எழுத்துரு அளவு Larger Font Smaller Font


ஜப்பான், பிரான்சு, ஜெர்மனி ஆகிய வல்லரசுகள் உட்பட மொத்தம் 43 நாடுகளின் பிரதிநிதிகளை தன்னை நோக்கி ஈர்த்திருக் கிறது தமிழகத்தின் ஓடந்துறை கிராமம்.

ஓடந்துறை கிராமப் பஞ்சாயத்து கோவை மாவட்டம், கோத்தகிரி மலையடிவாரத்தில் பவானி ஆற்றை ஒட்டி அமைந்திருக்கிறது. வாழைத் தோட்டங்களும் பாக்குத் தோப்பு களும் நிறைந்த பசுமையான பூமி. பெரும் பாலானோர் நகரத்தின் வாடையே அறியாத மலைவாழ் மக்கள். கடந்த அய்ந்தாண்டுகளில் இவர்களது கிராம பஞ்சாயத்து செலுத்தி யிருக்கும் மின் கட்டணம் சுமார் 1.20 கோடி ரூபாய் என்கிறார்கள்! இதில் அதிசயமான விஷயம் இந்த பஞ்சாயத்தின் சார்பாக ஆண்டுக்கு 6.75 லட்சம் யூனிட் வீதம் கடந்த 10 ஆண்டுகளில் சுமார் 67.50 லட்சம் யூனிட் மின்சாரத்தை உற்பத்தி செய்திருக்கிறார்கள். அதில் ஆண்டுக்கு 2.15 லட்சம் யூனிட் வீதம் கடந்த 10 ஆண்டுகளில் 21.5 லட்சம் யூனிட் மின்சாரத்தை தமிழ்நாடு மின்வாரியத்துக்கு விற்பனை செய்திருக்கிறார்கள். அதன் மூலம் சுமார் ரூ. 65 லட்சம் வருவாய் கிடைத்திருக் கிறது. இப்போதும் இது தொடர்கிறது. இதில் சிறப்பு என்னவென்றால், அந்த ஊரில் மின் உற்பத்தி நிலையம் என்று எதுவும் இல்லை.

1996 தொடங்கி 2006 வரைக்கும் ஓடந் துறை பஞ்சாயத்து பொதுப் பஞ்சாயத்தாக இருந்திருக்கிறது. ஓடந்துறை கிராமத்தின் பஞ்சாயத்து தலைவர் 1996 முதல் 2006 வரை முதல் பத்து ஆண்டுகள் சண்முகம். 2006-இல் அந்த பஞ்சாயத்தை பெண்களுக்காக ஒதுக் கியதும், சண்முகம் ஒதுங்கிக் கொள்ள, அவரது மனைவியான லிங்கம்மாளை தலைவியாக தேர்ந்தெடுத்திருக்கின்றனர் கிராம மக்கள். கடந்த பத்து ஆண்டுகளாக பஞ்சாயத்து தலை வராக தொடர்பவர் லிங்கம்மாள் சண்முகம்.

கணவன், மனைவி இருவருமாக இந்த கிராமத்தில் செய்திருக்கும் புதுமைகள், சாதனைகள் பலரையும் இந்த கிராமத்திற்கு வரவழைத்திருக்கின்றன. ஒரு கிராமப் பஞ்சாயத்து தனது வரிகளை நூறு சதவீதம் வசூலித்தால் தமிழக அரசு அதற்கு இணையாக மூன்று மடங்கு ஊக்கத் தொகை வழங்குகிறது. இந்த சலுகைகள் குறித்து, ஊர் மக்களிடம் பேசி இருக்கிறார் லிங்கம்மாள். அரசுக்கு முழுமையாக வரி செலுத்த வேண் டிய அவசியத்தை விளக்கி இருக்கிறார்கள். சிறப்பு முகாம்கள் நடத்தி வீட்டு வரி, கடை வரி, குடிநீர் வரி, தொழில் வரி, வரைபட அங்கீகாரக் கட்டணம் என்று நூறு சதவீதம் வரியை வசூலித்தார். ரூ.20 ஆயிரமாக இருந்த வரி வருவாய் ரூ.1.75 லட்சமாக உயர்ந்தது. அதற்கு ஈடாக மும்மடங்கு ஊக்கத் தொகை யாக தமிழக அரசு ரூ.5.25 லட்சம் கொடுத் திருக்கிறது. மறு ஆண்டு 3.5 லட்சம் வரி வசூலித்தார். அதே போன்று, தமிழக அரசிட மிருந்து ஈடாக 10.5 லட்சம் ஊக்கத் தொகை பெற்றார். சரி, இந்தத் தொகையை எல்லாம் என்ன செய்கிறார்கள்?

