எழுத்துரு அளவு Larger Font Smaller Font

 

முப்பரிமாண அச்சுத் துறையில் தொடர்ந்து பல புதுமைகள் வந்துகொண்டே இருக்கின்றன.

‘வால்யுமெட்ரிக்’ முப்பரிமான அச்சு  முறை மூலம் சில நொடிகளில், ஒரு முழு முப்பரிமாணப் பொருளை அச்சிட முடியும். வழக்கமான முப்பரிமாண அச்சு இயந்திரங்கள், ஒரு பொருளை அடுக்கடுக்காகவே அச்சிடும். இதற்கு அச்சிடும் பொருளின் சிக்கலைப் பொறுத்து சில மணி நேரங்கள் முதல் ஓரிரு நாட்கள்கூட ஆகும்.

ஆனால், வால்யுமெட்ரிக், 3டி பிரின்டிங் இயந்திரம், ஒரு பொருளை சில நொடிகளில் முழுமையாக அச்சிட்டுக் கொடுத்துவிடும். முப்பரிமாண உருவத்தை லேசர் ஒளிக்கதிர் மூலம் உருவாக்கும்,

‘ஹோலோகிராம்‘ தொழில்நுட்பம்தான் இந்த வேகமான அச்சுக்குக் காரணம். ஒரு தொட்டியில் திரவ பிசினை ஊற்றி, அதன் மீது லேசர் ஹோலோகிராமை விஞ்ஞானிகள் செலுத்துகின்றனர்.

திரவத்தினுள் குறிப்பிட்ட தொலைவு செல்லும் லேசர் குவியமடைந்து, குறிப்பிட்ட புள்ளியை பொசுக்கி, திரவத்தை அந்த இடத்தில் கெட்டியான திடப் பொருளாக்குகிறது.

இதே பாணியில், உருவாக்கப்பட வேண்டிய பொருளின் முழு ஹோலோகிராம் உருவமும் திரவத்தினுள் பாய்ந்து பொசுக்குவதால், சில நொடிகளுள், அச்சிடப்படவேண்டிய பொருள், பிசின் திரவத்தில் உருவாக்கப்பட்டுவிடும்.

அமெரிக்காவிலுள்ள மாசாசூசெட்ஸ் தொழில்நுட்ப நிலையம், கலிபோர்னிய பல்கலைக் கழகம் உள்ளிட்ட பல அமைப்புகளின் விஞ்ஞானிகள் கூட்டாக வால்யுமெட்ரிக் முப்பரிமாண அச்சு முறையை உருவாக்கி சாதனை படைத்துள்ளனர்.

இந்த முறையில், எவ்வளவு சிக்கலான அமைப்பைக் கொண்ட பொருளையும், சில நொடிகளில் அச்சிட்டு எடுக்கலாம் என, அவர்கள் தெரிவித்துள்ளனர்.

மூளை வளர்ச்சியை
பாதிக்கும் காற்று மாசு!

பிறந்த குழந்தையின் மூளை வளர்ச்சியை பாதிக்கும் அளவுக்கு உலகெங்கும் காற்றில் இருக்கும் மாசுகளின் அளவு அபாயகரமாக அதிகரித்திருப்பதாக, ‘யுனிசெப்’ எச்சரித்துள்ளது.

சர்வதேச உச்சவரம்புக்கு அதிகமான அசுத்தங்கள் காற்றில் இருக்கும் பகுதிகளில், வசிக்க நேரிடும், 1.7 கோடி குழந்தைகள் பாதிக்கப்படுவர் என யுனிசெப் கவலை தெரிவித்து இருக்கிறது. வாகனப் புகை, ஆலைப் புகை, புழுதி போன்றவை நுண்ணிய திவலைகளாக மாறி, காற்றில் பரவுகின்றன. இந்தத் திவலைகளை ஒரு வயதுக்குட்பட்ட குழந்தைகள் சுவாசிக்கும்போது, அவர்களது மூளைத் திசுக்களை சேதமாக்குகிறது.

