிலத்திற்கும், 2 பங்கு அதிகாரிகள் அண்டை மாநிலங்களுக்கும் நியமிப்பதை மாற்றி, 50 சதவிகிதம் பேர்களை சொந்த மாநிலங்களில் நியமிக்க வேண்டும். மீதமுள்ள 50 சதவிகிதம் பேர்களை அண்டை மாநிலங்களில் நியமிக்க வேண்டும் என்ற முடிவை எடுக்க வேண்டும்.

பல ஆண்டுகளுக்கு முன்பு இந்த விகிதாச்சார அடிப்படையில்தான் அய்.ஏ.எஸ். அதிகாரிகள் நியமனங்கள் இருந்தன. பிறகுதான் நிலைமை மாறியது. ஆக, மாநில அரசுகளும், நாடாளுமன்ற உறுப்பினர்களும் இந்த கோரிக்கையை வலியுறுத்தி குரல் கொடுக்க வேண்டும் என்பதே பொதுமக்களின் கோரிக்கையாக உள்ளது.

வெள்ளி, 18 மே 2012 14:47

0 Comments

சேலம், மே 18-சேலம் மாவட்டத்தில் மட்டும் தொட்டில் குழந்தைத் திட்டம் மூலம் கடந்த 20 ஆண்டுகளில் இதுவரை 1007 குழந்தைகள் மீட்கப்பட்டுள்ளதாக சமூகநல அலுவலர் தெரிவித்தார்.

சேலம் மாவட்ட சமூகநலத் துறை சார்பில் நலத் திட்டங்கள் மற்றும் பெண்களுக்கான சட்டங்கள் குறித்து செயலாக்க அலுவலர்களுக்கான ஆலோசனைக் கூட்டம் நேற்று நடந்தது. இதில் மாவட்ட ஆட்சியர் மகரபூஷணம் தலைமை வகித்து பேசியது:

தற்பொழுது பிறப்பிலேயே பெண் குழந்தைகள் கொல்லப்படுவது தடுக்கப்பட்டு வருகிறது. பெண்களுக்கு எதிராக நடக்கும் வன்முறை மற்றும் குடும்ப வன்முறையைத் தடுக்க சமூகநலத் துறை திட்டங்கள் மற்றும் சட்டங்களைப் பயன்படுத்தி பெண்கள் தங்களது பிரச்சினைகளைத் தாண்டி வர வேண்டும். இவ்வாறு ஆட்சியர் பேசினார்.

கூட்டத்தில் சமூகநலத் துறை அலுவலர் அன்பு பேசியதாவது:

சேலம் மாவட் டத்தில் 1992ஆம் ஆண்டு முதல் 1007 குழந்தை கள் தொட்டில் குழந்தை திட்டம் மூலம் காப்பாற்ற ப்பட்டுள்ளனர். இரண்டு பெண் குழந்தைகள் பாதுகாப்புத் திட்டம், திருமண உதவி, விதவை மகள் திருமண உதவி மற்றும் கலப்புத் திருமண உதவி உள்ளிட்ட குழந்தைகள், பெண்கள், அரவாணிகள், முதியோர் மற்றும் ஒதுக்கப்பட்ட மக்களின் மேம்பாட்டுக்காக சமூகநலத் துறை மூலம் பல்வேறு திட்டங்கள் செயல்படுத்தப்பட்டு வருகிறது என்றார்.

குழந்தைத் திருமண தடுப்பு சட்டம் குறித்து வழக்குரைஞர் கவிதா, குடும்ப வன்முறை தடுப்பு சட்டம் குறித்து வழக்குரைஞர் கவுதம் பூபாலன், மூத்த குடிமக்கள் பராமரிப்பு சட்டம் குறித்து சிவகாமி ஆகியோர் பேசினர். சமூகநலத்துறை, காவல்துறையை சேர்ந்த பெண்கள் இதில் கலந்து கொண்டனர்.