இனி வெறும் நடை பயிற்சி வேண்டாம்... வீடு திரும்பியதும் ஷூவில் இருந்து காகித வடிவ ஜெனரேட்டரை எடுத்து செல்போன் சார்ஜ் செய்யலாம், எல்இடி விளக்கை எரிய செய்யலாம். ஆம். நடப்பதில் மின்சார உற்பத்தி செய்ய முடியும் என்று அமெரிக்க விஞ்ஞானிகள் கண்டுபிடித்துள்ளனர்.
இதுபற்றி லண்டனில் வெளியாகும் டெய்லி மெயில் நாளேட்டில் வெளியான செய்தி வருமாறு: அமெரிக்காவின் லாரன்ஸ் பெர்க்லே தேசிய ஆய்வகத்தின் மின்சக்தி துறை விஞ்ஞானிகள் காகித வடிவ ஜெனரேட்டரை வடிவமைத்துள்ளனர். அதை ஷூவில் பொருத்திக் கொண்டு நடந்தால் மின்உற்பத்தி செய்யப்பட்டு சேமிக்கப்படும். ஷூவில் இருந்து ஜெனரேட்டரை எடுத்து இணைத்தால் செல்போன் சார்ஜ் செய்யலாம். எல்இடி விளக்கை எரிய விடலாம். சிறிய எல்சிடி டிஸ்பிளேவுடன் இருக்கும் இந்த ஜெனரேட்டரை விரலால் தொட்டால் அதில் சேர்க்கப்பட்டிருக்கும் தீமை செய்யாத வைரஸ்கள் தூண்டப்பட்டு காந்த சக்தியை மின்சாரமாக மாற்றும். நடக்கும் தூரத்துக்கு ஏற்ப கிடைக்கும் மின்சாரத்தின் அளவு வேறுபடும். எனினும், சராசரியாக ஒரு பென் டார்ச் செல் எனப்படும் ஏஏஏ பேட்டரியை புதிதாக வாங்கும்போது கிடைக்கும் மின்சக்தியில் நான்கில் ஒரு பங்கு மின்சாரத்தை பெற முடியும் என விஞ்ஞானிகள் தெரிவித்தனர்.