இதனால், அக்குழந்தைகளது அறிவுத் திறனும் பாதிக்கப்படுகிறது என ‘காற்றில் உள்ள பேராபத்து’ என்ற உலக நாடுகளுக்கான யுனிசெப் அறிக்கை தெரிவிக்கிறது. இந்த இரு பாதிப்புகளும், குழந்தைகளுக்கு, வாழ்நாள் முழுவதும் பின்னடைவுகளை ஏற்படுத்த வல்லவை எனவும், அந்த அறிக்கை சொல்கிறது. தெற்கு ஆசியா, கிழக்கு ஆசியா மற்றும் பசிபிக் ஆகிய பகுதிகளில் இருக்கும் நாடுகளின் குழந்தைகள் கூடுதல் ஆபத்தில் உள்ளனர்.

பிளாஸ்டிக் கழிவாக
மாறும் கடல்  

உலகின் கடல்கள் அனைத்திலும், பிளாஸ்டிக் கழிவுகள் கொட்டப்படுவது வெகுவாக அதிகரித் திருக்கிறது.

இதனால், கடல் ஆமைகள், பல வகை மீன்கள் மற்றும் கடல் பறவைகளுக்கு பலவித நோய்களும் உடல் குறைபாடுகளும் ஏற்படுவதாக அய்.நா.,வின் கடல் பிரிவுத் தலைவர், லிசா ஸ்வென்சன் அண்மையில் கவலை தெரிவித்துள்ளார்.

கடல் பகுதிகளில் பிளாஸ்டிக் கழிவுகள் கொட் டப்படுவதை தடுக்க, உலக நாடுகள் சட்டங்களை இயற்ற வைப்பதும் ஆமை வேகத்திலேயே நகர்வது, இந்த சுற்றுச்சூழல் பிரச்சினையை பெரிதாக்கி வருகிறது.

மேற்கு பசிபிக் கடலில் அமெரிக்காவுக்கு சொந்தமான, குவாம் தீவுப் பகுதியில்தான் உலகின் மிக ஆழமான கடல் பகுதி உள்ளது.

அந்தப் பகுதியிலேயே கூட, பிளாஸ்டிக் குப்பைகள் மண்டிக் கிடப்பதாக, சுற்றுச் சூழல் வல்லுநர்கள் தெரிவித்துள்ளனர்.

உடை வடிவில் ஒரு பேட்டரி!  


மனித வியர்வையில் இருக்கும் பாக்டீரியாக்கள் மூலம் மின்சாரம் தயாரிக்க முடியும் என்று நிரூபித்திருக்கிறார் அமெரிக்காவிலுள்ள பர்மிங்ஹாம்டன் பல்கலை ஆராய்ச்சியாளர், சியோகியுன் சோய்.

இவர் ஏற்கெனவே உருவாக்கிய நுண்ணுயிரி எரிபொருள் கலன் தொழில்நுட்பம், பாக்டீரியாக்களால் முடுக்கப்படும் வேதியியல் மாற்றம் மூலம் மின் உற்பத்தியை செய்யக்கூடியது.

இப்போது அதே தொழில்நுட்பத்தை நூலிழைகள் வடிவில் உடையாக நெய்து காட்டியிருக்கிறார். இந்த உடையை அணி பவரின் வியர்வையில் உள்ள பாக்டீரியாக்கள், அந்த உடையி லுள்ள, நுண்ணுயிரி எரிபொருள் கலனில் மின் உற்பத்தியை தூண்டும். அதாவது உடை வடிவிலான பேட்டரி இது!

ஒரு உடையில், 35 உயிரி பேட்டரிகளை வைத்துத் தைக்க முடியும் என்கிறார் சோய். இதனால், இந்த வகை மின்சார பேட்டரி உடையை, நெசவு ஆலைகளில் பெரிய அளவில் தயாரிக்க முடியும் என்றும் சோய் தெரிவித்துள்ளார்.

புதிய சூரியக் குடும்பம்

பூமி உட்பட எட்டுக் கோள்களைக் கொண்ட சூரியக் குடும்பத்துக்கு இணையான புதிய சூரியக் குடும்பத்தை முதன்முறையாக கெப்ளர் விண்வெளி தொலைநோக்கி மூலமாக நாசா கண்டறிந்துள்ளது.

