இதயம் இயங்குவதற்குத் தேவையான மின் துடிப்புகள் சீராக இல்லை என்றால், அதை சீராக்க, ‘பேஸ் மேக்கர்’ கண்டுபிடிக்கப்பட்டது. அதேபோல, மூளையில் மின் அலைகள் தாறுமாறாக ஏற்பட்டு வலிப்பு வரும் போது, அதை சீராக்க, ‘வாண்ட்’ என்ற கருவியை, கலிபோர்னியா பல்கலைக்கழக விஞ்ஞானிகள் உருவாக்கியுள்ளனர்.

மூளையில், எண்ணங்களை, உணர்வுகளை உருவாக்குவதில் மிக மெல்லிய மின் அலைகள், பெரும் பங்கு வகிக்கின்றன.

இந்த மின் அலைகள் தாறுமாறாகிவிட்டால், நோயாளிக்கு வலிப்பு ஏற்படுகிறது. வலிப்பு தாக்கும்போது, நோயாளிக்கு அருகே மருத்துவர் இருக்க முடிவதில்லை. இந்த சிக்கலை, வாண்ட் கருவி தீர்க்கும் என்கின்றனர் விஞ்ஞானிகள்.

வாண்ட் கருவி, இரண்டு பகுதிகளைக் கொண்டது. மூளை மீது பதிய வைக்கும் உணரிகள் மற்றும் மின் முனைகள், தலையின் வெளிப்பகுதியில் பதிய வைக்கும் வாண்ட் கருவி.

உணர்வான்கள், மூளைக்குள், 128 இடங்களில் ஏற்படும் வலிப்பு அலைகளை துல்லியமாக உணர்ந்து, தலைக்கு வெளியே பதிக்கப்பட்டிருக்கும் வாண்ட் கருவிக்கு அனுப்புகிறது. இதன் மூலம், ஒரு நோயாளிக்கு எந்தவிதமான வலிப்பு வந்துள்ளது என்பதை, துல்லியமாக பதிவு செய்ய முடியும்.

வலிப்பு சமிக்ஞை வரும்போதே, வாண்ட் கருவி, மின் அலைகளை, மூளைக்குள் பதியப்பட்டுள்ள மின் முனைகளுக்கு அனுப்புவதால், நோயாளிக்கு வலிப்பை உடனே நிறுத்திவிட முடியும் என, ஆராய்ச்சியாளர்கள் தெரிவித்துள்ளனர்.

அடுத்த கட்டமாக, நோயாளிக்கு ஏற்ற வகையில் சிகிச்சை தரும் அறிவை, வாண்ட் கருவியிலுள்ள சில்லுக்கு தருவதற்கு, கலிபோர்னியா பல்கலைக்கழக விஞ்ஞானிகள், ஆய்வுகளை நடத்தி வருகின்றனர்.

ஆப்ரிக்காவின் வனப் பகுதிகளில், 15 நிமிடங் களுக்கு ஒரு யானை கொல்லப்படுகிறது. இப்படியே போனால், சில ஆண்டுகளில் அங்கு யானைகளே இல்லாமல் போய்விடும். வன உயிர்களை, வனக் கொள்ளையரிடமிருந்து காப்பாற்ற, ‘ரிசால்வ்’ என்ற தொண்டு அமைப்பு, உயர் தொழில்நுட்பத்தை நாடியிருக்கிறது.

‘இன்டெல்’ தயாரித்துள்ள, ‘மோவிடியஸ்’ என்ற சில்லையும், நவீன செயற்கை நுண்ணறிவு மென் பொருளையும் பயன்படுத்தி, ‘டிரெய்ல் கார்டு’ என்ற கேமரா பட்டை ஒன்றை, ரிசால்வ் அமைப்பு உருவாக்கியுள்ளது.

கேமரா உள்ள இந்த பட்டையை காட்டு மரங்களில், மனித உயரத்தில் கட்டி வைத்துவிட்டால் போதும். மனித நடமாட்டம் இருந்தால், டிரெய்ல் கார்டு படம் பிடித்து, ஆப்ரிக்க வனத்துறை மய்யத்திற்கு, எச்சரிக்கை அனுப்பும்.