லிங்கம்மாள் சொல்கிறார்:

“எங்க கிராமத்துல யாரும் வெளியே வட் டிக்கு கடன் வாங்குறதில்லைங்க. கிராமத்துல இருக்குற ஒவ்வொரு வாக்காளருக்கும் கிராமப் பஞ்சாயத்தே கடன் வழங்குது. ஒரு ரூபா வட்டிங்க. கடன் பெறுவதற்கு ரெண்டு தகுதி வேணுமுங்க. தகுந்த காரணம் இருக் கோணும். பழைய பாக்கி இருக்கக் கூடாது. மருத்துவச் செலவு, பிரசவ செலவு, கல்விக் கட்டணம், சிறு கடை வைக்க கடன் தர்றோ முங்க. கல்யாணம், காது குத்து, நல்லது, கெட்டதுகளுக்கும் கடன் உண்டுங்க. ஆயிரம் ரூபாய் தொடங்கி 50 ஆயிரம் ரூபாய் வரைக்கும் கொடுத்திருக்கோம்‘’ என்கிறார். கொடுக்கும் தொகைக்கு எழுதி வாங்குவது கிடையாது. சரியான காரணமாக இருந்தால் உடனே பணம் தருகிறார்கள். பதிவேட்டில் தவணைத் தொகை வரவு வைக்கப்படுகிறது.

கடந்த 10 ஆண்டுகளாக நடந்துவரும் இந்தத் திட்டத்தில் திரும்ப வராதகடன் என்கிற பேச்சுக்கே இதுவரை இடம் இல்லை. இங்கிருக்கும் பழங்குடியினர் காலம் காலமாக தனியார் தோட்டங்களில் கொத்தடிமைகள் போல இருந்திருக்கிறார்கள். அவர்களுக்கென நிரந்தர வசிப்பிடம் கிடையாது. அவர்களுக்கு தனியார் தோட்ட முதலாளிகளிடம் போராடி நிலத்தைப் பெற்று வீடுகள் கட்டிக் கொடுத் திருக்கிறார் லிங்கம்மாள். “கிராமத்துல இருக் கிற மொத்தப் பேருக்குமே சொந்த வீடு இருக்கு. அதுல பாதி வீடுகள் சர்க்கார் வீடுங்க. வாடகை வீடுங்கிற கலாச்சாரமே இங்கே கிடையாதுங்க.’’

