நலம் காக்கும் கம்பளிப்பூச்சி

வெளிநாடுகளில் மருத்துவ அறுவை சிகிச்சையில் ரோபோ பயன்பாடு இன்று பெரிய அளவில் வந்துவிட்டது. அந்தவகையில் மருத்துவ வசதிக்காக உருவாக்கப்பட்ட சிறிய வகை கேட்டர்பில்லர் ரோபோ (கம்பளிப்பூச்சி ரோபோ) இந்த ஆண்டு கவனம் ஈர்த்தது. ஹாங்காங் சிட்டி பல்கலைக்கழக ஆய்வாளர்களின் கைவண்ணம் இது. மனித உடலில் மருந்துகளைச் சரியான இடத்துக்குக் கொண்டுசெல்வதற்காக இந்த ரோபோவை உருவாக்கினர். கம்பளிப்பூச்சிக்கு இருப்பதுபோலச் சிறிய கால்கள் இந்த ரோபோவுக்கு இருப்பதால், அந்தப் பெயரில் இது அழைக்கப்படுகிறது. சிறிய கால்களைப் பயன்படுத்தி உடலில் ஒரு இடத்திலிருந்து இன்னொரு இடத்துக்கு ஊர்ந்து சென்று மருந்துகளைச் சரியான இடத்தில் இந்த ரோபோ சேர்த்துவிடுகிறது.

குருத்தெலும்பில் புதுக் காது

சீனத் தலைநகர் பெய்ஜிங்கில், ஓசை இல்லாமல் புதிய சாதனை ஒன்றை மருத்துவ விஞ்ஞானிகள் படைத்திருக் கிறார்கள். உலகிலேயே முதன்முறையாகக் குருத்தெலும்பு செல்களைக் கொண்டு புதிய காதுகளை உருவாக்கிக் காட்டினார்கள். சில வளரும் குழந்தைகளுக்குக் காதின் வெளிப்பகுதி வளர்ச்சியடையாமல் போய்விடலாம். மைகுரோசியா என்றழைக்கப் படும் இந்தக் குறைபாடு உள்ளவர்களால், மற்றவர்கள் பேசுவதைத் தெளிவாகக் கேட்க முடியாது. இந்தப் பிரச்சினைக்குத் தீர்வு காணும்வகையில், நோயாளியின் குருத்தெலும்பு செல்களைக் கொண்டு புதிய காதுகளை உருவாக்கும் முயற்சியில் விஞ்ஞானிகள் ஈடுபட்டனர். அந்த முயற்சி இந்த ஆண்டு வெற்றிபெற்றதாக அறிவிக்கப்பட்டது.

இதயநோய் ஏற்பட காரணம்

இதயநோய் ஏற்படுவதற்கான காரணங்களைக் கண்டறிவதில் சுமார் எழுபது ஆண்டுகளுக்கும் மேலாக அமெரிக்கா கண்டுபிடித்த அளவீட்டு முறைகளையே இன்றுவரை உலகெங்கும் பயன்படுத்திவருகிறார்கள். இந்த அளவீடுகளின் மூலம் 30 சதவீத இதய நோய் களையே கண்டறிய முடிந்தது. அந்தக் குறையை இந்திய மருத்துவர்கள் போக்கியிருக்கிறார்கள். அப்போலோ குழுமத்தைச் சேர்ந்த மருத்துவ வல்லுநர்கள் இதயநோய் இருப்பதை உறுதிப்படுத்துவதற்கான கூடுதல் அளவீடு களைக் கண்டறிந்துள்ளனர். சுமார் ஏழு ஆண்டுகளாகச் செய்துவந்த ஆய்வின் அடிப்படையில் இது சாத்தியமானது. இந்த அளவீடுகள்மூலம் 67 சதவீத இதய நோய்களைக் கண்டறிந்து விட முடியும்.