இக்கருவியின் விலை குறைவு என்பதால், பல நுறு கருவிகளை எளிதில் பொருத்தி விட முடியும் என்கிறது ரிசால்வ். இக்கருவிக்கு ஓராண்டு வரை தேவையான மின்சாரம், இக்கருவியிலேயே இருக்கும். 2,000 வனக் காவலர்களே உள்ள செரங் கெட்டி விலங்குகள் சரணாலயத்தில், டிரெய்ல் கார்டு கருவிகள் சோதனைக்காக பொருத்தப்பட்டுள்ளன.

விரைவில், ஆசிய வனப் பகுதிகளுக்கும் இக்கருவியை அனுப்ப, ரிசால்வ் திட்டமிட்டுள்ளது.

செடிகள் பச்சையம் தயாரிக்க சூரிய ஒளியை பயன்படுத்தும் விதத்தில், ஒரு குறையை கண்டுபிடித்துள்ளது சர்வதேச விஞ்ஞானிகள் குழு.

அது என்ன குறை? தாவரங்களில், ‘ரூபிஸ்கோ’ என்ற என்சைம் உள்ளது. இந்த என்சைம், ஒளிச்சேர்க்கை நிகழும் போது, கார்பன்டையாக்சைடு மூலக்கூறுகளை ஈர்த்து, பச்சையம் தயாரிக்கிறது.

ஆனால், அவ்வப்போது ஆக்சிஜன் மூலக்கூறுகளையும் ரூபிஸ்கோ ஈர்த்து விடுகிறது. இதனால், தாவரங்களின் உடலில் நச்சுகள் சேர்ந்து விடுகின்றன.

இந்த நச்சை, ஒளி சுவாசம் - போட்டோ ரெஸ்பைரேஷன் என்ற வேதிவினை மூலம், தாவரங்கள் அகற்ற வேண்டியிருக்கிறது.

இந்த வேதிவினைக்காக, ஒரு தாவரம் சேகரிக்கும் ஆற்றலில், கணிசமான ஆற்றல் வீணாகிறது என்கின்றனர் விஞ்ஞானிகள். இந்த ஆற்றல் செடியின் வளர்ச்சிக்கு மடை மாற்றப்பட்டால், செடியின் வளர்ச்சியும், அதன் காய், கனி, பூக்கள் போன்ற விளைச் சலும் கணிசமாக அதிகரிக்கும்.

‘சயின்ஸ்’ இதழில் வெளியாகியுள்ள கட்டு ரையின்படி, விஞ்ஞானிகள், தாவரங்களின் மரபணுவில் எளிய மாற்றத்தை செய்ததன் மூலம், செடிகளின் வளர்ச்சியும், மகசூலும், 40 சதவீதம் வரை அதிகரிக்க முடியும்.

கார்பன் டை ஆக்சைடை மட்டும் ஈர்க்கும் வகையில், மரபணு மாற்றம் செய்யப்பட்ட புகையிலை செடி, மற்றும் சாதாரண புகை யிலை செடிகளை வைத்து, ஆய்வகத்தில் இரண்டு ஆண்டுகள் சோதித்ததில், மரபணு மாற்றப்பட்ட செடி அதிவேகமாக, அதிக இலைகளுடன் வளர்ந்திருப்பதை உறுதி செய்தது, விஞ்ஞானிகள் குழு.

அது மட்டுமல்ல, தாங்கள் உருவாக்கிய செடிக்கு, 25 சதவீதம் குறைவான தண்ணீரே தேவைப்பட்டது எனவும், அவர்கள் கண்டறிந்துள்ளனர்.

விலையுயர்ந்த உரங்களைக் கொட்டாமல், ஒளிச்சேர்க்கை முறையில் மட்டும் திருத்தம் செய்து இந்த வெற்றி கிடைத்துள்ளதால், அடுத்த சில ஆண்டுகளில், வளரும் நாடுகளி லுள்ள சிறு விவசாயிகளுக்கு, இந்த தொழில் நுட்பத்தை கொண்டு சேர்க்க வேண்டும் என, விஞ்ஞானிகள் தீர்மானித்து உள்ளனர்.

Banner
Banner