இத்தோடு நிற்கவில்லை சாதனைகள். இந்த கிராமத்தில் நூறு சதவீதம் மாணவர்களும் கல்வி பெறுகிறார்கள். இடை நின்ற மாணவர் ஒருவர் கூட கிடையாது. மின்சாரத்தை மிச்சப் படுத்தும் சோலார் தெருவிளக்குகள், எல்.இ.டி. விளக்குகள் ஜொலிக்கின்றன. ஒவ்வொரு வீட்டுக்கும் சுத்திகரிக்கப் பட்ட குடிநீர் கிடைக் கிறது. தெருக்கள் தூய்மையாகப் பளிச்சிடு கின்றன. இதற்காக மத்திய, மாநில மற்றும் உலக நாடுகள் அளித்திருக்கும் விருதுகள் கிராமப் பஞ்சாயத்து அலுவலகத்தை அலங்கரிக்கின்றன. வாசிங்டனிலிருந்து உலக வங்கி இயக்குநர் தலைமையிலான குழு ஒன்று ஓடந்துறையை ஆய்வு செய்திருக்கிறது. ஜெர்மனி, ஜப்பான், பிரான்சு ஆகிய வளர்ந்த நாடுகளின் உள் ளாட்சிப் பிரதிநிதிகள் கூட இங்கே நேரில் வந்து பல விசயங்களை பார்த்துச் சென்றிருக் கிறார்கள். மின்சார உற் பத்தி மற்றும் தொகுப்பு வீடுகளை பார்வையிட்ட ஆப் பிரிக்க நாடுகளின் அமைச் சர்கள் தங்கள் நாட்டில் இதுபோன்ற திட்டங் களை அறிமுகப்படுத்தி இருக்கிறார்கள். சிக்கிம், கேரளம், கருநாடகம் ஆகிய மாநிலங்களின் அரசு செயலர்கள் கூட ஓடந்துறையை வந்து பார்வையிட்டுச் சென்றி ருக்கிறார்கள். சென்னை அண்ணா மேலாண்மையகத்தில் பேரூராட்சி தலைவர்கள் மாநாட்டில் உரையாற்றியிருக் கிறார் கிராமப் பஞ்சாயத்து தலைவர் லிங் கம்மாள்.

இயற்கை உரத்தில் காய்கறி விளைவிக்கும் பெண்

இப்போதெல்லாம் காய்கறி களைப் பச்சையாகச் சாப்பிட யோசிக்க வேண்டியிருக்கிறது. அவற்றின் மீது என்னென்ன பூச்சிக்கொல்லிகளைத் தெளித் திருப்பார்களோ ரசாயன உரங் களைப் பயன்படுத்தி யிருப்பார் களோ என்ற அச்சம்தான் அதற்குக் காரணம். எங்களுக்கு அப்படி எந்த பயமும் இல்லை என்று சொல்லும் சசிகலா, மண் புழு உரத்தைத் தயாரித்து அதைத் தன் தோட்டத்துப் பயிர் களுக்கு இடுகிறார்.

சசிகலா, சேலம் மாவட்டம் அழகா புரத்தைச் சேர்ந்தவர். ஒரு ஏக்கர் நிலத்தில் தொட்டிகள் அமைத்து அவற்றில் மண்புழுக்களை வளர்த்து மண்புழு உரம் தயாரித்து வருகிறார். எனக்குச் சிறு வயதிலிருந்தே தோட்டக்கலையில் ஆர்வம் அதிகம். வீட்டைச் சுற்றி விழும் காய்ந்த சருகுகளையும் காய்கறிக் கழிவையும் செடிகளுக்கு உரமாகப் போடுவேன். இயற்கை உரங்களைப் பயன்படுத்திய தால் அவற்றிலிருந்து கிடைக்கும் பழங்களும் காய்கறி களும் சுவையாக இருக்கும். ரசாயன உரங்களைப் பயன்படுத்தி விளைவிக்கப் படும் காய்கறிகளில் அந்த அளவுக்குச் சுவை இருப் பதில்லை. அதனால் நாங்கள் ரசாயன பூச்சிக் கொல்லிகளையோ ரசாயன உரங்களையோ பயன் படுத்துவதில்லை என்று சொல்கிறார் சசிகலா.

பாராட்டு கொடுத்த வளர்ச்சி

அரசு சார்பில் நடத்தப்பட்ட மண்புழு உரம் தயாரிப்பது குறித்த முகாம், சசி கலாவை அடுத்த கட்டத்துக்கு நகர்த்தியது. முகா மில் பங்கேற்ற சசிகலா, அங்கு கொடுக்கப்பட்ட மண்புழுக்களை வாங்கிவந்து மண் தொட்டிகளில் வளர்த்தார். தொட்டிகளில் கிடைத்த மண் புழு உரம் பார்ப் பதற்குச் சீரகம் போல் இருந்தது. அதை எங்க வீட்டுக் காய்கறிச் செடிகளுக்குப் போட்டோம். பக்கத்துல இருக் கிறவங்களுக் கும் கொடுத்தோம். மண்புழு உரத்தைப் பயன் படுத்தினதால காய்கறிகள் சுவையா இருக் குன்னு அவங்க எல்லாம் பாராட் டினாங்க என்று சொல்லும் சசிகலா, அதன் பிறகு தனக்குச் சொந்தமான ஒரு ஏக்கர் நிலத்தில் தொட் டிகள் அமைத்து சிறு பண்ணையைத் தொடங்கினார்.