புதிய வைரஸ் தாக்குதல்

கேரளத்தில் நிபா என்ற வைரஸ் பரவியதால் மாநிலம் முழுவதும் பீதி நிலவியது. இந்த வைரஸ் தாக்கியதில் கோழிக்கோடு, மலபார் மாவட்டங்களில் உயிரிழப்புகள் ஏற்பட்டன. பழந்தின்னி வவ்வால்களால் நிபா வைரஸ் பரவியதாக இந்திய மருத்துவ ஆராய்ச்சிக் குழு தெரிவித்தது. இந்தத் தொற்றைக் குணப்படுத்தும் மருந்துகள் கண்டுபிடிக்கப்படவில்லை. 1998ஆம் ஆண்டில் மலேசி யாவில் கண்டுபிடிக்கப் பட்ட இந்த வைரஸ், 2001ஆம் ஆண்டில் வட இந்தியாவிலும் கண்டுபிடிக்கப் பட்டது.

புது ஆண்டிபயாடிக்

தற்போது பயன்பாட்டில் இருந்துவரும் பெரும்பாலான ஆண்டிபயாடிக் மருந்துகள் கண்டுபிடிக்கப்பட்டு 30 ஆண்டுகளுக்கும் மேல் ஆகிவிட்டன. நீண்ட கால மாகவே புதிய ஆண்டிபயாடிக் மருந்தைக் கண்டுபிடிக்க வேண்டும் என்று அமெரிக்காவின் போஸ்டனில் இருக்கும் நார்த் ஈஸ்டர்ன் பல்கலைக்கழக ஆய்வாளர்கள் முயன்று வந்தார்கள். அந்த முயற்சி இந்த ஆண்டு திருவினையானது. குறிப்பாக, எந்த ஆண்டிபயாடிக் மருந்துக்கும் கட்டுப்படாத நோயாக எலும்புருக்கி நோய் உருவெடுத்துள்ளது. இந்தச் சூழ்நிலையில் புதிய ஆண்டிபயாடிக் கண்டுபிடிப்பு, மருத்துவ உலகின் மைல்கல் என வர்ணிக்கப்படுகிறது. இதன்மூலம் அதிகமான புதிய வகை ஆண்டிபயாடிக் மருந்துகளைக் கண்டுபிடிக்கத் தற்போது வாய்ப்பு ஏற்பட்டுள்ளது.

பாதுகாக்கும் கவசம்

சிகிச்சையின்போதும் பரிசோதனையின்போதும் கதிர்வீச்சுத் தாக்குதலுக்கு மருத்துவர்களும் ஆய்வகப் பணியாளர்களும் உள்ளாவது தவிர்க்க முடியாதது.

தான் கண்டுபிடித்த புது மேல் அங்கி (ஏப்ரன்) மூலம் அந்தக் கதிர்வீச்சுத் தாக்குதலுக்கு முடிவுரை எழுதி யிருக்கிறார், மதுரையைச் சேர்ந்த அரசு மருத்துவர் செந்தில்குமார். ராஜாஜி அரசு மருத்துவமனை கதிரியக்க இயற்பியல் துறை உதவிப் பேராசிரியரான இவர். பிஸ்மத், ஆன்டிமனி, பேரியம் சல்பேட் (4) ஆகியவற்றைப் பயன்படுத்தி இந்த ஏப்ரனை உருவாக்கியுள்ளார். அது மனிதனுக்கு மட்டுமல்லாமல், சுற்றுச்சூழலுக்கும் நன்மை யளிப்பதாக உள்ளது.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

பிரிட்டனின் மிகவும் பரபரப்பான விமான நிலையம் ஒன்றின் மீது ‘வேண்டுமென்றே’ ட்ரோன்கள் எனப்படும் ஆளில்லா விமானங்கள் பறக்கவிடப்பட்ட சம்பவம் விமான பயணங்களை பாதித்ததோடு, உலகம் முழுவதும் இதுகுறித்த அச்சத்தை எழுப்பியுள்ளது.

லண்டனில் உள்ள பரபரப்பான காட்விக் விமான நிலையத்தின் விமான ஓடுபாதை அருகே அடிக்கடி பறந்த ட்ரோனால் அதிர்ச்சி யடைந்த விமான நிலைய அதிகாரிகள், அந்த விமான நிலையத்தில் தரையிறங்க இருந்த விமானங்களை மற்ற இடங்களுக்கு திருப்பி விட்டதுடன், விமானங்களின் புறப்பாட்டை ரத்து செய்தனர்.

