எழுத்துரு அளவு Larger Font Smaller Font

சமீபத்தில் ரஷ்யாவில் நடந்த, உலக அளவிலான பள்ளிகளுக்கு இடையேயான (செஸ்)சதுரங்கப் போட்டி நடைபெற்றது. அதில் வாகையர் பட்டத்தைத் தட்டி வந்திருக்கிறார் தமிழ்நாட்டைச் சேர்ந்த மாணவி ஹர்ஷினி. சென்னை, முகப்பேர் வேலம்மாள் மெட்ரிக் பள்ளியில் பத்தாம் வகுப்பு படித்து வருகிறார். அவர் கூறுகையில்,

“திருவாரூர் மாவட்டம் திருத்துறைப்பூண்டிதான் எனது சொந்த ஊர், அங்கேதான் பிறந்து வளர்ந்தேன். சின்ன வயதிலிருந்தே செஸ் விளையாட்டு எனக்கு மிகவும் பிடிக்கும். வீட்டில்  எப்போதும் செஸ் விளையாடுவேன்.

அதைப்பார்த்து அப்பா என்னை செஸ் கிளாஸில் சேர்த்துவிட்டார்.  கொஞ்சம் கற்றுக் கொண்ட பிறகு ஒரு செஸ் போட்டி பற்றி கேள்விப்பட்டு அப்பா அங்கே என்னை கூட்டிட்டு போனார். அங்கே நான் வெற்றி பெற வில்லை. நான் தோல்வியைக் கண்டு துவண்டுவிடக்கூடாது என்பதற்காக அங்கு திருவாரூர் மாவட்ட செயலாளராக இருந்த பால குணசேகரன் என்பவர் எனக்கு ஒரு பரிசு கொடுத்தார். அது என் மனதில் ஆர்வத்தை அதிகப் படுத்தியது. அதன்பிறகுதான் கோச்சிங்  கிளாஸுக்கு ஆர்வத்துடன் போக ஆரம்பித்தேன். அங்கே விளை யாட்டில் நிறைய நுணுக்கங்களை கற்றுக்கொண்டேன்.

2010ஆம் ஆண்டு ஆசிய அளவில் நடந்த பள்ளி களுக்கான சதுரங்கப்போட்டி இலங்கையில் நடந்தது. அதில் மூன்றாவது இடத்தைப் பிடித்து வெண்கலப் பதக்கம் வாங்கினேன். அதுவரை திருத்துறைப்பூண்டியில்தான் இருந்தோம். செஸ்ஸில் பேஸிக் கோச்சிங் முடித்த பிறகு மேற்கொண்டு  கோச்சிங்கை சென்னையில் கற்றுக் கொண்டால் நன்றாக இருக்கும் என்று நினைத்தோம். அதுமட்டுமில்லாமல் பெரும்பாலும் போட்டிகளுக்காக சென்னைக்கு வந்து போக வேண்டி இருந்தது. அதனால் 2013-ஆம் ஆண்டு சென்னைக்குக் குடிபெயர்ந்தோம்.

அப்பா அரவிந்தன் பிசினஸ்மேன் என்பதால்  சென் னைக்கும், திருத்துறைப்பூண்டிக்கும் மாறி மாறி பயணம் செய்து கொண்டிருக்கிறார். சென்னையில் செஸ் குருக்கள் அகாடமியில் பயின்று வருகிறேன். ஆர்.பி. ரமேஷ் தான் எனது குரு. சென்னை வந்த பிறகு நூற்றுக்கும் மேற்பட்ட போட்டிகளில் விளையாடி இருப்பேன். பல போட்டிகளில் வெற்றியும் பெற்றேன். பிறகு, 2016-ஆம் ஆண்டு மாநில அளவில் மகளிருக்கான போட்டி நடைபெற்றது. இதில் எல்லா வயது பெண்களும் கலந்து கொள்ளலாம். அதிலும் நான் முதலாவதாக வந்தேன்.

2016-ஆம் ஆண்டு ஜனவரி மாதம் தேசிய அளவில் பள்ளிகளுக்காக நடைபெற்ற போட்டியில் இந்திய அளவில் முதலாவதாக வந்தேன். அதனால் உலகளவில் நடைபெற இருந்த போட்டிக்குத் தேர்வானேன். அதற்காக இந்த வருடம் முழுவதும் தயார் செய்ய வேண்டி இருந்தது.  அதனால் பள்ளிக்கு அவ்வளவாக செல்ல முடியவில்லை. நான் இப்போது பத்தாம் வகுப்பு படிக்கிறேன். பத்தாம் வகுப்பு பொதுத்தேர்வு என்பதால் எப்போதும் எல்லா பள்ளிகளிலுமே பத்தாம் வகுப்பு பாடங்களில் தீவிரப் பயிற்சி இருக்கும். ஆனால் நான் இந்த உலகளாவியப் போட்டியில் ஜெயிப்பதற்காக எனக்குப் பயிற்சிக்குத் தேவையான விடுமுறையை எனது பள்ளி நிர்வாகம் அளித்து உதவியது. பாடத்தை நான் புரிந்து கொள்ள, எழுத என எல்லா விஷயத்திலும் எனது ஆசிரியர்களும், எனது வகுப்பு மாணவிகளும் எனக்கு உறுதுணையாக இருந்து வருகின்றனர். மேலும் பள்ளியிலுள்ள செஸ் கோச் வேல வன் அவர்களும் உதவியாக இருந்தார். அனைவருக்கும் இத்தருணத்தில் நன்றி சொல்லிக் கொள்கிறேன்.

நான் எந்த போட்டிக்காக தயார் செய்து வந்தேனோ அந்தப் போட்டி 2016 டிசம்பர் மாத இறுதியில் ரஷ்யாவில் நடைபெற்றது.

அதில் துருக்கி, உஸ்பெகிஸ்தான் போன்ற நாட்டைச் சேர்ந்தவர்களுடன் விளையாடி வெற்றிபெற்று, இறுதிப் போட்டியில் ரஷ்ய வீராங்கனையைத் தோற்கடித்து வாகையர் பட்டம் பெற்றேன். எனக்கு தங்கப் பதக் கத்துடன்  அவார்டும் கொடுத்தார்கள். ரொம்ப சந்தோஷ மாகவும் பெருமையாகவும் இருந்தது’’ என்றார்.

தமிழில் கருத்துக்களை தெரிவிக்க -  


Security code
Refresh

Banner
Banner