மண்புழுவுக்கு மாட்டுச் சாணம்தான் பிடித்த உணவு என்பதால் அதை மட்டுமே கொடுப்பேன். மண்புழுவைத் தொட்டிகளில் விடுவதற்கு முன் மாட்டுச் சாணத்தை மண்ணுடன் கலந்து அதில் போதிய அளவு தண்ணீர் கலக்க வேண்டும். சாணத் தில் உள்ள உஷ்ணம் குறைந்ததும் மண்புழுக்களை அதில் விட வேண்டும். சாணத்தில் தண்ணீர் விட்டதுமே மண்புழுவை விட்டால் உஷ்ணம் தாங்காமல் அவை இறந்துபோகக்கூடும்.

நிலத்தில் மண்புழுக்களை வளர்த்தால் அவற் றைச் சிறு பூச்சிகள் தின்றுவிடும். அதனால் தொட்டிகளில் வளர்ப்பதே சிறந்தது. மண்புழுவைத் தொட்டிகளில் விட்டு நல்ல உணவு கொடுத்து சுமார் 45 நாட்கள் கழித்து மண்புழுக்களின் கழிவு நமக்கு உரமாகக் கிடைக்கும் என்கிறார் சசிகலா.

இந்தியாவில் பெண்கள் நிர்வகிக்கும் முதல் ரயில் நிலையம்!

பெண்களால் நிர்வகிக்கப்படும் காவல் நிலை யங்கள் பல இந்தியாவில் உள்ளன. பெண்களால் நிர்வகிக்கப்படும் பள்ளிகள், கல்லூரிகளும் அநேகம் இருக்கின்றன. ஆனால் முழுக்க முழுக்க பெண்களால் நிர்வகிக்கப்படும் ரயில் நிலையம் ஒன்று கூட இந்தியாவில் கிடையாது. அந்தக் குறையைப் போக்க இந்திய ரயில்வேத் துறை, ஜெய்ப்பூர் நகரில் இயங்கும் துணை ரயில் நிலையமான “காந்தி நகர்’ ரயில் நிலை யத்தை முழுக்க முழுக்க பெண்களின் நிர்வாகத்தின் கீழ் கொண்டு வந்திருக்கிறது. காந்திநகர் ரயில் நிலையம் இந்தியாவில் பெண்களால் நிர்வகிக்கப்படும் முதல் ரயில் நிலையம் என்ற பெருமையும் பெற் றுள்ளது. இங்கே ஸ்டேஷன் மாஸ்டரிலிருந்து கடைநிலை ஊழியர் வரை பெண்கள்தான். நாற்பது ஊழியர்கள் இந்த ரயில் நிலையத்தில் பணிபுரி கிறார்கள். பெண்களுக்கு மாதாந்திர அசவுகரியத்தைப் போக்க நாப்கின்களை வழங்கும் மெசின் ஒன் றையும் இந்த நிலையத்தில் நிறுவியுள்ளனர். ஏதோ தினமும் ஒன்றிரண்டு வண்டிகள் போகும். அதனால் தான் காந்திநகர் ரயில் நிலையத்தைப் பெண்களைக் கொண்டு நிர்வாகம் செய்யச் சொல்லியிருக்கிறார்கள் என்று நினைத்துவிட வேண்டாம். தினமும் அய்ம்பது ரயில் வண்டிகள் போய் வருவதால் இந்த ரயில் நிலையம் எப்போதும் பிசியாக இருக்கும்.

தமிழில் கருத்துக்களை தெரிவிக்க -  


Security code
Refresh

Banner
Banner