காட்விக் விமான நிலையத்தில் சூழ்நிலை அபாயகட்டத்தை அடைந்ததை தொடர்ந்து உள்ளூர் காவல்துறையினருடன் இணைந்து செயல்படுவதற்காக பிரிட்டன் ராணுவம் வரவழைக்கப்பட்டதைத் தொடர்ந்து நிலைமை கட்டுப்பாட்டுக்குள் வந்துள்ளது. எனவே, சுமார் 24 மணிநேரத்திற்கு மேலாக நீடித்த பதற்றத்திற்கு பிறகு காட்விக் விமான நிலையம் சில நாட்களுக்கு முன்பு மீண்டும் திறக்கப் பட்டுள்ளது.

கடந்த சில காலமாகவே உலகமெங்கும் உள்ள அரசாங்கங்கள், பாதுகாப்பு அச்சுறுத்தலை விளைவிக்க கூடிய இடங்களில் ட்ரோன்கள் நுழைந்தால் அதை சமாளிப்பதற்காக பல்வேறு வழிகளை ஆராய்ந்து வருகின்றன.

சமீபகால தொழில்நுட்ப வளர்ச்சியின் வடிவமாக பார்க்கப்படும் ட்ரோன்களை எதிர்கொள்வதற்கு புதுமையான வழியொன்றை கண்டறிந்துள்ளது நெதர்லாந்து.

சந்தேகத்திற்கிடமாக பறக்கும் ட்ரோன்களை நோக்கி பறந்து சென்று அவற்றை தனது நகங்களால் திசைதிருப்பி, செயலிழக்கச் செய்யும் வகையில் அந்நாட்டு காவல்துறையினர் கழுகுகளுக்கு பயிற்சி அளித்துள்ளனர்.

இவ்வாறு பயிற்றுவிக்கப்பட்ட கழுகுகள் ட்ரோன்களை இரையாக கருதுவதாகவும், ஆனால் வேறெந்த பொருட்களையும் இவை தாக்குவதில்லை என்றும் தெரிவிக்கின்றனர்.

ரேடார், ‘ஜாமிங்’ அமைப்புமுறைகள்

அனுமதியின்றி, தவறான நோக்கத்தில் இயக்கப்படும் ட்ரோன்களின் செயல்பாட்டை கேமராக்கள், ரேடார், ரேடியோ அலைகள் போன்றவற்றை கொண்டு அதன் இருப்பை கண்டுபிடிக்கவோ, இடத்தை கண்டறியவோ பயன்படுத்த முடியும்.

மேற்காணும் தொழில்நுட்பங்களை தற்போதுள்ள விமான நிலைய பாதுகாப்பு அமைப்பு முறையில் இணைத்து, பல கிலோ மீட்டர் தூரத்தில் இருக்கும் ட்ரோன்களைகூட கண்டறிய முடியும்.

அதுமட்டுமின்றி, இந்த அமைப்புமுறையை கொண்டு அந்த குறிப்பிட்ட ட்ரோனுக்கும், இயக்குபவருக்குமிடையேயான தகவல் தொடர்பை துண்டிக்க செய்து, மீண்டும் அது எங்கிருந்தோ கிளம் பியதோ அங்கேயே திரும்ப அனுப்ப முடியும்.

ஒரு குறிப்பிட்ட இடத்தை நோக்கி வரும் ட்ரோனை சுமார் அரை மைல் தூரத்திற்கு முன்பாகவே செயலிழக்க செய்யும் இதுபோன்றதொரு தொழில்நுட்பத்தை சீனா ஏற்கெனவே உருவாக்கியுள்ளது என்பது குறிப்பிடத்தக்கது.

மிகவும் வெளிப்படையான ஒரு வழி என்னவென்றால், அச் சுறுத்தலை உண்டாக்கும் ட்ரோனை சுட்டு வீழ்த்துவதேயாகும்.

எனினும், இலக்கை தவறவிடும் தோட்டாக்கள் ஏற்படுத்தும் ஆபத்தின் காரணமாக இந்த முறையை தாங்கள் பயன்படுத்தவில்லை என்று காட்விக் விமான நிலைய அதிகாரிகள் தெரிவிக்கின்றனர்.

இருந்தபோதிலும், சந்தேகத்திற்கிடமாக காணப்படும் ட்ரோன்களை கை அல்லது தோள்பட்டை மீது வைத்து பயன்படுத்தும் துப்பாக்கிகளை கொண்டு சுடும்போது அதிலிருந்து வெளிவரும் வலைகள் மூலம் ட்ரோனை பிடிக்கும் மாற்று வழிமுறைகளை சில நிறுவனங்கள் உண்டாக்கியுள்ளன.