டிசம்பர் 14 அன்று, கெப்ளர்-90 நட்சத்திரம் என்று இதற்குப் பெயர்சூட்டி அறிவித்தது நாசா. இது பூமியி லிருந்து 2,545 ஒளி ஆண்டுகள் தொலைவில் உள்ளது.

கூகுள் நிறுவனத்தின் செயற்கை நுண்ணறிவு தொழில்நுட்பத்தைப் பயன்படுத்தி கெப்ளர் 90 கண்டுபிடிக்கப்பட்டுள்ளது.
நம்முடைய சூரியக் குடும்பத்தின் சிறிய வடிவம் கெப்ளர்-90 நட்சத்திரக் குடும்பம் எனலாம்.

ஏனென்றால், இதிலும் சிறிய கோள்கள் உள்வட்டத்திலும் பெரிய கோள்கள் வெளிவட்டத்திலும் உள்ளன. ஆனால், அத்தனை கோள்களும் ஒன்றுக் கொன்று நெருக்கமாக இருக்கின்றன என்றார் டெக்சாஸ் பல்கலைக்கழகத்தின் வானியல் பேராசிரி யரும் நாசா விஞ்ஞானியுமான ஆண்ட்ரூ வாண் டர்பர்க்.

வலியில்லாமல் உடலில் மருந்தை செலுத்தும் ஊசி

ஊசி போட்டுக்கொள்வதை வெறுப்பவர்களுக்கு இது ஒரு நற்செய்தி. ஊசி ஏதும் இல்லாமல், மருந்துகளை உடலுக் குள் செலுத்த பல ஆராய்ச்சிகள் நடக்கின்றன. அவற்றில் ஒன்று, அடுத்த ஆண்டு சந்தைக்கு வரலாம். ஜப்பானிய மருந்து நிறுவனமான, டகேடா, ‘பிரைம்‘ என்ற வலியில்லாமல் மருந்தை செலுத்தும் முறையை சந்தைப்படுத்த இருக்கிறது.

இந்த புதிய முறைப்படி, மருந்தினை ஒரு சிறப்பு குப்பியில் அடைத்து, மின்சார சவரக் கருவி போல இருக்கும், பிரைம் கருவியில் பொருத்தவேண்டும்.

அடுத்து பிரைம் கருவியை நோயாளியின் உடல் மீது வைத்து பொத்தானை அழுத்தியதும், மணிக்கு 200 மீட்டர் வேகத்தில் தோல் அடுக்கைத் தாண்டி, தசைத் திசுவைத் தாண்டி ரத்த நாளத்திற்குள் மருந்து சென்று விடுகிறது. திரவம் செல்லும் அகலம் தலைமுடியைவிடக் குறைவுதான். அரை வினாடிக்குள், ஒரு மில்லி மருந்தை, உடலில் செலுத்த முடியும். கூர்மையான ஊசி மூலம் மருந்தை செலுத்த, 10-15 வினாடிகள் ஆகலாம். ஆனால் பிரைம் கருவி மருந்தை துளியும்

வலியில்லாமல் உடனே செலுத்தி விடுகிறது.

அமெரிக்காவிலுள்ள எம்.அய்.டி., ஆராய்ச்சி நிலையம் பிரைம் மருந்து செலுத்தும் கருவியை பல ஆண்டுகள் ஆராய்ச்சிக்குப் பின் உருவாக்கி, ஜப்பானிய டகேடாவிடம் விற்பனைக்குக் கொடுத்துள்ளது.

தினமும், ‘இன்சுலின்’ போடவேண்டிய நீரிழிவு நோயாளிகள் முதல், தடுப்பூசி போட மறுக்கும் சிறுவர்கள் வரை, பலருக்கும் இந்த வலியில்லா ஊசி பிடிக்கும்.



.
 

இப்பிரிவில் அண்மைச் செய்திகள்:
இப்பிரிவில் முந்தையச் செய்திகள்:

தமிழில் கருத்துக்களை தெரிவிக்க -  


Security code
Refresh

Banner
Banner