பிரிட்டனை சேர்ந்த பொறியியல் நிறுவனமான ஓபன்ஒர்க்ஸ் உருவாக்கியுள்ள ஏவுகணைத் துப்பாக்கியான ‘ஸ்கைவால்100’, இலக்கை நோக்கி சுட்டவுடன் வலையை வெளியேற்றுகிறது.

இந்த வகை துப்பாக்கி, ஆசியா, அய்ரோப்பா மட்டுமின்றி வட அமெரிக்க நாடுகளின் அரசாங்க மற்றும் பாதுகாப்பு அமைப்புகளால் பயன்படுத்தப்படுகிறது.

அனுமதிக்கப்படாத இடத்தை நோக்கி வரும் ட்ரோனை இடை மறித்து, வலையை செலுத்தி அதன் இயக்கத்தை நிறுத்தும் ட்ரோன் களும் பயன்பாட்டில் உள்ளன.

ஒரு குறிப்பிட்ட கருவியின் இருப்பிடத்தை கண்டறிந்த ஒரு சில நொடிகளில் சுட்டு வீழ்த்தும் ஒளிக்கதிர்களை அடிப்படையாக கொண்ட தொழில்நுட்பத்தை அமெரிக்கா, சீனா ஆகிய இரண்டு நாடுகளும் பரிசோதித்துள்ளன.

பிரபல விமான தயாரிப்பு நிறுவனமான போயிங், சக்திவாய்ந்த இன்ஃபராரெட் கேமராக்களை கொண்டு சில கிலோமீட்டர்கள் தொலைவில் இருக்கும் ட்ரோன்களை செயலிழக்கச் செய்யும் தொழில்நுட்பத்தை உருவாக்கியுள்ளது.

 

 

 

 

 

 

 

 

 

 

 

 

 

 

 

சனிக்கோள் தனது அழகிய வளையங்களை இழந்து வருகிறது. நாசா விஞ்ஞானிகள் தகவல்!

சனிக்கோள் தனது அழகிய வளையங்களை இழந்து வருவதாக நாசா விஞ்ஞானிகள் தெரிவித்து உள்ளனர்.

சூரியக்குடும்பத்தில் 6ஆவது கோளாக இருக்கும் சனி, சூரியனிலிருந்து சுமார் 142 கோடி கிலோ மீட்டர் தூரத்தில் அமைந்து உள்ளது. சனிக்கோளின் நடுப் பகுதியை சுற்றி தட்டையாக வளையங்கள் காணப்படுகிறது,

சனிக்கோளுக்கு அழகு சேர்க்கும் இந்த வளையங்கள் பனித் துகள்கள், பாறைத்துகள்கள் மற்றும் தூசிகளால் ஆனவை ஆகும். மற்ற கோள்களில் இல்லாது சனிக்கோளில் மட்டுமே இருக்கும் இந்த வளையங்கள், தற்போது படிப்படி யாக மறைந்து வருவதாக நாசா விஞ்ஞானிகள் கவலை தெரிவித்து உள்ளனர். சனிக்கோளின் வளிமண்டலத்தில் அம்மோனியா படிகங்கள் இருப்பதால் வெளிர் மஞ்சள் நிறம் கொண்டுள்ளது.

சனிக்கோளின் மிகப்பெரிய நிலவான டைட்டான் புதன் கோளை விடவும் பெரியது எனவும் கூறப்படுகிறது. சூரியக்குடும்பத்தில் நீரை விட குறைவான அடர்த்தி உள்ள கோள் சனி மட்டுமே என்பதை அவசியம் குறிப்பிட வேண்டும்.

இந்த நிலையில் சனிக் கோளின் வளையங்களில் தூசிகள் படிந்ததால்தன் பனிக்கட்டிகள் உருகி வருகிறது என்று விஞ்ஞானிகள் தெரிவித்து உள்ளனர்.

மேலும் சனிக்கோளில் இருக்கும் வளையங்கள் அடுத்த 100 மில்லியன் ஆண்டுகளில் முற்றிலும் மறைந்துவிடும் என்றும் நாசா விஞ்ஞானிகள் தகவல் தெரிவித்து உள்ளனர்.

Banner
Banner